5
اليوم راح احجيلكم على الرحله الطويله اللي هيه يوم السفر.... طبعا السفر كان بليل رحت المطار الساعه 9 مساءا مع اهلي وطبعا اكو ويايه بعد اربع عوائل عراقيه تعرفنا عليهم بالكويت ولما وصلنا شفت كل الناس اللي قدمت ويانا على ال يو ان جايه تودع والله منظر روعه والكل تندعي من الله الفرج... الامور كانت سهله في المطار وطبعا اكو ناي من ال IOM كانت بالمطار تنتظرنا والحمد الله تسهلت الامور وبدت الرحله طبعا اول ترانزيت كان المانيا ظلينا بالمطار حوالي 13 ساعه ادري راح تكولون اووووف هوايه بس اللي انتظر سنين ينتطر ال 13 ساعه والمطار كان مليان عراقيين كم كل مكان طالعين عن طريق ال يو ان وطبعا بدت السوالف والحش وما حسينه بالوقت... اهم شي انه لما توصل اي مطار اذا ما شفت احد من ال IOM ينتطرك على طول روح الى البوابه اللي رحلتك منهه لان احنا صار ويانه هذا الموقف فاقترحت على الكل انه نروح للبوابه لان قسم منهم كانوا يريدون يرحون يدورون على IOM وطبعا هذا غلط لان ممكن يضيعون المهم رحنا البوابه وكعدنا ننتطر هناك وبعد 3 ساعات شرف ابو ال IOM يمكن جان نايم ههههههه المهم جيك اوراقنا وكال انتظروا الطياره... طبعا المانيا كلش غاليه يعني اشتريت بطل مي ب 6 $ ملاحظه نسيت اذكرها انه ال يو ان ينطون 100$ لكل شخص بالمطار يعني مصرف جيب الى ان توصل.
وبعدين من المانيا طرنا الى شيكاغو وصلنا المطار وعلى طول اكو شخص اول ما شاف ال IOM الجيس اللي شايلي سالنا اذا احنا عراقيين وطلع هو من ال IOM وعنده اسمائنا كلنا ورحنا الى الجمارك وما طولنا يمكن 10 دقائق واخذونا ال IOM الى الفندق وهمه كانوا دافعين مصاريف الفندق لمدة يوم واحد حتى منظل بالمطار وصلنا الفندق وجابولنا عشاء واللي سبح واللي نام من التعب بس محد بينا طلع لآن شيكاغو شويه مو امان خاصه بليل.. وثاني يوم اجانا ابو ال يو ان واخذنا الى المطار وكل عائله بينا اتجهت الى البوابه للمدينه اللي رايحيلهه ودعنا بعضنا وكل واحد وصل للمدينه مالته وضلينا على اتصال قسم بيهم كلش مرتاحين وقسم كلش مو راضين عن الحال. وطبعا كلنا نساعد بعض يعني اذا واحد بينا شاف شغل رائسا يخابر الثاني ويقوله والله كريم . اتمنى اني ما طولت عليكم.
عرض المشاركات
