30
سلام عليكم يا احلى الاولاد
مشتاق الكم وقلق على كل واحد منكم ينتظر
صباح العافيه عليكم وليداتي
تدرون واني ابكل وقت انشغالي اسال روحي افلان سافر لو بعده
اجم مره ردت ادخل واسلم عليكم دائما يطلعلي اكو خطا ابكلمة السر ..وره ما مليت سويت اشتراك جديد باسم ابو البشات بدل مو ابو بشات ..اليوم راح اسهر للصبح اقره اخباركم
والله مشتاقلكم وليداتي
بس الوكت والضروف احيانا اكبر من رغبة الانسان..والله لكيت بيكم عائله واهل ووطن بس يل وليداتي امريكا اتريد حيل وشغل ..ما اكول ماكو وكت بس ابهاي الفتره صارت عندي ضروف صار بيهه المزاج والوكت ينرادلهم وكت
سالفتنه وليداتي اليوم عن الحريه الشخصيه بامريكا..عن مو المريه اول ما شافتني وابتسمت يعني حبتني حشاكم اهواي اكو ناس هيج وبعدين مو كل وحدة لابسه ملابس مو مستورة من وجهة نظر تقاليدنه لازم بيهه انّه ..والاهم احترام الشغل والتفريق بين وكت الشغل والونسه
لان اذا ما صار احترامنا للشغل اكبر من رغبتنهه بالونسه راح اتصير مشاكلنه جبيره مثل عبيس برازيلي
وبعدين ابنفس سالفة عبيس برازيلي الجايه راح انشوف قضية المخدرات عند اللاجئيين
وهسه سالفة عبيس برازيلي
اول مرة عرفت بيهه عبيس برازيلي من اشتغل عدنه بالشركه عامل نقل , طبعا سمعت جماعتنه العراقيين بالشركه ابو حسين وجماعته اينصبون عليه ,وطبعا هوه ما موجود ايكولون اعيونه تشعل عالي وناصي مثل سيارة البرازيلي ما بيهه خير بس اللايتات ,طبعا الاخوان ما ايقصرون بالوصف خصوصا اذا صاحب الموضوع ما موجود
واول مرة ايصير عندي شغل ووياي عبيس من رحت لعمارة اكو شقه من الشقق ثلاجتهه عاطله ,الشركه دزوا وياي عبيس ايشيل الثلاجه وياي اذا جان عطلهه يستوجب انجيبه للشركه
الولد امرتب اعيونه ما شاء الله اوساع ونشط وحجاياته حلوه امرتبه ,كلت ويه روحي هذا المسكين لانو مؤدب الجماعه شادين عليه قايش,وصلنه الشقه دكينه الباب طلعتنه ابنيه بالتلاثين وعادي لابسهه مثل ما اشوف بعدة ابيوت ,الله يستر عليه باختصار لابسه ما قل ودل ...
طبعا اني سلمت ودخلت للمطبخ واعتذرت مثل ما امعلمينه بالشركه من عدهه لان راح انفرغ الاغراض من الثلاجه فاي طريقه اتريد نجمعهن حسب اجتهادنه لو هيه اتوجهنه,طبعا هاي تعليمات الشركه ,واني ادعي من ربي اتكول ابكيفكم حتى ناخذ راحتنه بالشغل..المره كالت اني اوجهكم..وبدينه انطلع الاغراض من الثلاجه وهيه اتكول وين انخليهه ,اشو وره اشويه المريه صاحت وات .. وات هبن ..تحجي باستغراب وهيه اتاشر لعبيس ,باوعت واشوف اعيون اعبيس جاحظه وصدك تشعل عالي وناصي مثل سيارة البرازيلي ,كلت انه ابو داوود هذا عبيس مريض والجماعه ما كالولي حتى ابتلي بيه,كتله عبيس هاي اشبيهه اعيونك ,كلي عمي ابو داوود معليك عوفني ابحالي,كتله ولك المريه مخروعه كلي اشبيك,كلي لا مخروعه ولا شي هاي حابه غمزتي لهذا متصركعه من اول نظره ..طبعا اني دمي فار وتوني ردت اصيح بيه اشوف المريه اللي لابسه ما قل ودل كامت تضحك واتكول فنتاستك ,واعبيس من سمع اشتغل العالي والناصي مالته بحيث انضرب راسه بالحايط من كد ما انحول وانثول ..صحت بيه اشبيك عبيس كلي وهو ايعض شفه, ابو داوود خلص المريه استوت وحبتني من اول غمزه
كلت رحل بيهه يبو داوود اكيد راح اتصير بيهه قضية تحرش جنسي وهذا عبيس برازيلي امبين راح يكلبني على الخط السريع يعني داي وي بدل الهاي وي
كتله ولك عبيس يبو الغيره الموضوع مو مثل ما انته فاهم,اشو عبيس البين اتسبع من شاف هاي اللابسه ما قل ودل تضحك وصاح بيه لشوكت اتضلون اتغارون من شبابي وجمالي واني غمزتي قاتله
كال كلمة قاتله وشعل اربع مرات عالي وناصي واندك الباب
ام القل ودل ركضت وهيه تضحك وفتحت الباب ,سمعت واحد ايكول هاي وصوت رصاص مو عبالك بوس ,ودخل يا اخوان واحد لابس عضلات أي والله لابس عضلات ,الباب طوله مترين والاخ نزل راسه حتى يدخل , صاحت ام ما قل ودل , هذا يعمل خدع بعينيه انظر..كالت احجايتهه وهيه اتاشرعلينه
طبعا عبيس خلص الباتري مالته ,لا عالي ولا ناصي يعني البرازيلي انكلبت وطفت لايتاتهه ..طبعا اني من الرعب نزعت نظاراتي بدون ما انتبه وعبيس امطفي لا عالي ولا ناصي
اللي لابس عضلات كال للي لابسه ما قل ودل , عندي سحر اقضل روحي للصاله واني جاي بعدك
ما قل ودل ركضت مثل الفراشه للصاله..وتقدم نحوي لابس العضلات اتراجعت اشويه وهو يتقدم نحوي رجعت واني البس النظارات حتى اكله مو اني لان مستحيل ايكون عندي صوت ينسمع واكو عمارة لابسه عضلات توكع فوك راسي
اصبعين اثنين والله مو اكثر اللي مدهم لابس العضلات..اصبعين اثنين وشفت روحي موفوع بسكف المطبخ
ومن اعالي المطبخ باوعت ,شفت عبيس منبطح على الكاع واشتم ريحة شياط يعني مثل أي سيارة برازيلي ايسوقه نايب ضابط مكلوبه وكل سيارات البرازيلي من تنكلب يبقى اللايت عالي ومفتوح بس عبيس امغمض لان ميريد ايشوفني اشلون انقتل...يمكن بخمس ثواني قريت القران عشرين مره..وهذا اللي لابس عضلات مو عبالك شايل بني لدم من ركبته لا عبالك كاعد ايطك اصبعنين
سمعت صوت ما قل ودل من بعيد ,أنا انتظرك جو حبيبي
ابتسمت عضلات الاصبعين ونزلني بهدوء
بس حصرني على حايط المطبخ وكال بصوت همزين هامس لان حتى صوته لابس عضلات..احنه الامريكان نبحث عن الجنس والحب خارج وقت العمل وانت محظوظ يا عجوز لاني احب ابي لهذا من اجله ساتركك ,تعلم ايها العجوز المراهق من هذا الصغير المؤدب الذي في عمر ابنك
كال جملته الاخيره وهو اياشر على عبيس اللي مشدة خوفه مغمض اعيونه ولا احسن واحد متربي
طبعا اني ردت ادافع عن نفسي وكتله ,انت فتهمت خطا فانا
ضحك وكال مثل ابي عمرك ولكن ابي اشجع منك بالاعتراف برغباته...انت سافل ولكن من اجل الشاب البسيط الذي معك اسامحك ولن انادي الشرطه..رجع لبس عضلاته وراح للصاله
طبعا اكيد انتو اتعرفون اشراح اسوي بعبيس وره ما راح عمود العضلات...يومين واني كاعد بالبيت اكتب تقرير للشركه حول اللي صار..يومين واني اكتب بالتقرير..يمكن رس التقارير عدنه احنه العراقيين وراثي
المهم كملت التقرير ورن جرس التلفون الارضي ورفعت السماعه واذا ابو حسين ايصيح تعال ابسرعة ابو داوود عبيس برازيلي بالمستشفى ويريد ايشوفك كبل لا ايموت
بجيت من القهر واني اشكك التقرير
ما معقوله انسان يكتب نقرير على انسلن وهو بالمستشفى .وركضت للباب ركض حتى اوصل ابسرعه ودك التلفون المحمول واني اركض فتحته وصحت منو
سمعت صوت عبيس برازيلي وهو تعبان ايكول كبل لا تجي للمستشفى جيب وياك خطيبتي
صحت بقبلق ولك منو خطيبتك كلي اللي لابسه مثل متكول ما قل ودل
السالفه الجايه احجيلكم زيارتي للمستشفى وبقية سالفة عبيس برازيلي
ضحكوا وليداتي
وكلهه اتصير سوالف
وتسلمون لعمكم ابو داوود
عرض المشاركات
