الرسائل

1

الهجرة و واللاجئين / رد: الاجراءات الطبية واللقاحات للاجئيين الذين وصولوا امريكا مؤخرا

« في: 19:19 25/05/2009  »

الاخ نور

جماعة ال siv صلا مسويين فحص طبي بغداد وميحتاجون اجراءات طبية لاستلامهم الكرين كارد

Wingo
بالعكس المعلومات كلش قيمة وبارك الله بيك بس حبيت اتلاطف وياك هاي شبيك

2

الهجرة و واللاجئين / رد: الاجراءات الطبية واللقاحات للاجئيين الذين وصولوا امريكا مؤخرا

« في: 06:34 25/05/2009  »

ا شاء الله نبيه جدا

3

الهجرة و واللاجئين / رد: الاجراءات الطبية واللقاحات للاجئيين الذين وصولوا امريكا مؤخرا

« في: 01:10 25/05/2009  »

الاخت ام سارة
اذا عندج موعد مال لقاحات فتذكري لا تطلعين من المركز الصحي بدون اوراق تثبت انو انتي او عائلتج اخذوا هاي اللقاحات
ومن تروحين اخذي وياج اوراقج

وهي خمس ابر سهلة ما بيها شي

وشوية صخونة اطول يوم تقريبا تنامين بيها بالفراش هم سهلة

4

الهجرة و واللاجئين / الاجراءات الطبية واللقاحات للاجئيين الذين وصولوا امريكا مؤخرا

« في: 00:55 25/05/2009  »

السلام عليكم

من الامور المهمة التي يجب الانتباه لها بعد الوصول الى الولايات المتحدة لامريكية بالنسبة للاجئ(مو الSIV) وهو امر الفحوصات الطبية و الجرعات اللقاحية الثلاث وخصوصا اصحاب العوائل والذين لديهم اولاد دون سن 18 سنة.
فيجب على كل لاجئ اجراء الفحوصات الطبية متكونة من اربعة مراحل
-المرحلة الاولى: فحص السل
وهو غرز جسم غريب صغير جدا تحت الجلد عند منطقة الذراع ( لا تخافون متأذي) هذا الجسم الصغير يترك زرقة (لون ازرق ) بالجلد اذا لا سامح الله كان اللاجئ مصاب بالسل. واذا لم تضهر اي علامة في الجلد فان الجسم الغريب يذهب يعني سليم  وين يذهب ؟( ما ادري اني اول ما سوها عبالي زرعوا بية جهاز تعقب او تنصت فطلبت من الولد لحد يحجي بالسياسة)

المرحلة الثانية: اللقاحات الجرعة الاولى
وهي عبارة عن خمس لقاحات HEP B , MMR, PPD. TD, VARCELLAI
و رجاءا لحد يسالني شنية لان ما ادري هي خمس ابر و سلام

المرحلة الثالثة: اللقاحات الجرعة الثانية( طبعا ما مسويها اني لحد الان) 
ويجب اجراءها بعد اربع الى ستة اسابيع من الجرعة الاولى

المرحلة الرابعة: اللقاحات الجرعة الثالثة
و يجب اجراءها بعد مرور شهرين الى ثلاثة اشهر من الجرعة الثانية


والمشكلة انو اللاجئ يستهزء بيها لان هو ماخذها بالعراق من جان صغير بس شوكت ينصدم من يقدم على الكرين كارد بعد سنة من وصوله لامريكا . لان لو ابوه اوباما نفسه ما ينطون الاجئ كرين كارد بدون اثباتات انو هو مكمل الفحوصات الطبية . فيضطر اللاجئ يروح مرة اخرى للمدكل سنتر يعيد اللقاحات وطبعا ها من جيبه الخاص لان خلص المديكير مالته بعد مرور 8 اشهر  وتكلف كله تقريبا 600 دولار يعني هم صرف فلوس وهم ضياع للوقت

لذلك احب احذر اللاجئين الي وصلوا مجددا او الي راح يصلون بسلامة و  حتى اذا المنظمة المسؤولة عنكم ما اخذتكم انتوا روحوا لان صدكوني ماكو كرين كارد بدون هاي الفحوصات واللقاحات الطبية

اخوكم ابن هيوستن

5

الهجرة و واللاجئين / رد: العراقيين اصحاب الذوات والانفة الفارغة في هيوستن

« في: 09:07 24/05/2009  »

الاخ العزيز شبعت من الاهرامات
طبعا هذا الفنان تعرفت عليه من وصل لامريكا وكونه عراقي حبينا احنى العراقيين انساعده فلازم ننصحه
وهذا الشخص نصحناه ومفاد بيه لحد ما شاف بعينه

وبعديين اني ما عندي مشكلة وية اصحاب الشهادات بس مشكلة وية التفكير مالتهم وللعلم ترة اني عندي شهادة جامعية فلا تاخذها بالجانب الحسد او الحقد بس اعرف اني شنو شهادتي هنا وشنو شهادي جانت بالعراق

والكلام مالتي مو متناقض لان الشخص اليجي ميقبل يشتغل الا بشهادته بس بعد مرور اربعة اشهر من تخلص المساعدات مال المنظمة يبدي يترس استمايرمال شغل (من تصير الحديدة حارة) زين ليش مو من البداية يشتغل ويحاول يجمعله جم فلس لحد ما يكدر يعادل شهاده ويقوي اللغة مالته عود بعدين يقدم على الدراسة وهو مطمئن انو اكو فد ايراد يجي اله للبيت

6

الهجرة و واللاجئين / رد: العراقيين اصحاب الذوات والانفة الفارغة في هيوستن

« في: 08:39 24/05/2009  »

الاخ الوحيد الغريب
طبع اسم الله عليك من الوحدة والغربة لان ما تراد
اما بالنسبة اذا  كان عندك حرفة معينة مثل كهربائي او ميكانيكي او حداد فتكدر تلكه شغل اهنا بهيوستن بسرعة خصوصا اذا عندك لغة انكليزية قوية

7

الهجرة و واللاجئين / رد: العراقيين اصحاب الذوات والانفة الفارغة في هيوستن

« في: 08:29 24/05/2009  »

عيني بغداد

طبعا اشكرك على النقد مالتك بس والله الف مرة نصحته للفنان انو لا يسوي المعرض مالته بس هو ما يقتنع يعني شسأويلة اذبله ورقة بيها تهديد

8

الهجرة و واللاجئين / العراقيين اصحاب الذوات والانفة الفارغة في هيوستن

« في: 07:32 24/05/2009  »

بعض العراقيين الذين وصلوا مجددا الى امريكا و خصوصا اصحاب الشهادات العلمية والانسانية يتوقعون باخذ مكانة متميزة بالمجتمع و وظائف مرموقة من  خلال الشهادات التي حصل عليها من العراق وحين يصل
اللاجئ يتفاجئ بالواقع المر وهو وجود الكثير من العراق اصحاب الشهادات من مهندسيين ودكاترة و مدرسيين جامعيين  يعملون خارج نطاق ما درسوه كأن يكون عامل في مطعم او عامل في حديقة او صانع في محل لتصليح السيارات ......الخ.ويبقى الاجى (نافش ريشه) لمدة اربع اشهر اينما ذهب يذكر الناس بالشهادة التي جلبها معه من العراق.
ولكن بعد الاربعة اشهر وبعد نفاذ المساعدات الحكومية للاجئ والتي تستمر لمدة اربعة اشهر او كحد اقصى ستة اشهر يتحول صاحب الشهادة المرموقة الى (مجدي درجة اولى) حيث البحث عن العمل اينما كان من اجل دفع الايجار وفاتورة التليفون والانشورنس للسيارة ( مو تدري طاك اول ما وصل اخذ سيارة 2009 الة لمرة وبنته) و ترى الدكتور او الفنان او الكاتب او المدرس او الرسام (يترس استماير مال توظيف ويرجع لورة) و يكول الشغل مو عيب
وبعد ما يجد العمل تجده يعمل ويغني (شجابني للضيم جنت مدللة)

وهنا اقول للعراقيين في امريكا او للقادميين الى امريكا هل تظن انك افضل من الامريكي الذي ولد وترعع في هذا البلد ؟ او هل تظن ان الشركة او الجامعة الفلانية سوف تفضلك على امريكي حاصل على نفس الشهادة التي لديك؟

الجواب ماكو اعي اكوله لان معروف

و هنا في هيوستن ترى العجب من العراقيين وليس جميع العراقيين طبعا لكن البعض منهم. تراهم يتذمرون من كل شي من الايجار والمصروف و المستشفيات والمدارس ومصاريف الدراسة
وهنا اقول له (اي لعد شتريد يجيبوك من العراق بلاش ويعيشوك بلاش ويدرسوك بلاش ويعالجوك بلاش اي متكلي شتريد بعد بس يزوجوك وينطوك بيت وسيارة ونوط الشجاعة مال عاصفة الصحراء وهم ما ترضى والله لان احنة العراقيين انولدنا واحنى مراضين على الساعة الي ايجينا بيها)  مع العلم ان تكساس او هيوستن انسب مكان لللاجى لان بيها فرص عمل كثيرة و رخيصة مقارنة باقي الولايات الي الاقتصاد بيها ميت بحيث دوائر حكومية عزلت لان ماكو اي وارد مادي يجيها مثل ولاية كاليفورنيا و مشيكان و كاناتيكا

خوب اكو واحد اعرفه والله اول ما وصل كام يشمر منا ومنا اني رسام وفنان واريد افتح معرض ال لوحاتي هنا بهيوستن والامريكان عمت عيني ميعرفون يقفصون راسا كلوله الله لوحاتك حلوة امشي تعال انسويلك معرض بوسط المدينة حيث الادباء والمثقفين بس العليك تدفع 8000 دولار اجرة المكان والحرس والباي علينا احنا انرتبلك المعرض. والله هو المعرض استمر 3 ايام و كان عدد الزوار عدد لا يصدق اني والرسام و اثنيين متيهين بالمكان

لذلك  انصح الي يريد يجي لامريكا بان ينسى الشهادة مالته ويركز على شغلات اهم .و من تجربتي الشخصية اشوف اكو شغلات مهمة كلش مثل

-تعلم اللغة الانكليزية بشكل مستمر.
-تعلم قيادة السيارات للذين لايعرفون.
-معرفة قوانيين  الولاية التي يراد الذهاب اليها.
-كيفية البحث عن وظيفة.
-خلق صداقات مع العراقيين الاقدم.( واني ما شاء الله اول ما وصلت شفت عراقي سلم عليه وكلي اول احجاية دير بالك من العراقيين لا تمشي وياهم ولا تحجي وياهم يسولك مشاكل فاني كتلة في امان الله لان انت عراقي و ما اريد احجي وياك وبعدين طلع هو ابو مشاكل اظاهر )لان صدكني تره يبقى الدم دم وتبقى المحنة طبع بينة احنى العراقيين.

وبالاخير تدري هسة هذا الفنان شديشتغل ؟؟؟

خليها مفاجئ لحد ما تجون لهيوستن