كان الله بالعون يا اخي الله يحمي العوائل ان شاء الله
خلي احكيلك فد قصة زغيرة وهي واقعية 100% لأن الشخص الي حكاليها صديقي واعرفة
اكو جان فصل مال عشاير يعني كعدة شيوخ علمود دهس بسيارة
واهل الداهس يعني السايق الي دعم ذاك الرجال كان جيرانهم وصديقهم مسيحي فأصر الى ان يآزرهم بشدتهم ويروح وياهم للفصل يعني حتة تكون لمة زلم وشيوخ ووجهاء . ما اطول عليكم لما صارت الكعدة العكل كامت تتراكع على مد النظر وبعد ما بوس عمك وبوس خالك استقر الفصل على مبلغ من المال كتعويض ومصاريف علاج الرجال المدهوس . بعدين صار تنزيل للمبلغ وهو عرف عشائري متعارف عليه يعني لخاطر الشيخ فلان هلكد نازل ولخاطر الشيخ فلان هلكد نازل وضلت هالحسبة ووصل السرة لأخونا المسيحي طبعاً هو بس صافن لأن ما حاضر مثل هيج كعدات وعلى االفور لملم جرأته ووكف وكال اخواني اني رجال مسيحي من البصرة اصلي بس اني جاي وية جيراني ووعزيز عليه أريد تخلولي خاطر وتنزلون من المبلغ المفروض عليه واذا اريد اذكركم بحسب قصصكم ان عيسى الحي وية محمد هسة بالجنة واثنينهم انبياء كرماء واطالبكم بموقف التاريخ ابد ما نساه هوة موقف الملك النجاشي لما اجو الة اصحاب النبي محمد (ص) لما هاجروا من بطش الكفار واستقبلهم وحماهم رغم ان الكفار اجو اله وعرضوا عليه ذهب وكنوز وكللهم ما انطيهم لأن ذولة ما بينه وبينهم فرق الا هذا الخط وأشر بعصاه بالارض ومثل ما شفنه بفلم القادسية ..... يعني هذولة الشيوخ ضلوا صافنين شيردون عليه سكتهم بعدين كام شيخ عشيرة المدهوس كله عمي انته سكتتنه وبعد ما نكدر نحجي يعني صدك ما ننسى انو لولا موقف الملك النجاشي النصراني بحماية اتباع محمد قبل 1400 سنة لما وصل الدين النا هذا اليوم عمي كل الفصل طايح الكم مثل ما يكول ........
اخوية اني احكي معاك عمامي الاثنين اثنينهم متزوجين مسيحيات جيرانهم بكمب سارة وحدة بقت على دينهة معززة مكرمة والاسلام ما يمانع الزواج من الكتابية ووحدة طلبت تغير وتسلم وهاي مو هسة صار 30 سنة يعني احنة جيران ونسابة واخوة حتى . حتى مرت عمي هي الي سمت بنتي الصغيرة (ماري) .
بالنسبة الي اني اشوفكم اقدم من العرب بالوطن العربي والحضارات تشهد ....
الله يفك ازمة العراقيين في بلدهم العراق
اخوكم الناسك
و الله عمي انت على راسي من فوك و و مااعرف شنو اكول لان انت اتسكت الكل بس احنة يقصدنا على بعض من كهنتنا المسيحين و اشلون يطلعون و ايكذبون بالتلفزيون الوضع زين و مستقر بالنسبة الى العراقين مع الاسف عليهم الى متى انظل على هذا الحال ؟؟؟؟؟
عرض المشاركات
