كوافير رجالي في أمريكا

[GOLD FINGERS]

   السلام عليكم أخواني وأحبائي في منتدى عينكاوا ( أعضاء ومشرفين )
 
تحية طيبة وبعد ....  أرجو أن تقبلوني ضيف جديد عليكم في هذا المنتدى وتقبلوا عضويتي ولكم مني جزيل الشكر والتقدير .


سؤالي هو أنا حلاق ولي خبرة في مجال( الحلاقة الرجالي) منذ سنة 1990 أي صارلي 19 سنة بالمهنة من ضمنها( 4 سنيين )في مصر التي هي فترة أقامتي الحالية والحمد لله والشكر نجاحي وتوفيقي وخبرتي في هذه المهنة كلها بتوفيق من الله عز وجل ( حلاق ماهر جدا )

سؤالي هو عند وصولي الى أمريكا ما هي الأجراءات القانونية التي يجب أن أتبعها لأتمكن من مزاولة عملي كحلاق رجالي في الصالونات هناك ...( شهادة خبرة أو أجازة ممارسة مهنة............. ألخ )

وهل أذا جبت وياية شهادة خبرة من مصر تبين كفائتي بالمهنة سأكون مهيأ للعمل فورا..


أرجو من أخوتي المتواجدين في أمريكا أن يفيدوني بآرائهم ومقترحاتهم وأنا بأنتظار ردودكم أحبائي حول الموضوع

[angie-dawood]

اولا اهلا وسهلا بك في المنتدى بين اخوانك واخواتك عسى ان تفيد وتستفيد
اخي الكريم احسن مهنة في امريكا هي مهنة الحلاقة ومزاولتها لم يتوقف ابدا طول ما في وجود ناس عايشه اللة ينطيهم العمر الطويل
اخي العزيز انت اجلب معك شهادتك وهنا هم لازم تدخل دورة وهي حسب الساعات يعني لازم تخلص 1600 ساعة طول فترة الدورة الى ان يعملون لك امتحان على الشهادة بالغة الانكليزية طبعا وطول فترة الدراسة تكلف حوالي 12 الف دولار لازم انت تدفعها هاي بمشكن اني احجي بس بغير ولايات ما اعرف بصراحة
واكو شغلة اكثر العراقيين ديسوها كبداية حياتهم انه يشتغلون بالبيت مثل للاصدقاء او اقرباء الى ان يكسبون زبائن طبعا اذا شغلك زين وحلو راح تكسب زبائن بسرعة وقص شعر الكبار هو 15 دولار والاطفال 10 ومرات 12 دولار واذا تريد تشتغل عند شخص يملك محل حلاقة طبعا لو عاملة براتب اسبوعي او تاجر عنده كرسي وكل يوم 25 دولار هذة هي معلومات عن الحلاقة في مشكن واي سؤال نحنوا بالخدمة 00 تحياتي 00

[MAGGIC]

اخي العزيز اهلا بيك في المنتدى

كلام الاخت انجي جدا مضبوط واذا انت متابع للموقع ستعرف بان اي مهنه تحتاج الى رخصه عمل في امريكا وهذة الرخصه يجب ان تعادل الشهادة بواسطه دورة هناك قبل مزاوله المهنه


تحياتي

[GOLD FINGERS]

السلام عليكم.........

الأخ العزيز MAGGIC ...اشكرك على الرد وبارك الله بيك أخي والله يحفظك من كل مكروه ...


الأخت العزيزة ANGie  ...أشكرج على المعلومة وعلى هذا الجواب الوافي ولكن عندي بعض الأسئلة :

أرجو منك أن توضحيلي بتفاصيل أدق عن :-

1- مدة الدورة  1600 ساعة .
2- تكلفة الدورة 12 ألف دولار .

3- 25 دولار باليوم لو بالساعة ؟؟؟؟؟
ولكم جزيل الشكر والتقدير

                                        ---------------------------------

[hussein5582]

""اخي العزيز انت اجلب معك شهادتك وهنا هم لازم تدخل دورة وهي حسب الساعات يعني لازم تخلص 1600 ساعة طول فترة الدورة الى ان يعملون لك امتحان على الشهادة بالغة الانكليزية طبعا وطول فترة الدراسة تكلف حوالي 12 الف دولار لازم انت تدفعها هاي بمشكن اني احجي بس بغير ولايات ما اعرف بصراحة ""
هذا كلام سليم 100 % و نفس الكلام بولاية تنيسي
الكوافير هنا رايدله رخصه و اكو كليات هنا هي تنطي هاي الشهاده او تدرس بيه الساعات اغلمطلوبه و الي هي تقريبا 1600 ساعه تتقسم طبعا على سنتنين او سنه و نص انته وشطارتك و بعده يسولك امتحان على اساسه يسولك شهاده مزاولة المهنه
اما بالنسبه للتكاليف فهاي من الممكن ان تقدم على الفايناشيال ايدو هي مساعدات فدراليه علمود تدرس و تكدر بنفس الوقت تشتغل بالبيت او عد واحد عراقي او عربي بالاسود (الكاش ) لحين ما تتخرج و تكدر على ساس الشهاده مالتك تفتح محل
و ماعتقد الاخت تقصد 25 باليوم لانوا اذا باليوم ابقى ابمصر احسلك اعتقد بالساعه
المصدر :- نجاح الحلاق يم بيتنه بتينيسي ياخذ منه 14 دولار على الحلاقه صدك لاغاف

[angie-dawood]

اخي العزيز الدورة هي حسب ما انت تكدر تداوم  مثلا هي كلها الدورة لازم تخلصها يكون عندك عدد الساعات 1600 ساعة اذا اداوم فول تام يعني 8 ساعات باليوم راح تخلصها يمكن خلال سنة او اقل بس اذا داومت كم ساعة باليوم مثلا بس اربع ساعات راح تتطول الدورة اكثر يمكن سنتين الى ان تاخذ الشهادة ورخصة العمل ]اكو  شغلة اذا انت تاخذ مساعدات من الحكومة انت ما تدفع بس حق الكتب وهي قيمتها 700 دولار بس اذا ما تاخذ من الحكومة راح تدفع 12 الف دولار حق الدورة بس اذا تاخذ مساعدات من الحكومة لازم من تروح تقدم على اخذ الشهادة مال حلاقة تكول الهم اني داخذ مساعدات من الحكومة  حتى انت ما تدفع فلوس الدورة بس تدفع حق الكتب الي هي حقها 700 دولار وبنسبة لتاجير الكرسي في الصالون 25 دولا وقسم منهم ياجرون 50 دولار باليوم وقسم 35 كل صاحب محل شكل له تعامل واذا تريد توضيح اكثر بالخدمة اخي

[سوسن كليانه]

شكرا اختي انجي عالتوضيح,,,اخي صاحب الموضوع بالنسبه لولايه كالفورنيا الي عنده شهاده يدوام 1000 ساعه فقط ,,,وبعدها اتسوي امتحان عملي وتحريري بالكمبيوتر وهذه هي المصيبه لانها مصطلحات الشعر العلميه جدا صعبه,,,,لاني انا ادرس واخذ كورسات في الحلاقه مع العلم اني كوافيرا من زمان,,,واذا مااتشد حيلك وتقرا كل تعبك يروح بلا فائده,,,,لان العملي  لوحده ما يكفي,,,

[NOOR 2]

اجمل واحلى شغله

NOOR 2

[angie-dawood]

اخي hussein5582   تحية وسلام 000
نعم اخي اني قصدت 25 او 35 او 50 باليوم تاجير الكرسي عند المحل للحلاقة وما دام انت بمشكن تكدر تتصل باي حلاقة وتسالوه وتتاكدة من صحة كلامي

[★M a r t i n a★]

اهلا وسهلا اخوية نورت المنتدى واهلا وسهلا بيك

بلنسبة لمهنتك هيا احسن مهنا بامريكا طبعا شغل مضمون واسعار حلوة 

بلنسبة للشهادة انت جيبها للضرورة
وثانيا لازم تدرس  وحسب توقيت مدرستك شكت ينطوك هما ايجوز سنة ايجوز اقل حسب ساعات الي هما ينطوك اياها  بلمدرسة واخر سنة يمتحنوك  بيها ونشالله تنجح وتكدر تاخذ شهادة وتصير حر وين ما تروح يشغلوك لان هنا بامريكا اولا شغلة هيا حلاقة كلش حلوة وناس ترغبها

لان اني عندي خبرة بهل اشياء واحنا عدنا صالون بساندييكو واختي حاليا دا تدرس  بمدرسة حلاقة نسائي ورجالي  لمدة سنة تمتحن وتخلص  اذا نجحت خير على خير واذا منجحت لازم تعيد السنة

ونشالله انت تكون من بين المتفوقين هنا

تحياتي لك بلموفقية

[سوسن كليانه]

اختي مارتينا اذا الواحد سقط مايعيد السنه كلها ,,,وانما ياخذ 200 ساعه اضافيه يسوي بيها براكتس وبعدها يعيد الامتحان وانشالله ينجح,,,مع تحياتي للجميع

[GOLD FINGERS]

السلام عليكم أخواني وأخواتي الأعزاء ....بارك الله بيكم وحفظكم من كل مكروه ...

   hussein 5582 ....... أشكرك أخي على هاي المعلومة وجزاك الله كل خير وسلملي على زميلي نجاح الحلاق وكله كافييييييييي لغفففففففففففف   ........ هههههههههههههههههههه


Angie ..... اشكرج أختي على هاي المعلومات الثمينة  عندي بعد أستفسار ؟؟؟؟
               
                 1- فلوس الكتب 700 دولار هل أدفعها كاش لو على دفعات ؟
                2- موضوع أني أأجر كرسي سواء (25 - 35 - 50 ) دولار باليوم مثل ما ذكرتي وآني ما عندي
                   رخصة قانونية هناك فهل قصدج أني أعمل بالخفاء وبدون علم الحكومة؟لو يصير أدرس وأعمل
                   في نفس الوقت ومحد يكدر يحاسبني ؟؟؟؟


سوسن كليانة ......  مشكورة أختي على مساعدتج الي بالمعلومة عندي سؤال أختي ؟؟
                       
                        تقصدين أذا جبت وياية شهادة خبرة من مصر فراح أدرس 1000 ساعة فقط بدل من
                        1600 ساعة على أساس الشهادة اللي عندي ؟؟ أرجو التوضيح وشكرا ...


  hannan's family  .....  مشكورة أختي على مساعدتج الي بالمعلومة عندي  سؤالين أذا أمكن ؟؟
                     
                        1- 1600 ساعة دراسة هل هي مقسمة الى قسمين : عملي .. ونظري .. وكم هي
                           نسبة ساعات العملي ونسبة ساعات النظري  ؟؟
                       2- هل الشخص اللي عنده خبرة بالعملي ممتازة جدا يسووله أختبار عملي ويحددوله
                           ساعات الدراسة العملي بوقت أقل من الشخص اللي ما عنده خبرة أصلا .. لو هي
                           الساعات متحددة بشكل ثابت للجميع على حد سواء (اللي عندة خبرة واللي
                             ماعنده خبرة ) ؟؟

                                 مشكووووووووووووووووور
                                    لجمييييييييييييع
                                        الأعضاء


                                                                                    أخوكم  (GOLD FIGERS )

[hussein5582]

✿AnGie✿
لا اني افتهمت غلط اني عبالي ديقصد انوا اذا  يشتغل يم واحد شكد ياخذ بالساعه ,, منتبهت على شغلة ايجار الكرسي
وشكرا

[مظلومه سوادي]

خويي الاصابع الذهبيه
طلعت زميل مهنه والله يوفقك

حبيبتي الورده انجي
كلما اقرا كتاباتج عن مهنة الحلاقه بامريكا احس احساسين متناقضين
الفرح العارم لان اني حلاقه شاطره والله مداامدح بنفسي بس كل زبوناتي متخبلات على شغلي
والله هذاك اليوم اجتني وحده خابرت اول مره بالتلفون ودليتهه عالصالون وكالت اني اخذت تلفونج من احد منتديات التجميل لان مسويلج البنات عضوات هذا المنتدى دعايه موطبيعيه

الشعور الثاني هو الحزن الشديد لان مااكدر اوصل لامريكا واشتغل هناك مع الاسف
لان المنظمه مال اليوان عدنه بماليزيا نايمين

واني اقترح عالاداره انو ينطوج لقب العضوه الذهبيه لماتفيدين به المنتدى واعضاءه من معلومات قيمه عاشت ايدج ياورده


مظلومه سوادي

[angie-dawood]

شكرا حياتي مظلومة انتوا الذهب والماس وهذا اقل واجب اقدمه لاخواني واخواتي ربي يفرجها عليكم كلكم

[angie-dawood]

اخي gold fingers تحية وسلام 000
اخي العزيز فلوس الكتب احتمال هسى صايره اكثر من 700 لانه اتصلت بصديقتي هي هم حلاقة كالت هسى زيدوها فلوس الكتب كالت تقريبا 1000 الف دولار صارت بس تكدر تدفعها على كيفك مو شرط كلها تدفعها جرى وحدة يعني كل شهر تكدر تدفع 100 دولار لو 50 دولار ما يهم وبنسبة اذا تشتغل يم الحلاق يعني اذا تاجر كرسي او تشتغل عامل طبعا لازم يكون عندك ايجازة ورخصة العمل اني قصدي كان كبداية اشتغل بالبيت للاهل والاصدقاء الى ان تعادل الشهادة وتاخذ رخصة والشهادة وبعدين تريد تشتغل يم حلاق او انت تريد تفتح محل الك شخصيا مثل كل الناس ما يسوون هنا واغلب الناس يشتغلون ببيوتهم واحنا العراقيين كلنا نروح للحلاق او الحلاقة بالبيت مالتهم احسن من صالون يكون بمحل وانشااللة ربي يوفقك من توصل وتاخذ الشهادة وتفتح محل لحسابك بالتوفيق اخي

[GOLD FINGERS]

AnGie ....

أشكرج أختي والله ما قصرتي جزاك الله عنا كل خير وبارك الله بيج

[سوسن كليانه]

اخي العزيز كلام الاخت انجي صحيح وهي وفت وكفت بارك الله بيها ومجهودها الشيق ,,وانشالله استفاديت من المعلومات,,والله يعطيها الف عافيه

[valvol]

اخوية اني حلاقة ودادرس هنا باميركا

اذا عندك شهادة وعندك هادة مزاولة مهنة راح حسبون وقتها بالساعات اذا تكون مخلص ساعاتك راح يطلبون منك بس كم  ساعة وانت تختار المدرسة اللي تريدها وما تكلف هواية ولانك لاجئ تكدر على حساب الدولة بس مو كل البلغ يدفعون 70 بالمئة من المبلغ المطلوب وطبعا انت ما راح تدفع مبلغ كبير لانك بس تداوم كم ساعة وهاي الساعات الدولة تحددها و لا تخاف مو هواية اماباقي المبلغ اللي يصير عليك تدفعة بعد تخرجك ب 6 اشهر ويكون دفعات كل شهر 50 دولار واذا ماعندك تكدر تقللها وتوكل على الله و لا تخاف وراح تستفاد هواية واي استفسار عندك تدلل اني حاضرة ارد عليك    وبالتوفيق

[★M a r t i n a★]

اهلا وسهلا اخ gold
وردة هيى الساعات ساعات تدخهل من يبدي الدوام لحد ما يخلص الدوام يعني كل ساعات ادومها سواء ان كنت خبرة او بدون خبرة
مثل ما كلت الك اختي عدها شهادة بلعراق بس هنا ماتعتبر يمهم فا هسة دا اتروح مدرسة من ساعة 5 العصر الى 10 بليل  ولمدة سنة ورا ماتخلص اخر شي امتحان  عملي اكيد

وبلنسبة الى امتحان يسوك عملي ويخلوك اول مرة تدرسوينطوك زبائن  لان كل قسم اله مرحلة واخر قسم بلمدرسة الي هوة امتحان يمتحنوك ونشالله تنحج بيها وتصير احسن حلاق وردة
تحياتي واي سؤال اخر اني بلخدمة

\
سوري على التاخير بصراحة جنت مضيعة الموضوع ودورت عليه ويلا كدرت اجاوب

[vincenzo]

اصدقائي
هاية الكتب اجباري واحد يشتريهه؟؟؟
يمعودين اكو اشكال الكتب تتحمل ببلاش من مواقع خاصة بالانترنت ومنتديات
بالاضافة الى شراء الكتب من الانترنت وخصوصا موقع امازون اللي بيه كل كتب العالم
اما اذا اشتريتوهه من امازون مثلا مستعملة او paperback international edition فاحتمال تطلع كلهه جوة الخمسين دولار

[مظلومه سوادي]

للرفع فقط 

[angie-dawood]

تعرفين خيتي مظلومة هاي كم يوم اني دادور على هذا الموضوع  والبارحة لكيته نزلته الرابطة بموضوع اخي يمتى الفرج لان هو هم كان طالب معلومات ورابطة مال موقع الي ياخذون فلوس من الحكومة للدراسة واني شكد دورت ماشفته تعبت على ما عيوني خوخشششششششششششششششت

[مظلومه سوادي]

 
لاشكر على واجب خيتي