مواقيت الصلاه واتجاه القبله في امريكا

[ابو عبد الله التكساسي]

اخواني واخواتي السلام عليكم
يمكن ان نسال السؤال التالي ((شلون راح نعرف اتجاه القبله وشلون نعرف مواقيت الصلاه في امريكا)) طبعا اولا الامور هاي احنه ماخذيهه بساطه بالعراق او اي بلد اسلامي لان راح تلكي واحد يكللك وبكل سهوله اما في امريكا فالوضع مختلف تماما وخصوصا بعد احداث 11 سبتمبر لان الحكومه الامريكيه مثل ما تعرفون اتشددت كلش على المسلمين في كل انحاء امريكا وهيج سؤال بالتاكيد راح ايثير حفيضة بعض الناس والي بالتالي يمكن راحايأدي الى بعض التساؤلات الغير مرغوب بيها
احجي عن نفسي اني اخاف اسال هيج سؤال بامريكا لاي احد مو عراقي لان حتى لو مسلم بس من غير جنسيه ما ممكن اظمنه واكرر اني احجي عن نفسي فقط
طبعا اني مو كلش قوي بالتصفح بالانترنت وهاي السالفه اكلت من عندي هوايه وقت كاعد اكلب وبدون فائدة كل الاماكن الي زرته تنطيني اوقات الصلاه ببلدان اسلاميه !!!!! ومحد كدر ينطيني شي على امريكا (( ولاية تكساس تحديدا مدينه هيوستن)) زين شنوحال الولايات الاخرى واخوانه اشلون مدبرين هاي السالفه ما اعرف
هذا الموضوع اشويه بيه تحفض لان المنتدى مو  للعراقيين المسلمين بس , ياريت تقبلون بي وتساعدوني وكل من ايريد الفائده عسى ان انفيد ونستفيد

هذا الموضوع مهم جدا بالنسبه الي لان سفرتي راح اتصير انشاءالله 10 رمضان - زايد ناقص-
والسلام ختام
اخوكم ابو عبدالله

[alfaras]

الاخ ابو عبد الله السلام عليكم

هذا الموضوع سهل ان شاء الله تكدر اذا انته ماعندك خبرة بالنت  تشوف احد ينزلك البرنامج ويعلمك عليه وعندي اصدقاء في امريكا اذا اتكلمت معهم راح اخذلك البرنامج ان شاء الله والحل الثاني يوجد سجادة صلاة فيها بوصله تشير الى القبله تكدر تسأل عليها موجوده في اي بلد مسلم تقبل مروري

اخوكم
alfaras

[عيني بغداد]

السلام عليكم

أخي العزيز هذا الموضوع فكرت بيه قبل كم يوم ولكيت موقع الباحث الاسلامي تكدر تدخل عليه تكتب اسم المنطقة وهو ينكيط كل المعلومات اللي تحتاجه من اوقات صلاة وحسب المكان اللي انت ساكن فيه ومن تدخل على المنطقة المطلوبه يحددلك أتجاه القبلة.

الرابط هو
www.islamicfinder.org/cityPrayer.php?country=usa&lang=arabic

أن شاء الله ينفعك ويتقبل منا ومنك.

تقبل ردي
عيني بغداد

[ريم عبد]

فعلا اخ هذا موقع اسلامك فايندر كلشي تلكي بيه من اوقات الصلاه الى موقع القبله وممكن واحد اينزله على الموبايل او ينطي ايميله وهم ايدزوله اوقات الاذان بكل شهر
وتكدر اتشوف اتجاه القبله على الموقع واتواشكها على الكوكيل ايرث ايطلعلك عنوانك بالضبط واتجاهاته واتطبق عليه اتجاه القبله
واذا واحد يلكي بوصله الافضل هاي تنفع على طول الطريق وبامريكا ايضا
وياريت الي يلكي هاي البوصله وين تنباع ايخبرنا لان كلش مفيده بالسفر والكل يحتاجوها
وتسلم اخي على طرح الموضوع
اختكم ريم

[ابو عبد الله التكساسي]

السلام عليكم من جديد
اخوي الفرس الاصيل ,انته اصيل وردك اصيل وراح انتضرك يا طييييييييييب
عيني بغداد : الله يسللم هالعيون ياطيب وبارك الله بيك وبكل الطيبين وجدا اشكرك واشكر جهودك
اخت ريم : شكرا للمرور والله مشكورين كلكم وبلا استثناء وفعلا هسه يلا اتذكرت انه اكو سجاده مال صلاة بيها بوصله تنباع باب الدروازه بالكاظمية المقدسه
وشكرا جزيلا للردود السريعه من الاعزاء كلش في عين كاوه والله يبارك فيكم ويجازيكم خير الجزاء
اخوكم ابو عبدالله

[eynaseynaseynas]

الاخ العزيز

بالنسبة للاذان احنا نستخدم برنامج مجاني اسمه بلال موجود على النت يحدد الك المواقيت وياذن بكل وقت للصلاة وبي تلاوة للقران وكل شي وهو مجاني
اما بالنسبة للصلاة فعدنة سجادة بيها بوصلة وهي مفيدة جدا ممكن تلكيها بالسوق يعني شي متوفر ان شاء الله ولا تتخوف من سؤالك عن القبلة لان المساجد موجودة بكثرة ومن تروح وتشوف كمية المصلين راح تروح منك الخوفة انت تخيل هنا برالي يقيمون صلاة الجمعة ثلاث مرات من كثرة المصلين فاخذوا فتوى انه يقيمون الصلاة والخطبة ثلاث مرات متتالية تبدي من الحادية عشر الصبح وتنعاد ثلاث مرات حتى الك يتمكن من الحضور فلا تتخوف واسال على راحتك وراح تلكي محلات اسلامية كووووومة ومطاعم اسلامية واكل حلال واحنا الى حد الان ناكل دجاج ولحم حلال ومعلبات اردنية لو مصرية لو سعودية وفرقها بسيط مو هواية وحتى الخبز والصمون اللبناني والمناقيش ومن توصل باذن الله راح تتاكد من كلامي وما راح تشيل هم للامور هذي
مع الشكر

[ريم عبد]

اخيeynaseynaseynas  مكلتنا انت بيا ولايه بالعافيه عليكم ومشكور اخي  على هاي المعلومه اول مره اسمع بيها
تسلم
اختكم ريم

[ابو عبد الله التكساسي]

اخويه ايناس ياورده الف شكر ورحمالله والديك , بس ما كلتنا ابيا ولايه انت كاعد

[mohammed2009]

اخواني وهذا هم موقه مفيد جدا لتحديد اتجاه القبله من اي مكان بالعالم ان شاء الله تستفادون من عنده

http://www.qiblalocator.com/

طريقه الاستعمال تكتب في المستطيل الموجود في اعلى الصفحه العنوان الكامل لمنزلك
بعد ذلك سوف يشير الخط الاحمر الى اتجاه القبله

وصلاه مقبوله ان شاء الله

اخوكم

محــ2009ــــمد

[بت بطوطة]

صحيح هذا الموقع لمعرفة اتجاه القبلة من منزلك مضبوط واني مجربته ..  انشالله يفيدكم

الخطوات:
1.      أدخل على الموقع http://www.qiblalocator.com
2.      هذا الموقع يحتاج نسخة متقدمة من برنامج إنترنت إكسبلورر للتصفح.
3.    أختر Satellite لكي ترى الأماكن الفعلية مثلما ترى برنامج Google Earth.
4.    حدد موقع منزلك أو المكان الذي تتواجد فيه.
5.    ستجد علامة + في منتصف الصفحة ضع منزلك في منتصف العلامة.
6.    ستجد خط أحمر بداية من العلامة + و نهايته عند الكعبة المشرفة .
7.    اتجاه هذا الخط هو إتجاه القبلة.
 
تحياتي

[toofy]

بارك الله بيكم جميعا على هايه المواقع ...كلش مفيده ...مشكورين
اما عن مدينة الاخت ايناس اعتقد كاتبه رالي اللي هي عاصمة نورث كارولينا ..اني عندي اصدقاء هوايه اسلام بهذه المدينه وصحيح مثل ما كالت الاخت مطاعم اسلاميه ومنتجات اسلاميه لان الجاليه الاسلاميه هناك كبيره
تحياتي toofy

[ابو عبد الله التكساسي]

االى كل الاخوات والاخوة الذين شاركوا في هذا الموضوع
السلام عليكم والف الف الف الف شكر الكم مني وجزاكم الله الف خير والله يحفظكم ويرعاكم و يتقبل صلواتكم آميييييييين انه سميع مجيب واني جدا ممنون لهذا التفاعل الحلو
تحياتي
اخوكم ابو عبد الله

[Wingo]

أخي الغالي
الأخوة جميعاً ما قصروا و لن أزيد أي شيء على ما ذكروا
نسأل الله أن يتقبل صلواتنا جميعاً
و احييك على حرصك و إهتمامك بالصلاة
الله ييسر سفرك و ألف ألف مبروك
بس يا أخي الغالي عندي عتب عليك
شلون تخاف تسأل حتى المسلمين في أمريكا عن إتجاه القبلة ؟!
هسة في أمريكا أكو أكثر من 2000 مسجد  ( قسم منها مراكز إسلامية كبيرة) و حوالي 6 ملايين مسلم ، لو كان كل واحد يخاف بهذا الشكل كان المسلمين إنقرضوا في أمريكا من زمان !
أنت أذا تريد أطفالك يحافظون على دينهم و أخلاقهم لازم تتحلى بقدر أكبر من الجرأة و الشجاعة.
و يا اخي العزيز الإعلام يركز على الأمور السلبية ، لحد اليوم و بالرغم من كل التشويه الإعلامي ، مازالت كل الأديان تتمتع بحرية ملحوظة في أمريكا ، و كل إنسان يمارس طقوسه الدينية بحرية و من دون خوف.
لو كانت الأمور مختلفة ، لما فكرنا بالذهاب إلى أمريكا.
إن شاء الله بس تبقى الأمور كما هي و ما تصير أسوء في المستقبل ، لأجلنا و لأجل مستقبل أطفالنا.
تمنياتي لك بالموفقية أخي الكريم

تحياتي
wingo

[اهلي ياعراقين]

السلام عليكم ورحمة الله وبركاته

جزاكم الله خير الجزاء وادامكم ذخر لاخوانكم وجعلها في ميزان حسناتكم , حفظكم الباري عز وجل

[ورقاء]

معلومة طريفة
اردوغان رئيس وزراء تركيا مخلي بناته بجامعة امريكية؟
لانه باميركا يكدرون يدخلون الجامعة بالحجاب بس بتركيا ممنوع!!!!!!!!!!!!!!!!!!!!!!!!

[ابو عبد الله التكساسي]

السلام عليكم
ورقاء الورده كلش حلوه منج وتعيشين على هالسالفه مال اردوغان
اغاتي العزيز وينكو - العتب مرفوع وحجايتك عالعين والراس - بس الي تلدغه الحيه بيده يخاف من جر الحبل ويا اخويه اني اشتغلت ويه الخوال وشفتهم بعيني ولو نتنتبه اني كلت مسلم مو عراقي - يعني اني اثق بس بالعراقيين - وهذ حقي الشخصي لان ما فديوم حن علينه اخ من المسلمين وخصوصا الا خوان العرب

تاج الراس اهلي يا عراقيين بالخدمه وعالراس اذا ما تشيلك الكاع
وحلوه من كل الاحباب بعين كاوه على النصائح الجمله 1000000000000000 شكر

م \ ما اعرف هذا الرقم شلون ينقري ؟؟

[mongoose]

 ابو عبدلله شلونك
مثل ما تدري  اني بهيوستن
اني اشتريت بوصلة  من العراق بيها كل الدول  حتى هيوستن تكساس
ونسبة الى مواقبت الصلاة  والامساك والفطور
موجود مراكز اسلامية في هيوستن لديها مواقع على الانترنيت
واني حملت كل مواقيت الصلاة منها

[ابو عبد الله التكساسي]

اخي موون كوس كلش تسلم انحلت والحمد لله

[Iron_man]

مشكووووووووووووور اخوية على هذا الجهد الرائع


الله يبارك بيك


Iron_man

[غريبةمن بعد عينج يايمة]

السلام عليكم ......بالنسبة للاخ او الاخت ايناس الي تحدث على الصلاة ووجود الجوامع في رالي .هل انت في نورث كارولاينا؟وهل هناك نسبة من العرب والعراقيين هناك لاني انا وعائلتي بانتظار الوصول الى هناك.....وفعلا موضوع الصلاة مهم جداااا بالنسبة لي........

مع الشكر وتمنياتنا بالتوفيق للجميع

[مشيكان]

السلام عليكم
اخوان اني من جيت مريت بنفس هاي المشكله صليت اول فتره بالاعتماد على البوصله الي جبتها ويايه وكذالك عندي بوصله اخرى بسجادة الصلاه لكن بعدين انتبهت ان البوصله خاطئ بسبب الموقع الجغرافي ل امريكا حيث هذه البوصله تعمل بشكب صحيح في اوربا او غيرها من الدول لكن في امريكا لا تعتمدوا عليها نصيحتى ان تعتمدوا يأما على المساجد القريبه من مكان سكنكم او على برامج الانترنت بعد ان تأخذ احداثيات البيت الي راح تسكن بيه وتنطي الموقع بلاتماد على خط الطول والعرض  وتقبلوا احترامي

[ابو عبد الله التكساسي]

شكرا مشيكان

للرفع
الاخ الاسد الجامح هذا الموضوع رفعته علمودك

تحياتي الك
بالتاكيد الموضوع قديم قبل لا اسافر وبعد وصولي لتكساس اتفاجئت بكثره المسلمين والجوامع داير مدايري

اخوك ابو عبد الله التكساسي