*** ( كل يوم طبخة )***

[*Sandra*]

حبايبي نساء الجزر 
ليش تحتارون بطبخ الغدة والعشة    فوتن هنا وشوفن الطبخة الي تعجبجن     ويوميا  نطبخ طبخة  ونتناقش على طريقة طبخها واذا اكو عندج  أكثر من طريقة طبخ لأكلة معينة كولينة عليها حتى نستفاد

اليوم    أكلتنه  أكله بسيطة وسهلة وسريعة وهي

شاورما دجاج

 المقادير
   صدور دجاج مقطع شرائح صغيره
   1 كوب لبن زبادي
   نصف كوب ماء
   رشه فلفل اسود
   قطعه ماجي دجاج
   4 ملعقه طعام زيت

 طريقة التحضير
توضع جميع المواد معا بقدر و يوضع على نار هادئه و يقلب كل ربع ساعه حتى يجف الماء تقدم حاره مع خبر تنور و بالعافيه

 

[labak]

والله يا امنية هذا اللي كنا محتاجي
وخلي يسمع بي اﻻخ العزاوي

[*Sandra*]

مو تدللين لاباك   

عزاوي بس لا يشتم ريحة  الشاورمة  ويجي ركض

وهذا ماعون الشاورمة مال الدجاج سويته على السريع   والف عافية     

[داليا الوردة الوردة]

هاي شنو امنية حتفتحون مطعم لعد اشارك وهاج شيش كامل كص لو شاورما بكيفج

وينة عزاوي محد شافة هذا كص مال قاسم ابو الكص

[*Sandra*]

    داليا  شلون كص هذا  يجنن عاشت ايديج عليه
عيوني داليا  يوميا نطبخ طبخه ونتناقش على طريقة طبخها  والي يعجبها تكتبنه طبخه من صنع ايديها بعد احسن

وتسلمين على المرور

[labak]

بالنسبة اللي اني ما اخلي لين عاشت ايدج امنية
فكره اني ممجربتها انشاء الله راح اجربها واكيد طيبة مدام من ايدين اخيتي امنية
اني اسوي اوياها صلصة مخلوط من الراشي وعصير الليمون وملح اعتيادي

[*Sandra*]

لاباك وردتي الخلطة الي بيها راشي  وليمون امبينة طيبة  راح اسويها ان شاء الله

واكو بيهم يبرشون قشر الليمون  وبالنهاية من بعد ما تنشف يحمسوها بالزيت  كلش طيبة اتصير

[labak]

امنية
اني احمسها راسا واخلي قليل زيت وعلى نار هادئة
بعد ما تستوي اضيف شوية فلفل اسود واﻻحمر الباربيكا وابرش قليل جوز الطيب  وقليل جدا جدا دارسيني واحمسهم
قليل وهاي هيه

[*Sandra*]

لاباك ما شاء الله عليج امبينه طباخه ماهرة  حبيبتي
بسلامة راح اسويها غدة لباجر  والله كريم
تسلمين وردةتي

[labak]

عوافي وهني
اختي امنية الغالية

[labak]

عوافي وهني
اختي امنية الغالية

[*Sandra*]

الله يعافيج حبي لاباك
يارب بلكي تفرج عليج  امين ياربي وترتاحين  بحق القران ان شاء الله  يفتحلج رب العالمين كل ابواب الفرج الج ولكل منتظر من أهلنه وحبايبنه  بحق محمد وال محمد

[um amy]

عاشت ايدج حبي امنيه والله فكره كلش حلوه وبلكت تنطونه وصفات اكلات غريبه حتى نجربهه 

[*Sandra*]

هلوو حبي ام آمي  ومشكورة على  التعليق الورد مثلج
حبي ان شاء الله  اليوم امحظره أكله طيبة على الغدة  وان شاء الله انزلها قبل الغدة بربع ساعة 

حتى لا تبرد 

والي اتريد تعرف طبخة معينة لا تتردد تسأل  وان شاء الله كل الوصفات موجودة وبنكهة عراقية وعربية وأجنبية
وتددللووووووووون

[labak]

تسلمين يا عزيزتي اسعدي قلبي  بدوعائك  الصادق
هذا من طيبك
يار بي يا كريم يرزقك ويسعد ايامك ويجعل لك في خطوه سلامة
امين يا رب 

[*Sandra*]

كباب ملوكي -

 المقادير
   نصف كيلو لحم مثروم
   فصين ثوم
   فلفل اسود
   رشة ملح
   نضيف طماطة عدد (2)
   رشة معدنوس
   بعدها كوب ونص من الماء
   ملعقة ونص من المعجون

 طريقة التحضير
تخلط نصف كيلو لحم مثروم مع فصين ثوم ورشة فلفل أسود و رشة ملح مع بعض وتكور على شكل كرات وتقلى في زيت حامي ( يمكن تغميسها في الطحين حتى لا تتفتت )
هنا خلصت مرحلة الكباب او الكفتة
المرحلة الثانية نأخذ قرص من الخبر ونضعها في تبسي ممسوح بالزيت
ثم نضع الكباب ونضع فوقه بصلاية مثرومة ومقلياية
ثم نضيف طماطة عدد (2) مقلية
ثم نرش فوقة معدنوس
بعدها نضع قرص خبز اخر
ونضيف بعدها كوب ونص من الماء مضاف اليه ملعقة ونص من المعجون مع رشة ملح ورشة فلفل اسود
ويدخل الفرن
حتى ينشف الماء والي يحب انه تصير الخبزاية مقرمشة يفتح الفرن من فوك ومن جوة .
والف عافية

[labak]

عاشت ايدج اختي امنية اﻻكله كلش طيبة  واكو اكله بنفس المقادير  والمكونات والطريقة بس الفرق انه اللحم والبصل والثوم اتسوي قيمة يعني ينسلق ويتقلى قليلا بقليل من الزيت
نفس الشي اتخلي في خبزه تنفتح من الوسط مثل العيش المصري او خبزتين صغار من خبزنا  وقبل ما تنشوي يضاف اله صلصة مطبوخه من معجون طماطة وثوم وفلفل احمر للي يحب الفلفل بس الصلصة اتكون وسط بالكثافة وتدخل للفرن فترة بسيطة لحد ما تنشف
وبالهنى والشفاء

[gazala]

هاي
اريد انطيلكم نوع من مرقة او صلصة مكسيكية اسمها شيلي كون كارني وتاكل وية التمن

لحم مفروم

بصلة مقطعة + فص ثوم

فلفل اخضر واحمر واصفر اذا تواجد عدكم بالبيت مقطوع على شكل مكعبات
 
طماطة بدون قشر مقطوعة

فاصوليا حمراء بالعلب هي مسلوقة وجاهزة تغسل وتخلي على صفحة

ملح + فلفل احمر حاد+ملعقة صغرة كمون +اوريغانو +ملعقتين معجون طماطة




نطبخ اللحم المفروم وبعدها نخلي البصل والثوم لمدة دقائق مع التحريك وبعدين نخلي الفلفل والطماطة ولحد 

مينطبخ زين يرادلة 15 دقيقة

وبعدها نضيف الملح والبهارات ومعجون الطماطة وبالنهاية نخلي الفاصوليا الحمرة وهم تبقى على نار لحد متنطبخ الاكلة

جربوها ومراح تندمون طيبة هواية

[ام الحلوة]

عاشت الايادي العراقية الطيبة والله اخت امنية اني ما اشتهيت الاكلة بكد ما اشتهيت  خبز التنور لان من وصلت امريكا ما ذقته  وطريقة اضافة الصلصة من اختنا لاباك كلش حلوة والاكلة اللي قدمتها اختنا gazal سهلة وسريعة التحضير والله وتعيشون بس اكو طريقة لعمل الكص في الفرن حبيت اذكرها تجيبن لحم البقر وتقطعيه على شكل اصابه وتبرشين معه بصل وتنقعيه في الخل مع اضافة الملح وقليل من الفلفل الاسود واي بهارات انت تحبين لمدة نصف ساعة بعدين تصفين اللحم بالمصفي وتضعيه في الكيس الحراري في صينيه داخل الفرن وتراقبيه الى ان ينتفخ الكيس ويستوي اللحم طبعا يقدم مع السلطة العراقية الشهيرة  وملاحظة لاستخدام الكيس الحراري قبل الاستعمال اضيفي ملعقة كبيرة من الطحين حتى لا ينفجر الكيس داخل الفرن وبعد ان تضعي اللحم او اي شئ داخل الكيس قومي بربطه من الاعلى واحداث ثقوب بسيطة في اعلى الكيس تسمح بتدوير الحرارة  والف عافية والف سلامة

[labak]

شكرا غزالة اﻻكله امبين عليه طيبه راح انجربها  انشاء الله

[داليا الوردة الوردة]

هاي شنو حبايب عاشت الايادي الاكلات جميعها رائعة وراح اجرب مرقة الفاصوليا باللحم المفروم

وتحياتي لكل من ساهم بالموضوع العراقيات طباخات ماهرات ومحد يلحكهن بالذوق

[alazawi]

عيني امونة اذا هيج سويلي اكل مال شهر ودزي بال DHL 

اخوج جوعان 

[*Sandra*]

labak
وردتي  سويت اليوم الاكلة على الغداء مال الشاورمة  مال الدجاج وكولش طيبة  بس شوية  صارت مالحة بسبب الماكي  مالح كولش   ومكانكم خالي


gazala
اهلا بيج عزيزتي  وعاشت ايديج على الاكلة  وباين عليها كولش طيبة اني احب الفاصوليا  تسلمين وردتي

ام الحلوة

اني مرات  اخبز بالبيت خبز تنور بس بسبب الحرارة  اتأذى منها  تركته ومرات  اخبز شوية من اسوي أكلة احتاج بيها الخبز مثل التشريب  

وياريت لو بيدي أكدر ادزلج خبز بس شلوووووون  
وتسلمين على الكص طيب  سواء لحم دجاج او لحم  بقر وعاشت ايديج حبيبتي

داليا الوردة الوردة

مليون عافية داليا الاكلات العراقية كولش طيبة  وأحلى ما بيها اللمة مال الاهل والحبايب

alazawi

مو تدلل  أي أكلة اسويها راح اكل حصتك ليكدام  

الله كريم عزاوي بلكي الله يسهلك وتتزوج بنت الحلال وتاكل من ايديها أطيب أكل
كول آمين

شكرا للجميع ونأمل مزيد من التفاعل  وخصوصا ان شهر رمضان قريب  

[labak]

امنية لعد اني اليوم راح اسوي شاورمة اللين  هسه رجعت اتاكد من المقادير
 تسلميلي  حبيبتي

[ضـاع الوطن]

والله نسوان اخر وكت ميعرفن يسون بس شاورمه لا وجماله ايكولون خل انجيب المقادير مال الشاورمه هع هع هع هع هع !!!!!!!!!!!!!!

[labak]

اويلي ضيوعي هههههههههههههه
متفوته فايته
امنية الشاورمة كولش طيبة عاشت ايدج وتنغصنا عليكم  ردت ادز الضيوعي بس اكلو كوووله اني ملحكت على شي
ها صدك شويت اوياها بتيته بالفرن اول شي قطعت البتيتا نصفين  ودهنتها بالزيت المخلوط معه فلفل حار وكركم وملح  وبالفرن على الحرارة العالية
 
م الحلوة بالعافية وهني عزيزتي
تحياتي

[غــــــــزل]

الللللللللللللللللللللللللللللللللللللللله شنو هاي الاكلات الحلوة عاشت الايادي
وعاشت ايدج حبيبتي امنية على هذا المضوع الحلو يسلموا

[ام الحلوة]

طريقة عمل الهمبرغر في البيت اليكم المقادير : كيلو لحم مثروم ,بصلة مثرومة,فلفل حار مثروم (حسب الرغبة ),بيضة واحدة,ملعقة كبيرة طحين ,بهارات متنوعة ,ملعقة ملح  .طريقة العمل ;تخلطين الماد جميعا وتعجنيها باليد حتى تتجانس ثم تاخذين قطعة لحم وتكوريها على شكل كرة ومن ثم تبسطيها براحة اليد (بس مو حيل تضغطين عليها حتى لا تصير خفيفة ) تصفين عدد من القطع التي عملتيها في صينية وضعيها في الفريزر لمدة نصف ساعة وعند القلي ضعي قليل من الزيت في مقلاة تيفال وقومي بقلي القطع وقلبيها على الوجهين تقدم على شكل سندويتشات حيث يقطع الصمون وتضعين المايونيز او العمبة +ورق الخس+قطعة الهمبرغر+حلقة بصل +حلقة طماطة  بالتسلسل ويقدم معها البطاطا المقلية فرينج فرايز والف عافية س للامانة  قريت الطريقة في احد المنتديات وجربتها بنفسي  وصارت سندويتشات راقية تلوك لاعضاء هالمنتدى الطيبين  تقبلو احترامي                           

[موفق الو منار]

اخوية ضاع الوطن

هاي غير بس هنا وكل وحدة تكتب بكيفها وداعتك الله يساعد رجالهن امكظيها كلها دلفري

[gazala]

هاي

انطيلكم وصفة سهلة للعصريات او وية الجاي

خبز توست تخلون عليه جبنة الماعز وبعدها نخلي العسل وقليل من روزماري وتخلوه بالفرن لحد ميحمر وجه الجبن

خبز تويست نخلي حلقة طماطة قليل من الملح والفلفل الابيض ونرش جبن مبشور ونخليه بالفرن

وهل وصفتين يقدموها بالمطاعم عدنا كضيافة

جربوها طيبة وسهلة وسريعة

تحياتي

[ام الحلوة]

عاشت ايدج اختنا gazala وان شاء الله اجربها وبالنسبة الاخونا موفق لاحظ انه كل وحدةمنا من تكتب الوصفة لازم تكون مجربتهة بالبيت يعني كول هنيالهم لازواجنا لان نحير شنسويلهم وهذا اللي نكتبه هو قطرة من بحر من الوصفات الراقية اللي دنحضرها بالبيت ومنو يلحك العراقيات بالنفس الطيب بالاكل ولو عدنا مجال نكتبها كنا ملينا المنتديات تقبل تحياتي وشكرا لمرورك على الموضوع

[doori]

مرحبا ....
اني كل فتره اخترع اكله معينه طبعا" شاب وعزابي واني اطبخ احسن ما اشتري اكل من السوك ونصيحه لكل مغترب عزابي اطبخ بايدك اصرفلك وانضفلك
المهم
الاكله ما ادري شسمها هخهخهخهخهخ
المقادير
قرنابيط
بصل مفروم
رشه بقدونس
راشي او طحينيه
طريقة العمل

ا- نقلي القرنابيط ونحمره ونخلي على صفحه
2- نخلص الراشي مع شوية حامض وشوية ملح مع شوية مي تصير صلصه عاديه سائله
نجيب البصل المفروم نام ونحطه بتبسي او طاوه غميجه وينحمس بشوية زيت
3- نحط فوكا القرنابيط المقلي  تصير طبقتين هيج
4- نضيف صلصة الراشي الي سوياناها ورشة كمون ونخليها شويه على النار الى ان تثخن صلصة الراشي
نشيلها من النار ونرش البقدونس فوكاها
اكلوها بالخبز والف عافيه

جد جد تخبل واذا بزيت الزيتون اطيب واطيب



اخوكم
حمودي
الاردن_عمان

[labak]

تسلم ايدك اختي العزيزة ام الحلوة
راح اجربها اكيد
اني ممجربه البيض ولا الطحين
ابرش عليها صمون من اعجنها
تسلمين عزيزتي

[labak]

لكن اكلت القرنابيط عالغده اليوم  ما بيها مجال شكرا جزيلا اخي دورا
واحسن حاجه اتسويها اتسوي حاجتك بايدك تعرف شنو ما شنو محتوياتها عالاقل
تاكل وانت مطمئن
ربي ايخليك

[labak]

امنية عزيزتي وينج اشو ماكو هاليومين  انشاء الله خير

[great hope]

السلام عليكم يا اعضاء منتدانا الحلو
طبعا عاشت ايدج امنية على هذا الموضوع الراقي
واليوم عندي اكله تعلمتهاوالي هية صيادية السمك
طبعا جربوها كلش حلوة وسهلة وجديد
المهم نبتدي بالمقادير
كيلو سمك فيليه
2 كوب رز بسمتي
فلفل حلو ملون يعني تجيبين اصفر واحمر وبرتقالي واخضر من كل لون فلفلاية وحدة
4  روس بصل
واني حطيتها من عندي بزاليا وجزر مفروم ناعم علمود القيمة الغذائية طبعا
زيت زيتون بكد استكان الشاي
فلف ايود وملح وكمون وكاري
واذا عندج زعفران راح يخليه نكهته تخبل


نجي على الطريقة
نفرم البصل ناعم ونحمسه بالجدر بزيت الزيتون كله ووراها نضيف السمك الي نكون احنا قبلها مقطعيه قطع صغيرة ومملحيه ونخليه 10 دقايق على النار الهادية ونسد الغطا مال الجدر
وراها نضيف الجزر والفلفل الملون والبزاليا ونحمسهم هم على نار هادية وووياهم التوابل والبهارات كلها ومن تبدي تطلع ريحته الي راح تكون تخبل
نحط الرز البسمتي يكون مغسول ومنقوع نص ساعة
وتحطين مي يكفي لنضج الرز
ومن تبدي المي يخلص تنصين على النار وتخليه يتهدر براحته
وراح تضوكون اكله تالكون صوابعكم وراها وتخبل

مع تحياتي
وعلى فكرة اني اخترع هواية اكلات
واهم شي عندي الاكل يكون قيمته الغذائية علية يعني بيه كل الي يحتاحه الجسم خضار ولحوم ونشويات
والف عافية على كلبكم يارب

[labak]

شكرا اختى العزيزه كريت هوب
اكيد طيبه  مدام من ايديك
وطبعا اكيد راح انجربها
تسلمين

[*Sandra*]

أهلا  بعزيزتي لاباك شلونج حبيبتي طبعا اشكرج على سؤالج عني وهذا أن دل على شيء فأنه يدل  طيب خلقج وأصلج فقد كنت مشغولة  بالبيت
تسلمين وردتي

great hope

تسلمين على الاطراء الجميل على الموضوع وعاشت الايادي على الأكلة  
بس حبيت اعرف السمك يشترط الا يكون فيليه يعني اذا أي نوع سمك أخر يصير أستخدمه  هذا اول شيء
ثاني شيء هل أستطيع أبدال البصل بالثوم لأنه زوجي نهائيا مياكل البصل واني الواكعه بيها  

الف شكر وتقدير لمسهماتكم  لانه بصراحة  طبخاتكم اتساعدنه على القضاء على الملل والروتين في مسألة الطبخ

[*Sandra*]

تدرون حبايبي  اشكد أحب التمن الكشري  وبصراحة اني  قليل آكل التمن لكن اذا طبخت الكشري أكل كثير

واليكم مقادير وطريقة طبخ الكشري


الكشري

المقادير
   2كوب رز بسمتي او مصري حسب الرغبة
   كوب عدس اخضر
   ملعقة صغيرة فلفل اسود
   3 ملاعق زيت نباتي للرز
   4 حبات طماطم
   3 ملعقة كبيرة معجون طماطم
   ملح
   4 فصوص ثوم
   كمية من البصل المقطع الى جوانح
   باكيت معكرونه


 طريقة التحضير
يسلق العدس على نار هادئة ثم يضاف اليه الرز المنقوع مسبقاً ويضاف اليه الملح والفلفل الاسود الى ان ينضج الخليط
تعمل الصلصة باضافة الطماطم بعد فرمها مسبقا في قدر فيه كمية من الزيت ويضاف اليه معجون الطماطم والثوم المفروم الى ان يحمر الخليط ويتم بعد ذلك اضافة كمية من الماء كي ينضج
نحمر البصل في قدر فية كمية وفيرة من الزيت كي يكون البصل مقرمشاً
تسلق المعكرونه في قدر فيه ماء مع اضافة قليل من الزيت
يوضع طبقة من الرز مع العدس ومن ثم اضافة المعكرونة والبصل المحمر مسبقاً وقليل من الصلصة حسب الرغبة

[*Sandra*]

سلطة الفول باللبن والزيت  

طبعا هذه السلطة جدا طيبة وسهل تحظيرها وموادها متوفرة

شوفو طريقة التحظير

المقادير
   كوب (1) فول
   150 غم زيتون أخضر
   150 غم زيتون أسود
   100 غم لبن مدخن
   50 غم كرفس

 طريقة التحضير
نقوم بخلط الفول مع الزيتون المقطع وثم  نضيف الكرفس واللبن المدخن ونقوم بخلط المواد وثم نقدمها بعد ان تزين

[great hope]

حبي امنية تكدرين تشيلين البصل بس لاتحطين ثوم هواية

[ام الحلوة]

عاشت الايادي على هالاكلات الطيبة والله البارحة سويت شاورمة الدجاج على طريقة اختنا الغالية امنية والقرنابيط على طريقة اخونا الدوري وكانت كلش طيبة وبالنسبة للصيادية من ايد اختنا great hope  بداعة  ومشكور كلمن يضيف طريقة مختلفة للاكلة الواحدة لان حسب المتوفر بالبيت بس حبيت اسال عن طريقة الستيك المقلي لان قريت عنة اكثر من طريقة بس اريد طريقة عراقية واذا سويته مع شنو اقدمه ؟ تقبلو احترامي

[labak]

اختي ام الحلوه
بالنسبة للستبك اني اخذ اللحم شرائح بعدين ادكها بالة الستيك اللي عندي فد حديدة وبيها سنون والجزء اﻻخر سنون مظلعه
اظل ادكها بهدوء واني حاطته بكيس نايلون  , مرات في هاﻻثناء اخلي ثوم ينطي طعم طيب
بعدين اتبلها بالفلفل اﻻسود والملح ولوخها بالطحين اوﻻ وبعدها بالبيض واخر شي فتات الخبز  واقليها بالزيت
هو هذا البوفتيك بس اني بالنسبة اللي نفس الشي
وعوافي وهني

[ام الحلوة]

اي هي هاي الطريقة الحلوة والله عاشت ايدج اختنا الغالية لاباك مو اني دخت بالطرق العديدة فكلت اسال العراقيات المعدلات هم يدلوني وان شاء الله راح اروح اسويها ما دام كلشي جوة ايدي تسلمين وتتقبلي تحياتي

[labak]

بالعافية انشاء الله وهني

[labak]

أمنية عزيزتي ترى محتارين اشنطبخ

[great hope]

السلام عليكم

[*Sandra*]

labak

هلو لابك وردتي شلونج  ليش حبيبة قلبي محتارة شطبخين مو تدللين انت  وكل حبيباتي  بمطبخنة الحلو وهسة راح انزلج أكلة  الج حبي ولكل  اخواتنة

great hope

ياوردة عاشت ايدج على هالوصفات الحلوة  وهذا الاكلة دا اتخيل شكلها  طبقات الرز والخبز المقرمش  ولحم الدجاج  اخ شلون طيبة وعاشت ايديج الاثنين ياوردة

عيوني خلي في بالكم اذا اجه رمضان بخير وسلامة اتسولنه  جدول  مو بس بالاكل  بل بالشرابت والعصاير وانواع الشوربة والحلويات

الف شكر  وهسة راح انزللكم أكلة كولش طيبة

[*Sandra*]

خبز عروق

المقادير
   كوب واحد (1) طحين
   ملعقة صغيرة ملح
   ملعقة صغيرة كركم
   ملعقة صغيرة كزبرة جافة مصحونة+ فلفل اسود
   خميرة
   لحم مفروم
   بصل مفروم
   كرفس مفروم ناعم
   ماء دافئ
   للقــــــلي زيت ذرة

 طريقة التحضير
ضع طحين و الملح و الكركم و الكزبرة و الفلفل والخميرة قلب المكونات مع بعضها
بعدين ضيف اللحم و البصل والكرفس
وأضف الماء الدافئ بالتدريج
نترك العجينة إلى أن تخمر حوالي 30 دقيقه
نسخن الزيت ثم نعمل من العجين أقراص و نضعه في الزيت الساخن
إلى أن تصبح لون ذهبي

وااااااااااااااااااااااالف عافية

[great hope]

عاشت ايدج امنية حبي\

[*Sandra*]

great hope

الف عااافية وهنا حبيبتي  صحيح خبز عروك التنور أطيب
وان شاء الله  ياربي يهل علينا وعليكم وعلى الكل رمضان الخير والرحمة والغفران

وهذا أحلى خبز عروك ألج حبيبتي

[great hope]

تسلمين حبي امنية

[*Sandra*]

great hope
ماكو مثل خبز الأم أطيب منه ماكو وأحلى شيء بيه انه  من ايدها الحنونة الطيبة

وصدك الجاي المهيل روعة  وية خبز العروك 

مليون عوافي وعساكم دوم بخير  ان شاء الله

سلامي للوالدة وللاهل

[*Sandra*]

اليوم راح اقدملكم حلويات خلي انغير شوية 

طبق الحلو اليوم هو زلابية  هسة راح اكتبلكم المقادير وطريقة العمل وكلش كلش سهلة

الزلابــــــيه

المقادير
   2 كوب طحين
   2 كوب ماء
   1 ملعقة طعام خميرة+ 1 ملعقة طعام سكر+ 1/2 كوب ماء دافيء
   رشة ملح للطحين
   زيت غزير للقلي
   شيرة


 طريقة التحضير
1- تعد الخميرة بخلطها مع السكر والماء الدافيء
2- تخلط مع الطحين جيداً ويضاف الماء وتخلط جيداً حتى لا تتكتل
3- تترك لمدة 2 ساعة في مكان دافيء
4- توضع الزيت على النار ويجب أن يكون حامياً
5- تخلط المزيج وبواسطة قمع التزيين والتي على شكل إبرة توضع المزيج في كيس وتصنع في الزيت أشكال دائرية مربوطة
6- تقلى في الزيت ويخرج منه وتوضع في الشيرة لمدة عدة دقائق الى أن تتشرب بالشيرة وثم توضع في مصفاة
ملاحظات:
1- اذا كان الزيت ليس غزيراً ولاحامياً لاتتكون أشكال الزلابية بالشكل المضبوط وإنما تخرج بشكل مستوي
2- اذا كان المزيج سائل جداً أي تركت مدة طويلة لاتتكون الاشكال يمكن اضافة ملعقتين من النشاَ وتترك لمدة عشر دقائق
3- عدم استعمال الشوكة التي تستخرج منها الزلابية من الزيت أو التي تقلب بها في اخراج الزلابية من الشيرة لكي لاتحترق في الزيت


والف عااااااااااااااااافية  وهنا

[labak]

الله على خبر العروق وشلون عرفتي اطيب شي عندي بالدنيا خبر العروق وخصوصا خبر التنور اويا الجاي المهيل ومن ايدين   امي  يا سلام
تسلمين يا حبيبه واليوم راح اسوي
بالنسبة للزﻻبيه بس اطحين ومي وخميرة ؟؟؟؟؟؟
راح اجربها انشاء الله واكلج اشراح تطلع عندي وﻻ مره طلعت عندي زينة
شكرا

[y.a.r.a]

عااااااااشت ايدج حبي اموووووووونه على هذا الموضوع
بس حبيبتي رجاءا هذا الموضوع وقفواااا برمضان
اذا هسه مدنتحمل برمضان شراح ايصبرنااااااااااا للفطوووور

حبيباتي كلكم عاشت ايديكم الجزيره دتفحفح من الريحه الطيبه
حتى الاخوه الاعداء كلهم اجو ااااادخلوااااا للموضوع على ريحة الاكل


حبي امونه هذا الي سويتي عروق الطاوه المقلي ايخبل ويه جاي العصريه
وكل شي يرهم بالريوك وبالعشه ويه الجاي ولا اطيب

[y.a.r.a]

تبسي الدجاج
انطيكم وصفه كلش سهله وكلش طيبه

تبسي الدجاج اكيد كلكم اتسواااااااا وانواع تباسي الدجاج
واني راح اسويلكم تبسي دجاج نوع اخر

اتقطعين الدجاجه قطع متوسطه الحجم
اتجيبين اللبن اتبلي بالملح والفلفل الاسود واذا اتحبين اتضيفيله كمون
اتغطسين كل قطعه من الدجاج باللبن واتسفطيها بالتبسي
اما تبسي بايركس او تبسي تيفال
واذا بقه بعد لبن  رشي فوكاها ودخليها بالفرن
يمكن تقطيع البطاطا قطع كبيره واضافتها للتبسي

اشعلي الفرن الفوك والجوه الى ان يحمر الدجاج
وطلعي بعد ساعه ولا احلى ولا اجمل ولا اشهى
مقرمش ومحمر والرائحه الزكيه تدخل الخياشيم بدون استاذااااااااان

اذا حبيتي تسلقين الدجاج قبل متخليها بالتبسي اتوفرلج في وقت الشوي واتقلل من الدهن مالت الدجاج
وتستعمل الطريقه العاديه بالسلق باضافة الملح وورق الغار والقرنفل والدارسين
وشيليها قبل متنضج وغمسيها بصلصة اللبن وسفطيها بالتبسي كما سبق شرحه
واكلوا بالف الف عااااااافيه

[*Sandra*]

يارا حبي  اشكرج على  مرورج على الموضوع واتمنى تشاركينا بوصفاتج الطيبة
حبي يارا اني هم اكول شلون بينة برمضااان نشوف هذا الاكل الطيب ومن ايادي نسوان عراقية اصيلات  الله يصبرنه  

عااااااااااشت ايديج حبيبتي على التبسي مال الدجاج  وان شاء الله راح اسوي على الغدة ان شاء الله

تسلمين وردة

[alazawi]

يارا سويلي تبسي دياي 


امونة شطابخة اليوم 

[*Sandra*]

عزاوي اليوم غيرنه  سوينه زلابية طبق حلو
يارا اليوم طبخت النه تبسي يجنن عاشت ايدها ومكانك  خالي عزاوي  والله عليك شتريد أكل طبخ  كولنه وتدلل

[alazawi]

زلابية 
اريد اكل اكل  شنو زلابية 

مشتهي برياني 

اكلو للتبسي مال يارا 

انتي شطبختي اليوم 

[*Sandra*]

سويت خبز عروك عراقي  عزاوي الف عافية ان شاء الله

[alazawi]

عاشت الايادي 

اريد برياني هاي شسوي حتى لو صور نشبع بالصور  المهم اكل 

[*Sandra*]

اوكي باجر بسلامة راح اطبخ برياني واول ماعون بأسم عزاوي دالاس وتأمر أمر والف عافية

[*Sandra*]

طريقة عمل البرياني العراقي بالدجاج

المقادير صدر دجاج بصلة كبيرة، مكعبات بطاطا كبيرة، مكعبات 2 كوب تمن بهارات مشكلة (كاري_ نومي بصرة_كبابة الصين_فلفل أسود_هيل (حبهان)_ ملح) الطريقة نسلق الدجاج حتى النضج. .1 ننقع التمن بالماء. .2 نحمس البصل في قليل من الزيت ثم نضع عليه الدجاج بعد أن (يفلس الدجاج من العظام). .3 تقلى مكعبات البطاطا حتى تشقر. .4 نضع البطاطا على البصل والدجاج . .5 نطحن البهارات ونضعها على الكمية السابقة . .6 نطبخ التمن، بوضع قليل من الزيت ثم نضع التمن المنقوع ونضع الماء ونتركه حتى ينشف، ثم يوضع على نار هادئة. .7 نخبط الكمية السابقة مع التمن جيداً ثم يقدم. ألف صحة وهناء.


اخوية عزاوي اتفضل  عيوني هذا ماعون برياني الك  وتدلل

[alazawi]

راح اكتفي بالصوره واتذكر طعم البرياني:-[

شكرا امونة 

[الهيفاء]

وااااااااااااو وااااااااااااااااااو واااااااااااااااااو هاى شنو هالاكلات الطيبه مبينه كلش يابه صدك عاشت الايادى العراقيه الاصيله الى من يوم يومها تعرف طعم الطبخ والنفخ

باجر راح اسوي زلابيه عجبتنى الى يريد ياكل وتعجبه الزلابيا يتفضل بس يجيب وياه باقة ورد وبطل بيبسي 

وراح احاول اقدملكم انى هم فد طبخه لو تريدون سلطه 

[الهيفاء]

هاى خواتى شلونكم اموركم احوالكم اليوم طبخت طبخه وعازمتكم كلكم عليها 
طريقة عمل كبة حامض
مقادير

كوبين برغل
كوبين سميد
راس بصل كبيره
شويه كرفس
لحم مفروم للحشوه
بهارات على حسب الذوق
فاصوليا خضراء ، طازه او معلبه
معجون طمامه
قليل من الليمون دوزي
قليل من الزيت
.........................
تغسلين البرغل وخلي عليه شويه مي غطيه و خليه على صفحه

تفرمين اللحم و البصل و الكرفس و غسليهم

خلي اللحم على النار الى ان ينشف المي و ضيفي علي البصل و الكرفس و البهارات و الملح و من يخلص خليه بالثلاجه الى ان يبرد
جدر كبير شويه خلي مي و شويه ملح و ليمون دوزي و خليه على النار من يغلي ضيفيله شويه زيت مع معجون طماطه

اقطعي السيليري ستيكس الى قطع صغار و ضيفه الى المي المغلي ، طبعا هذا حسب الذوق انتي تقدرين تضيفين اي خضراوات على حسب الرغبه
جيبي البرغل و هسه يكون شرب المي الزايد عليه و صار ناعم ، ضيفي عليه شويه ملح و اعجنيه هسه من غير ما تضيفي عليه السميد الى ان يتماسك شويه .
هسه ضيفي عليه السميد و استعملي مي مع ايدج و اعجنيها الى ان تصير عجينه متماسكه
سويه منه دوائر صغار كما في الصوره
احشيها بالحشوه كما في الصوره ، تقدرين تسويها على شكل بيضوي اذا تحبين
ملاحظه : من تخلين الكبه بالجدر لازم المي يكون يغلي حتى الكبه لا تنفتح

الان اذا كانت الفاصوليا الي تستعمليه معلبه خليها اخر شي لان هي اصلاً مستويه ,
اما اذا لا فضيفيها مع السيليري ستكس و ممكن تضيفين عليها سلق اذا تحبين

حركيها على مهل حتى لا تنفتح و خليها الى ان تستوي

هذا الشكل النهائي














و الفـ عافيهـ


تحياتى  الهيفاء

[*Sandra*]

تسلمين هيفاء حبيبتي وعاشت ايدج  على الاكلة الطيبة
حبيبتي السميد ضروري وية البرغل ؟؟؟
اني استخدم الجريش المخلوط بالبرغل ؟

تسلمين وردتي

[great hope]

عاشت ايديكم بنات على هالطبخات

[*Sandra*]

great hope
ايدج العايشة حبيبتي تسلمين عيوني  العراقيات كلهن معروف عنهن بالندارة والشطارة
الله يحفظ الجميع

[*Sandra*]

اصابع الكنافة المقلية

المقادير
   500 غرام عجينة كنافة جاهزة
   مهلبية جاهزة بالقشطة
   زيت أو سمن للقلي
   قطر جاهز

 طريقة التحضير
نأخذ قسم من شعرية الكنافة بعد جعلها على شكل أصابع ووضع جزء من المهلبية ثم لفها على شكل أسطواني وترتيبها بالمقلاة, ثم نسخن الزيت أو السمنة على جهة ثم سكبه على أصابع الكنافة وقليها لغاية الأحمرار ثم وضعها بالقطر ( الشيرة الجاهزة ) وأكلها بألف عافية.....

[الفريدو]

عاشت ايدكم على هاي الطبخات

بس يرادلها  ستكان جاي لان انتخمنه 






اخوكم : الفريدو

[الهيفاء]

الف عافيه على قلب الجميع واختى امنيه كلش طيبه الكنافه تسلم الايادى وشكرا الج دادا

الف رديو استكان جاى ابو الهيل الك مو تدلل



الهيفاء

[*Sandra*]

الفريدو صبتلك جاي هيفاء الله ينطيها العافية بس اشو مدفعت فلوس الاكل ؟

هيفاء عااااااااااااشت ايدج حبي على الجاي المهيل شميت ريحة الهيل وطبيت للموضوع 

[alazawi]

شطابخين اليوم  جوعان  مشتهي اكل عراكي 

[*Sandra*]

عزاوي كافي موزين عليك تاكل هواي اخاف تصير سمين وينكسر كرسي الامبراطر ويارا تموتنة تلعب بينة  جولة 

[alazawi]

  ياسمن امونة هو اني كنت 73من كنت بالعراق العظيم  وهسة 70  اريد اكل  اكلهم هنا مينجرع 

[*Sandra*]

عزاوي  من صدك احجي  مو من جذب  شوفلك أكلة من هذا الموضوع تعجبك وروح للسوك اتسوك موادها وعلى كيفك  اطبخها  وأكل  الف عافية  ( شتسوي مضطر لحين وصول بنت الحلال ) هي شبيها عاصية متجي؟؟ كوللها يلة عاد خل تجي 

[alazawi]

امونة يابنت حلال 

[*Sandra*]

ليش عزاوي    شنو ناوي متزوج  لو أتأثرت  بأفكار  ضيوعي  شاد حرابة وية النسوان 

خوية عزاوي اتوكل على الله وخلي الاهل يتوكلون على الله هماتين ويخطبولك بنت حلال والله يرزقكم بيبي حلو تلتهي بيه 

راح اغير اسم الموضوع من طبخ الى خطبة

[الهيفاء]

ههههههه عافيات خيتو امنيه  

عزاوى اليوم نطبخلك  بيتزااااااا شتكوووووول :Dهاى قبل ما تجى بنت الحلال  

الكمية تكفي: 4 أشخاص  
 
وقت التحضير: 30 دقيقة  
 
وقت الطهي: 30 دقيقة  
 
المقادير: مقادير العجين:
2 كوب دقيق
1/8 كوب زيت ذرة
1 بيضة
ذرة ملح
قطعة خميرة في حجم عين الجمل
ماء دافئ
مقادير الحشوة:
بسطرمة أو لحم معصج أو تونة
2 ثمرات فلفل أخضركبيرة
جبن رومي
جبن شيدر
جبن موزاريلا
زيتون أسود مخلي
شرائح طماطم رقيقة
مقادير الصلصة:
3م ك زيت ذرة
بصلة متوسطة مفرومة
عصير 3 ثمرات طماطم
1 م ك دقيق
ملح وفلفل أسود وبهارات  
 
التحضير: 1- وضع ملعقة سكر للخميرة وبعض الماء الدافئ لتخمر
2- يتم عمل العجين وذلك بإضافة الملح للدقيق ثم إضافةالخميرة للدقيق وإضافة الزيت والبيضة وتعجن جيدا ويضاف له الماء الدافئ إذا احتاج له حتى تنفصل العجينة عن يديك ولا تلتصق بها، وتترك لتخمر وترتفع.
3- يتم عمل الصلصة وذلك بوضع الزيت في الحلة ووضع البصل المفروم معه ويقلب حتى يصبح لونه ذهبيا ثم يضاف الدقيق ثم عصير الطماطم ويترك ليغلي لدقائق ثم يضاف الملح والتوابل ويترك لتبرد.
4- يفرم البسطرمة والفلفل الأخضر والأجبان ويقطع الزيتون.
5- توضع 3 م ك زيت ذرة في الصينيةثم تفرد عليها العجين بسمك 1 سم وتترك لتخمر في الصينية.
6- توزع الصلصة في الصينية بالتساوي بحيث تغطي العجين.
7- يرش على الوجه -بالتساوي- البسطرمة أو اللحم المعصج أو التونة (بعد تصفية الزيت منها وتفتيتها) ثم الفلفل الأخضر ثم الأجبان ثم الزيتون ثم حلقات الطماطم ثم يساوى الوجه باليد بالضغط الخفيف جدا
والف عافيههه




الهيفاء

[alazawi]

لا ان شاء الله امونة  اي امونة خل نقلب الموضوع 
عيني الهيفاء عاشت الايادي بس اني احتاج اربع ايام لتحضير البيتزا ويمكن احرك البيتزا بالنهاية  خو اكو جاهزة  ليش هذا العذاب 

[*Sandra*]

         هيفا مممممممممممم شلون طيبة البيتزااااااااااااااا عااااااشت  ايديج وردة

عزاوي الله كريم  الله يوفقك  يا طيب

[الهيفاء]

لاشنو جاهزه الى تسويها بيدك اكيد تكون اطيب اكل السوك مو طيب  اتعلم من هسا تطبخ قبل ما تزوج ههههههههه

وايدج السالمه عزيزتى امنيه

[alazawi]

 

[الهيفاء]

  ::)عزاوى ليشش

[alazawi]

  

[doori]

مرحبا
عيني خواتنا اني شاب واحب اطبخ بنفسي بالبيت وما اجب اكل اكل برا حتى الهمبرغر اسوي بالبيت ويطلع اطيب من المطاعم ودراستي اصلا" كانت سياحه وفندقه قسم مطبخ .....المهم
اختي الهيفاء
عندي طريقه للكبه بس اني ما خلي سكميد اجيب مثلا" نص كيلو برغل نام اقسمه نصين نص اطحنه بالطاحونه يصير نام وبعدين اضيفه للنصف اثاني وارش عليه مي دافي الى ان ينكع و اغطي وراها بفتره جم مره اعجنه واضيفله مي ويه كل مرا بس رشه بسيطه وتطلع كل طيبه للقلي مو للسلك لكن الحشوه مال لحم هم لو تحطيلها شوية سماك تطلع اطيب واطيب جربيها والف عافيه



حمودي
الاردن_عمان

[الهيفاء]

انشالله اجربها اخى حمودى واكيد راح تكون طيبه واهلا وسهلا بيك بالدردشه

[مظلومه سوادي]

اطيب شي الخميعه

جانت بيبيتي مسدوحه الله يرحمها تسويلنياهه عالريوك صدك طيبه وخاصة بالشتا

تحط بجدريه عالنار
حليب سائل
شوية شكر
تفت الخبز
وتحط شوية زبد

ننتظرهه لمن يتشرب الخبز زين
وتؤكل حاره
صدك طيبه