مشكورين شباب على الردود المفيدة وبكل انواعها..
بس شباب انريد معلومات عن الفيزا من بغداد حتى لو بيها تبصيم منو عندة معلومة عن هاي الفيزا ارجو الفائدة لان اريد اطلع فيزا شنغن الى اوربا وعيني ابو 11 مرة رايح الي اوربا اريد توضح شنو الوضع هسة بالسفارات بالعراق ومنو ينطي فيزا علما اني عندي هوية تجارية وكتب شركة وكشف حساب بنكي وتأمين صحي..
تحياتي للطيبين وصاحبين الردود الجميلة.
عزيزي ..ابو 11 مرة ايجاوب و ايكول
السفارة الايطالية تنطي من بغداد
السفارة الاسبانية متنطي بس من سوريا
السفارة الالمانية تنطي
السفارة الايطالية اسهل وحدة بس مرات ايدكون الناقصة و ينطوك محلية مو اوربا
الالمانية اذا اوراقك مضبوطة مينطوك رفض
اكو ابسوريا و اببغداد مكاتب سياحة ايدبرولك الفيزا بس مثل ما كلت قبل انه صار فترة ممجيك
ملاحظة:- كلت انه عندك تأمين صحي..... عزيزي التأمين الصحي حسب السفارة اللي دتقدم عليهة لأن كل سفارة معتمدة شركات تأمين و التأمين بالمدة ...يعني اذا دتقدم شهر اخذ تأمين ابو التلث اشهر حتة ايغطي الفترة مال تأشيرة و ألخ..الخ
ملاحظة 2:- السفر من اقليم كردستان اسهل اذا رتبت كتاب من غرفة تجارة كردستان ...ميرقضون احد مناك (بس اشوية صعب ينطون كتاب من كردستان)
و حلوة هاي مال ابو 11 مرة....مشكور
تقديري
حبيبي مشكور على الرد الحلو ابو 11 مرة ههههههههههههههه شنسوي انت مقطع اوروبا بهاي ال11 مرة هع هع هع ترى اشاقة داد.
المهم عيني انت عبرت السفارة الفرنسية وهي اكثر وحدة هسة تنطي فيزا من عدها وموجود موقعها بس اني اريد بعد كم سفارة وشي ثاني اخوية اني ترى عادي اذا بصمت ماكو مشكلة اني اريد اروح زيارة فقط وارجع المهم اطب اول مرة يعني شغلة تبصيم ما تبصيم ما تهمني لذالك كتلك اريد شي اني اراجع بيه وعندي مقومات تساعدني لان كتلك عندي هوية تجارية وعندي كشف حساب وعندي كتاب شركة!!
واريد اسالك عيوني اني يمكن راح تجيني دعوة من اسبانيا يعني لازم اروح لسوريا علمود اقدم؟؟!!انتبهلي على هاي الشغلة..
وبالنسبة لتامين الصحي شتنصحني شسوي؟مال كم شهر لان اريد تلث اشهر وارجع..
ابو 11 مرة مسويها باب الشرجي واوروبا ورى بيتكم ههههههههههههههههه.
مشكور عيني على الرد مرة ثانية..
هههه....
عيني بالنسبة للفرنسية فمكتبتهة لأن ممجربهة .... وما اكدر اكول شي اني ممتأكد من عندة
وبالنسبة للأسبانية , لازم تطلع السوريا لأن السفارة الاسبانية اببغداد متنطي و اكو قانون ايكول للعراقيين المقيمين بالعراق التقديم من السفارة الاسبانية ابدمشق
و دير بالك واحد ايكلك من الاردن تكدر اتقدم ..لأن بس المقيمين بالاردن الهم حق ايقدمون على فيزا الاسبانيا من عمان
و بالنسبة للتأمين الصحي اذا اتريد اتحصل اتلث اشهر فأنصحك سوي مال ست اشهر او سنة.... صح كلفة اكثر بس هيجي راح تنطيهم انطباع انه انتة امورك زينة و متهتم للمصاريف (يعني دبل)
وترة اوربا مو ورة بيتنا .................ابصف بيتنا (للتصحيح) هههههههه
وملاحظة اخيرة
اذا انت مطالع الاوربا قبل صعب جدا ينطوك 3 اشهر و غالبا ينطوك one month single entry يعني دخول مرة واحدة لمدة شهر
و معلومة اخيرة
السفارة الاسبانية فرقها عن باقي السفارات انه من تطلعلك الموافقة ايريدون من عندك تذكرة طيارة مرجع حتة ايختمولك الفيزا (وهاي ما دائما ايطلبوهة)
و حتة اعيدلك الاشياء المهمة المطلوبة من عندك :
1- دعوة (من شركة او من شخص ) تندز للسفارة مباشر و ينطوك نسخة منهة (يعني الشركة او الشخص ايدزهة بال DHL للسفارة مباشر و ايدزلك نسخة منها ( ولازم الدعوة ينكتب بيها اسمك مثل ما بالجواز و ينكتب سبب الزيارة و الدعوة و تاريخها و مدتها يعني الاسم و الغرض من الزيارة و مدة الزيارة)
2- تأمين صحي من شركة معتمدة يم السفارة اللي دتقدم عليهة
3- حجز فندق مبدئي (لازم تاريخ الدخول للفندق ابنفس تاريخ الزيارة اللي بالدعوة ونفسة اللي انتة كاتبة ابطلب الزيارة و مدة البقاء بالفندق نفس الشي)
4- حجز طيارة مبدئي (نفس تاريخ الزيارة اللي بالدعوة والطلب)
5- كشف حساب بنكي لست اشهر
وخلي يمك احتياط هوية الاحوال و شهادة الجنسية مترجمة و مصدقة من مكتب ترجمة معتمد بالعراق
و انشاء الله تمشي امورك
مع تحياتي ...ابو 11 مرة
الكاتب
