فسنجون أيراني.. ودولمة تركية.. خلي ياكلون بصاية خالهم* !!!
جلال جـرمكَا * / سويسرا أيام زمان كنا نتعجب من تركيبة الحكومات اللبنانية.. حتى أكون دقيقاَ كنا نسخر من تلك التشكلية الطائفية الغريبة :
• رئيس الجمهورية مسيحي ماروني!!.
• رئيس الوزراء مسلم سني!!.
• رئيس مجلس النواب ( البرلمان ) مسلم شيعي !!.
• الوزارات السيادية مقسمة بين ألأديان والطوائف والمذاهب !!!.
نعم كنا نستغرب..لابل نسخر منهم ومن تلك التشكلية التي لم نستطع أن نجد لها تفسيراَ!!.
ولكن اليوم.. يا سادة ياكرام... نحن ألأغرب .. وهل ينكر ؟؟؟.
• رئيس الجمهورية كوردي سني له نائبان عربيان / شيعي وسني !!.
• رئيس الوزراء عربي شيعي له نائبان كوردي وعربي من السنة . !!.
• وزير الدفاع عربي سني!!.
• وزير الداخلية عربي شيعي !!.
• وزير الخارجية كوردي سني!!.
• وزير النفط عربي شيعي !!.
• هلم وجرأ في بقية الوزارات.. مقسمة على أسس طائفية 24 قيراط لاتقبل النقاش.. ومن يقول لاء.. أرد عليه وبأعصاب أبرد من الثلج وأقول: راجع نفسك وضميرك !!.
• بقية ألأجهزة ألأمنية وألأستخباراتية مقسمة بالتساوي.. وفي بعض ألأحيان تلك الكفة أكثر من هذه وبالعكس !!.
من المعلوم.. ومن ( غير ليه ) هنالك تدخلات مرئية من قبل ألأخوة وألأشقاء وألأعزاء وألأحبة..ألأخوان / دول الجوار.. لكل دولة أجندتها وبرامجها ومصالحها وتخطيطها وعالمكشوف... تدرون ليش ؟؟؟.
لكون الحكومة ضعيفة... ماعندها مقومات حكومة... لها مشاكل داخلية بالمئات.. وألأهم هنالك من محسوب على / زيد.. وألأخر على عبيد... ممكن قصدي واضح !!.
ــ حمدان ................. شدكَول ؟؟.
+ نسيت شغلة مهمة ..
ــ وهي..
+ أشو ما ذكرت ألأخوة المسيحيون والصابئة وألأيزيدية ؟؟. .. شنو هذولة من غير وظائف؟؟؟.
ــ حمدان.. على شنو أذكرهم.. هم هساع جازوا من الوظائف.. أشو واكَعين بيهم دكَ ويامن يحميهم.. يا وظائف ؟؟؟... نصهم هاجروا وتركوا كلشي للأرهابيون والقتلة !!.
+ أبختي تمام ...
ــ حمدان.. فدوة هالوجه .. شنو أخر ألأخبار..؟؟.
+ هاااه .. أخر ألأخبار .. فسنجون... ودولمة .. !!!!!!!!
ــ حمدان.. هاي شبيك..؟؟ أكَولك أخر ألأخبار.. شنو فسنجون؟؟ شنو دولمة..؟؟ شنو جوعان...؟؟... لو أمسخن..؟؟ مريض..؟؟؟؟.
+ لاء..
ــ لعد شنو.. ماتحجي؟؟؟.
+ أنت تفتهم بس تريد تحجيني..
ــ يشهد الله ما أفتهمت قصدك.. أحجي..
+ زين أخوية :
السيد المالكي .. زار طهران.. طبعاَ من غير مناسبة.. البلد يغلي والحكومة على شفة ألأنهيار.. أنسحابات بالجملة وهو في طهران ...ليش؟؟؟.
ــ وأني شمدريني .. يجوز راح يكحل عيونه برؤية الجماعة .. ليش لاء ؟؟؟.
+ زين من جهة أخرى.. الدنيا مكَلوبة كتل برلمانية ووزراء منسحبون ونائب الرئيس / طارق الهاشمي بتركيا... ليش؟؟.
ــ حمدان.. تحجي لو أروح ؟؟؟.
+ لاء أحجي.. بس لاتقاطعني..
ــ زيييييين.. بس أحجي..
+ يعني ماتعرف ليش السيد المالكي راح لأيران والسيد الهاشمي راح الى أنقرة..
ــ لا وحق كل حرف اللي بالمصحف... أنت كَول..
+ ها عليك نور.. بالحقيقة والواقع.. السيد المالكي تعبان.. هلكان.. سهران.. مغثوث... ياكل بروحة.. مايتهنى حتى باللكَمة ..
ــ وتاليها...؟؟ .. أروح ؟؟ لو تحجي؟؟
+ هيواشك علي.. لذلك وهو كَاعد عجبة يأكل فسنجون أيراني أصلي غير مقلد ..
ــ وماياكل منهو لازمة..؟؟.
+ لاء خالي.. لاء.. الفسنجون ألأصلي لايطبخ الا في أيران... لذلك قرر فوراَ السفر الى أيران.. وراح أثبتلك كلامي.. زين.. مقابلة السيد المالكي للرئيس ألأيراني شفت العلم العراقي وراه ...؟؟.
ــ لاء..
+ شفت.. الزيارة جانت مستعجلة.. لذلك مالحكَوا يحطون حتى العلم العراقي.. لكن العلم ألأيراني كان بظهر الرئيس ألأيراني...
ــ زين وشنهو قصة الدولمة..؟؟.
+ خوش سؤال.. السيد الهاشمي سني.. له علاقات مع أنقرة السنية.. ما أن سمع أن المالكي أشتهي الفسنجون وسافر الى أيران.. حتى هو هم أشتهى دولمة تركية وقرر السفر الى أنقرة لتناول جدر دولمة خمس نجوم !!!.
ــ حمدان .... صدك تحجي.. لو تصنف ؟؟.
+ لا أصنف ولاهم يحزنون... وإلا شنهو داعي هالسفرات وبهذا الوقت بالذات ..؟؟
ــ طيب والشعب..؟؟ والناس..؟؟ .. والوطن ..؟؟. .. ومعالجة المشاكل ..؟؟.
+ خوش سؤال.. هذولة الهم / الحصة التموينية وأنقطاع الكهرباء والماي وأنعدام الخمات وألأنفجارات والخطف والقتل..وو... بعد شيريدون ؟؟ كَول مو خوش حكومة؟؟؟.
ــ بس نسيت شغلة مهمة..
+ وهي ؟؟.
ــ والرئيس / مام جلال شوكت يسافر..؟؟.
+ وين..؟؟.
ــ قريب .. مو بعيد .. الى السليمانية..
+ وليش؟؟ الجماعة مو هنا.. غير يرجعون؟؟؟.
ــ أخاف على غفلة يكَعد ويه نفسه ويشتهي / تمن نكَازة وعلي شيش محمر وخبز صاج ولبن أمدخن ..
+ بالقرآن..الطيارة حاضرة.. يدكَ سلف وينزل بمطار سليمانية.. طبعاَ قبل ما يطير يخابر.. يحضروله المقسوم.... ورأساَ للحدود .. وأجتماعات بقادة البيشمركَة ..
ــ ولك حمدان.. يامقسوم..؟؟ .. يا حدود..؟؟ هو عليش سافر..؟؟
+ غير على مود ضرب الحدود من قبل جماعة الفسنجون؟؟؟.
ــ ولك حمدااااان.. على مود الــ ( علي شيش ) !!!.. ياحدود ؟؟؟... بسسسسس.. يزي.. راح أنفجر...
+ ليششششش...؟؟.
ــ بسبب الفسنجون والدولمة والعلي شييش... عاشت الحكومة..عاش.. عاش..
+ شوف أكَولك والله أنت أكبر منافق..
ــ أشكرك أغاتي...بشرفك المنافق يحجي الحق ؟؟؟ ما أعتقد.. أحنه نظل نحجي خلي يكَولون علينا كلشي.. المهم آلآف يقرأون ويسمعون كتاباتنا وكلامنا..
+ من هالناحية صحوووووح ... بالمناسبة.. خلي أحنة هم أنسافر..
ــ وين يامصخم ..؟؟.
+ الى هذاك الصوب.. أشتهيب / ثريد باكَلة وبيض بالدهن الحر وكاسة طرشي.....
ــ أمشي.. هي بقت علينا ...؟؟؟؟.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
• خلي ياكلون بصاية خالهم / مثل شعبي .
• كاتب مشاكس ..كتاباته مملؤة بالأخطاء النحوية ( الله وكيلك ثلاثة أرباع كتاباته خطأ في خطأ ومايتوب ومايكَعد راحة.. هم زين مايعرف العربية بطلاقة ).. في منتصف التسعينيات من القرن الماضي نجا من حبل المشنقة و بأعجوبة.. الله يستر من ألأيام الجاية ... رقبته مو اله !!!.
