السلام عليكم
اخواني الاعزاء موضوعي اليوم عن تامين السيارة و هو موضوع جدا مهم من وجهة نظري و حساس جدا و راح ايكون هذا الموضوع مفصل جدا من اجل فائدة الجميع و بي اهم و احسن الشركات مال التامين و ارخص و اغلى و الجو محترك
التامين على السيارة من المواضيع المهمة في امريكا لان هذا الشي الي ايغطي حالات الحوادث الي اتصير بالسيارة لكن مع الاسف بعض العراقيين ما ايئمنون على السيارات مالتهم و هذا الشي ايخليهم بمواقف تعبانة
نجي هسة على تفاصيل الموضوع الدقيقة
من اجل سياقة السيارة في الولايات المتحدة لازم ايكون عندك ثلاث اشياء مهمة و هي
1 رخصة السياقة
2 الرجستريشن
3 تامين السيارة
و هو موضوعنا لهذا اليوم و كل يوم تامين السيارة
تامين السيارة انواع و حسب الشركة الي التامين لكن المشكلة ايكون نوعا ما غالي اذا ما عندك تاريخ سياقة في الولاية الي انت بيهة و ايكون غالي اذا عمرك جوة الثلاثين سنة
و ايكون غالي اذا كانت السيارة حديثة و انت طالب كفرج عالية
او حتى نفهم فكرة التامين راح اشرحهة بالتفصيل ركز وياية
على سبيل المثال عندك كامري موديل 2000 اتريد اتامن عليهة
يتحدد نوع التامين بالاعتماد على المسافة الي ماشيتهة السيارة ( المايلج)
محرك السيارة اذا كان 6 سلندر او 4 سلندر و السبب انو السيارة الي محركهة جبير ايكون تعجيلة كبير و بهذة الحالة السيارة معرضة للحوادث اكثر من السيارة ذات المحرك الصغير ( شوف اشكد الواتة )
السيارة اذا كانت سالفج او كلين تايتل
انواع التامين الاساسية
التامين على الطرفين ::
و يعني انت امامن على سيارتك و سيارة الشخص الي راح تضربة الله يبعدنا و اياكم من الحوادث
يعني اذا سويت حادث لا سامح الله راح شركة التامين تدفعلك فلوس الك و الى الشخص الي ضربت سيارتة
ملاحظة السيارات السالفج تايتل لا يشملها هذا التامين في معظم شركات التامين و ايكون تامين السيارة السالفج تامين على طرف واحد
تامين على طرف واحد :::
و هو التامين الي اتامن بي على سيارة الشخص الي رح تضرب سيارتة
يعني اذا سويت حادث راح شركة التامين تنطي فلوس للشخص الي انت ضاربة لكن سيارتك مالهم علاقة بيك و راح كلشي ما ينطوك
على العموم ايكون التامين ارخص نسبيا من التامين السابق
سمي سعرك ::
و ملخص هذا التامين انو انت اتخلي مبلغ التغطية الي يعجبك يعني ممكن انو اتخلي المبلغ يوصل الى 300 الف دولار و سبب هذا التامين و الفيكة شنو هسة اني اكلك
انو الانواع مال التامين السابقة اتكون مبلغ التغطية مالتة الة حد 50 الف دولار في احسن الاحوال و اذا دعمت شخص سيارتة غالية و اذيتة او سببتلة عاهة مستديمة راح ايقاضيك و اكيد راح ينحكملة تعويض و لنفرض انو المبلغ كان 200 الف دولار و بهاي الحالة شركة التامين راح تدفع 50 الف فقط و الي هو مبلغ التغطية و الباقي انت تدفعة من جيبك او السجن و اتونس خاليييي
لذلك الامريكان البيض المضبوطين تامينهم ايكون ارقى شي و مبلغ التغطية مالتة فد 500 الف او 300 الف لان ايعرفون الفلم
اكو خدمات اخرى تنطيهة شركات التامين و الي هية (التونك) او سحب السيارة بكرين و اذا خلصت بانزين اتخابر على شركة التامين ايجيبولك بانزين بس تكدر اتسويهة يمكن 3 مرات كل 6 اشهر و غيرهة من الامور بس كلشي بفلوسة
هسة نجي على المهم والي هو شركات التامين و هاي لستة بشركات التامين
ادخل على هذا النك راح تلكة كل شركات التامين في امريكا
http://en.wikipedia.org/wiki/List_of_United_States_insurance_companiesعندك من اهم الشركات و الي هي
تربل اي هذ النك
AAA AUTO INSURANCE
ال ستيت هذا النك
www.allstate.comبروكرسيف و هذا النك
www.Progressive.com ميركوري و هذ النك
www.MercuryInsurance.com كايكو و هذا النك
www.GEICO.comو يوجد الكثر الكثر من شركات التامين لكن هذة اهم الشركات و تعد شركة اتربل اي افضل شركة و اغلى شركة لكن يوجد تخفيض على الفنادق و شركات الطيران لمشتركين هذة الشركة
اخوان شركة ميركوري من الشركات الرخيصة جدا و الي اتريد تجمع زبائن و من اتخابر على هذة الشركة اتناقش وياهم و حاول انو اتحصل تخفيض و الي ايسمونة السائق الجيد كلهم اني اسوق بلدي و صارلي مدة و حاول انو تقنعهم راح اتحصل خوش تامين و خوش كفرج و بسعر مناسب جدا يوصل الى نصف سعر التامين الي راح تطلبة منك بقية الشركات و على سبيل المثال
اتربل اي كل تيرم (6 اشهر) تاخذ 700 دولار عليك لان انت جديد بامريكا
ميركوري تاخذ بالتيرم 200 دولار و اقساط يعني كل شهرين تدفع 50 دولار
انصح بيهة ميركور لكن السلبية الوحيد انو اذا تاخذ تكت وحدة ايصعدون سعر التامين عليك للضعف فكون حذر لا اكثر
سبب كتابتي لهذا الموضوع انو معظم العراقيين مشتركين بشركات مال تامين غالية و اني انصح بشركة ميركوري و انصح انو اذا اتريد اتروح لشركة مال تامين اخذ امريكي وياك لان اكيد يعرف يتفاهم وياهم
نستنتج من ما سبق
*** التامين ضروري جدا و لا اتسوق سيارة بدون تامين لان راح اتعرض حياتك لخطر
*** شركات التامين انواع و ارخص شركة ميركوري لان ايريدون يجمعون زبائن و ينطك تخفيضات على رخصة السياقة العراقية
*** تكدر اتسوق سيارتك بدون تامين لكن الغرامة اذا لزمك شرطي مرور اتكون 330 اقل شي هاي بكاليفورنيا و انت صاعدبينما تكدر تدفع 200 دولار و راسك بارد و انت مرتاح
اي شي تحتاجو اني حاضر الى اي سؤال
ربي ايوفق الجميع
