موضوع جديد خلاني ما اعرف راسي من رجليه ((تحديث))

[ابو عبد الله التكساسي]

سلام
طبعا هاي التجربه هي بحد ذاتهه امتحان لاي عراقي جديد بامريكا ومهم جدا ان اسولفلكم عليهه حتى لا تنصدمون من تصير عدكم
الموضوع معقد بس راح اختصره واوضحه قدر المستطاع ...
جماعتي يعرفون انه اني اشتغل  بشركه ترجمه ماخذه 80 % من شغل الترجمه بالعالم (( يعني شركه جبيره كلش ))واني بالنسبه الهم مجرد موضف لا ازيد ولا انقص وما عدهم اي مانع يصرفوني من العمل وبدون مبررات وهذا الشي مكتوب بالعقد
اكو شركه لوجستيه متوليه الرواتب والاجازات والمعاملات المصرفيه والتعيين والفصل - شركه مستقله - متعاقده ويا شركتنا الاصليه لهذا الغرض, هذولي خسروا العقد مالهم ويا الشركه الام الي راح اسميهه ل ل س , خابرو علينا وكالو راح يتصلون بيكم شركه جديده علمود يسوون تعيين جديد - يابه اوكي احنا ما عدنا شي ينظم - كالونا الشركه الجديده من اتصلوا بينا انه اكو فد شي اسمه (( كنسومر كردت ريبورت)) واهنا بدت المشكله والسبب انه هذا التقرير مو تقرير على الحسابات المصرفيه - الكردت ريبورت العادي. لا هذا تجييك على الموضف من الناحيه الجنائيه و دخوله القانوني للبلد و الحسابات والمعاملات المصرفيه و الممتلكات الغير مدفوعه الضرائب بالاضافه الى تاكيد الوثائق الرسميه المقدمه من قبل الموضف لقبوله في اي عمل !  خوش عمي - لهنا هم ماكو مشكله

الشركه الي تسوي هاي التقارير اسمهه (( هاير رايت)) وهي شركه معروفه بهذا المجال والتخصص - يعني شغلتهم هجمان بيوت العالم فقط-

اجتني ايميلات منهم اتكولي انه السوشيل سيكيورتي نمبر مالتك غير صادر من الحكومه الامريكيه اعتمادا على الكنسومر ريبورت الي احنا سويناه

اني سويت الحل المنطقي الي يكول - اروح للسوشيل واكللهم بهذا الشي - رحت حجيتلهم الفلم كالولي انمت شكد صارلك وياهم - كلت سنه - كالو وهسه يله اتذكروا ؟؟ عموما ابو السوشل الرجال انطاني صحه صدور واخذته ودزيته للشركه مالتي الي هيه ل ل س - دزوا الشركه لجماعه هاير رايتس - احزروا اشصار ؟؟ هم رجعت نفس النتيجه . اتخبلت وكلت هاي الشغله يرادلهه واحد عنده كلبب ما مدشن . رحت للسوشل مره لاخ وانطاني نسخه الولد من الداتا بيس مال الكمبيوتر مالته وبيهه اسمي والسوشل واسم الموضف وتوقيعه وخابرهم لهاير رايت كالهم انه السوشيل صحيح وما بيه شي !
دزيت الورقه مره لاخ , هم اجاني نفس الجواب . وهسه صارلي فتره دا احاول اطلع من هاي الطلابه الي لا عالبال ولا عالخاطر ولا اجتي ابال احد ولحد الان ما محلوله بشكل رسمي .

خلي في بالكم انه اعتمادا على هذا التقرير - الشركه لازم لازم تفصلني لان اكو قانون تشريعي فدرالي اسمه
Federal Fair Credit Reporting Act
هذا القانون يلزم الشركات بعدم تعيين اي شخص داخل بصوره غير قانونيه او اوراقه تعد غير صحيحه .
فالشركه مالتي لحد الان ما مسوين اي خطا ومراح اكدر ارفع عليهم دعوه بالمحاكم المدنيه لان تعتبر ملزمه بالقانون وحتى لو اني اوراقي صحيحه فالريبورت ديكول غير شي
عندي نقطه وحده ممكن ابهذلهم بيهه وهاي على كلام المحامي الي حجيت وياه
اكو شركات هيه تدفع الضريبه مالتك مال السوشل
 الي اكدر اسويه انه احصل على ما يسمى - ايرننغ ريبورت - Earning Report  من مكتب السوشيل - هذا اذا الشركه دافه فلوسي مال التقاعد للسوشيل فمعناها انه السوشيل صحيح واني فقدت وضيفتي بلايا حق  واذا ما دافعين الفلوس للسوشيل فمعناها هم مسوين جريمه فدراليه(( لان موضفيني بدون سوشيل)) وبايكين فلوسي لان هم ديستقطعون الضريبه مال السوشيل
المشكله هسه انه الريبورت مال 2010 لحد الان الشركه ما مجهزته لمكتب السوشيل وما ناشره رواتب الموضفين لحد الان عند الحكومه - وعدهم مجال من بدايه شهر الواحد 2011 الى نهايه شهر كانون الاول 2011
انتبهوا يعني اذا الشركه ما دازه التقارير مالتهه لمكتب السوشيل ممكن اضل سنه كامله دا انتضر ورقه زغيره وانتوا تعرفون انه السنه بلاي شغل ازعاج مو طبيعي .

ادري الموضوع طويل بس تفاصيله جدا مهمه الكم باعتبار احنا دنبدي حياتنا اهنا وصدكوني هاي الشغله مو سهله مثل ما تتصورون لان هذا الريبوت ممكن ايدمر حياتك بامريكا ببساطه
 لذلك حبيت انوهلكم عن هذا الموضوع و خلي ابالكم ماكو حجه اذا ما خليته على باب المقترحات ويا الشركه ولكن للاسف بدون فائده

الي عنده سؤال او صارت الشغله هوسه عليه خلي يسالني واجاوبكم بكل ممنونيه


تحياتي للجميع
 

[ســـرى]

صدك مو عالبال ابو عبدالله هيج شغلة تصير.مشكور عالنصيحة وان شاء الله تنحل شغلتك وتبشرنا.

[ابو عبد الله التكساسي]

شكرا على المشاعر الجياشه دكتوره ورحمالله والديج وجد ا اسف مكدرت اجاوب على رسالتج
الف شكر

[ابو شموس]

ابو عبودي الله يسهل امورك يارب وان شاءالله ماكو غير الخير
بس ابو عبدالله شنو الواحد لازم يسويه حتى لا يصير بهيج موقف؟؟

[ســـرى]

معذور اخوية ابو عبدالله ان شاء الله ينحل الاشكال.

[ابو الحسن]

عمي ابوعبودي
الله يصبرك ويقويك وانته كدها وكدود
مو  مثل ما سولفنا اخر مرة عمي
المؤمن مبتلى وهاي اختبار من  رب العباد
كول الحمد لله
وربك والله والله
ربك يسد باب ويفتح الف الف باب
بس كول يا لله

ابو الحسن

[ابو عبد الله التكساسي]

ابو عبودي الله يسهل امورك يارب وان شاءالله ماكو غير الخير
بس ابو عبدالله شنو الواحد لازم يسويه حتى لا يصير بهيج موقف؟؟

عيوني الحلول هوايه بس اني بحالتي اهم شي لازم اثبت موضوع الايرننك ريبورت لان هو الدليل الفانوني الوحيد عندي حاليا

بس اكو محامين مال امبلويمنت ممكن يسولك القضيه سهله واعتمادا علىيهه ممكن تقاضي الشركه بملغ تعويض
للاسف اني عقدي ما يلزم الشركه بهذا الشي
عموما الله اليستر وانريد دعائكم ويانا

[ابو عبد الله التكساسي]

عمي ابوعبودي
الله يصبرك ويقويك وانته كدها وكدود
مو  مثل ما سولفنا اخر مرة عمي
المؤمن مبتلى وهاي اختبار من  رب العباد
كول الحمد لله
وربك والله والله
ربك يسد باب ويفتح الف الف باب
بس كول يا لله

ابو الحسن

الف شكر عمي ابو الحسن بمرورك
وكل الكلام الي كلته مضبوط

تحياتي

[ابن الحلة]

ابو عبد الله انتة متستاهل غير كل الخير والله يسهللك ويحل مشكلتك ولا يهمك انتة طيب
تحياتي

[ابو عبد الله التكساسي]

ابو عبد الله انتة متستاهل غير كل الخير والله يسهللك ويحل مشكلتك ولا يهمك انتة طيب
تحياتي

رحمالله والديك خويه

[Black Angel]

والله ياعمي ابو عبد الله اني من يمي مكمت اعرف راسي من رجلي
واجاني مغص وراسي كام يوجعني بس رغم ذلك كله
اني متاكد من حقيقة وحدة انه ربك اكبر من كلشي ومادام انت طيب مراح تحصل غير الطيب
وبصراحة مخايف عليك لان ثقتي رب العالمين ساندك ومادام انت مومن هاي اهم شي " ان تنصروا الله ينصركم "
وان شاء الله تنحل بسرعة وتبشرنا تكوللنا انه انفضت وكلشي رجع طبيعي
يارب يفرجهة عليك

[ابو عبد الله التكساسي]

والله ياعمي ابو عبد الله اني من يمي مكمت اعرف راسي من رجلي
واجاني مغص وراسي كام يوجعني بس رغم ذلك كله
اني متاكد من حقيقة وحدة انه ربك اكبر من كلشي ومادام انت طيب مراح تحصل غير الطيب
وبصراحة مخايف عليك لان ثقتي رب العالمين ساندك ومادام انت مومن هاي اهم شي " ان تنصروا الله ينصركم "
وان شاء الله تنحل بسرعة وتبشرنا تكوللنا انه انفضت وكلشي رجع طبيعي
يارب يفرجهة عليك

رحم الله والديك اغاتي وممنون منك
الله يستر

[أسد بابل]

السلام عليكم.
والله يا أبو عبد الله ما أدري شكلك صدك هاي مشكله.
بس أنشا الله أنته سبع وكده وكدود.
وأنته طيب وكل طيب الله يوكفله.
ومثل ما كال أحد الاخوان أن المؤمن مبتلى.
والله أنشا الله يفرج شغلتك وتبشرنا.

[ايسراحمد]

السلام عليم اخوي العزيز ابو عبدالله .... ان شاء الله يسهل امرك ويفرج همك بحق هو الحبيب محمد صلى الله عليه وسلم
لان انت تستاهل كل الخير ... ومن الله التوفيق.

[مضروب ليزر]

الله يسهلك اخويه ابو عبد الله و اندعيلك بالخير و الله يفرجها بحق محمد و ال محمد لان انت طيب و معدنك اصيل.

[(بغدادي)]

هاي السوالف اللي تجي غفلة ومنين وشنو متدري..رايي تخلي المحامي يتصرف وياهم وينعل والديهم لان هذا شغل مخربط وبموزمبيق ماكو هيجي افلام..اذا صاحب الشان يكول الرقم اصلي وما عليه غبار بعد هالاصرار عالخطا شنو..

بغدادي

[زيوس]

ان شاء الله ما تشوف شر

[مازولا]

الاخوان الاعزاء ... الاخ العزيز ابو عبد الله ... الله يساعدك على المشاكل ... لكن الحياه اذا ما بيهه مشاكل هم ما تنراد ... يعني هاي الاشياء تسويلك شويه اكشن بحياتك ههههههههههههههههه ....
 احسن حل حسب اعتقادي (و لو اني اعتقد انو انت كلشي سويت بس ميخالف هم الواحد يحجيهه) انو تروح للاتش ار مانجر مال شركتكم و تكولهم هجي و هيجي عندي مشكله و تسالهم اذا همه مقدمين اسمك للسوشيال ... او تروح للقسم القانوني و تكولهم انو هاي الحاله وصلتك و انت تريد تعرف السبب و تريد تعرف الحل ... و بين الحجي دعبللهم انو هاي ممكن ان يكون بيهه عواقب قانونيه على الشركه بس لا تكلهم انو انت تريد ان ترفع عليهم قضيه ... بس كلهم انو انت استشاريت محامي بخصوص هاي الشغله ... همه اذ بيهه اي شي قانوني او معنوي ممكن ان ياثر عليهم راح يهتمون بالشغله ... بس اذا حسو انو الشغله هيه بس عليك و بس انت راح تتاثر بيهه و همه يطلعون منهه مثل الشعرة من العجين فمراح تشوف احد يهتم (هذا تره طبعهم بالشغل و اكيد انت تعرفه) ... على كل انت دائما روح و راجعهم و دائما من يكولولك فد شي .. و عاده يكولوه شفهي حتى لا تلزمه عليهم ... وره ما ترجع لمكتبك اكتبه بايميل و دزه الهم و كلهم اني هيجي اللي افتهمته منكم فهل هذا صحيح لو غلط ... اكيد همه راح يخابروك حتى يحجون وياك بس هم ما راح ينطوك شي مكتوب ... مع ذلك هاي الاشياء دائما انت وثقهه بايميلات و تواريخ ... و دائما لح عليهم و يوميه اسالهم بايميل شنو صار من شغلتك ... بس اني اكولك ... همه الشركات الكبار دائما همه اللي يطلعون على حق بالاخير و احنه الصغار اغلب الاحيان اللي ناكلهه ... هاي دا احجيلك عن تجربه خاصه اني صارت ويايه ... و هم حاولت كل اللي كلتلك عليه ... بس بعدين شافولهم دربونه و فاتو بيهه و سدوهه بوجهي ...
على كل ... انت دائما لح عليهم لان همه همينه يحترمون اللي ما يتنازل عن حقه ... و بالاخير انت ما عندك شي تخسره ... و الله كريم و ان شاء الله تنحل شغلتك على خير ... اخوك مازولا

[ابو الحسن]

عمي بلكي بداية اسبوع جديد وربنا يفرجها عليك بحق محمد وال بيت محمد
بشرنا باخبارك اول باول ياطيب
ابو الحسن

[Dr.Ameen]

يا الله بحق كل من عندة جاه عندك ان تسل لابو عبدالله
ولوالشغلة ما دا افهمهة مدري كبرنة وحششنة مدري الرام مالتي ضرب

[ابو عبد الله التكساسي]

الاخوان الاعزاء
اسد بابل
ايسر احمد
مضروب ليزر
بغدادي و زيوس
الف شكر على تعاطفكم ويانا بالموضوع وممنون للمرور

[ابو عبد الله التكساسي]

اخويه الغالي ماجلان
اولا اني ما ناسيك ولا ناسي اي واحد الشغله وا مبيهه انه انتوا ابد ما تتصلون بيه رغم انه اني عللى طول اتصل واحب اتواصل وياكم
ثانيا موضوع اليدنتتي ثفت الي انت تحجي عنه اعرفه واعرف تفاصيله والكريدت ريبورت الي مشكلتي وياه مو نفس الكردت ريبورت الي انت تحجي عنه
اني اتعامل ويا ولس فاركو والكلام مالتك صحيح وعندي هاي الخدمه بس الشي الي انت تكوله ماله علاقه بشغلتي
حاول ترجع للبوست الاول مالتي واتشوف الي اني كاتبه
(( كنسومر كردت ريبورت)) واهنا بدت المشكله والسبب انه هذا التقرير مو تقرير على الحسابات المصرفيه - الكردت ريبورت العادي

ولكن المشاركه منك فقط تبعث السرور بالقلب
الف شكر عمي

[ابو عبد الله التكساسي]

الاخوان الاعزاء ... الاخ العزيز ابو عبد الله ... الله يساعدك على المشاكل ... لكن الحياه اذا ما بيهه مشاكل هم ما تنراد ... يعني هاي الاشياء تسويلك شويه اكشن بحياتك ههههههههههههههههه ....
 احسن حل حسب اعتقادي (و لو اني اعتقد انو انت كلشي سويت بس ميخالف هم الواحد يحجيهه) انو تروح للاتش ار مانجر مال شركتكم و تكولهم هجي و هيجي عندي مشكله و تسالهم اذا همه مقدمين اسمك للسوشيال ... او تروح للقسم القانوني و تكولهم انو هاي الحاله وصلتك و انت تريد تعرف السبب و تريد تعرف الحل ... و بين الحجي دعبللهم انو هاي ممكن ان يكون بيهه عواقب قانونيه على الشركه بس لا تكلهم انو انت تريد ان ترفع عليهم قضيه ... بس كلهم انو انت استشاريت محامي بخصوص هاي الشغله ... همه اذ بيهه اي شي قانوني او معنوي ممكن ان ياثر عليهم راح يهتمون بالشغله ... بس اذا حسو انو الشغله هيه بس عليك و بس انت راح تتاثر بيهه و همه يطلعون منهه مثل الشعرة من العجين فمراح تشوف احد يهتم (هذا تره طبعهم بالشغل و اكيد انت تعرفه) ... على كل انت دائما روح و راجعهم و دائما من يكولولك فد شي .. و عاده يكولوه شفهي حتى لا تلزمه عليهم ... وره ما ترجع لمكتبك اكتبه بايميل و دزه الهم و كلهم اني هيجي اللي افتهمته منكم فهل هذا صحيح لو غلط ... اكيد همه راح يخابروك حتى يحجون وياك بس هم ما راح ينطوك شي مكتوب ... مع ذلك هاي الاشياء دائما انت وثقهه بايميلات و تواريخ ... و دائما لح عليهم و يوميه اسالهم بايميل شنو صار من شغلتك ... بس اني اكولك ... همه الشركات الكبار دائما همه اللي يطلعون على حق بالاخير و احنه الصغار اغلب الاحيان اللي ناكلهه ... هاي دا احجيلك عن تجربه خاصه اني صارت ويايه ... و هم حاولت كل اللي كلتلك عليه ... بس بعدين شافولهم دربونه و فاتو بيهه و سدوهه بوجهي ...
على كل ... انت دائما لح عليهم لان همه همينه يحترمون اللي ما يتنازل عن حقه ... و بالاخير انت ما عندك شي تخسره ... و الله كريم و ان شاء الله تنحل شغلتك على خير ... اخوك مازولا

بالتاكيد اني سويت هيج اخي مازولا والمحامي حجى وياهم مباشره والكفيل مالتي هم حجى وياهم والمنظمه مالتي حجت وياهم على الواهس
وما خفي كان اعظم

تحياتي يالغالي

[ابو عبد الله التكساسي]

السلام عليكم
اليوم راح اسولفلكم الخربطه الي صارت خلال الايام الماضيه
اكو فد موضف حمار بالشركه الي مسويه الكنسومر ريبورت غلطان باخر رقم من ارقام السوشيل مالتي وهذا سبب المشكله الي وكعنا بيهه
ومن اني دزيت الاثباتات للاج ار
, اثاري الخاتون ما فاتحه الاتاجمنتات الي اني دازهه قبل اسبوع واسبوعين
البارحه اتصلت بالسوشيل وما وصلت لنتيجه لان اهل السوشيل رفضوا يحجون وياها بدالي وبعدين طلبت مني اي اثبات من السوشيل
كولتلها انه اني داز الاثباتات صار طعش تالاف سنه كالتلي انه هيه ما مستلمتهن
فسويتلها ايميل البارحه وبيه البرنت اوت  مال السوشل (( احزروا اشصار ))؟؟
كالتلي ها اي هذا صحيح بس اكو رقم غلط الي هو اخر رقم
كلتلها انه ماكو غلط والرقم صحيح ومطابق للسوشل مالتي . ودزتلي نسخه ثانيه من اوراق التعيين والي لازم تتصدق من كاتب عدل وانشوف الي راح ايصير
وراح اوافيكم بالنتائج لاحقا

تحياتي للجميع

[Revolver]

يفرجها رب العالمين عليك ان شاء الله وتنحل الامور كلهة وتتسهلك ياذهب .. والله مشتاقيلك ابو عبدالله, بس ماأعتقد راح اتنزل موضوع بهل
 " التعقيد " ...

حبيبي أبو عبدالله, بأذن الله من تنحل المُشكلة وترتاح وتستقر .. اريدك تكتبلنة نصائح عن الي صار وياك بلنسبة للي يشتغلون بلجديد وية الشركات الامريكية ...

امنياتي الك بسنة سعيدة ان شاء الله والله يحفظك ويحفظ الاهل ..

اخوك


ريفولفر

[PlatinuM]

ان شاء الله تنحل مشكلتك اخي العزيز
وتكون تجربة جديدة تحصنك في المستقبل
وكل شيء بيه فائدة
بالتوفيق
تحياتي

[Haidouri]

اخي

اسأل الله ان يوفقك ويسهل امورك ويحل ضيقتك ان شاء الله


تحياتي

حيدوري

[عراقي هواي]

ربي ينصرك ياطيب

ربك ميخلي حمل مطروح

الله والنبي وال البيت وياك

[hussein5582]

بسيطه ان شاء الله وداعتك صارت بيه اتعس منه ,, ال uscis كلولي مره انته ما عندك فايل يمنه ,,  وداعتك بس لو الموظفين الاغبيار مالتهم ينتبهون شويه لو تعرف شكد مشاكل صارت من وره الاهمال او عبالهم الي ديحجي وياهم ميفتهم و تكله السالفه هيج يكلك okok عود هوه افتهم السالفه ة هو كلشي ميعرف

[ابو عبد الله التكساسي]

الف شكر اخواني الاعزاء
ريفولفر البطل الله يسهل امرك
ابو يوسف ال شكر
حيدوري مشتاقين عمي
عراقي هواي الف شكر على الدعاء الجميل الله يوفقك
اغاتي ابو علاوي الورد

[violin]

الله يساعدك ابو عبدالله ... ياربي تنحل مشكلتك بأسرع وقت والله ياابو عبدالله انته انسان طيب وشهم واكيد الله رح يوكف وياك ويساعدك مثل متساعد الناس ... الاهل كلهم يدعولك

[ابو عبد الله التكساسي]

الحمد لله اخوان فكت الجبسه
وطلع الغلط من موضفه التعينات الي ما فاتحه الاتاجمن الي اني دزيتلهياه من البدايه
واليوم رجعنا للشغل وكلشي تمام والحمد لله رب العالمين

[ابو الحسن]

الف مبروك اغاتي ابو عبودي
ربنا ما يكطع بالعباد
فكيف ويا طيب وفاعل خير مثلك
الف الف الحمد لله والشكر لله
فرحت جدااااااااااااااااااا بهذا الخبر
دومك مستقر ومنصور بحق محمد وال بيت محمد
ابو الحسن - ماليزيا

[ابو عبد الله التكساسي]

الف الف شكر عمي ابو الحسن على هذا القلب الطيب وهاي المشاعر الجياشه
ممنون منك اغاتي
والف شكر

[soloworld]

يارب تنحل , و ما اتمنى لك غير الخير .. بس من صدك سالفتها سالفة : ( ...

بس افضل تشوف و تطبق رأي المحامي على الاقل تكون ضمنت لك شئ ..

[Black Angel]

على الخير عمي ابو عبد الله شفت رب العالمين ميتخلة عن عباده خصوصا اذا كانوا مثل عمي ابو عبد الله الوردة
هسة لازم تسوي عزيمة للاهل بهاي المناسبة 

بس عمي هاي الموظفة التحفة ام التعينات مسوولهة شي  ؟

[عراقي هواي]

السلام عليكم ابو عبد الله

الحمد الله والشكر من انحلت القضيه
وكل بفضل الله عز وجل

[ARMY STRONG]

على خير ابو عبودي حمد الله انفكت الجبسه

[violin]

عالخير ابو عبدالله .. الف الحمدلله والشكر.. والله فرحتنا

[فداء الروح]

عالخير والف الحمد لله على سلامتك ابو عبد الله

[ســـرى]

الحمد لله اخوية ابو عبدالله فرحنالك من كل قلبنا وان شاء الله ما توكع بشدة مرة ثانية.تقبل تحياتي

[Haidouri]

الف الف مبروك اخوية العزيز ودفع الله عنكم كل بلاء ان شاء الله

ملاحظة: ترة الموضوع ينرادلة ذبيحة وتعزم اخوانك واخواتك عليها

[ARMY STRONG]

الف الف مبروك اخوية العزيز ودفع الله عنكم كل بلاء ان شاء الله

ملاحظة: ترة الموضوع ينرادلة ذبيحة وتعزم اخوانك واخواتك عليها

و الطلي لازم عراقي و مفتر كل درابين بغداد

[hussein5582]

هلهوله للشعب الصامد

[ذاكر ابو فابيان]

الله يساعدك اخي ابو عبد الله ويكون بعونك ويسهل عليك المهمة

[ابو عبد الله التكساسي]

الف شكر على تعاطفكم ويانا بالموضوع وممنون للمرور

[PlatinuM]

الحمد لله اخوان فكت الجبسه
وطلع الغلط من موضفه التعينات الي ما فاتحه الاتاجمن الي اني دزيتلهياه من البدايه
واليوم رجعنا للشغل وكلشي تمام والحمد لله رب العالمين

الف الف مبروك اخي العزيز
الحمدلله على كل حال
تحياتي لك

[Leroy Jethro Gibbs]

موضوع مفيد ورائع جدا