طبعا اكيد الموضوع راح يكون له عدد كبير من الزوار ولهذا وكعادة ابو قمر راح اكتبلكم الموضوع بالتفاصيل يمكن انا رجل مغرم بالتفاصيل لان اغلب الاحيان التفاصيل البسيطة ممكن تنطيك معلومات مهمة جدا هذا رائيي وطبعي ...
طبعا اغلب الناس الي هنا واني منهم يوم بعد يوم يزداد شوقهم لرؤية اهلهم الوالد الوالدة ممكن الاخوة فمن خلال مشاهداتي هنا اشوف كثير عوائل ترجع من اجل زيارة اهلها وهم عوائل غالبا ما تكون كبيرة .. فاجا ابالي بدل ما نروح احنا ليش مو هما يجون ؟؟؟؟
وكالعادة اي موضوع تقدم عليه لازمله دراسة والدراسة كانت كالتالي :
في حالة ذهابك وعائلتك الى العراق او دول الجوار لزيارة الاهل :
1- الناحية النفسية اكيد هي الاهم في حالة ذهابك وانت صاحب عمل هنا فاعلى اجازة ممكن تحصل عليها اسبوعين واذا اكثر لازم تبطل وهاي مصيبة ما اوصي بيها , الاسبوعين راح يطير منهم يومين روحة ويومين جية مع الراحة يعني يبقالك 10 ايام , هاي ال 10 ايام هل هيا كافية ان تشوف والدتك ؟؟؟ اكيد لا بقدر ما راح تكون فرحان غند وصولك بقدر ما راح تكون حزين لمن تسافر ضيف الى هذا عيشتك لامور نسيتها مثل انقطاع الكهرباء والمي والحر والازدحامات وتعامل قوات الامن الرائع بالسيطرات راح اعصابك اتصير فووول .
2- الناحية المادية : اذا نتكلم عن عوائل واني الي اصدقاء راحوا زيارة عدد افراد اسرتهم 5 نفرات ارخص تكت طيارة تحصلة لتركيا 1050 دولار وللاردن 1250 دولار في الايام العادية يعني تعمل حسابك على 5250 أو 6250 دولار هاي بس توصل للمطار وترجع منه مصاريف نقلك للعراق اذا كنت حابب تشوفهم بالعراق مو اقل من 1000 دولار بري طبعا .. مصاريفك في البلد اذا كنت بسوريا راح تأجر واذا بالعراق لازم تصرف انت جاي من امريكا مو اقل من 100 دولار باليوم يعني 1000 دولار , الهداية الي لازم تاخذها وطبعا الكل لازم يحصل هدية ومرة ثانية اكررها انت جاي من امريكا الناس تتخيلك صندوق النقد الدولي وطبعا الكل راح يزعل لين مراح تعجبه الهدية ويجوز تصير مشاكل ترجعنه للنقطة الاولى الي هي الحالة النفسية يعني بالمختصر للخمس نفرات يحتاجلك مو اقل من 10000 دولار لقضاء 10 ايام يعني النفر بطيارته بمصاريفه ويا الهداية ويا السلطات والبابا غنوج والملاعيب ينرادله 2000 دولار وانت احسبها على حجم عائلتك . اما اذا تكول اروح وحدي فهاي قمة الانانية لان ببساطة شلون تعوف اهلك وحدهم هنا ..
3- الناحية الامنية : يعني راح استثني المهدد لان هذا ميصير يدخل البلد , الي مو مهدد كلش وهواية موجودين بامريكا اول شي راح تظل تفكر بالجنسية وراح تظل تسئل شلون خاف مينطوني الجنسية لان داخل للبلد الي لجئت منه وحقه يقلق لان الموضوع اصلا مو منطقي ان ترجع لبلد مهدد بيه مهما كانت اسبابك , نجي لمن توصل الوضع الامني بسوريا ودول الجوار معروف والربع هناك الاعتقال ابسط منه ماكو والتهمة جاهزة وانت حتعترف لان راح يخلوك تعترف وانت الممنون , العراق وياك كرين كارت ولدك يحجون امريكي اكيد راح تكون معرض لمشاكل امنية .
نجي للمقترح الجديد هما يجون ...
1- الناحية النفسية : الوالد او الوالدة ممكن يبقون وياك فترة توصل الى سنة يعني تشبع منهم شوف ورزايل والاهم هما راح يكونون فرحانين بيك وبيتك لمن يشوفون مدارس ابنك لمن يشووفون حياتك الي عايشها راح تستمتعون ولاكو كهرباء تنقطع ولا نقاط تفتيش .
2- الناحية المادية : تكت طيارة للوالدة و الوالد 1050 دولار من تركيا يعني ويا طيارة العراق تركيا 1450 روحة رجعة بالمطارات لتخاف عليهم حتى لو ميحجون انكليزي عندي طرق كثيرة تساعدهم راح اذكرها بالمستقبل واكيد من راح يجون تاخذلهم هداية ومن هالسوالف يعني ماكو مقارنة بالناحية المادية
3- الناحية الامنية : ترك ..... ماكو شي اسمه ناحية امنية البلد امين وهما راح يجون بصورة رسمية
طبعا هسه الكل يكول كلشي واضح بس شيجيبهم هنا ؟؟؟؟ والامنية شلوون ؟؟؟ وشكد اطول ؟؟؟؟
الجواب : الموضوع جدا سهل وفيزتهم خلال اسبوع .. هذا الشي مو سامعخ من احد هذا الشي سويته الشهر الفات لوالدتي ولخالتي / خالتي اخت امي / نجي للمهم :
أول شي يدزولك هوية الاحوال والجواز سكنر وعنوان البيت وعنوان العمل اذا كانوا يعملون
ثاني شي اتجيب كلاص كهوة وتقتح كمبيوترك وتدخل على موقع السفارة الامريكية في بغداد وتدخل على تاشيرات لغير الهجرة وهذا اللينك والتفاصيل بالعربي :
http://arabic.iraq.usembassy.gov/b_visas2.htmثالث شي تعبي استمارة (DS-160) من المعلومات الي عندك بالجواز والهوية الاستمارة جدا سهلة اكو فقرات بيها تحط اسمك وعنوانك تحتاج ابداية الاستمارة صورة شخصية واضحة يعني يدزولك اياها بدون كبس , بعد متعبي الاستمارة وتتاكد من المعلومات تطبع نسخة الك وتضغك على اكمال راح ترسل اوتماتيكيا للسفارة وراح ينطوك رقم الاستمارة بنفس الموقع تروح مباشرة الى هذا اللنك :
https://evisaforms.state.gov/default.asp?PostCode=BGH+++++++&CountryCode%20=IRAQ++++++&CountryCodeShow=&PostCodeShow=&Submit=Submitتختار سكجول ابويتمنت يعني تحددلهام موعد مقابلة بعدها ادخل الكود الي عندك والي حصلته بعد ما اكملت الاستمارة راح يطلعلك رزنامه تختار منها اليوم بعد متتفق ويا الاهل على التاريخ .
طبعا تطبع ورقة تاكيد الموعد وورقة الباركود الي بيها الصورة والاستمارة وادزها لوالدتك بالانترنت تاخذها وياها من اتروح
شباقي عليك انت .. تكتب رسالة دعوة عالوورد عندي نسخة ا>ا احد يحتاجها تكتب بيها فوق اسمك وعنوانك وتلفونك وتكتب بيها لوالدتك انك تدعوها لزيارتك لقضاء شهر او الفترة الي تحبها وتكتب بيها انك راح تتكفل بكل مصاريف طيارة روحة رجعة واكل واقامة وتامين صحين خلال فترة وجودها في امريكا توقع وادزها للوالدة تاخذها وياها للمقابلة ووياها ترسل الكرين كارد والدرايفر لايسنس نسخ طبعا .. من يمك انت خلصت اسه الوالدة شلازم تسوي غير ان تروح للمقابلة لازم تسوي شغلتين راح اطبعهم من الموقع للسرعة :
1- دفع رسوم طلب التأشيرة:
• يجب أخذ جواز السفر أو أستنساخ عنه الى أي فرع من فروع بنك الوركاء للأستثمار والتمويل وابلاغ البنك بأنك ستدفع رسوم طلب فيزا أمريكية، يمكن لشخص اخر ان يدفع بدلاً منك ولكن في هذه الحالة على الشخص الاخر أن يأخذ جواز سفرك أو استنساخ منه الى البنك.
• عند دفع الرسوم ($140) سيصدر لك البنك إيصال (وصل).
• يرجى التأكد من المعلومات التالية على إيصال البنك:
1. إسم صاحب الطلب كما هو مكتوب في جواز السفر تماماً.
2. رقم جواز صاحب الطلب.
3. الكلمة التالية " US Embassy MRV Sweep "
4. لايجب دفع الرسوم مقدماً لمدة تزيد عن سنة قبل تاريخ المقابلة.
2- فاتورة شحن مسبقة الدفع من شركة البريد DHL ( لمزيد من المعلومات حول استخدام ال DHL) وهذا اللنك يوضح التفاصيل
http://arabic.iraq.usembassy.gov/dhl.html • اوراق ثبوتية تشرح الغرض من الزيارة، او اي ترتيبات لتغطية نفقات السفر بالاضافة الى ضرورة البرهنة على وجود روابط اجتماعية ، اقتصادية او /و مهنية خارج الولايات المتحدة ( الوثائق التي يمكن تقديمها لاثبات وجود روابط داخل العراق ممكن ان تكون عقد عمل او حساب مصرفي او مستندات تثبت وجود عقار او رسالة اثبات الوظيفة او جوازات السفر السابقة التي تبين الرحلات السابقة خارج العراق).
المقابلة :
تروح من الصبح قبل الساعة سبعة وياها الاوراق الي كلنا عليها المقابلة جدا عادية راح يسئلوها شكد راح تظل وليش رايحة المهم هي تحاول من خلال كلامها انها رايحة حتى تشوف احفادها الي صارلها سنين مشافتهم وبنفس الوقت متكدر تتاخر هناك لين عدها هنا ابناء او عمل او املاك .
بعد المقابلة راح ياخذون الجواز يكلولها بعد اسبوع لعشرة ايام تستلميه طبعا راح تستلمة انشاء الله مختومة عليه الفيزة نوع B2 الفيزة مدتها سنة يعني تكدر تجيكم خلال اي يوم لمدة سنة وممكن تجيكم اكثر من مرة خلال السنة وبعد السنة راح تكون جدا سهل ان تحصل فيزة اخرى . مدة بقائها في امريكا ست اشهر ممكن ان تتجدد ست شهور اخرى
طبعا هذا الكلام صار ويا والدتي وبعدها خالتي واثنينهم اخذوا الفيزة وانشاء الله راح يجونا عن قريب بعد الموسم بحيث التكتات تنزل
اكو عوامل اتساعد بالقبول وهاي مهمة .. اذا كانوا يعملون ياخذون هوية او كتاب من العمل اذا عدهم بيت ملك ياخذون السند وياهم واذا عدهم اولاد هناك فضروري يوضحون هذا بالمقابلة . طبعا ولد صديق ايضا اخذوا الفيزة رغم ان ميعملون بالعراق ولا عدهم ملك يعني الموضوع بيه تسهيلات لان كبار بالعمر وبالذات لمن توضحلهم انك متكدر ترجع للعراق فالموضوع انساني .وعلى فكرة ختم الفيزة بتاريخ نفس يوم المقابلة يعني اقل من 24 ساعة .. هنا >كرتلكم الموضوع وفق تجربتي .. والموضوع مضمون واتمنى يستفاد منه الجميع بالذات الي دينتظرون الجنسية حتى ليكونون باشكال العودة لبلد اللجوء
طبعا كان المفروض اليوم اكتب موضوع عن الكردت حسب طلب اخوتنا بس انشاء الله الموضوع القادم راح يكون عن الكردت .
تحياتي
أبو قمر
