ينشر للمرة الثانية بعد الحذف ..
طبعا الجميل الي شفته بالمنتدى بالايام الي فاتت عودة المواضيع المهمة وعودة اعضاء رائعين ... ومن بين هذه المواضيع موضوع اخونا المدرس الي اتمنى ان يدخل ويقرا الجميع لاهميته ... ولدي تعليق واضافة بسيطة ...
موضوع قرض الطيران بالمختصر مهم جدا لبناء الكردت , والكردت راح انزل موضوع خاص عنه .. القرض تسديده مهم عند عدك تستيده بالوقت المحددة سوف ينزل التاخير هذا على تقرير الكردت ويبقى لفتره 5 سنين لايمكن مسحه زين شنو الضرر بالموضوع ؟؟ جواب
تقرير الكردت في امريكا بالضيط مثل شهادة حسن سير وسلوك ماليا , المواطن في امريكا يقيم من خلال تقريرين تقرير امني والي يتضمن مشاكلك الامنية و الخروقات الامنية الي تقوم بيها وبيه كل المحاكم الي دخلتها وتقرير مالي الي هو المهم من قبل الشركات الي راح تتعامل وياها بحياتك , فكل الشركات الي تطلب منها خدمات مثلا انترنت كهرباء مي تلقون كيبل بنوك في حالة طلبك لقرض او لكردت كارت جامعات في حالة طلبك لقرض ممكن تكول في كل تعاملاتك راح ينضرون للتقرير والسكور والي هو الدرجة الي تحسب وفق التقرير مالتك . في حالة التاخر بالدفع شهر راح ينزل السكور مالتك وينكتب بالريبورت واذا شهرين راح ينزل اكثر وهكذا , في حالة دفعك هل راح يزيد السكور مع الاسف لا .
ليش ؟؟؟ طبعا هذا السؤال سءلته لامريكي مختص بهذا المجال واتعمقت بموضوع الكردت حيل قبل شرائي للبيت ولهذا الحمد لله الكردت مالتي ومال ام قمر جيد جدا .. الجواب كان قرض الطيارة يعامل في الكريدت ريبورت معاملة فواتير الكهرباء والماء والانترنت والاجار هذه الفواتير تدفعها متزيد السكور ما تدفعها تدمر السكور .. الي يزيد السكور هو ثلاث اشياء
1- الكردت كارت عدد 2 اقل شي ويجب ان يكونوا من بنوك محترمة
2- قرض شراء سيارة والتسديد بالوقت المحدد
3- قرض شراء البيت والتسديد بالوقت المحدد
نجي لفقرة اخرى عندي توضيح الها وبعدها ندخل بموضوعنا مسئلة تقليل القسط الشهري اذا كانت بالاتفاق مع الكنيسة او الجهة الي اعطتك القرض فمتئثر نهائيا لان مثدار الدفعة في الكردت ريبورت راح يكون نفس الي تدفعه لان الجهة الثانية بعد الاتفاق راح تغير تفاصيل القرض بالكريدت ريبورت فانت بالسليم ... اما اذا انت وصلك البيمنت 50 دولار مثلا وانت دفعت 20 من غير الاتصال بيهم والاتفاق معهم فهذا غلط ...
موضوعنا اليوم هو تكملة للمواضيع السابقة الي تهم الجميع الي ينتظرون السفر والي سافروا هو شوي طويل بس مفيد انشاء الله ... في الموضوع الاول حكينا عن موضوع الاعتماد على المساعدات وعدم السعي وانفقاد الامل .. ومثل ما وعدتكم راح اكنبلكم تجارب وقصص حدثت هنا راح تثبتلكم كثير من الي تكلمنا فيه سايقا .
القصة تبدأ عند وصولي الى امريكا ومن اول ايام كالعادة عند الوصول سوف تأجر لك المنظمة في منطقة تم الاتفاث على ان تكون منطقة تحوي جميع الاجئين والسبب في ذلك انهم عندما يضعوا الجميع في منطقة واحدة يجعل الجميع يساعد بعضه البعض طبعا هذا الكلام ناجح جدا مع البورميين الافريقيين لكن العراقيين كالعادة نحن نختلف عن الاخرون طبعا مو جميع العراقيين البعض .
المهم فور وصولي اتصلت الموظفة بالمنظمة باحد العراقيين حتى يجي يساعدنا في التعرف على المجمع ومكان الغسيل والامور الاخرى ,, الاخ الفاضل وصل واول مشافنه وجها معبس وكاللنا بالحرف هاي شجابكم هنا ليش هيجي سويتوا بنفسكم راح تواجهون هيجي نماذج سووا مثلي ابتسامة عريضة دخل الكلام من اليمين وخرجه من الشمال مع وضع اكس احمر على هذا الشخص , طبعا بدا يلف ويدور حتى يعرف اني سني او شيعي / نعم اكو الكثير من هذه النماذج في امريكا / سئلني :
حضرتك ابو شنو ؟؟؟ كتله : ابو قمر / قمر اسم لا شيعي ولا سني طبعا داخ /
زين اسم حصرتك شنو ؟؟؟ كتله : ياسر / داخ اكثر الاسم ميوحي بشيء /
زين من يا عمام حضرتك ؟؟؟ كتله : حسيني / هم بعده ممتاكد اكو حسينيين شيعة واكو شنة ظ
زين وين جنتوا بالعراق ؟؟؟ كتله : ابغداد
طبعا انا طول الفترة ابتسامة عريضة واحترام فائق لان اعرف غرضه ..
كتله حتى لا اتعبك اني عراقي ..... كلي : لالا ميصير كتله شنو هو الميصير كلي هنا احنا مجموعات لازم تختار شتصير كتلة متكلي وين اسافر حتى اخلص من هالسوالف اقدم هجرة لزحل ... كلي راح تشوف كتلة ما اريد اشوف .. طبعا هذا الشخص موجود حي يرزق ومن سنتين ولحد الان يدور على شغل اشتغل اكثر من ست مرات ويبطل بيهم .. طبعا اكيد حول على الهاوسنك وماخذ كل انواع المساعدات المشروعة والغير مشروعة . المهم بعد وصولنا ب3 اشهر وصلت عائلة لشخص اسمه ابو دلال / طبعا الاسماء مستعارة للخصوصية الشخصية / هذا الرجل طيب جدا ومن اهل الله عنده ولد وبنية بس مشكلته كلمة تودي وكلمة اتجيبه اول ما اجوا باركمالهم وظل فترة يتصل بيه بعدها استلموه الجماعة بعد فترة شهر مرينا عليهم للبيت نباركلهم بمناسبة معينة ملكينا الرجال وكان اليوم سبت الساعة تسعة ثاني يوم عرفت ان الرجل ديروح ويا الشباب يسهر بالداون تاون نوادي وهالسوالف وطبعا هو لا يشتغل ولا هما يشتغلون وكلما تشوفهم يلعنون بامريكا خابرته ثاني يوم وكتله انت اخ وحقي عليك ان انصحك انت عندك عائلة والسنت الي تصرفه اهلك اولى بيه .. هو حس بغلطة واتعذر لكن استمر وياهم وطبعا قدم عالهاوسنك وانقبل وه>ا شي جيد لان معتده لغة ولا خلو بخلال هالسنتين يحسن بلغته ..
مرت الايام وبقينا على اتصال وجا زارنا يباركلنا للبيت ودا اشوفه ضايج كتله اكو شي ابو دلال كلي لا بس ضايجين والحياة هنا صعبة كتله ليش كلي الجماعة يكولون اكو شغل بالاسكا او يجوز اروح ليوتا .... كتله الاسكا كال ايه كتله هما راحوا كال لا بس اني راح اروح كتله شنو ديدفعوك وبعدين انت هنا دورت على شغل ؟؟ بعدين انت شكو عندك ايجارك مدفوع وفوت ستام وتنف كال ما ادري شكلك ...
المهم راح منا واني وام قمر بصراحة حيل ضجنا من الي يريد يسويه بنفسه ... ثاني يوم بالشغل بالاجتماع كالوا ان الشغل راح يزيد وراح يزيدون العمال سبحان الله اجه ابالي راسا ابو دلال رغم ان اني غاسل ايدي منه بس كلت اسوي الي يملي عليه ضميري .. اتصلت بيه بال 10 الصبح طبعا اكيبد نايم دطيت عليه بال 11 رد عليه كتله انطيني اسمك والسوشيل وعبيتله الاستمارة مريت على شركة التوظيف الي تتعامل وياها شركتنا كتلهم عندي ولد حباب وشغول يريد شغل بس مشكلته انكليزية ما عنده بس المهم بالنسبة النا ان يكدر يشتغل باوقات الي نحتاجه ويكون ملتزم واكيد راح يكون ملتزم لان عنده عائلة طبعا البنية بالشركة بس تريد تسويلنا خدمة لان نشتغل بالشركة الام كلتلي راح احط ملفة اول واحد خابرتني بعدها بربع ساعة لان حطيت رقمي لان انكليزيته مصيبة كلتلي خلي يجي فورا .. خابرته وكتله تعال هسه بسرعة واني ممقتنع بالموضوع لان اعرف مواعيده كتله حاول توصل قبل ال2 وقت الغدا حتى اكدر ادخل وياك المهم الرجل وصل عالوقت انتظرته على الشارع العام دخلته للمكتب طبعا كوه يكتب اسمه عبيتله الاستماير كلتلي اكو امتحان لازم يسويه كتلها مو مشكلة اني راح اترجمله وهو يجاوب طبعا اترجمله السؤال وهم يجاوب غلط فهمته الاجابات خلصنا الامتحان ودخلوه للشغل .. قبل ليدخل كتله لي هنا انتهى دوري راح اوصي السوبر فايزر مالتك عليك والباقي عليك تثبت جدارتك لحد هاي اللحظة اني ممقتنع والمشكلة بديت احس بتانيب الضمير اخاف ان اكون ساعدته ياخذ مكان واحد احق منه لكن حصلت المفاجئة .. اتعمدت كل شوية اطلع للطابق الثاني واتفرج عليه واني ماشي شو ابو دلال ديحصد بالشغل حصد خلص الدوام رحت مريتله كتله ها يمتى ترحون كال كلولي ابقى اوفر تايم واني باقي شعندي رايح بديت افرح كتله بس تره باجر قبل التسعة انت هنا وخابرته بالليل اكدت عليه لان اعرف مواعيده ثاني يوم وصلت الشغل لكيته طابك بالكراج من الساعة سبعة ونص .. صادفت سفرتي لكالفستون كام يتصل بيه ويحجيلي انجازاته وهو فرحااان واني اسمعه ومقدر فرحته وحسيت ان بدا يحس ان هو عايش ومن رجعت البارحة من السفرة سئلت سوبر فايزره كلي عليه جيد جدا ... طولت عليكم هواي بس حاولت انقللكم تجارب لناس كسرت المستحيل وان البيئة الي حوالك جدا مهمة وانك عندما تجد الفرصة راح تبدع ..
طبعا بنهاية كل موضوع راح احط سؤال حتى الجميع يشارك :
س: ماهي العبارة الي تسمعها دائما بالوطن العربي ؟؟ وعمرك متسمعها بامريكا ؟؟
حل السؤال :
العبارة هيا : / انت تعرف ويامن دتحجي / هاي العبارة الي يستخدمها الكثيرين وعمري مسمعتها هنا ...
ملاحظلة اخرى : ارجو من الادارة والمشرفين عدم حذف اي راي او تعليق حتى لو كان مخالف لابو قمر او لاي انسان الجميع من حقه المشاركة مهما كان رائيه يحترم حتى لو كان يمس صاحب الموضوع الكلمات المسيئة فقط تحذف واكيد كعادة مشرفينا متابعين هذا الموضوع ..
تحياتي
اخوكم
ابو قمر
