مالذي يمنعك من السفر ... الكردت الجزء الثاني

[أبو قمر]

ينشر للمرة الثانية بعد الحذف


ما حبيت ان اطول عليكم في تكملة الموضوع السابق حتى تتمكنوا من ربط المعلومات مع بعضها , وبصراحة الكلمات لاول مرة تخذلني التعبير عن مشاعري لكل الاخوان الي شاركوا وكتبوا كلمات اقل ما اقول عنها رائعة , من خلال قرائتي للردود لاحظت ان كثير من الاخوان متعطشين لاي معلومة عن بلدهم الجديد وهذا بداية نجاحهم انشاء الله , دائما ما احاول ان اختار الاهم ثم الامهم من المواضيع واحيانا تثير بعض مواضيع المنتدى حفيضتي للكتابة , لكني انشاء الله اعد الجميع بان اكتب وبالتفصيل وبالتجارب والحقائق كل ما طلبتوه وما لاتطلبوه فانا اعتبر نفسي مؤتمن من في مكاني هذا ان اوصل الحقيقة للجميع  امنيتي وهدفي ان ينجح الجميع في حياتهم الجديدة وان يؤسسوا حياة كريمة وان تكون لكتابات ابو قمر العامل المساعد في ذلك وبهذا العمل قد اكون اقتربت من الله في زمن اصبح فيه الاجر والثواب سلعة نادرة ..
قبل ان ابدا بالموضوع اثار حفيضتي موضوع كتب على العام لاحدى العوائل التي وصلت الى بلد الامان , واسفت لما حدث لهم من اهمال من قبل المنظمة , لكن كان لدي تحفظ على امور كثيرة , قسم من الاخوة عندما يذهب لامريكا يتخيل انه ذاهب الى الجنة والمصيبة انه يعطي انطباع للاخرين انه قادم من الجنة وهذا ما يتفاجىء به الجميع هنا ؟؟ بالعامية لاجىء ويفيك ؟؟؟؟
عندما تكون هارب من الموت والحياة المذلة فلا اتصور ان تقف امام صرصر , نعم امريكا فيها صراصير وفيها صراصير اكثر من العراق لكنها لا تحتوي على صراصير بشرية مثل الصراصير التي تفتك ببلدنا المظلون الان , اغلب البناء في امريكا من الخشب ولهذا من البديهي ان يكون هناك صراصير لكنها ليست بحجم ولا بشكل صراصير بلدنا , يعني الصرصر هنا بحجم حبة الفاصوليا ولا عنده شوارب ولا يطير يعني صرصور على كد حالة راضي بقسمة ربه ان خلقه صرصور , مو معناها ان شفنا صرصر انتهت الحياة وانخلي هذا الشي التافه يئثر على اندفاعنا واجتهادنا في حياتنا الجديدة , والموضوع بسيط جدا تتصل بادراة المجمع يجوك كل اسبوع يرشون شقتك واذا منفع فتروح للسوك وهاي عن تجربة يوجد مبيدات مختلفة افضلها المبيد الضبابي يعني مثل قنبلة غازية تفتحها بالشقة وتخرج انت والعائلة وترجع بعد ساعات تلكة كل الصراصر منطيتك عمرها وانت بعدها تخافظ على النظافة وتستخدم المبيد مرة بالشهر وتحلم اذا شفت صرصر بعد , واذا كان البناء قديم فبعد ال 6 اشهر ابحث عن بناية انظف , الشيء الاخر الي حبيت ان اعلق عليه  المنظمة متكدر تحجزلك بفندوق المايروت لان ببساطة المنظمة تحجزلك من فلوسك والليلة بهذا الفندق متقل عن 120 دولار ولتنسى انك لاجىء مو ضيف دبلماسي ولا سائح يوجد فنادق نظيفة والليلة بيها 50$ يعني لتكعد بفندق تعبان ولا فرد نوب طاب وراح انزللكم مستقبلا اسماء الفنادق واسعارها ومواصفاتها وعن تجربة شخصية , الي اريد اوصله من الي كتبته ان ماكو داعي للخوف الخيارات هنا كثيرة لكن تحتاج منك ذكاء وصبر والامور التافها لا تجعمل منها جبل يقف امام طريقك وانا كنت متاكد من ان هذا الموضوع اثار الجميع وكلي تعاطف مع صاحب الموضوع لكن هذه تحفظاتي ...
نرجع نكمل موضوعنا الي كتبنا البارحة .. طبعا اني اسف مكتبت المصطلحات بالانكليزي وكتبتها بالعربي حتى للي ميعرف انكليزي يكدر يقراها ومع هذا راح اكتبها اليوم باللغتين وبالنسبة للتعاملات المصرفية فبعد موضوع الكردت راح اكتبلكم موضوع كامل شلون تفتح حساب وشنو انواع الحساب وشلون تضمن عدم فرض غرامات عليك او مبلغ شهري وشلون تستخدم الكارت بصورة امينة وكل ما يتعلق بالموضوع والمصطلحات راح تكون بالعربي والانكليزي بس تبطل الكحة الي شكلها حبتني ومتريد تفاركني .
الموضوع السابق فهمنة الكردت سكور ( Credit score ) ان يحسب وفق الكريدت ريبورت ( credit report )  وشرحنا ان الكردت ريبورت جدا مهم في حياتك والي تكدر من خلال كونه عالي ان تشترك ويا شركات الخدمة بدون اي تامينات تشتري سيارة تقسيط بدون فائدة تشتري بيت تقسيط بفائدة صغيرة جدا واضيف عليها تفتح مشروع بقرض من البنك تدفع نسبة من المبلغ والبنك يكملك الباقي وتقسط القرض من ارباح المشروع , معناتها الكريدت ريبورت ( credit report ) يعادل ملايين يعني لازم نكون متبهين عليه ونجيكة سنويا اذا مو كل 6 شهور حتى نتاكد انم اكو اي شخص مستخدم معلوماتنا وفاتح حسابات بيها ونتاكد انم اكو احد يطالبنا بشي واحنا منعرف , وهذا الشي صار وياي في السنة الي فاتت شهر 4 بديت اتحرك كثيرا باتجاه بناء الكردت وبصراحة المعلومات عن بناء الكردت جدا قليلة حتى بعض الامريكان ميعرفون وكل واحد يحكي شكل تعبت جدا حتى احصل على معلومات من مصادر مختصة ( مع الاسف اغلب العراقيين ميعرفون اي شي عن هذا الموضوع والمشكلة يفتون بكيفهم من دون علم لان كالعادة كبريائهم متسمحلهم ان  يكولون اسف معندي معلومة عن الموضوع ) , قررت ان اجيك الركدت ريبورت مالتي فدخلت على الشركة الاولى ونزلت الريبورت واتفاجئت ان هناك شركة اطالبني بمبلغ 135$ وصارلها اربع اشهر ومنزلة الدرجة مالتي الى 490 , اني بحياتي مماخر فاتورة فمباشرة اخذت رقم الحساب الي عليه الخلاف واتصلت بشركة الكردت وانطيتهم معلوماتي وكتلهم اكو شخص مستخدم معلوماتي لان اني بحياتي معندي تعامل بولاية اخرى لان كانت شركة التحصيل بولاية كاليفورنيا , كلي معناتها انطيك معلومات الشركة تخابرها وتفتهم منها واحنا راح ندز الهم ونستفسر منهم وانت ممكن تسوي   Disput وهو مسطلح للاعتراض على اي فقرة داخل الربورت , وبالفعل اتصلت بالشركة اليد تطالبني بالمبلغ والمفاجئة ان كان اسمي بالفعل وعنواني القديم  والفاتورة فاتورة طبية مال اسنان طيب اني عندي تامين من الشركة يغطي الاسنان وعمري مسويتا سناني بتاريخ هي الفاتورة , المهم انطتني عنوان المستشفى ورحت للمستشفى ونزلت للارشيف وطلعت اوراق الموعد وطلع الموعد نفس موعد الجيك الفيزيائي الي تسويه اول متوصل امريكا بعد اجراء اللقاحات , طيب انا بذلك الوقت عندي مدكيت وعندي تامين خاص من نفس المستشفى وعندي تامين صحي مال عملي طيب ليش مستخدموهم او على الاقل بلغوني , بعدين اني مسوي فحص سريري شجاب الاسنان بالموضوع , اخذت الفايل من الارشيف وطلعت للطابق الثالث والي هو القسم الي قمت بالفحص السريري بيه  وقابلت مدير القسم وطلبت منه التفسير لان هذا القسم مبيه اسنان شلون يصدر فاتورة اسنان , المهم الرجال راح ورجع ووجه مخطوف كتله تفضل , كال الفاتورة صحيحة ؟؟ كتله شلون كال الي صار انت لمن سويت الفحص السريري الدكتورة سئلت كانت تشكو من شي انت كتلها كلشي تمام بس يحتاج شوية شغل للاسنان فالدكتورة كتبت بالتقرير ان انت كلشي تمام بس الاسنان ينرادلها شغل  فالموظف الي صدر الفاتورة  شاف بيها اسنان فحسبها فاتورة اسنان , طيب ليش ما بلغتوني واني مغير عنواني يمكم ؟ الجواب : عنوانك متغير يمنى بس ممتغير بالقسم الاخر الي هو قسم الفواتير فضلوا يدزولك الفواتير على عنوانك القديم , والمشكلة ان التحويل الي تسويه من البريد بعد متنتقل من عنوان الى عنوان يحول الرسايل First class فقط وهما جانوا يدزون اشعارات عادية , المهم كتله اني بالنسبة الي الكردت مالتي ادمر بسبب هذه الاخطاء واني مستعد ان اروح هسه للمحكمة واقاضي مستشفاكم , المهم هو نزل للحسابات ودفعوا الفاتورة بتاريخ قديم وخاطبوا شركة التحصيل ان تغلق الملف , وطبعا اني هم يوميا كمت اخابرهم الى ان مسحوا هذا الحساب وطفر الكردت سكور الى 710 , نفس الشي في حساب اخر قرض  الطائرة ان ادفع شهر بشهر الشهر الي انتقلنا بيه  موصلني اشعار منهم لمدة شهرين فاتفاجئت ان اكو تاخير شهرين ومن اتصلت بيهم وكتلهم  شنو الفلم انتم مدزيتولي اشعار كالوا هذا واجبك انت المفروض ادز من غير متنتظر اشعار وهما كانوا محقين بهذا الشي  واني كنت جديد فما اعرف التفاصيل فكانت الغلطة مني مع هذا سويت  Disput واتصلت بالكنيسة الي ادفعلها القسط وحجيت ويا السوبر فايزر واعتذرت منه وهو الرجل ساعدني ومسح شهر وبقالي شهر ..
معناتها التجييك جدا ضروري .. طيب ني شلون ارفع الكردت مالتي بفترة زمنية قصيرة  شنو الاساليب والحيل وراح انطيكم طريقة مبتكرة , المعروف 3 اشياء ترفع الكردت سكور مالتك  راح ارتبها من الاقل تاثير الى الاكبر تاثير :
1-   Credit card   يكون عندك كردت كارت من بنوك محترمه  , وكلما كان تاريخك بالتسديد جيد راح يزيد عندك السكور وكلما كان مبلغ credit line مالتك اعلى كلما يزيد اكثر .
2-   شراء سيارة بالاقساط  او شراء اثاث من محلات كبيرة بالاقساط , كلما تدفع القسط بوقته كلما يزيد الكريدت مالتك .
3-   شراء بيت بالاقساط وهذا الشي راح يخلي الكردت مالتك يعلك .. والعروض راح تجي عاليك مثل المطر من البنوك وبمبالغ كردت كارت خيالية .
طيب هاي الاساسيات زين شنو الاساليب الاسرع  شسوي اني حتى خلال سنتين ارفع الكردت سكور واكدر اشتري بيت راح انطيكم وصايا استخدمت قسم منها اني شخصيا :
1-   صديق الي تايواني انطاني طريقة رهيبة وسريعة جدا 4 اشهر راح يفرق عندك الدرجة فرق كبير جدا , شلون كلي تروح تشتري سيارة اقسط من معرض , كتله م واني معندي كردت عالي راح يطلب مني  فائدة عاليا  اشتريها كاش افضل , كلي هنا الغلط , كتله واذا اني ما ادفع 3000 $ زيادة واني عندي المبلغ مو منطقي , كلي خليني افهمك الطريقة مراح تخسر 3000$ كل الي تخسره 300$ بس !!!!!
الطريقة شنو انت تشتري سيارة بالقسط والنفرض سعرها 4800 $ تقسطها على سنتين 200 $ لكن هو راح يفرض عليك انترست والنفرض الانترست  30% مبلغ السيارة راح يكون  4800+1440 = 6240 يعني بالشهر  260$ يعني الفرق هو 60 دولار بالشهر كلي ادفع القسط هذا لمدة 4 شهور وبعدها ادفع المبلغ كامل فراح تخسر الفائدة ل4 شهور فقط والي هي 240$ لكن الكردت مالتك راح يصعد جدا لانك دفعت اقساط  بدون تاخير والاهم انك غلقت الحساب ودفعة المبلغ كامل وهذا الشي جدا مهم برفع السكور . نفس الطريقة ممكن تستخدمها بالاثاث .
2-   كثير من العراقيين مع الاسف  يستخدمون مبلغ credit card مالتهم كامل , يعني هو عنده كارت كردت ب 500$ شيسوي يحاول يصرف اكبر مبلغ منه ضنا منه ان هذه طريقة راح تحسن الكردت مالته لكن هذه طريقة خاطئة جدا وبالعكس تضر الكردت متزيده شلون :
دائما لمن يقيمون حساب الكردت كارت مالتك  ينضرون انتش كد صارف منه وكلما تصرف اقل معناتها انك مؤتمن اكثر لانك ممتاز بادراة اموالك وممحتاج ان تشتخدم مبلغ الحساب مالك بشكل كبير , ولهذا لا تصرف اكثر من 20% من مقدار حسابك في كل فاتورة , يعني اذا انت حسابك 500$  اصرف منه 20 دولار 40 دولار بكل الاحوال لتجاوز 100%  ومن تجيك الفاتورة ادفع المبلغ كامل .
3-   اخذ قرض بسيط من بنك  2000$ او 3000$  وتسديده لفترة كم شهر ثم دفعه كاملا , طيب شلون ناخذ قرض واحنا بعدنا جدد معدنا كردت , بعض البنوك تنطيك قرض مؤمن security loan , يعني تفتح حساب وياهم ب 3000$  وتاخذ قرض منهم ب 3000$ بضمان حسابك الي يحجز بيه المبلغ , وتدفع كم شهر وبعدها تدفعه كامل , اعرف اخوان استخدموا هاي الطريقة بس اني ما حبيتها وما انصح بيها لانها تبديل عملة بعملة فبصراحة اني ابتعد عنها .
4-   لا تحاول تغلق اي  credit card  تملكه مهما كان السبب لان هذا الشي راح ينزل السكور عندك , ولهذا دائما اقوول لمن تفتح credit card  أتاكد من كلشي من الاشتراك السنوي اهم شيء ومن قوة البنك او الجهة الي تنطيك الكارت لان  من غير المفضل انك تغلق هذا الحساب لانك راح تخسر هستري وراح تحسب على انك غير قادر على ادارة الحساب .
5-   لاتكثر من تقديمك على كردت كارت او خدمات تقوم بتجييك الريبورت الخاص فيك في كل مرة انت تقدم وهذه الشركات تطلب الريبورت مالتكراح تفقد ما بين 2-4 درجات من السكور مالتك , فاذا متكون متاكد انك مؤهل للقبول لتقدم , والاخطر هو عند التقديم لاكثر من مرة بوقت قصير .
الموضوع مفصل وكبير وانا مستعد لاي سؤال او استفسار على الخاص او على العام , وراح انزل باسفل الموضوع رابط الموضوع القديم للي مقراه , وطبعا كل مقترحاتكم دا اقراها واسف للتاخر بالرد , وانشاء الله راح انزل كل المواضيع الي تشغلكم وبالنسبة لطلب اخوية عراقي وكرادي فانشاء الله راح اكتب في كل ما طلبته  ومتسافر الا ميتكون  امريكي 100% من ناحية المعلومة وحبيت جدا مقترحك للامور الترفيهة وشلون تقضي يومك وراح ارتبلك موضوع يخبل بهذا الخصوص راح يفيد الجميع انشاء الله , عذرا على الاطالة والاخطاء الاملائية لكني كالعادة لا احب ان اراجع ما اكتب ...

تحياتي
أبو قمر

[نــــــــــوار تيتــــــو]

حبيبي ابو قمر
 
منور عيوني

كلللللللللللللللللللللللللللللشششششش


شلونك  اغاتي انشالله بخير

 

انــــــــــــــــــــــــــــــــــــــي  فـــــــــــــــــــــــــــــرحــــــــــــــــــــــــــــــــــــــــان 

[aws love]

  ورده ابو قمر ... ودمتم للنضال ... تحياتي اخي العزيز

[azizaliraqi]

نورتنه ابو قمر والله
يارب ردي قبل رد نوار
ههههههه

[tofy]

عااشت ايدك ابو قمر

تحيااتي

[مهاجرين بلا حدود]

حمد لله على السلامة

الكل منتظر جيتك ابو قمر ...ومابقى شي على المظاهرات ..

متفهمنا شنو القصة..الاحداث بس وياك ؟

ابو محمد

[bhabhan]

نورتنا يا غالي الغوالي

[أبو قمر]

اخوية مهاجرين الورد اني كتبت الي صار بموضوعي الي انحذف وهاي نسخة من الي كتبته .. شكرا لكلماتكم ومشاعركم الطيبة تبقوون غاليين وتبقى المحبة بينا الى الابد انشاء الله ...

صباح الخير للجميع اولا ...
الجميع راح يسئل شنو الي صار .. البارحة واني ارد على احد الاخوان بموضوعي اتاخر الرد بالنشر وانتظرت اكثر من 10 دقائق حتى يرسل الرد وبعدها طلعلي لايمكنك كتابة مشاركة في هذا القسم .. انتبهت اني خرجت .. حاولت ادخل باسمي مكدرت ادخل من البارحة العصر .. واتفاجئت العصر من رجعت البارحة ان الموضوع اختفى واخوانا منزلين مواضيع فاتصل بيه الاخ صفاء وصحتله الي صار , بس الي استفزني البارحة ان كان اكو تسائل الي يحذف الموضوع احد ثلاثة يا الادارة يا صاحب الموضوع , يا خلل فني , طبعا صاحب الموضوع الي يكعد فوك الساعتين يكتب ويجمع افكار مو بالبساطة يحذف هذا الشي لعد ليش نزله , بعدين من ينزل موضوع وتصير بيه مشاركة مو من حق اي انسان يحذفه لان اصبح مو موضوع صاحب الموضوع اصبح موضوع ملكية عامة للجميع فمو من حقي ان احذفه , فما دا ادري شنو السبب ... اليوم الصبح كدرت ان ادخل ( دا ادخل حسب مزاج المنتدى  بكيفه ادخل وبكيفه يخرجني ) بس مو مشكلة من المرة الي فاتت اتعلمت اخزن مواضيعي وهنا نسخة من الموضوع واتمنى الجميع يشارك فيه وكلما ينحذف راح انزله .. ونزلت ايضا موضوعين انحذفوا سابقا ... اذا كان الخلل فني فكلي احترم لجميع الاداريين اما اذا كان الحذف من شخصهم فاقول لهم شكرا على الاجر والثواب فانتم بالفعل تساعدوني على تحصيل اجر عظيم . تحياتي للجميع ولاخي عزيز وبهبهان وزرزور ونوار وايمي وكل الاسماء الي نادت وسئلت عن ابو قمر والبارحة مجنت اكدر ادخل بس والله فرحتي متوصف بمحبتك .. ولا يهمكم راح اظل اكتب والي ينحذف ارجعه من جديد ..
 ابو قمر

[عباس الطائي]

الله اينصرك يا ابو قمر
والله اجمل مواضيع هذا المنتدى منك.. انت ابداع.. انت راقي... الله ايوفقك ياغالي
ايخوني التعبير عن وصفك
تحياتي الك

[مهاجرين بلا حدود]

منور ابو قمر ... بعز النهار يمنها واسمك منور دائما


تحياتي

[SARA CALIFORNIA]

اعجز عن الكلام,,موضوع رائع,,,جعله الله في ميزان حسناتك
طبعا النقطة رقم خمسة اني عانيت منها جدا و سببت نزول السكور عندي لما سحبت تقرير الكردت,,,كلما اطب ستور تسالني الموظفة او الموظف تريدين كارت التخفيض مال الستور و عدة مرات وافقت و سويته,,,مع الاسف الجهل بالامور يخلينا نرتكب اخطاء صعب تتصلح,,المهم الستور وراها سوى ما يعرف ب(hard inquiry) عليه بينما الي المفروض يصير فقط (soft inquiry)و هاذه الشي دمر الكرت مالتي او اثر عليه,,,هيه اذا على شغلة مرة وحدة مو مشكلة بس مرة على مرة على مرة تلم ة تصير هواية و تخرب الكردت هستوري
شكرا اخ ابو قمر عالموضوع الرائع و اني هالمرة قبل ما اقراه سيفته تحسبا للتايهات

[*iskender*]

عاشت ايدك حبي  ابو قمر

[Banjamen]

انت القمر الينور ظلمتنة بالمنتدى يا اطيب قلب

[أبو قمر]

شكرا اخت انجي لتعاونك ومساعدتك في نقل الموضوع ..

تحياتي
أبو قمر

[PlatinuM]

ابو قمر الوردة
ممنون منك على المعلومات القيمة
تحياتي

[Sound of Soul]

السلام عليكم اخي ابو قمر

ممكن سؤال بسيط اريد اعرف شوكت الواحد يكدر يبدي يبني الكردت مالته بالضبط
من لحظة دخولة لامريكا وماهي اولى الخطوات اللي يكدر يبدي بيها ببناء الكردت
وشكرا مقدما على الرد

تحياتي ...

[أبو قمر]

السلام عليكم اخي ابو قمر

ممكن سؤال بسيط اريد اعرف شوكت الواحد يكدر يبدي يبني الكردت مالته بالضبط
من لحظة دخولة لامريكا وماهي اولى الخطوات اللي يكدر يبدي بيها ببناء الكردت
وشكرا مقدما على الرد

تحياتي ...

 اختي الارمنية بمجرد حصولك على السوشيل سكيورتي نمبر بامكانك المباشرة ببناء الكردت , طبعا اول شي ممكن تقومين بفتح سكيور كردت كارت والي ذكرته في مواضيعي سابقا , وهو مبلغ تنطيه للبنك ينطيج بيه كارت كردت يرجعلك اياه بعد سنة اذا كانت دفعاتك بالوقت المحدد خلال اشهر السنة هذا راح يساعدك ببناء الهستري ووضع قدمك على اول طريق بناء الكردت , طبعا لازم تحافظين على دفعات كل فواتيرك من اجار كهرباء مي انترنت هذا كله مهم حتى يحافظ على الكردت مالتك لان اي مشاكل قد توضع بالربورت مالتك ويسبب مشكلة كبيرة للكردت مالتك , ايضا شراء سيارة بالاقساط يساعد جدا ببناء الكردت ايضا البيت لكن البيت مرحلة اكبر لانك تحتاجين الى كردت مناسب لشراء البيت بالاقصاط .. انا وضحت كل هذه الاشياء بكيفية بناء الكردت الجزء الاول والجزء الثاني ممكن تطلعين على المواضيع وانا حاضر لأي سؤال او استفسار ..

تحياتي
أبو قمر

[ياسمين بهاء]

شكرا لك اخي ابو قمر على المعلومات الي بصراحه استفاديت منه رغم اني الي اكثر من ثلاث سنوات باميركا الا اني ومكنت اعرف كل هاي المعلومات فبارك الله بك,لكن اخي اين رابط الموضوع السابق الي قلت انك رحت توضعه في الاسفل يبدو انك نسيته ارجو ان تضعه لنا اذا سمحت لغرض الاستفادة من معلوماته مع الشكر لحضرتك

[مهاجر ابدي]

الاخ الكريم ابو قمر

لدي استفسار حول فتح سكيور كريدت بمبلغ ثم يمر شهران او ثلاثة دون ان تستخدمه كان تكون خارج امريكا لفترة معينه..هل هذا التصرف اي عدم استخدام الكردت كارد لهذه الفترة سيؤثر على السكور؟

وهل الكرديت جك الذي تقوم به شركات العقارات عندما تؤجر عقار يؤثر على السكور؟ لأن هذه العملية تتكرر اكثر من مرة عندما تنوي ايجار الشقة. واذا لم يكن عندك كريدت اكاونت وقمت بهذه العملية كذلك يتأثر السكور ام يتأثر فقط اذا كان لديك كردت اكاونت

تحياتي وشكري لك

[Sound of Soul]

السلام عليكم اخي ابو قمر

ممكن سؤال بسيط اريد اعرف شوكت الواحد يكدر يبدي يبني الكردت مالته بالضبط
من لحظة دخولة لامريكا وماهي اولى الخطوات اللي يكدر يبدي بيها ببناء الكردت
وشكرا مقدما على الرد

تحياتي ...

 اختي الارمنية بمجرد حصولك على السوشيل سكيورتي نمبر بامكانك المباشرة ببناء الكردت , طبعا اول شي ممكن تقومين بفتح سكيور كردت كارت والي ذكرته في مواضيعي سابقا , وهو مبلغ تنطيه للبنك ينطيج بيه كارت كردت يرجعلك اياه بعد سنة اذا كانت دفعاتك بالوقت المحدد خلال اشهر السنة هذا راح يساعدك ببناء الهستري ووضع قدمك على اول طريق بناء الكردت , طبعا لازم تحافظين على دفعات كل فواتيرك من اجار كهرباء مي انترنت هذا كله مهم حتى يحافظ على الكردت مالتك لان اي مشاكل قد توضع بالربورت مالتك ويسبب مشكلة كبيرة للكردت مالتك , ايضا شراء سيارة بالاقساط يساعد جدا ببناء الكردت ايضا البيت لكن البيت مرحلة اكبر لانك تحتاجين الى كردت مناسب لشراء البيت بالاقصاط .. انا وضحت كل هذه الاشياء بكيفية بناء الكردت الجزء الاول والجزء الثاني ممكن تطلعين على المواضيع وانا حاضر لأي سؤال او استفسار ..

تحياتي
أبو قمر

 حقيقة جهودك تستحق عليها كل الشكر والتقدير على المعلومات القيمة اللي تقدمها للاعضاء
الله يوفقك وبارك الله بيك اخونا العزيز

[أبو قمر]

الاخ الكريم ابو قمر

لدي استفسار حول فتح سكيور كريدت بمبلغ ثم يمر شهران او ثلاثة دون ان تستخدمه كان تكون خارج امريكا لفترة معينه..هل هذا التصرف اي عدم استخدام الكردت كارد لهذه الفترة سيؤثر على السكور؟

وهل الكرديت جك الذي تقوم به شركات العقارات عندما تؤجر عقار يؤثر على السكور؟ لأن هذه العملية تتكرر اكثر من مرة عندما تنوي ايجار الشقة. واذا لم يكن عندك كريدت اكاونت وقمت بهذه العملية كذلك يتأثر السكور ام يتأثر فقط اذا كان لديك كردت اكاونت

تحياتي وشكري لك

صديقي العزيز انا اسف للتاخر بالرد تقبل اعتذاري ..
ابدا عدم استخدام الكمردت كارت لفترة قصيرة اي شهرين او ثلاثة لايوثر سلبا لكنه بنفس الوقت لايعطي ايجابا .. الافضل هو صرف مبلغ بسيط ودفعه بالكامل .. اذا كنت بالعراق ممكن تستخدمه اون لاين تدفع فاتورة مي او فاتورة كهرباء او انترنت ومن تجي البيل وانت بالعراق ادفعها من حسابك البنكي وانت بالعراق على الانترنت ..
موضوع التجييك على الكردت , وهو مايسمى انكيوري والي اكو نوعين منه هارد انكيوري وهذا ايئذي الكردت سكور ينزل من نقطتين الى ثلاثة في كل تجييك , واكو سوفت انكيوري وهذا ميئثر وهذا تقوم بيه بعض البنوك والشركات لتجييك وضعك المالي وتقديم العروض الك والي ميكون بطلب منك ..
موضوع الاجار اكيد لمن يسوون بوول للكريدت ريبورت مالتك راح يئثر قليلا لكن الاخطر هو طلب اليبورت لاكثر من مرة خلال فترة قصيرة .. يعني اذا انت كل شهر او شهرين يصير انكيوري على الكردت ريبورت مالتك فالتئثير قليل اما اذا كان في اليوم الواحد او في اسبوع اكثر من انكيوري راح يئثر تأثير كبير ولهذا افضل ان تقلل من هذه العملية لكن طبعا مو بيدك لانه شر لابد منه , لكن حاول بقدر ما تقدر ان تقلل من التقديم في مكانات غير مضمونة القبول ..

تحياتي

أبو قمر

[mohammedchemical]

والله انت وردة ابو قمر الغالي شكرا على هي المعلومات

[AboDiana]

ابو قمر الغالي شكرا على هذه المعلومات القيمة والمفيدة على الدوام وخاصة للاخوة والاخواة في الولايات المتحدة

تحياتي اخوكم
ابو ديانا

[ALBERT.]

 اعرف اخوان استخدموا هاي الطريقة بس اني ما حبيتها وما انصح بيها لانها تبديل عملة بعملة فبصراحة اني ابتعد عنها ..............


ربي  يحفظك ويثبتك ويبارك برزقك.....

[rezgar-77]

وينك ابو قمر

[mosul87]

تحية طيبة ....
تحية شكر قليلة بحقك يا ابو قمر
لان فعلا فددنا بشكل كبير .. و خصوصا انو اني جديد ما صارلي شهر
احب اسألك  ..
اني فتحت حساب بنكي في بنك ويلس فاركو save & check
بس هذا عندا جارج اذا ما استخدم الجيك اقل شي 10 مرات بالشهر
وبصراحة اريد اغلق الحساب في هذا البنك و افتح في bank of america
لان قريب على بيتي و ما يجررج
بس اكو شخص قال انو يمكن تأثر عل كرديت سكور اذا سديت حساب  !!

شنو نصيحتك اليا و شسوي ؟؟؟!!

[عمي كيل]

قبل التسجيل في المنتدى
وقبل الوصول الى امريكا كان من المصادر المفيده جدا والمتكامل بالمعلومات لدي هو ابو قمر شكرا على التفاني والوقت الثمين الذي تبذله معنا جعله الله تعالى في ميزان اعمالك

[fouad nasir]

مشكورة جهودك ابو قمر

[al3lass]

اخوية ابو قمر اني احد قراء مقالاتك لاحظت استخدامك انشاء الله بدل ان شاء الله واكيد تعرف الفرق
حسيت من كلامك اتحب اساعد الناس بمعلوماتك و خبرتك بالحياة لكن انتبه في حاله تشجيع الناس على الربا و هو حرام بكل الاديان وبالتالي تاخذ سيئات كل واحد يطبق نصيحتك وانت كاعد بالبيت
اخوك المهندس خالد من ايطاليا

[rafidmk]

اخي العزيز ابو قمر
تحية طيبة
اني لحد الآن ما وصلت لامريكا وحالياً بانتظار الموافقة بس عندي استفسار حول موضوع الكردت
اني بمصر وعندي كردت كارت (ماستر كارد-من ستي بنك مصر) ودائما اسدد بدون تأخير بمعنى ان الهستري مالتي هنا جيد
السؤال هو ممكن انقل هذا الهستري من مصر الى امريكا؟
وشكراً