تحية طيبة ,
اليوم حبيت اكتبلكم واشرحلكم شي مهم جدا ويشغل بالي الكثيرين ..... ماذا لو فقدت عملي في امريكا ؟؟ اكيد راح يذبوني بالشارع ؟؟ على فكرة هذا الكلام تسمعه من صنفين الصنف الأول بعض العراقيين هنا في امريكا الصنف الثاني من هم ليسوا في امريكا لكونهم كالعادة يعتمدوا على معلومات من الصنف الاول او معلومات التلفزيونات العربية والصحف العربية الي هي بطبعها دائما تقلل من شأن امريكا , ولهذا عليك ان تتاكد من مصدر أي كلمة تسمعها لان للاسف ان جميع من يسكن هنا ولا يملك لغة او احتكاك بالمجتمع غير قادر على اعطائك معلومات صادقة , وهنا بهذا الموضوع راح اكتبلكم عن ماهو نظام العمل في امريكا؟ كيفية التقديم على عمل وجتلكم استمارة تقديم حتى نتعلم شلون نمليها وغالبا ما تكون استمارات التقديم متشابهة ما بين الشركات , كيف تحافظ على عملك ؟ وماذا لو فقدت عملك ؟؟ وراح ابدي بالسؤال الاخير .
الجميع يعلم ويسمع عن الازمة الاقتصادية التي مرت بأمريكا والعالم , لكني لغاية هذه اللحظة لم ارى شخص جائعا او شخص يفترش الشارع !!!! الكثير من الاقتصاديين اشادوا بالاقتصاد الامريكي رغم التراجع الذي حدث خلال وبعد الازمة , قوة هذا الاقتصاد نابعة من الدستور وقوانين المجتمع المدني والقوانين التي تحكم علاقة العمل بين اصحاب الشركات والعمال أو الموظفين .
ماذا لو فقدت عملي ؟؟ هنا نتوقف عن كيفية فقدانك للعمل , هل فقدت للعمل بسبب صاحب العمل او بسببك انت , بمعنى اخر هل طردت من العمل بسبب اخطاء قمت بها ام تركت العمل لان الشركة ترغب في تقليص عدد العمال بسبب قلة الانتاج او لاسباب اخرى ,
اذا كنت موظف أساسي في شركة او معمل او محل ومر على خدمتك فترة تتجاوز الستة اشهر فيح لك عند فدانك للعمل التقديم على unemployment benefits وهو عبارة عن برنامج حكومي يمكن التقديم له اون لاين او من خلال زيارة مكتبهم القريب من منطقتك , وبعد ارسال المعلومات لهم سوف تكون مؤهل لاستلام 80% من مرتبك الشهري السابق وانت جالس في البيت لمدة 6 اشهر قابلة للتجديد 6 اشهر اخرى لكن بشرط ان تقوم بالتقديم على عمل اسبوعيا وبعدد لا يقل عن ثلاث مرات في الاسبوع لكي يضمنوا انك تبحث عن عمل ,والكثير من الامريكان يستفادون من هذا البرنامج في حالة فقدانهم للعمل خلال فترة بحثهم عن عمل اخر , طيب هذا المبلغ الي يدفعولك اياه منين مصدره ؟؟؟
طبعا راح تسمع الكثير من حجي العراقيين الي يعملون بالكاش يكلك عمي ليش تشتغل بالشركات وتدفع ضرايب وفلوسك تروح للدولة احسن شي واريح شي الكاش؟؟ طبعا هذا كلام مغلوط مئة بالمئة , وراح ابدي اوضح موضوع ضريبة العمل الي تدفعها والي الكثيرين ميعرفون ان اغلبها يرجع الك والدولة ممستفادة أي شي منها شلوون ؟؟ الضريبة الي تستقطع من راتبك تقسم الى ثلاثة اقسام :
Social security Tax
Medicare Tax
Federal Tax
طبعا مقدار الضريبة الي تدفعها يحسب على عدد الي تعيلهم وحسب استمارة ال W4 الي عبيتها اثناء تقديمك للعمل وراح نكتب عنها موضوع كامل مستقبلا ودائما متكون الضريبة بين 15% الى 3% , اذا كنت صاحب عائلة فمراح يستقطع منك الكثير واذا كنت شاب راح تكون الضريبة اعلى وراح انزل موضوع خاص بالضريبة مستقبلا لأن اغلب الناس ماخذ فكرة غلط عن الضريبة , اذن مبلغ الضريبة راح يتوزع لثلاث اقسام القسم الاول يروح Social security Tax والي راح ينجمع الك وتسفاد منه في فقدانك للعمل يعني هذا المبلغ راح يستخدم في حالة فقدانك لعمل وراح يرجعلك البعض راح يكول بس هذا المبلغ اقل من الي يدفعولك اياه اذا فقدت العمل , نعم صحيح لان المبلغ المدفوع الك راح يكون جزء منه من السوشيل مالتك والجزء الاخر من الشركة الي بطلتك راح تظل تدفعلهم بشكل شهري حتى تلكه عمل وتخرج من البرنامج اضافة الى دعم مالي حكومي , ولو موضوعنا مو عن التاكس بس راح اوضحلك القسمين الباقيين , Medicare Tax هذا المبلغ يجمعوه الك كضمان صحي من تطلع تقاعد , Federal Tax وهذا القسم الوحيد الي يروح للحكومة والي راح تسترجعه كاملا اضافة الى منحة حكومية كل راس سنة في ما يسمى باسترجاع التاكس في حالة دخلك قليل مقارنة بمتوسط الدخل الامريكي وعلى فكرة نادر ما يستقطع هذا النوع من التاكس للعامل صاحب العائلة ويستقطع فقط عندما يكون المبلغ عالي نسبية وفق حسابات معينة ولهذا اصحاب العوائل غالبا مايستقطع منهم Social security Tax , Medicare Tax فقط , اكيد كثير منكم متهمة التفاصيل يريد شد هي الضريبة الي لازم يدفعها اذا اشتغل ؟ رغم ان هذا السؤال لايمكن الاجابة عليه لان الموضوع يعتمد على عدد افراد الاسرة ومقدار الدخل لكن راح انطيكم مثال , مثلا اني عندي طفلة وزوجة يستقطع مني ضريبة على 1000$ مقدار 60$ طبعا انا دخلي يختلف عن غيري كلما يقل دخلك كلما تقل الضريبة وشي على شي المبلغ جدا صغير .
نرجع لموضوعنا معناتها اني اذا مثبت بشركة لمدة تتجاوز ال6 شهور راح اكون ضامن ان يكون الي دخل شهري حتى لو عزلت الشركة ( بعض الناس يكلك الشركات تعزل ويشمروك بالشارع ) , نجي الان الى كيفية التقديم على عمل ؟؟ وكيف يقسم العمل في امريكا من ناحية التوظيف ؟؟ وكالعادة راح ابدي باخر سؤال .
العمل في امريكا يقسم من ناحية التوظيف الى نوعين :
عمل مؤقت Temp Job : هذا النوع من العمل مراح تملك بيه اي حقوق من اجازات مدفوعة الاجر كالعطل الرسمية او عطل سنوية او عطل مرضية اضافة الى عدم حصولك على تامين صحي اضافة الى ان صاحب العمل ممكن ان يمشيك باي وقت يحب ومن دون ان يكون الك الحق للتقديم على برنامج unemployment benefits , اذا هذا النوع ليس لك فيه أي حقوق , وهذا النوع غالبا ميكون لمدة 3 او 6 اشهر تنتقبل بعدها للنوع الاخر .
عمل ثابت Permanent Job : هذا النوع من العمل تملك فيها جميع الحقوق كاملة من عطل رسمية مدفوعة , من عطلة سنوية والي اغلب الشركات تعطي 10 ايام سنويا مدفوعة , اجازات مرضية غالبا متكون 6 ايام بالسنة اضافة الى تامين صحي مدعوم او مدفوع كليا , بامكان الشركة ان تمشيك في حالة توقف العمل او تقليص عدد العمال لكن يكون لك الحق بالتقديم على رنامج unemployment benefits , لكن هذا الامر نادرا جدا لان اغلب الشركات عندما تقلص العمال تقلص العمال الموقتين اولا اضافة الى ان الشركة سوف تبقى مطالبة للدفع لك حتى بعد تسريحك من العمل وهذا الي ذكرته سابقا ولهذا اخر خيار للشركة سوف يكون تسريح العمال المثبتين .
هنا نجي نبسط الموضوع , نظام العمل في امريكا غالبا ما يفرض فترة عمل مؤقته بالذات العمال والموظفين محدودي الخبرة والكفاءة والوظائف التي لا تحتاج الى خبرة , يعني هذا النظام نادر ما يطبق على الاطباء والمهندسين واصحاب المهن الاحترافية , اذن غالبا ما تكون اول 3 اشهر او 6 اشهر من عملك فترة مؤقته فترة اختبار للتاكد من انك موظف كفوء , هذه الفترة غالبا ما تكون فيها تحت اسم شركة توظيف أي شركة مغايرة للشركة الي تعمل فيها , يعني شركة التوظيف هي الي تعينك وتعطيك المرتب مالتك وتكون مسئول منها طيل الفترة المؤقته بالمقابل الشركة الام الي انت تعمل بيها متكون مسئوله عن أي شي يخصك مجرد تدفع راتبك الى شركة التوظيف + عمولة شركة التوظيف على كل ساعة , ولهذا هويتك واوراقك كلها تدل على انك تعمل مع شركة التوظيف وليس مع الشركة الام , بعد فترة العمل المؤقتة الشركة الام تطلب من شركة التوظيف ان تحول اوراقك لتثبيتك ضمن كادرها وسوف تقوم بتوقيع عقد جديد ويكون تالك حقوق جديدة , هذا النظام ماشي في اغلب الولايات الامريكية ويشمل الشركات والسوبر ماركتات والمعامل ومختلف قطاعات العمل , احيانا الشركة الام تعينك كموظف مؤقت عدها لفترة وبعدها يتم تثبيتك بدون الاستعانة بشركة توظيف وهذه الحالة موجودة ايضا , لكن بالناتج دائما يكون هناك فترة مؤقتة تثبت فيها كفائتك وفترة دائمية تاخذ فيها كل حقوقك .
يفية التقديم على عمل : هناك طرق كثيرة للبحث عن العمل ( لا تعمتد على المنظمة في ايجاد عمل لك وتكعد تنتظر ) انا بالنسبة الي الانترنت يعتبر المصدر الاساسي للبحث والي من خلاله تجد شركات التوظيف الي قريبة من منطقتك اضافة الى وظائف مباشرة يكون التقديم عليها عن طريق الانترنت مباشرة , الاصدقاء والمعارف الي تعرفهم والي اغلبهم مراح ينطيك معلومة بس مع هذا حاول , السوبر ماركتات الكبيرة وهذا النوع دائما يطلب عمال وموظفين ويمكن التقديم اله عن طريق الانترنت مثل الولمرت ، تاركيت ، روز , كروكر , والكثير من السوبرماركتات الضخمة وممكن ان تذهب الى نفس السوبر ماركت هناك كمبيوتر للتقديم ممكن ان تجلس وتكمل استمارة تقديمك , وانشاء الله راح احاول ان انزل مواضيع تشرح كيفية التقديم وبالصور لكل هذه المكانات , طيب كيف اعبي الاستمارة , اليوم جبتلكم نسخة من استمارة لاحدى شركات التوظيف وراح اوضحلكم كيف طريقة املائها وهي غالبا ماتكون نفس الاستمارة في اغلب اماكن التقديم مع اختلافات بسيطة يمكن البعض راح يشوفها جدا سهلة لكن حبيت ان اوضحلها للي انكليزيته ضعيفة والي معنده معلومات عن استمارات التقديم ,
اذا تلاحظ بالاستمارة كما بالصورة المعلومات المطلوبة معلومات بسيطة جدا وهي :
First name : أسمك الاول
Middle : اسم الوالد وغالبا ميكون اختصار اول حرف فقط
Last name : وهو اسم الجد او اسم العائلة حسب ما انت ذاكره وحسب ما موجود بهويتك
Home phone : رقم تلفون البيت وممكن تكتب N اذا معندك
Cell phone : رقم موبايلك والي هذا جدا مهم لان يتصلون عليك بيه ولهذا ما انصح بتغيير تلفونك كل كم يوم والله اكو شركة ارخص , قبل لتاخذ التلفون قررويا اي شركة وانهي الموضوع رغم ان اغلب الشركات تنقلك رقمك ويا الخدمة بس اكو شركات معدها هاي الامكانية , اذا كانت انكليزيتك غير جيدة ممكن تتفق ويا شخص تعرفه وتحط رقم تلفونه يجاوب عنك .
Email : ايميلك الشخصي
SSN : رقم السوشيل سكيورتي نمبر مالتك والي لازم تكون دائما حافضه .
Address : الي هو عنوانك والي بيه رقم المجمع والشارع ورقم شقتك ( لتنسه رقم الشقة )
City : المدينة الي انت عايش بيها ... state : الولاية .... Zip cod : وهو الرقم البريدي لمنطقتك وهو خمس ارقام وموجود دائما بعنوانك بعد رمز الولاية وهذا لازم تكون حافظه دائما .
Shift available to work : اوقات العمل الي تستطيع العمل فيها , هنا في امريكا كل 8 ساعات تعتبر شيفت عمل فهناك شفت عمل صباحي واكو شفت ثاني واكو شفت مسائي واكو شفت ليلي , وعلى فكرة الي يشتغل بالليل يدفعوله اكثر من الي يشتغل بالنهار يعني 25 سنت عالساعة ممكن اكثر او ممكن اقل هنا بهذه الاستمارة كاتبلك صباحي AM او مسائي PM او both يعني بكل الاوقات وهذا الافضل ان دائما تكتب جميع الاوقات بالذات اذا معندك عمل اخر لانك بهاي الحالة راح تكون ضامن التعيين اذا كان اكو شواغر باليلي او بالنهاري
Over time : غالبا ما تنسئل هذا السؤال والي هو هل انت قابل انك تعمل بعد فترة العمل 8 ساعات , طبعا بعض الامريكان ميكدر لان يكون مرتبط بعمل اخر او يكون عنده ظروف خاصة بس بالنسبة الك هو فرصة لاثبات كفائتك بالعمل وفرصة لكسب مبلغ اكبر والي معروف في امريكا اي ساعة بعد ال8 ساعات تدفع مرة ونص او مرتين حسب قانون الولاية , يعني اذا انت تاخذ 8 دولار بالساعة ساعتك بعد ال8 ساعات تصبح 12 دولار او 16 دولار , طبعا هذا في حالة تجاوزك 40 ساعة في الاسبوع , يعني القانون الامريكي يعتبر اي عمل بعد 40 ساعة بالاسبوع وقت اضافي ولازم يندفعلك مرة ونص او مرتين ,
Position applied : وهو الوظيفة الي انت مقدم عليها ممكن تكون عامل operator او اي شي اخر حسب الوظيفة الي مقدملها
Desired salary : شكد تتوقع راتبك اكو بعض الناس يكتب الحد الادنى الي يريد يشتغل فيه واكو كثير يتركه فارغ او يسئل شكد يدفعون لهذا العمل ويحط الرقم , يعني انت كباحث عن عمل لاول مرة اكتب رقم مقبول ومتعارف عليه والافضل ان تتركه فارض , لتخاف مثل مراح يدفون لغيرك راح يدفعولك .
EMERGENCY Contact : هنا يطلب منك اسم ورقم تلفون الشخص الي يتصلون بيه في حالة الطوارىء يعني مثلا حضرتك اشتغلت وبعد الشر عليك اغمى عليك اثناء العمل او صارلك شي فيحتاجون شخص يتصلون فيه يعني مو تحط نفس رقم تلفونك لان مراح يقبلون Relation : يعنون بيها علاقة الشخص بيك يعني اخوك صديقك منظمتك الكيس ووركر مالتك وهكذا .
الي ذكرته سابقا راح يكون موجود بجميع طلبات التقديم , وانا اختاريت استمارة بسيطة هذه المرة حتى لا اعقدها عليكم , طبعا الجزء الثاني من الاستمارة راح يطلب منك المكانات الي اشتغلت فيها سابقا وهذا الطلب دائما ينطلب منك في كل مكان تقدم فيه
Name and address : اسم وعنوان المكان الي اشتغلت فيه سابقا
Job title and duties : شنو كانت وظيفتك وشنو كانت مهماتك
Employed from ……. To عملت ويا الشركة السابقة من يا تاريخ لأي تاريخ
Supervisor name : اسم المسؤال المباشر عن عملك tel ورقم تلفونه .
Payrate : شكد كانوا يدفعولك
Reason for leaving : ليش تركت الشغل وهذا سؤال دائما يسئلولك اياه , طبعا اذا انت تارك الشغل بسبب الشغل ضعيف ممكن تتب هذا الشي , اما اذا انت مسويلك مكسورة فالافضل انك لا تكتب اي شي عن عملك بهذا المكان حتى لو مشتغل بيه 10 سنين لانه غالبا ما يتصلون بمسؤلك السابق ويستفسرون عنك واني كثير استلمت تلفونات من شركات عن عمال بطلوا من يمنى ودائما كنت انطيهم انطباع ايجابي وتعتمد على المسئول مالتك وقناعته بعملك وشخصك .
طبعا بالجزء الاخير يطلب منك اشخاص اشتغلت وياهم سابقا ممكن ينطون عنك انطباع جيد مو معنى ان يكفلوك لكن يعرفون شغلك ويشهدون بانك موظف كفوء ( Professional work reference ) والي ايضا راح تكتب اسمه , Position وظيفته ورقم تلفونه , طبعا الجزء الاخير مو الك دائما من تشوف جملة office use only معناتها هذا الحقل مو الك للشركة او المكتب الي مقدم بيه .
طبعا موضوع العمل موضوع كبير ومتشعب واكيد راح تكون اكو مواضيع قادمة تشرح مالذي تحتاجه حتى تستمر بالعمل وميبطلوك كيفية التعامل مع الموظف هنا شنو الفوائد الي تقدملك اياها الشركة واشياء اخرى كثيرة انشاء الله اكتبلكم اياها بالمستقبل .
طبعا بالفترة السابقة اخي العزيز ابن الحلة نزل ملف فيه جميع مواضيعي السابقة واشكر اله هذا الجهد الكبير والله ينطي الاجر والثواب جدا فرحت بالموضوع لكن مع هذا يبقى هذا الملف مواضيع مقرؤة لكن غير قابلة للنقاش , ولهذا احد اخواني الاعزاء ايضا هو عضو بمنتدانا عرض عليه ان ينشر مواضيعي في قسم بمنتدى اخر وتكون مثبته ومن خلالها يستطيع الجميع يطلع على المواضيع ويتم النقاش عليها , طبعا انا وافقت ليس لرغبة مني للتسويق لاي منتدى اخر فهذا الموضوع لا يهمني لا من قريب ولا من بعيد لكني اعلم ان هذه الفرصة لا يستطيع ان يقدمها منتدانا فكثير من المواضيع باقلام اعضاء رائعين اختفت في الارشيف والكثير من الاعضاء الجدد يسئلون عن هذه المواضيع فلهذا اعتبرت هذه الفكرة فرصة لتسهيل الامر على الجميع , اضافة الى ان كان الي مقترحات او لرجلرحب فيها ومنها انشاء مدرسة لتعليم كيفية التقديم وتعبئة استمارات العمل واستمارات الطبيب واستمارات المساعدات الحكومية مثل الفود ستامب وغيرها , اضافة الى مدرسة لتعليم الانكليزية للمهاجرين او ما يحتاجه المهاجر من انكليزية في الاشهر الاولى , انا متاكد بان هذا الاقتراح لن يبادر باي اهتمام من قبل ادارتنا قد يكون لانشغالهم او لاشياء اخرى لكن هذا الشيء يشعر فيه الكثيرون في هذا المنتدى وانا منهم , طبعا اكيد سوف يكون هناك مواضيع جديدة تنشر هناك كل يوم احد , كل ما ارجوه ان تصل المعلومة لاكبر عدد من الاشخاص واتمنى التواصل من الجميع واتمنى بان اسمع مقترحات الجميع .
البارحة وصلتني رسالة من احد اخواني الغاليين تسئل عن كيفية معرفة اوقات الصلاة في امريكا والمناسبات الدينية وطلب مني ان اكتب هذا على العام حتى تصل المعلومة لاكبر عدد , بصراحة انا استخدم برنامج جميل جدا منصبه على كمبيوتري الثاني الي دائما رابطه عالتلفزيون وكل وقت اذان اسمع الاذان في كل البيت اوتماتيكيا حسب الوقت الخاص بمدينتي هذا البرنامج يمكن يعرفه الكثيرين ممكن تنصبه وتختار المدينة الي انت فيها وراح تسمع الاذان باوقاته وبالذات جايينا شهر رمضان الله يعيده على الجميع بالخير والبركة , راح انزل الرابط الخاص بالموقع وهو بالعربي ايضا ومن خلاله ممكن تنصيب البرنامج .
http://www.islamicfinder.org/athanDownload.php?lang=arabicحبيت قبل اني انهي الموضوع الي طووول هواية , ان اقدم شكري وامتناني وانحني احتراما لاخونا كوبرا واختنا ماكنتوشا الي البارحة بالفعل شعرت بسعادة لم اشعر بها من زمن عندما رائيت ردودهم وهم يهنئون بشهر رمضان الكريم وبكلمات طيبة تعكس مشاعر محبة افتقدناها كثيرة في بلدنا , تحية لمشاعركم الطيبة ودمتم اخوة واحبه الى الابد يااااااارب , طبعا دائما اكرر اسفي على الاخطاء الاملائية او اللفضية لاني كالعادة ما احب اقرا الي كتبته ومعندي الوقت الكافي للتصحيح .
تحياتي
ابو قمر
