طبعا نزلت هذا الموضوع للرد على موضوع لاحد الاخوة الي دينزل اشاعات وبسبب كثرة الاخبار الي انتشرت بالمنتدى منها الصحيحة ومنها المغلوطة وهذا اقتباس من كلامه :
///اخوان محبيت اجيب هذا الخبر اليوم بس شي اكيد اي واحد مقدم على برنامج SIVمن بغداد راح يجي رفض لان الامور ببغداد صارت احسن من ناحية الامان.والدليل لو مهدد من صدكك جان سافر وقدم من اي دوله بس هوه نايم بيتهم ويكول اني مهدد.لذلك راح يجي رفض لاي واحد مقدم SIVمن بغداد بسبب الوضع الامني الجيد الذي يتمتع به العراقيين الان في ظل قيادة السيد المالكي دام ظله..وراح يكون الرفض على شكل دفعات.واي واحد يدعي انه مهدد وهوه يومية بيتهم نايم صارت قديمه .////
وهذا ردي :
ولو جنت مقرر اني ما اكتب بس بصراحة استفزيتني بكلامك ... يعني اول شي انت جتيب حجي من جيبك . الاس اي في شعليه بالوضع الامني اقرا برنامج الاس اي في بالاول وبعدين طلع دعاية ... الاس اي في يختلف عن برنامج اللجوء .. تره كافي تلعبون باعصاب الناس اني بامريكا واحترك دمي على هاي الناس الي دتلغبون بعصابها .. كافي دعاية الكل راح ينرفض انت منو حتى اكول هذا الشي وزير الهجرة الامريكي .. بطلوا كافي هاي الاعيبكم الي دمرت اعصاب الناس .. الرفض حسب الحالة اكو 58000 وصلوا امريكا ذولا شلون وصلوا اذا الرفض بالجملة مثل متكول .. اكو ناس تنرفض وهذا ماله علاقة بالبرنامج اكيد اكو سبب خاص بالشخص يجوز الشخص نفسه ميعرفه .. اكو موافقة واكو ناس دتسافر , الموضوع طبيعي ..
بعدين هاي مال ادام الله ظله شنو معناتها .. على شنو يديم الله ظله على طيحان الحظ الي بالعراق شنو الي قدمه للعراق حتى يديم ضله كافي لواكه البلد مدمر والمالكي صاحبك هو من اسباب الي دتخلي الناس تنهزم .. يطلوا هاي السوالف تره انتم مكشوفين للناس خلي الناس اتشوف دربها حرام عليكم واني محتار وين رب العالمين راح يخليكم بالاخرى ولكم حتى الدرك الاسفل من النار قليل عليكم ..
الي صار ان مسئلة اعادة الامنية لجميع الي جايين عن طريق برامج الهجرة خلت الناس تفكر هواي .. رغم ان ماكو داعي للتفكير ومالها اي علاقة بالرفض الي يصير لان هذا الرفض من زمان يصير عادي اكو ناس انرفضت لسبب خاص بصاحب الكيس , هما لكوا ثغرة بالبرنامج وديجيكون الي اجوا الى امريكا , وزادوا التجييك الامني علي راح يجون عن طريق ادخال نظام معلومات الجيش بالتجييك الامني , يعني امر جدا عادي , على شنو هاي الضجة .. واذا صدفت اربعة اشخاص من المنتدى اجاهم رفض بنفس الاسبوع فهذا شي عادي هوايا مرات اكثر من اربع اشخاص يجيهم موعد سفر بالمنتدى , لان مو كل الي مسجلين ببرنامج الهجرة مسجلين بالمنتدى الي بالمنتدى هي عينة عشوائية مو ممكن ان تقاس على البرنامج ككل والي دارس احصاء يعرف هذا الشي , فالموضوع مجرد صدفة لا اكثر ولا اقل , اما موضوع الانسحاب الي دايخين بيه عمي حتى اذا انسحبوا البرنامج شغال والسفارة موجودة وعلى فكرة الانسحاب مو كلي راح تبقى قواعد وما لا يقل عن عشرين الف جندي راح يبقون , الي صار ان الاخبار اجتي بتوقيت واحد فخوفتكم .. البرنامج مستمر واكو ناس دتسافر .. خلوا ايمانكم بالله كبير والي كاتبه ربكم يصير , وتره لصالحكم ان تزيد الاجراءات الامنية لان من راح تجون راح تشوفون عراقيين اجوي ميستاهلون يطلعون لطريبيل شوهوا صورة العراق والعراقيين , واحنا حجينا من زمان ان البرنامج بيه ثغرة لان ياهو الجان كام يسافر والحمد لله حسوا وبجوا يصلحون بالعكس هذا الشي راح يسرع معاملاتكم لان الي ميستحق والي عنده اشكال راح يطلع من البرنامج , نعم ممكن اكو ناس تنرفض لسبب هما ميعرفوه بس اكيد اكو سبب شمعنى هو ينرفض وغيره ينقبل , البرنامج مستمر والناس دتسافر واكو ناس دتنرفض وهذا من زمان وما اله علاقة بالاحداث الي دتصير .
اخوان خلوا ايمانكم بالله كبير .. ولا تخلون الاخبار تئثر على نفسيتكم وتصرفاتكم .. الموضوع مجرد زوبعة مالها اي داعي اني اتصلت بناس الهم نفوذ هنا بموضوع الهجرة والموضوع مستمر مجرد انهم عدلوا على البرنامج الامني .. والانسحاب ما اله اي علاقة , ولعلمكم البرنامج لحد الان يستقبل طلبات .. صحيح بريطانيا واستراليا طلعوا مترجميهم وياهم ومو مثل الي ديسووه الامريكان بس خلي نكون واقعيين امريكا بلد مهدد من قبل الارهاب والها وضعها الخاص و كل الجماعات الارهابية تتهز فرصة حتى تئذيها امريكا صار بيها باحداث سبتمبر مالم يحدث في استراليا او بريطانيا , ولهذا تغير نظامهم الامني بعد الاحداث ومن حقهم يحافظون على بلدهم هما مو انبياء ولا ملائكة نعم لكنهم مصلحة شعبهم قبل اي شي اخر ..
والعدد الي وصل امريكا 58 الف مو شوية , واكو اعداد قادمة والبرنامج مستمر , واذا صدفت اكو بعض الاشخاص انرفضوا بنفس الوقت مو معناتها نهاية العالم .. البرنامج مستمر وماكو اي ربط بين الرفض الي صار للبعض بجماعة كنتاكي ولا بالانسحاب من العراق هي صدفت ويا بعض , وهاي مو اول مرة يكتشفون ارهابي في امريكا قبل سنة واحد صومالي راج يفجر نفسة باعياد راس السنة وقبضوا عليه مطردوا لا الصوماليين ولا المسلمين , الموضوع عادي جدا .
اني ما اشكك باي انسان ينرفض او ينزل موضوع الكل صادق الى ان يثبت العكس , لكن علينا ان نكون عقلانيين وان لانجعل حالات خاصة حالة عامة , وهاي مشكلتنا بمجتمعنا دائما نعمم الخاص ..
قبل لا انهي الموضوع عندي تساؤل : الموضوع الي ينكتب بيه اني ارفضت بدون ميذكر اي معلومة شنو الفائدة منه يعني بشنو ديفيد اخوته بيه ؟؟؟ وحتى هو مديسئل اني انرفضت اريد نصيحتكم شسوي ,
لمن اني ابو قمر اكتب اني اني انرفضت لازم يكون الي سبب لكتابة الموضوع يا اما اسئل الاعضاء شممكن اسوي يا اما انطي للاعضاء سبب رفضي حتى هما يستفادون . لكن اجي اكتب انرفضت وفيما الله شنو الفائدة من الموضوع ؟؟؟؟ ارجع واكول ان مو من حق اي انسان يشكك باحد والرجل ممكن يكون صادق لكن مالفائدة الي تقدمها لاخوتك بهذا الموضوع ؟؟
الامر الاخر الي استغربله : اتشوف الي انرفض من امريكا يكلب عليها 180 درجة يطلعهم مو خوش اوادم واني اعرفهم الامريكان شلون اوادم ؟؟ طيب اذا تعرفهم من الاول ليش قدمت وشلون اذا انقبلت واجيت عشا بمجتمع انت ماخذ نضرة سيئة عنه بالعكس راح تعاني اكثر الله ايحبك انك انرفضت ... الامريكان مو ملائكة ولا امريكا الجنة . لكن من حقهم ان يرفضون او يقبلون وهذا واقع , ولتنسون لمن رحتوا وقعتوا عقد للعمل وياهم مكان من ضمن بنود العقد انهم راح يسفروك او يكفلون حمايتك , ولتنسون لمن اشتغلتم وياهم انتم تعرفون كلش زين الوضع سيء وراح تكونون مهددين وقبلتوا مو محبة بامريكا لا قبلتوا من اجل الراتب الي راح تعيشون بيه عوائلكم لان البلد مبيه شغل , اذن هما مو ملزمين , لكن مع هذا فتحوا البرنامج واستقبلوا 58000 لحد الان والعدد في زيادة , انا لست في صدد الدفاع عن امريكا لكني اتعلمت ان اقول الحق ولو كنت نفسي مخطئا ولو كان هذا الحق ينتقدني وينتقد ابناء جليدتي , صجكني مشكلتنا تنحل لمن نكون صريحين ويا انفسنا ونخلي ايمانا بالله كبير .. والي كاتبه الله راح يصير .
تحياتي للجميع
أبو قمر
