صباح ومساء الخيرات بجميع التوقيتات ..
تحية طيبة للجميع .. اليوم حبيت ا كمل موضوع كان مهم وكانت الاسئله بيه كثيرة وجبتلكم وياي صور المستندات الي تخص الموضوع ..
تذكرون سابقا اتكلمنا عن موضوع فيزة الزيارة الى امريكا وشرحنا بالتقصيل كيفية التقديم لها واستخراجها وكان الموضوع جدا سهل واستفاد منه كثيرين والي ما مطلع على الموضوع هذا رابط الموضوع :
http://www.ankawa.com/forum/index.php/topic,510666.0.htmlاليوم راح اجاوب على اسئلة كثير انسئلت تخص هذا الموضوع وكانت الاجابة عليها اجتهادية واحيانا غير دقيقة فاليوم راح نجاوب عليها جواب دقيق ومثبت عن تجربة .. من الاسئلة الي سئلت ... كم مدة فيزة الزيارة المستخرجة من العراق ؟؟ كم المدة التي يستطيع الشخص بقائها في امريكا ؟؟ هل الفيزة للدخول مرة واحدة او متعددة الدخول ؟؟ هل العائلة تستخدم فيزة واحدة ام كل فرد يحتاج الى فيزة ؟؟ هل بالامكان تمديد وقت الاقامة ؟؟ هل من الممكن التقديم على اللجوء من داخل امريكا بعد الدخول بفيزة الزيارة ؟؟؟ هل هناك ختم خروج عند مغادرة امريكا ؟؟ واسئلة كثيرة راح نتحاول بيها ونجاوبها بهذا الموضوع ..
طبعا مثل مدا تشوفون بالصورة فيزة السياحة او المسماة فيزة الزيارة ويطلق عليها فيزة B1/B2 , هذه الفيزة تختلف في مدة صلاحيتها فمنها السنة ومنها الخمس سنوات لكن السفارة في بغداد تعطي فيزة صالحة لمدة سنة فقط , بمعنى ان اذا استخرجت الفيزة بشهر العاشر الفيزة صالحة ويمكنك دخول امريكا الى الشهر العاشر من السنة القادمة , السؤال هل بامكانك ات تسافر وترجع اكثر من مرى خلال هذه الفترة ؟؟ الاجابة نعم لان نوع الفيزة متعددة الدخول multiple-entry وهذا الشي اتلاحظة بداخل الفيزة اذا بحثت على كلمة ENTRIES راح تلكه جواها M والي تعني multiple اي متعددة الدخول , اذن الي عنده هذا الحرف ممكن ان يدخل امريكا اكثر من مرة خلال فترة صلاحية الفيزة , نجي للسؤال المهم الاخر شكد فترة بقائل في امريكا ؟؟ عند وصولك لاول مطار في امريكا ومقابلتك لضابط الجوازات راح ياخذ بصماتك وبصمات العين وراح يستخرجلك بطاقة I-94 ويكبسها بالجواز مالتك وهذه البطاقة راح تكون لمدة سنة من تاريخ الدخول يعني اذا دخلت شهر عشرة راح يكون انتهائها شهر عشرة السنة القادمة وبنفس الوقت راح يختملك ختم دخول على جوازك مدته ست اشهر .. طبعا اهنا راح تسئلون شنو سنة وشنو ست اشهر ؟؟؟ الست اشهر الي تاخذها بالختم يمكن تجديدها الى ست اشهر اخرى قبل انتهائها بعذر معين فمجرد ان تقدم الطلب راح يختم جوازك ست اشهر اخرى وبالمحصلة راح تكون مقيم اقامة شرعية لمدة سنة من تاريخ دخولك , بعض الاخوان يسئل هل ممكن ان اقدم لجوء عند دخولي ؟؟ الاجابة بالنسبة الي شخصيا لم اقم بهذه التجربة لكن هناك قانونية عراقية مقيمة فترة طويلة في امريكا ذكرت لي ان هذا الامر جائز وانها شافت اكثر من حالة بهذا الخصوص وعند سؤالي عن التفاصيل ذكرتلي التالي : لا يمكنك التقديم خلال فترة الست اشهر الاولى بمعنى ا ناول ست اشهر تكون اقامة عادية وقبل انتهاء الست اشهر تقدم لتجديد الاقامة ست اشهر اخرى وبعد حصول الموافقة توكل محامي لطلب اقامة او لجوء على اقامة اقاربك والمحامي هذا راح يحاول ان يحصلك اوراق منع سفر قبل انتهاء فترة الست اشهر حتى لا تكون مقيم غير شرعي , هذا النوع من القضايا غير مضمون وياخذ وقت طويل بالمحاكم يعني من سنة الى 3 سنوات , حتى تكون قضيتك اسهل عليك بفترة الست اشهر الاولى عدم ارتكاب اي اخطاء قانونية او مالية يعني لا فواتير طبيب مدافعها ولا مخالفة سير يعني لازم تكون اقامتك في اول ست اشهر اقامة نظيفة ونموذجية , هنا احب ان انوه شغلة يمكن الكثير يعرفها خلال كل هاي الفترة لا يوجد اي دعم حكومي الك , يعني الي داخل بفيزة السياحة مو من حقه ان ياخذ اي نوع من المساعدات لا فود ستامب ولا مدي كيت ولا هاوسنك ولا اي شي يعني لازم تسويلك تامين صحي على حسابك وتدفع فواتيرك على حسابك الى ان تحصل الكرين كارت , هذا الكلام راح اقوم بتاكيده انشاء الله بالمستقبل القريب احد اصدقائي اخوه استخرج فيزة زيارة نفس الطريقة الي ذكرتها وراح يجيب عائلته ويقدم منا على اللجوء هو انشاء الله يوصل نهائية هذا الشهر , راح احاول ان اخذ كل معلومات التقديم وتكاليف المحامي وكل ما يخص هذا الموضوع وانزللكم اياه بالمستقبل انشاء الله .
هنا نجي عند مغادرة امريكا هل هناك ختم مغادرة ؟؟ لا طبعا مجرد ان تمر على ضابط او ضابطة الامن ينضر لجوازك وينضر لبطاقة الطيارة يقارن الاسماء ويباوعلك بعدها تمر للتفتيش الجنط وكل المعادن توضع بعلب بلاستيكيه وتمر من سكانر خاص وانت تدخل داخل شكانر ترفع ايدك لمدة 10 ثواني ومن بعدها تطلع راح يكون موظف امن يجيك بطنك ومعدتك بايده وبالنسبة للنساء راح تكون هناك موظفة امن اتجيك نفس الاماكن اضافة للرأس بالنسبة للمحجبة يعني تحط ايدها حول راسها فقط , وكل هذا وبطاقة ال I-94 تبقى وياك الى ان تدخل باب الطيارة موظفة شركة الطيران راح تسوي سكان لبطاقة سفرك وتسحب بطاقة ال I-94 منك وتكلك توصل بالسلامة ..
طبعا اجراءات التفتيش متستغرق اكثر من ثواني وبكل احترام عادة لا يسمح للاشخاص المرافقين الدخول للمنطقة الامنية , لكن بامكانك ان تطلب من شركة الطيران ان تدخل وياهم وتساعدهم وهذا الي صار وياي شركة الطيران انطتنا باج خاص الي ولقمر وام قمر ودخلنا ويا الوالدة والخاله الى المنطقة الامنية ووصلناهم الى باب الطيارة ..
هنا موضوع الفيزة خلص واني حاضر لاي اسئلة او استفسارات , بس هنا راح اذكرلكم حادثة طريفة وبنفس الوقت حزينة مرت بصديقي الي سافر قبل شهرين هو وعائلته للعراق وطبعا تخص التجييك الامني ..
طبعا هما سافروا الى الاردن عن طريق الخطوط الاردنية الي عادة ما اطير من شيكاغو فكان وياهم حقيبة يد لبنته فبعد معبرت السكانر الموظفة الامنية طلبت منها تفتحها وتشوف شكو بيها المهم فتحتها البنية وطبعا بنته عمرها 14 سنة وماخذة شمرت تعامل المجتمع الامريكي فالبنية كالت للشرطية طيب ليشه التعطيل هذا مو مرت من السكانر بعد شكو تفتحوها ؟؟ الشرطية كالتلها احنا جدا اسفين ونعتذر بس احيانا اكو اشياء تكون غريبة السكانر يطلب منا التفتيش اليدوي واحنا جدا اسفين وظل تتعذر منها فطبعا ابوها ابتسم وكللها اتس اوكي وطاروا بالطيارة ووصلوا الاردن وطاروا الى مطار بغداد الدولي , بالخروج مال مطار بغداد الدولي موظف الامن مالتنه بيده عصا تذكرون العصي مال المعلمين فاول موصلوا كللهم شنو هاي الجن طوياكم حطوهن عالميز وكانه كاتلين ابوه فكللها لبنته افتحي هاي الجنطة طبعا هو ملك ميمد ايده بعدها نبش الغراض بالعوده مالته وكللها يله يله سديها وشيليها طبعا البنية دتفتح حلكها ابوها كلهها ولج ولا كلمة سدي حلكج وامشي لتورطينا .. طبعا كل هذه الاحداث مع الضابط كانت على نغمات اغنية كلب كلب ووين وين غايب عليه يومين .. بس بس ميو ..والي جان مشغلها ابو الامن على موبايله ... مرحبا بكم من جديد على ارض الوطن ... تحياتي
الموضوع انشاء الله يكون مفيد للجميع .. بس هنا راح اطلب طلب من جميع من يقرا الموضوع ان يجاوب على السؤال التالي :
هل الموضوع الذي قرائته افادك او فيه فائدة للمهاجرين ؟؟؟ الاجابة تكون بنعم او لا ..
هل تشهر بان الموضوع فيه دعاية للكاتب ؟؟؟ الاجابة نعم او لا
طبعا هو استطلاع للراي لان بالفترة الاخيرة كلما انزل موضوع يطلعلي شخص يكلي موضوعك دون المستوى واني اسوي دعاية طبعا دعاية لشنو ما ادري ولهذا حبيت ان اخذ استطلاع الجميع والي اكيد راح يساعدني ان اغير باسلوب الكتابة حتى تعم الفائدة , عملا بالاستطلاعات الي تقوم بيها الدول المحترمة للتاكد من ان المعلومات والخدمة توصل بصورة صحيحة للمواطنين رغم ان كل المنتدى هما اخوتي واصدقائي لكن هو تقييم مفيد الي ومفيد لمنتقدي
أبو قمر
الموضوع القادم حيكون عن كيفية التقديم للعمل في الوالمرت بالصور خطوة بخطوة وكيفية الاجابة على اسئلة امتحان التقديم طبعا الاسئلة والاجوبة بالصور ..
