صباح الخيرات ...
اولا احب ان اعتذر لعدم كتابتي في الاسبوع السابق لاسباب وظروف خاصة اتمنى من الجميع تقبل اعتذاري ..
ثانيا كل عام وانتم بالف الف خير وانشاء الله ينعاد بالخير والمحبة والامان على كل البشرية باختلاف الوانهم وقومياتهم ودياناتهم يكون عيد محبة وخير لكل الانسانية , طبعا مثل ما وعدت في الموضوع السابق وبما ان موضوع الضرائب كان الاكثر تصويتا فراح اكتبلكم اليوم موضوع مفصل عن الضرائب في امريكا على ان يكون موضوع شراء المنزل والتقديم للقرورض في الموضوع القادم لكن قبل لا ابدأ هناك معلومة ممكن تكون معروفة للبعض لكن احد اصدقائي القريبين من اختصاص الهجرة واللجوء اكادلي هذا الموضوع الي هو :
من أحد أسباب تاخير المعاملات للعوائل الي تشمل اكثر من كيس واحد , أي بمعنى القضية الي تشمل اكثر من كيس كثير من الاخوان عدهم ابناء بالغين فالابناء راح يكونون بكيس خاص بكل واحد بيهم للاسف هناك تاخير ديصير بسبب الربط شلون يعني :
فالنفرض انت عائلتك عبارة عن ثلاث كيسات مرتبطة رابط قوي , طبعا كل كيس راح يمشي بالاجراءات على حدى لكن معنى الربط القوي ان الجميع يجب ان يسافر معا , هنا الثلاث كيسات قد يكمل احد الكيسات اجاراءاته الامنية هنا لايمكنه السفر سوف ينتظر الكيسين الباقييين في حالة تاخر احد الكيسين او كلاهما اكثر من سنة الموافقة الامنية لابد انا تعاد للكيس الاول لانها راح تكون اكسباير معناتها الكيس الي اكمل راح يظل ينتظر الكيس الاول الي صاير اكسباير رغم ان اعادة الامنية وقتها اقصر بكثير من استخراجها لاول مرة وممكن لمن تكمل الامنية تكون امنية الكيس الثالث اكسباير وهكذا يعني هناك احتمال ان اندور في حلقة قد تاخذ الكثير من الوقت , هنا ااكد بان هذه الحالة ليست عامة لكن ممكن ان تحدث ولهذا براءيي الخاص اذا كان لايوجد سبب قوي لربط الكيسات رابطا قوية الافضل تغيير الرابط الى رابط ضعيف بهذه الحالة تضمن السرعة بالسفر للحالة الي مخلصة اجارءاتها ..
نجي لموضوعنا اليوم طبعا بما ان اتربينا ببلد منظومة الضرائب بيه محدودة فاكيد لما ننتقبل الى بلدان يكون بها نظام الضرائب عصب اقتصادي للبلد راح يفرق الموضوع فرق كبير جدا , طبعا كلنا راح نسئل بعضنا وراح نحاول نجمع معلومات لكن للاسف كما ذكرت سابقا قد نسئل في المكان الغير المناسب ونسمع اجابات خاطئة والتي غالبا ما تكون مجرد فتاوي للاسف كما ذكرت سابقا اغلب ابناء جلدتنا ميعرف يكو لاني اسف ما عندي علم لازم يبرهنلك انه علامة فيبدي يفتي والكثيرين ياخذون هذه الفتوة ويتناقلوها حتى تكون قانون يؤمن به الجميع , هنا اوضح شيء مهم مقدار النجاح في هذا البلد يقاس بمقدار ما لديك من معلومات واكيد لازم تسئل وتبحث بنفسك حتى تمتلك هذه المعلومات لكن عند سؤالك حاول ان تسئل اشخاص يملكون معلومات دقيقة او صحيحية نصيحتي الك :
1- حاول ان تسئل صاحب الاختصاص يعني اذا كنت تسئل عن ضرائب اسئل مختص بالضرائب ممكن يكون امريكي او يكون عربي ,
2- حاول ان تسئل اشخاص ناجحين في الحياة , اذا كنت جديد بالمجتمع ولا تملك لغة وكل الي حواليك عرب او عراقيين حاول ان تستنقي باسئلتك الناس الناجحين في حياتهم الاجتماعية والعملية والي يملكون انكليزية جيدة , للاسف اغلبنا يبحث عن الاقدمية والله شنو صارله 10 سنين في امريكا وللاسف مو كل قديم يعرف معلومات عن هذا المجتمع وللاسف اكو كثير ناس صارلها 15 سنة او اكثر في امريكا ولحد الان ميعرف يحجي انكليزي .
قبل لا ابدا بالشرح المسئول عن كل الامور الضريبية في امريكة دائرة مهمة جدا اسمها Internal Revenue Service او المعروفة بالمختصر IRS وهذا الموقع الالكتروني مالتها :
http://www.irs.gov/طبعا الجريمة الضريبية تعتبر من اخطر الجرائم في امريكا , أي تلاعب ويا هذه الدائرة اقرا على الجنسية السلام وعلى مستقبلك وتاريخك بهذا البلد السلام .
اليوم جبتلكم الرئيس اوباما كمثال , حاله حال اي مواطن , طبعا جبتلكم نسخة من 1040 مالته والي توظح شكد الدخل مالته ,
طبعا الرئيس اوباما يستلم شهريا 33000 دولار كراتب رئيس جمهوية يعني دخله السنوي حوالي 390000 هذا من راتبه الرسمي , اوباما ايضا سنة 2010 الف كتابين ايضا عنده عقارات واملاك خاصة كان دخلهم جميعا حوالي 1380000 فمجموع دخله السنوي 1795000 دولار , تدرون شكد دفع ضريبة ؟؟؟
453770 يعني حوالي نص مليون , الجميل بالموضوع ان رئيس الجمهورية حاله حال اي مواطن يسوي ضريبة وتكون معلونة للناس وكل الناس يعرفون شكد يستلم بالشهر ومنين تجي فلوسه وحتى الراتب 33000 والي هو اقل بكثير من مسئلوين بحكومتنا العراقية يدفع عليه ضريبة , طبعا لا ننسى ان اوباما قدم معاملته على انه عائلة من زوجته وبناته الاثنين يعني لو مسوي سنجل وحده كان دفع ضريبة اكبر بكثير .
اكيبد موضوع الضرائب طويل ومعقد ويحتاجله صفحات طويلة لكن راح احاول اختصر و اوضح امور مهمة بهذا المجال , الضرائب في امريكا ممكن نقسمها الى ثلاث انواع رئيسية :
1- ضريبة مبيعات
2- ضريبة عقارية
3- ضريبة دخل
ضريبة المبيعات شنو هي ضريبة المبيعات , هي أي شي تشتري غير المواد الغذائية , للاسف بعض الاخوى نزلوا معلومات ويعتقدون بيها ان المواد الغذائية عليها ضريبة بس لان ديدفعون بالفود ستامب ماكو ضريبة عليهم هذا كلام غير دقيق المواد الغذائية من خضراوات ولحوم ومعلبات ومشروبات غازية وعصائر وماكولات مجمدة معليها أي ضريبة الا في حالات العروض الخاصة الي ينزل بيها صاحب السوبر ماركت الاسعار بحد ادني من السعر المتعارف عليه , هنا اوضح ان الماكولات الجاهزة المطبوخة في المحلات او المطاعم لازم تدفع عليها ضريبة , الملابس الاجهزة الكهربائية الاثاث الى اخره من هكذا مواد يجب ان تدفع عليها ضريبة , السيارة البيت ايضا عليه ضريبة شراء لكن البيت حالة خاصة ضريبت شراء جدا قليلة لانه يقوم بدفع الضريبة العقارية السنوية , ضريبة الشراء تدفع لمرة واحدة فقط وتحسب حسب مقدار الضريبة والي يختلف من ولاية الى اخرى والي غالبا ما يكون ما بين 7-9.5 بالميه , يعني مثلا كل 100 دولار عليها 8 دولارات ضريبة , لا ننسى ان الكهرباء والمي والمعاملات كلها عليها ضريبة والي هي نفس ضريبة المبيعات , طبعا هذه الضريبة تستقطع وتذهب الى حكومة الولاية والي راح تستخدم في النفقات الي تنفقها الولاية اضافة الى جزء منها راح يذهب للحكومة الفدرالية
الضريبة العقارية وهي مفهوم غريب علينا وللاسف اغلب الناس فاهتمه غلط , كل منزل سكني او تجاري من محلات وما شاكل عليه ضريبة سنوية تختلف بالمقدار باختلاف الولاية ويختلف من سنة الى اخرى حسب قيمة هذا العقار الي يقيم من قبل دوائر خاصة , على ماذا تعتمد قيمة الضريبة السنوية لبيتي ؟؟؟؟ اكيد كلكم راح يسئل هذا السؤال ؟؟؟؟؟
1- قيمة المنزل بالسوق كلما كان البيت غالي كلما كانت الضريبة اعلى
2- مساحة البناء في المنزل كلما كانت مساحة المنزل اكبر زادت ضريبته
3- قرب المنزل من الخدمات اسواق محلات مدارس مستشفيات كلما كانت اقرب كانت القيمة اعلى
4- الموقع في الخارطة اذا كان المنزل يقع على حدود مدينتين فراح يدفع ضريبة للمدينتين وهذا الامر لازم تتبهله قبل شراء أي منزل
سؤال اخر ممكن تسئلوه يا شهر بالسنة لازم ادفع وشكد عندي وقت للدفع ؟؟ وراح اضيف سؤال اخر هذا مبلغ الضريبة الي دا ادفعه وين دا يروح الحكومة تاخذه ؟؟؟؟
عادة في اغلب الولايات الضريبة ترسل الى العقارات في شهر 10 وبيها المبلغ المقرر لهذه السنة وعندك اربع اشهر للدفع يعني من شهر عشرة الى نهاية شهر الواحد , طيب هل اكو تقسيط اكيد طبعا ممكن ان تدفع المبلغ على دفعتين النصف الاول يدفع قبل نهاية شهر عشرة والنصف الثاني ممكن تدفعه اي وقت قبل نهاية شهر سبعة بالسنة القادمة , طبعا هناك تفاصيل اخرى للدفع للي عنده معوق بالبيت او كبير بالسن هناك تخفيض كبير ومزاية اخرى للدفع ..
وين دتروح الفلوس الي دتدفها هنا راح اذكرلكم النسب حسب ولاية تكساس وهناك راح يكون اختلاف بسيط بالنسب بين الولايات
حوالي نصف المبلغ يذهب مباشرة الى السكول دسترك الي تابع انت الها يعني بالعربي نصف مبلغ الضريبة يروح لمديرية التربية المسئولة عن المدارس بمنطقتك ولهذا دائما المناطق الراقية الي الاسعار بيها مرتفعة تكون مدارسها راقية ومحترمة بما معنى ان رواتب المعلمين والمصاريف للمدارس يدفع الجزء الاكبر منها اصحاب المنازل او العقارات الي بالمنطقة , المدينة راح تاخذ حوالي 20 بالمية والي راح تستخدمها في مشاريع تطوير المدينة والصيانه ,المقاطعة راح تاخذ حوالي 10 بالميه والي راح تستخدم في تطوير الربط بين مدن المقاطعة الوحدة , مديرية الماء راح تاخذ حوالي 4 بالمية , المستشفيات الي بالمنطقة والي تابعة للمدينة مالتك تاخذ حوالي 7 بالمية , المعاهد او بالانكليزي تسمى الكولج الي موجودة بالمنطة والي راح تاخذ 9 بالمية , هنا يمكن لاحضتوا او ملاحضتوا انم اكو سنت ديروح للحكومة الفدرالية ..
ضريبة الدخل وهذا الموضوع الي مدوخ الناس والي كل واحد يفتي بكيفه بيه , شنو ضريبة دخل هو اي دخل يدخلك سنويا راح يكون عليه ضريبة يعني اذا كنت موظف راح تستقطع الضريبة منك شهريا اذا كنت صاحب بزنس نهاية السنة راح تحسب ارباحك وتدفع الضريبة اذا كان عندك مبلغ بالبنك في حساب وديعة او توفير وفي ارباح سنوية راح تحسب عليك ضريبة على هذه الارباح , اذا ربحت بطاقة يانصيب مثلا راح تدفع ضريبة تعادل 40% من المبلغ يعني اذا ربحت ميت مليون راح تستلم 6 مليون فقط , الموضوع مضحك طبعا بس دائرة الضريبة تعتبر نفسها شريك الك باي مبلغ يجيك دون عمل او تعب شلون يعني انطيكم مثال اخر اخر السنة اغلب الشركات تدفع بوننص للموظفين يعني ارباح ممكن تكون راتب شهر او شهرين ممكن تكون مبلغ من المال فالنفرض 2000 دولار , طبعا راح تدفع بشيك منفصل بدون اي ساعات وراح يحمل اسم بوننص هنا الضريبة الي راح تستقطع حوالي 600 دولار يعني حوالي 30 بالمية من الشيك , بينما العادي لا يتجاوز نسبة 3-9 بالمية ..
نرجع لموضوعنا لان الموضوع صار طويل جدا , بالنسبة للموظف راح تفرض عليه ضريبة شهرية تحسب قيمتها وفق ورقة مهمة اسمها W4 الي يمليها الموظف بيوم تعيينه والي بيها سؤال مهم الي هو عدد الافراد الي متكفل بمصاريفهم طبعا كلما كان العدد اكثر كانت الضريبة اقل , طبعا كلكم راح يكوول هاي شنو نحنا نشتغل والدولة تاخذ ضرايب وللاسف هذا كلام مو واقعي لان صاحب العائلة مثلا يدفع مبلغ رمزي شهريا مو مبلغ كبير مثل متتصورون , راح انطي مثال حتى تكون الصورة واضحة انت صاحب عائلة بيها طفل وزوجتك يعني تكفل شخصين اضافة الى نفسك طبعا , اذا كنت تاخذ 8 دولارات بالساعة فبالاسبوع اذا كنت اداوم 40 ساعة راح يكون شيكك 8*40 = 320 والي راح تطرح منه الضريبة والي راح تكون حوالي 13 دولار فقط , طبعا اذا كان عندك اوفر تايم اي ساعات فوق 40 ساعة راح تكون الضريبة المحسوبة عليها اكثر لانك دتاخذ مرة ونص من اجرك الرسمي يعني كلشي محسوب بصورة دقيقة راح نسئل السؤال المهم هذا المبلغ وين ديرووووح اكيد الحكومة دتحطه بجيبها ..
ضريبة الدخل الي تدفعها في كل شيك تستلمه تروح الى ثلاث جهات :
1- ضريبة الصحة
2- ضريبة السوشيل سكيرتي نمبر
3- الضريبة الفدرالية الي تروح لحكومة واشنطن
النسب راح تكون وفق عدد افراد الاسرى يعني اذا نكول عائلة من زوجة وطفل غالبا ما تكون ضريبة الصحة حوالي 50-60 بالمية من الضريبة المدفوعة يعني اذا انت تدفع 30 دولار راح يروح حوالي 18 دولار لهذا النوع من الضريبة طيب فلوس هاي الضريبة وين دتروح , هاي الفلوس تروح الجانب الصحية والي راح يكفلك تأمين صحي في عمر التقاعد والمعروف ان كل شخص عمره 63 وفوك ياخذ تامين صحي مجاني
نسبة السوشيل سكيورتي نمبر راح تكون بين 30-40 يعني ممكن تكون 13 دولار مثلا , هاي الضريبة وين تروح هاي تنحس بالك في حالة فقدانك لعملك بسبب اغلاق البزنس الي انت موظف بيه او لكون صاحب العمل بطلك لان شغله ضعيف راح تستلم راتب شهري يعادل 80 بالمية من راتبك الطبيعة الى ان تجد عمل اخر وممكن يستمر لمدة سنة كاملة هذا المبلغ راح تدفع جزء منه الشركة الي بطلتك وجزء الاكبر منه راح يدفع من قبل السوشيل سكيورتي نمبر , اذن هذا هم راجعلك
اما الضريبة الفدرالية فهذه نسبتها ممكن تكون 0 – 20 بالمية من الضريبة الي تدفعها وغالبا ما لا تدفع من قبل صاحب العائلة الا في حالة ان يستلم مبلغ عالي يعني صاحب العائلة ممكن السنة كلها ميدفع اكثر من 100 دولار , وهذه الضريبة الي راح تحتاجها باستعادة الضريبة السنوي والي راح ترجعلك اضافة الى مبلغ اخر يعتمد على عدد افراد اسرتك وعلى دخلك السنوي , وكثير من العوائل تستلم مبالغ كبيرة كل بداية سنة كمبلغ استرجاع ضريبة وهو بالحقيقة مو مبلغ تسترجعه هو دعم من الدولة لكل من دخله قليل , ويمكن اذا تعرفون ان نسبة الفقر بامريكا تعتمد على الدخل السنوي واي شخص دخله اقل من 25000 بالنسة يعتبر فقير ..
كل شخص في امريكا عليه ان يملي استمارة 1040 والي تعبتر الاقرار الضريبة لاي مواطن طبعا ترسل الى دائرة IRS والي هي تحدد شكد راح ترجعلك فلوس او شكد راح تدفع فلوس , , وبما ان الموضوع صار طويل وراح يصير ممل راح انهي هنا على ان نكمل التفاصيل المهمة لكيفية استرجاع التاكس وماهي افضل الطرق القانونية لاسترجاع مبالغ اعلى وماهي الطرق الغير قانونية الي قد ادخلنا بمشاكل كبيرة جدا وقبل كلشي ماهي اهمية استمارة 1040 هذا كله انشاء الله باقرب وقت الموضوع القادم , تحياتي للجميع وكل عام وانتم بخير مرة اخرى .
أبو قمر
