0 الأعضاء و 1 ضيف يشاهدون هذا الموضوع.
جعله الله في ميزان حسناتك وبارك الله بيك
موضوعك اجه بوقته لان اليوم كان عندي استفسار بهذا الخصوص بموضوع الشخص اللي ذكرته وهو مشكور لما يقدمه .اخي ابو قمر بارك الله بيك ، وحبيت ارد قبل ان اقرأ الموضوع واشكرك على جهودك وجزاك الله خير الجزاء .طبعا رجعت قرأت الموضوع وتنورت هوايه الله ينور دربك وين متروح ، واستفسار بسيط لو سمحت اذا الورثة خارج امريكا يعني عايشين بالعراق يشملهم الارث اذا قدموا اثباتات بذلك ؟ ام الهنا
العزيز الغالي ابو الاقماار الوردتسلم ايدك ع هذا المجهود الرائع اخوية ضل بالي عليك البارحة لكيت نفرات ترجع بيه لو خصمته واخذت تكسي طمني شلون رجعت وره الابر الصينية تحياتياخوكابو مريومة
صباح الخيرات ..قبل كم قريت احد مواضيع الاخوة الاعضاء وهو اخ عزيز ومبدع ومحترم , لكن للاسف المعلومات الي في الموضوع غير دقيقة والغريب ان بدت تصلني اسئلة كثيرة عن هذ الموضوع الي زرع الرعب بداخل كثيرين رغم ان الموضوع نازل للمنتدى بتاريخ قديم لكن لم يجد اي تصحيح لا من احد الاعضاء ولا من الادارة فبقت المعلومة الغير صحيحة تنتشر بين الجميع , ولهذا شفت ان من واجبي اوضح هذا الموضوع بصورته الصحيحة , قبل ان ابدي راح انوه عن شي وهو وصية لكل الاجئين لا تسئل عراقيين عايشين في امريكا مهما كانت مدت بقائهم اذا لم يكونوا ناجحين ومختلطين مع المجتمع .. يعني مو كل واحد صارله 10 سنين في امريكا يعرف كلشي للاسف اكو ناس صارللها 20 سنة ومتعرف تحجي انكليزي ومتقوقعه داخل بيتها وعلاقتها بالعراقيين الاخرين وتلفزيون وقنوات عربيه يعني مجتمع داخل مجتمع فكل العشرين سنة لم يعرفوا شيئا عن امريكا وللاسف هذا النوع من الناس عند سؤاله كبريائه ميسمحله ان يكول ما عندي علم لازم يفتي وللاسف اغلب فتاوي العراقيين في امريكا لا تختلف عن فتاويهم في العراق , هذا ما يمنع ان اكو عراقيين مبدعين يملكون معلومات اكثر من الامريكي لكنهم للاسف قله , لهذا اذا احتجت اي معلومة اسئل من تراه انسان ناجح بالمجتمع يجيد اللغة واسئل اكثر من طرف حتى تاخذ فكره اكبر رغم اني افضل ان تسئل صاحب الاختصاص اولا .الموضوع كان الي يتوفى من دون ان يكتب وصية كل امواله تذهب للدولة !!! هنا ظلمنا الدولة ظلم كبير واخذ بعض الناس يبدا بالحقد على الحكومة لكن للاسف هذه المعلومة غير صحيحة بالعموم لكن ممكن تكون صحيحة بالخصوص شلون يعني ؟؟؟ هنا راح تحتاج ان اوضحلكم قوانين الميراث في امريكا للي متارك وصية الي يسموها WILL الميراث في امريكا يختلف عن الميراث في الدول العربية او الاسلامية , لكون الدول العربية والاسلامية معضمها تعتبر الدين الاسلامي مصدر للتشريع وان قوانين الميراث جائت من القرأن الكريم مع بعض الاضافات البسيطة . في امريكا الوضع مختلف كليا لان قوانين الميراث هي قوانين موضوعة وتختلف كليا عن قوانين ميراث الوطن العربي , وهنا راح نسئل السؤال مرة اخرى هل المتوفي من دون ان يكتب وصية كل امواله تذهب للدولة ؟؟؟ الاجابة اكيد لا في حالة كون له اقارب زوجة, اب , ام , اخ , اخت , ابن , ابنه , أبن اخ , ابن أخت , ابن ابنه , ابن بنت , جد , جدة , عم , عمة , خال , خاله , ابن عم ، ابن عمه , ابن خال , ابن خاله اذا كان عنده اي واحد من هؤلاء الافراد الدولة متاخذ كلشي مجرد تاكس بسيط واجور اوراق ومحكمة ..اما اذا كان المتوفي معنده كل احد يعني مقطوع من شجره بهذه الحالة الاموال الي يملكها تروح للولايه , اما المنزل او الارض التي يملكها راح تروح للمقاطعة الي هي بيها , يعني اذا المتوفي بتكساس وعنده ارض بمقاطعة بولاية اخرى راح تروح للمقاطعة الي هي بيها , واذا كانت الارض بين مقاطعتين راح تتقسم الى جزئين كل جزء داخل مقاطعة تاخذه المقاطعة , المقاطعة اقصد بيها county وهنا مثل ما ذكرت اذا كان اله اي اقارب راح نروح لقوانين الميراث والي تكون متشابها في اغلب الولايات مع اختلافات بسيطة بين ولاية واخرى وهنا راح اوضحلكم بعض من هذه القوانين :عند وفات اي شخص راح تقوم محكمة خاصة بعملية تقسيم الارث بين الاقارب وفق قوانين الولاية , يعني ولايه عن ولايه تفرق المحمة اسمها محمة الارض والوصيه بالانكليزي probate courtطبعا الارث راح يقسم الى اموال , ملكية خاصة للسكن مثل البيت الي ساكن بيه , املاك عقاريه والي تنقسم ما بين ارض او بناء , بزنس والي هي الشركات او المحلات او اسهم البورصة الي يملكها , اموال اخرى والي هي مبالغ تأمين الحياة و 401 K اموال برنامج التقاعد وهذا انشاء الله اسويلكم موضوع عليه بالمستقبل ..التقسيم راح يكون حسب قانون الولاية وهنا راح اذكرلكم قوانين التقسيم بشكل عام وراح اختار ولاية تكساس قد تختلف من ولاية الى اخرى يعني الي اذكره ممكن ينطبق في تكساس لكن لا ينطبق في كاليفورنيا ولهذا انا اذكره للتوضيح كيف هي القوانين بشكل عام :اذا كان المتوفي اعزب :1-اذا كان اله والدين ( أم و أب ) الارث راح ينقسم الى 50% لكل واحد منهم 2- اذا كان احد الابوين متوفي ولم يكن للشخص اخوة او اخوات او ابناء اخوه او اخوات الارث يذهب للأب الي على قيد الحياة 3- اذا كان للمتوفي احد الابوين عايش وكان له اخوه او اخوات او ابناء اخوه او اخوات , نصف الارث يذهب الى الاب العايش والنصف الاخر يقسم بين الاخوة او الاخوات او ابنائهم 4- اذا كان المتوفي ليس لديه ابوين على قيد الحياة فالارث يقسم بين الاخوة والاخوات أو اذا كانوا متوفين يقسم بين ابنائهم 5- اذا كان الشخص متوفين امه وابوه واخوته وابنائهم ومعنده كل احد الاموال راح تتقسم الى قسمين قسم يروح الى الاقارب من طرف الوالدة وقسم الاخر يتقسم على الاقارب الي من طرف الاب يعني العمام والعمات والخالات وابنائهم اذا كانوا متوفين ..6- اذا كان اقارب احد الوالدين كلهم متوفين فالمبلغ يروح لاقارب الوالد الاخر بالكامل 7- الحالة الوحيدة الي راح تذهب بيها الاموال الى حكومة الولاية عندما يكون المتوفي معنده كل احد نهائيا .المتوفي اعزب وله اولاد 1- اذا كان المتوفي لديه ابناء او احفاد بنفس القيمة شلون يعني , يعني يكون عنده كلهم اولاده , او اولاده كلهم متوفين وكل الي عنده احفاد , يعني بشكل اوضح اذا كانوا كلهم اولاد او اذا كانوا كلهم احفاد يعني كلهم نفس القرابة راح يتوزع عليهم الارث بالتساوي ..2- اذا كان هناك اولاد واحفاد فيقسم الارث بين الاولاد بالتساوي والاحفاد يتشاركون حصة الاب المتوفي ..نجي هنا للمتزوج هنا راح تكون العملية اكثر تعقيد لان الاموال راح تنقسم الى اموال مشتركة واموال خاصة , يعني شلون هنا في امريكا اغلب الزواج لديهم حساب بالبنك مشترك وكثير منهم البيت ايضا مشترك وهكذا , ولهذا هنا راح يكون للاموال المشتركة قوانينها وللاموال الخاصة قوانينها :الاموال او الاملاك المشتركة :1- اذا كان هناك ابناء وهؤلاء الابناء هم ابناء للطرفين , يعني ولد الزوجة نفسها , فالزوجة راح تاخذ كل الارث 2- اذا كان هناك ابناء من غير الزوجة يعني هي مرت ابوهم راح تاخذ حصتها فقط وحصة الاب راح تتقسم على الابناء الي من ام اخرى 3- اما اذا كان لايوجد اي ابناء فجميع الاموال المشتركة تذهب الى الزوجة الاموال الخاصة :1- اذا كان هناك ابناء فالزوجة تاخذ الثلث والابناء يتقاسمون الثلثين 2- اذا لم يكن هناك ابناء فالزوجة تاخذ الارث كاملا لكن اذا كان هناك ابوين او اخوة او احفاد فهنا الزوجة راح تاخذ النص والابوين ياخذون نص اما اذا الابوين متوفيين فالاخوة ياخذون النص اما اذا الاخوة متوفين فابناء الاخوة ياخذون النص اما اذا ماكو كل احد فالاموال تروح كلها للزوجة .طبعا هذه هي القوانين في ولاية تكساس وتكون مقاربة لباقي الولايات , فاذا كان عاجبك القوانين كان بها اذا معاجبك ممكن تكتب وصيتك واطبق بيها الشريعة الي انت تؤمن بيها , يعني اذا كنت مسلم اكتب وصية وزعها وفق الشريعة الاسلامية , او اذا ضايج من اهلك فاكتب وصية واتبرع بيها لملاجىء الايتام واضرب كل الورثة بوري حتى يترحمون عليك كلش زين ..تحياتي وانشاء الله الموضوع الجاي عن الدفن والفاتحة في امريكا ...... هسه يكولون ابو قمر شبيه اليوم دا امزح وياكم الله يبعد عنا وعنكم كل شر انشاء الله الموضوع الجاي نختم بيه موضوع التاكس لان قربت مبقى شي ومثل منكول بالعراق الدبل يصعد لكل العراقيين باسترجاع ضريبة الدخل ..تحياتي أبو قمر
ابوقمر الورد عاشت ايدك عالتوضيح في هذا الموضوع دائما وكما عودتنا على طرح المواضيع المفيده اتنمى لك الموفقيه والنجاح ... تحياتي
والله كفى ما عندي اي تعبير اقوله يوفيك حقك جزاك الله خير فقط ما عندي اكثر
ابو قمر الغالي تحياتي يعني نصيحتك نجي لامريكا لو لا ؟يبارك بيك
مرحب احبتي جميعااليوم موضوع مهم جدا ويرجى الانتباه اليه من جميع اخوانا واخواتنا الي متواجدين في الولايات المتحدة الامريكيةوايضا من هم في الطريق الى الولايات المتحدة الامريكية موضوع الوصية او الورث والاغلبية ماتعرف بعض القوانين الامريكية وللتنويه والاطلاع حبيت اوضح الموضوع ونرجوا من لديه ايضا بعض النصوص من القوانين الامريكية التي نجهلها او نجهل البعض منها ان يزودنا هنا بكل شيءفي جميع البلدان العربية هنالك موضوع ( الارث او الميراث ) وكل دولة ونظامها وكل مذهب ونظامه وتشريعه والى اخره .....جميعنا يعرف بعد موت الانسان ينتقل كل مايملكه شخصيا الى افراد عائلته جميعا وبدون وصية وفي بعض الحالات تكون هنالك وصيةاما في اميركا لاتوجد تلك الحالة ( اي انتقال املاك المتوفي الى عائلته بدون وصية ) وتذهب الى الحكومة موضوع حقا يستحق الانتباه اليه والاطلاع عليه من الاغلبية واستحق ان انقله لحضراتكم لما شاهدته من تلك التجربة لشخص معينتوفي شخص عراقي وكان لديه مال كثير وفي حسابه البنكي وايضا بعض المحلات والدور وغيرها من الامور.........الله يرحمة المتوفي لم يذكر وصية لاملاكه وذهبت جميعها الى الحكومة الكل او الاغلبية قد لايعرفون بهذا الموضوع نهائيا او لم يطلع عليه او لم تكن لديه ادنى فكرة للموضوعاوصيكم بابلاغ كل من تعرفوه وجزاكم الله الف خير ونرجوا من لديه اي معلومات او اي قانون ممكن يذكره وممكن نكون غير مطلعين على الكثير من الامور والقوانين في اميركاكل من لديه رد يفيد الجميع مشكور وجزاه الله الف خيرمع التحياتارجوا ان لاينقل الموضوع من قسم الهجرة لكي يطلع عليه اغلبية اعضائنا وزوارنا الكرام خدمتا للجميع
المحرر
موضوع: لا تتورط ..اذا تموت في امريكا اموالك كلها تروح للدولة وعائلتك كلشي متحصل ( قوانين الميراث في امريكا (زيارة 39406 مرات)
