اصدقائي الاعزاء .. اولا انا اعتذر لحضرتكم لعدم دخولي للمنتدى لفترة طويلة بسبب المشاغل الي ابد متخلص في امريكا .. واعتذر عن لكل العراقيين الي بامريكا والي مديكدرون يجاوبون لأن اكيد معذورين فلهم مشاغلهم الخاصة ..
سوال ماهي المساعدات في الولاية الفلانية ؟؟ يمكن سبق وان اجبت عن هذا السؤال بس اكيد الجواب اندثر بالارشيف .. راح احاول هنا انطيكم جواب نموذجي راح يفهم من خلاله الجميع شنو معنى المساعدات في امريكا ...
الولايات الامريكية تقدم نوعين من المساعدات مساعدات فدرالية ومساعدات الولاية او المدينة , اضافة للمساعدات الي تقدمها المنظمات المدنية كالكناس وبعض المنظمات الانسانية هاي غير ممكن تحديدها فهي منتشرة بصورة عشوائية على خريطة الولايات المتحدة , لكن ممكن نقول ان العدد الاكبر متوفر بولايات الشمال ..
طيب شنو المساعدات الي تتوقعها ؟؟؟
انت كلاجىء في اي ولاية كنت تكساس كالفورنيا اينما كنت الك مساعدات الاجىء الخاصة بيك والي هي شغلتيني :
1- مبلغ مالي مقدم من الحكومة الفدرالية والي يسمى الويلكم وهذا يعطى لكل فرد من افراد الاسرة هذا المبلغ كان سابقا 520 دولار صم اصبح 950 والان الي اعتقده اصبح 1125 دولار للفرد الواحد يعني انت عائلة مكونة من اربع افراد الك مبلغ من الحكومة الفدرالية 1125*4 وياريت الي عنده الرقم الدقيق حاليا ممكن ان يضيفه ويساعدنا لان تقريبا كل سنة يتغير هذا المبلغ ودائما ما يتغير للاعلى .. السؤال راح ينطوني هذا المبلغ بيدي الجواب طبعا لا لاسباب راح اذكرها لاحقا ..
2- برنامج الدعم المالي الخاص بالاجئين , كل لاجىء وكل عائلة توضع على برنامج خاص دعم مالي كاش اسستنس , هذا البرنامج توضع عليه في الشهر الاول من وصولك , هناك برنامجين رئيسيين البرنامج الاول اسمه ارسي اي والي غالبا ما يعطى للعزاب هذا البرنامج تستلم من خلاله مبلغ شهري لمدة اربعة اشهر ثم تستلم مبلغ شهري اخر لمدة اربعة اشهر اخرى اذا كان دخلك اقل من حد معين لكن الاربع الاشهر الاخرى راح تستلم 40 بالمية من المبلغ الي كنت تستلمه بالاشهر الاربعة الأولى , مثال : عائلة من اربعة افراد راح تستلم مبلغ فالنفرض 980 دولار شهريا مقسم على دفعتين كل اسبوعين هنا انت راح تدفع الايجار والفواتير والباقي اتضمه الك بعد ما تخلص الاربع اشهر الاولى راح تستلم بالشهر ما يقارب 400 دولار لمدة اربعة اشهر طبعا الارقام تقريبيا , البرنامج الثاني اسمه الماج كراند هذا البرنامج غالبا ما يعطى للعوائل والي ينقسم الى 3 اشهر اولى راح يدفع ايجارك كامل وفواتيرك ويعطى الك مبلغ مالي شهري يعني اذا كنت عائلة 4 افراد مثلا راح يدفعون ايجارك وفواتيرك وينطوك مبلغ 600 دولار شهريا على دفعتين طبعا اكرر المبالغ تقريبيا فقط للتوضيح , بعد نهاية الاشهر الثلاثة الولى اذا كان دخلك اقل من حد معين راح تكون مؤهل الى القسم الثاني من البرنامج الي هو 3 اشهر اخرى يدفع لك الايجار فقط من دون اي مساعدة نقدية .. طبعا انا شرحت باختصار لان هاي البرامج شرحت كثيرا في المنتدى من قبلي ومن قبل اعضاء كثيرين , هذه البرامج راح توضع على احدها بغض النضر عن الولاية الي انت فيها وبكل الحسابات البرنامجين متقاربين من حيث القيمة لكن طبعا برنامج الماج كراند افضل للي ساكنين في ولايات يكون فيها الاجار غالي .. طبعا مو من حقك تختار البرنامج المنظمة هي الي تختارلك حسب اليات معينة وحسب اي البرامج يكون مفتوح في وقت وصولك .
هذه كل مساعداتك كلاجىء في كل الولايات , انت تعتبر لاجىء فقط لفترة 6 اشهر او 8 اشهر بعدها متعتبر لاجىء تعتبر مواطن مقيم امريكي صجيج اوراقك تكول انت لاجء لكن حقوقك المادية كلاجء انت اخذتها كاملة ... نجي هنا للمفهوم الخاطء عند اغلب العراقيين ..والي هو
المنظمة تنطيني هاي المنظمة تنطي احسن من الثانية .. ومن هالكلام الغير دقيق .. ولهذا راح اوضح التالي .. المنظمة هي مؤسسة غير حكومية قد تكون ربحية او انسانية وضيفتها ادارة الامور المادية والمعنوية للاجىء خلال فترة البرامج الخاصة باللجوء , يعني المنظمة مثل مكتب متعاقد ويا الدولة الدولة تنطي لاجئين وتنطيه اموالهم وتكله انت رتب الدفعات الهم وساعدهم لتعلم المجتمع الجديد والك عمولة على كل لاجىء , وهنا اوضح المنظمة متدفعلك من جيبها سنت واحد كل الي تاخذه من فلوسك الي الدولة تمنحها الك , هنا اوضح بعد المنظمات الغير ربحية الانسانية تعمل نفس عمل المنظمات الربحية لكن غالبا ما تقدم خدمات اضافية واحيانا ممكن ان تعطيك دعم من التبرعات الي تتحصلها هذه المنظمة , ولهذا نشوف ان البعض يكلك اني منظمتي تقدملي خدمة معينة والاخر يكلك اني متقدملي والسبب ان المنظمة الاولى هي منظمة انسانية غير ربحية مثل الكاثوليك جيرتي والمنظمة الاخرى هي منظمة ربحية تقوم باعطائك الاساسيات وما مطالبة هي باعطائها لك من دون اي زيادة ..
اذن المنظمة هي مدير اعمال الك يدير اموالك ويدير الشؤون المعنوية الك لفترة الاشهر الولى فقط وتاخذ عمولتها من الدولة , ولهذا من حقك ان تسئلها عن كل سنت صرفته عليك وتسئلها عن فواتير الشراء وهذا الشي مو عيب في امريكا ..
هنا انتهينا من كل حقوقك كلاجىء , نجي هسه لبقية المساعدات , والي راح تقسم كما ذكرت الى قسمين المساعدات الفدرالية والي راح تشمل :
1- الفود ستامب : مبلغ شهري يعطى لكل فرد من افراد الاسرة على شكد بطاقة الكترونية لايمكنك من خلالها سوى شراء الاكل بكافة انواعه والمشروبات يستثى منها الاكل الجاهز والمشروبات الكحولية والسكائر .. طبعا بما ان انت مقيم في امريكا وعندك اقامة لاجىء او اقامة دائمية فمن حقك التقديم على هذه المساعدات باي وقت طبعا المبلغ يختلف من ولاية الى اخرى بحسب اقتصاد الولاية لكن ممكن نكول ان لكل فرد رقم يقارب 200 دولار اقل شوية او اعلى شوية , هاي المساعدات تستمر معك طول العمر اذا محصلت على دخل شهري يكفيك ويكفي عائلتك , طبعا اذا اشتغلت وكان راتبك اقل من حد معين راح يقل الفود ستامب شوية ويستمر وياك الى ان تكون معتمد على نفسك والدخل مالتك يكون عالي , طبعا المنظمة مسئولة عن التقديم الك في المرة الاولى وتعليمك على كيفية التجديد وتعبئة الاستمارة ..
2- التامين الصحي الحكومي المدكيت , ايضا كل فرد دخله قليل اقل من جد معين ممكن ان يقدم اله ولاطفاله على المدكيت , طبعا المدكيت يشمل العلاج الطبي المجاني , طبعا ايضا يختلف من ولاية الى اخرى بالتغطية مالته يعني ممكن يغطي الاسنان والعيون في ولايات او يغطي العيون ولايغطي الاسنان في ولايات اخرة طبعا هذا للكبير اما الصغير فيغطي كل شيء في جميع الولايت , طبعا المتعارف عليه وللاسف هو مو دقيق بان المدكيت لثمانية اشهر فقط للكبار ويستمر للاطفال .. هنا احب ان اوضح ان ممكن ان يستمر للكبار ايضا اذا لك يكن لديهم دخل او دخلهم جدا قليل لكن يحتاج التقديم من جديد , وايضا اوضح التأمين الصحي للاطفال ايضا ممكن ان يتوقف اذا وصل دخلك مبلغ يتجاوز الحد المسموح يعني مو كرنتي كلشي يعتمد على الدخل مالتك .
3- بيوت الدولة الهاوسنك , وهذه البيوت متوفرة في جميع الولايات لكنها تختلف من ولاية الى اخرى من حيث الزخم وجدول الانتظار , ايضا تغتمد على الدخل وعلى عدد افراد الاسرة ويختلف السستم من مدينة الى اخرى او من ولاية الى اخرى ,
طبعا هناك مساعدات اخرى مثل التنف الولفر هذه ايصا تعتبر مساعدات مدفوعة من قبل الحكومة الفدرالية لكن تديرها حكومة الولاية , كل ماذكرته مدفوع من الحكومة الفدرالية لمساعدات الامريكان اصحاب الجنسية او المقيمين اقامة شرعية ومن ضمنهم الاجئين , ايضا مننسى السكشن ايت ايضا فدرالي طبعا ينرادله موضوع خاص بس طبعا ما اوصي بالتقديم عليه لان خلاص راح تحكم على مستقبلك بانك عالة على الحكومة .
النوع الثاني من المساعدات الي تقدمة الولاية ولهذا راح تسمع دائما ما يكلك بان الولاية الفلانية المساعدات فيها احسن , طبعا اغللب الولايات الي تقدم مساعدات راح يكون فيها ضريبة دخل للعاملين على اراضيها خاص بالولاية نفسها , تذكرون من ذكرتلكم انك لمن تعمل راح ينكص من راتبك الشهري او الاسبوعي مقدار معين للضريبة والي راح يروح الى 3 جهات الي هي الفيدرال تاكس , والسوشيل سكيورتي تاكس , والمدكيت تاكس , راح اتضيم في هذه الولايات شي اسمه ستايت تاكس , فاكيد الاستقطاع راح يكون اكبر .
طبعا شتضمن مساعدات الولاية .. دعم مالي للسكن .. دعم مالي لمصاريف العائلة .. كوبونات غذاء .. دعم مالي لفواتير الكهرباء والغاز والماء .. طبعا تختلف من ولاية الى اخرة , افضل الولايت حسب التجارب ولاية مين وولاية مينسوتا ..
طبعا ولاية تكساس متقدم اي نوع من انواع مساعدات الولاية وكذلك اغلب ولايات الجنوب لكونها لا تستقطع اي ضريبة عمل وايضا لكون اقتصادها قوي وغير محتاج الى دعم في الوقت الحالي
انا هنا ذكرت الخطوط العريضة والي ممكن يستخدمها اي شخص قادم للولايات المتحدة في تقييمه للمساعدات ..ولهذا راح تكون العملية اسهل عليه لانه راح يحتاج للسوأل فقط عن مساعدات الولاية والي تختلف من ولاية الى اخرى اما باقي المساعدات فهي موجودة في كل الولايات ..
تحياتي
أبو قمر
