ankawa
المنتدى الثقافي => نتاجات بالسريانية => الموضوع حرر بواسطة: عوديشو سادا في 21:23 02/12/2013
-
܀ ܡܼܢ ܢܹܒܼܗܵܝܘܼܬܝܼ ܐܵܠܒ ܐܝܼܬܘܼܬܝܼ ܀
ܐܝܼܡܵܢ ܓܵܘ ܐ̄ܪܵܙܵܐ ܓܲܫܩܸܢ ܓܵܘ ܦܵܬܼܵܟܼܝ
ܘܒܪܝܼܪܘܼܬܼܵܐ ܢܒܼܵܥܵܐ ܡܢ̄ ܫܘܼܦܪܵܐ ܕܥܲܝܢܵܬܵܟܼܝ
ܪܲܦܪܸܦܵܗ̇ ܓܵܐܢܝܼ ܒܐܵܢ̈ܝ ܓܵܫܲܩܝܵܬܵܟܼܝ
ܘܠܒܼܝܼܫܬܵܐ ܕܫܲܡܵܫܹ̈ܐ ܡܣܘܼܩܲܠܬܵܐ ܠܩܘܼܡܬܵܟܼܝ
ܒܓ̰ܘܼܠܹ̈ܐ ܕܫܲܡܵܫܹ̈ܐ ܟܡܵܐ ܣܩܝܼܠܬܵܗ̇ ܩܘܼܡܬܵܟܼܝ؛؛؛
ܘܐܝܼܡܵܢ ܕܚܲܙܸܢܵܟܼܝ ܟܠܝܼܬܵܗ̇ ܒܩܲܪ̈ܝܵܢܹܐ
ܥܲܡ ܚܲܒܸܪ̈ܝܵܬܵܟܼܝ ܒܓܲܘܢܹ̈ܐ ܫܸܛܪ̈ܵܢܹܐ
ܘܬܘܼܪܓܵܡܵܐ ܒܐܝܼܕܵܬܼܵܟܼܝ ܩܵܕ̄ܡ ܩܵܢܟܹ̈ܐ ܘܟܵܗܢܹ̈ܐ
ܕܲܪܫܸܢ ܡܢ̄ ܥܲܝܢܵܬܼܵܟܼܝ ܒܠܸܥܙܹ̈ܐ ܪ̈ܘܼܚܵܢܹܐ؛؛؛
ܗܵܕܟܼܵܐ ܝ̄ܠܹܗ ܚܘܼܒܵܐ ܫܲܡܵܫܬـܝܼ ܚܠܝܼܬܵـܐ
ܕܡܵܚܹܐ ܓܵܘ ܠܒܵܐ ܡܼܢ ܬܪ̈ܝܼܢ ܥܲܝܢܵܬܼܵـܐ
ܪܥܝܼܫܠܝܼ ܒܝܼ ܚܢܵܢܵܟܼܝ ܡܢ̄ ܚܙܲܝܬܵـܐ ܩܲܕ̄ܡܲܝܬܵـܐ
ܐܲܦ ܩܲܕ̄ܡ ܡܲܕܒܚܵܐ ܓܵܘ ܐ̄ܪܵܙܵܐ ܕܥܹܕܬܵـܐ؛؛؛
ܓܵܘ ܥܘܼܡܩܝܼ ܗܵܘܹܐ ܒܸܠܗܵܝܵܐ ܢܘܼܪܵܐ
ܒܪܲܦܪܲܦܬܵܐ ܕܥܲܝܢܵܟܼܝ ܦܲܫܪܸܢ ܒܬܲܢܘܼܪܵܐ
ܠܸܐ ܝܵܕܥܸܢ ܪܥܸܫܬܵܬܝ ܕܗܵܘܸܢ ܒܸܢܛܵܪܵܐ
ܥܲܠܠܵܟܼܝ ܝܵܐ ܒܬܼܘܼܠܬܵـܐ ܡܠܝܼܬܼܵܗ̇ ܡܼܢ ܫܘܼܦܪܵܐ
ܥܲܠܠܵܟܼܝ ܝܵܐ ܒܪܵܬܵـܐ ܘܐܲܢ̄ܬـܝܼ ܠܗ̇ܘ ܒܵܪܵܐ؛؛؛
ܠܹܐ ܗ̄ܘܸܢ ܒܸܚܛܵܝܵܐ ܕܢܦܸܠܠܝܼ ܓܵܘ ܓܲܪܕܵܟܼܝ
ܡܵܚܘ̇ܪܵܐ ܐܝܼܘܸܢ ܘܪ̈ܥܵܫܝܵܬـܝܼ ܫܕܸܠܠܵܟܼܝ
ܩܵܕ̄ܡ ܣܸܬܪܹ̈ܐ ܕܩܘܼܕܼܫܵܐ ܬܦܸܩܠܝܼ ܒܦܲܐܝܘܼܬܼܵܟܼܝ
ܠܹܐܝ̄ܘ̄ܢ ܡܨܵܝܵܐ ܕܦܲܬܚܸܢ ܕܘܼܪܵܫܝܼ ܡܢܵܟܼܝ؛؛؛
ܓܲܪܹܓ ܡܲܕܥܸܢܵܟܼܝ ܕܝܑܼܘܸܢ ܡܵܚܘ̇ܪܵܐ
ܟܠ ܫܘܼܦܪܵܐ ܒܥܘܼܡܩܝܼ ܠܲܓ̰ܠܸܓ̰ ܡܐܲܝܟܼ ܢܘܼܗܪܵܐ
ܘܐܲܢ̄ܬܢ ܡܐܲܝܟܼ ܘܲܪܕܵܐ ܣܡܘ̇ܩܵܐ ܒܸܢܗܵܪܵܐ
ܓܵܘ ܓܲܢܬܵـܐ ܕܠܸܒܝܼ ܪܒܼܝܼܠܵܟܼܝ ܒܲܫܪܵܪܵܐ؛؛؛
ܒܵܥܹܢ ܡܲܫܡܸܥ̄ܢܵܟܼܝ ܡܢ̄ ܪܸܚܩܵܐ ܒܪܲܩܵܠܝܼ
ܒܠܸܠܝܵܐ ܘܐܝܼܡܵܡܵܐ ܨܲܠܡܵܟܼܝ ܒܚܝܼܵܠܝܼ
ܨܘܼܪܬܵܟܼܝ ܠܘ̇ܓ̰ܵܢܬܵܗ̇ ܒܟܠ ܪܦܵܦܵܐ ܩܛܵܠܝܼ
ܡܼܢ ܢܹܒܼܗܵܝܘܼܬܼܝܼ ܡܫܘܼܚܬܼܵܟܼܝ ܟܬܼܝܼܒܼܵܠܝܼ؛؛؛
ܥܲܒܼܕܝܼܫܘ̇ܥ ܣܵܗ̄ܕܵܐ ܝܘܼܚܲܢܐ