رسالة من ابي
ابني الحبيب انت العفتني ورحت وكلت اهلي عدولي اتركتنه ودمع بعيوني عليك شلال بيهن فرح وبيهن قهر افراكك .ادري الولد يغفر لابوه هيج علمني الزمن.ردت اطلع وراك واخلص كل خواتك قبل اخوتك موسهله طلعت؟ سقط صدام وراحو الاجرام وكلنا يا الله تفرج اليوم لو باجر جنت اظن مطول ايام وكمت احلم بيوم طبتك علينا وارجع اظمك بين ايدي واشوف اولادك لا ولك وصلت بالحلم وطولت وكلت يجي ذاك اليوم واشوف ولد ولدك وجت علي ايام اكعد واصفن بالبيت الجان مليان انت واخوتك وخواتك وزوجاتكم وبيوم الي سمعت خطفو زوج اختك وحال اختك الي على الكافر تصعب شوفتها انكسر ظهري وحرت كمت اخاف اني اخاف ولك؟ اني الجنت جبل من حديد .من يطلع احد من اخوتك برة البيت ايدي على قلبي يرجع لو مايرجع ينخطف ينكتل .كمنا نفز وندور من نمشي نسينه الفرح نسينه الضحكه بس الدمع بالعين والقهر بالقلوب يكبر وطلع اخوك الصغير وطلعت اختك .ووصلو والله لو تشوف امك صارت تنسى جم مرة تصلي باليوم دعواتها وصلت للسماء.واخذت اختك وجهالها وصعدتهم للشمال وحرنه لا زوجها رجع ولا اخوه ولا سنه ولا اثنين وايست كلت عدهم الله الماينساهم طيبين حيل جانو والطيب بهالزمن ينداس واقنعت اختك وعمها وعمتها بان يطلعون لخاتر الاطفال العيشه بالشمال مو سهله اصعب طلعت وطلعوا وصلتها لدمشق وجهالها وعمها وعمتها وياها ورجعت كلت كافي بزمن الاغبر حرامي واحد جان وراح بس جؤي للحكم حراميه .وياهو اليحكم يكول خل اكرف الحكم فرصة مو من ذهب الماس والحكم عام وكعدو يحسبون شكد نكدر نسرق بعام وتاهت الناس والجثث بالشوارع مطشرات اباب البيت صارو يزرعون عبوات الموت وغزا الجار الجار ذاك الجنه ننخاه بالشدة وجان النا حزام ظهر انكلب وصار خوان وتركو اخوتك البيت واحد ورة الاخ وصفيت اني وامك ابيت جان مليان نكعد بانفجار لو برشق رشاش ولا جنا بحرب ايران لا شو بعد اخره هاي شصاير مو تمنينه يروح صدام مو ركصنا لوجه الصبح كلنا العراق راح يعيش بسلام بس طلع حلم وشلون حلم /مثل ذاك اليكول حلم ابليس بالجنه .تدري الي يحز بقلبي اني وامك شنو جبناكم للدنيا علمود نضيعكم واحد وره الاخ.ادري بيك قلب عصفور شايل وادري بيك بجنه تكون وقلبك يم اهلك يكون.كمنا نراقب صديقك ونشوف شلون العمر يحفر بوجه خطوط والشيب بلش يزحف ويطلع براسه وامك تكول ابني هم هسه بعمره واكيد شيب هسه والزم سبح بيدي واذكرك بيهن واضحك بوجه امك حتى لا تنقهر بس وعيونك حبيبي تفضحني دمعاتي مكدرت كتبتلك رساله وادري من توصلك يمكن اكون ميت بس اريدك تعرف اني وامك راضين عليك وكلت لازم اكوله بوساتي وبوسات امك الك ولزوجتك ولولدك الحلويين.
ابوك
اليحبك موت
سالم كوريا ايشو العقراوي
ميونخ /المانيا
