قصيدة بغداد شلونج

[sarroba garabet]

بغداد شلونج عيني وبعد شلونج
               هواية خايفة على أهلـج ودورج
جنتي تنورين الدنيا بأبداعاتج
               حنينة طيبة ودافية مثل شمســج
حبيبة فطني الجهل ناوي يحكمج
               يكطع الوصل دوم بيومج وليلج
يلغون كل فكرج و حتى علمج
               ويغتالون كل حرف من حروفج
ولج عبوات ناسفة حتى بفنونج
               راح يذبحون نهرينج وروحــج
شراح تكول الليلة شهرزادج
               وشتسولف للصبح لشهريــارج
المنصور تايه والرشيد يشكيلج
           والنؤاس دم ودموع بكاسة يمليلــج    
كتّابنا اليوم أحتاروا شيكتبولج
               فنّانينا يا نصب بعـد ينحتولــج
شمّة اليوم على عودة شيدكلج
               كريم والساهر شراح يدلعونــج
ثوري ولا تسكتين على ظلاّمج
              أرجعي ودوسي عليهم باقدامــج
فدوة بوسة على خدج وجبينج
              أصحي ولاتخليها تغفى جفونــج
بعيدة آنا بعد شرد أكلّــج
             غير يمّة شلونـج عيني شلونـــج

سراب جقمقجيان

[اسعد الزبيدي]

سلمت  يمينك 


   قصيدة  رائعة 


  تحياتي

[nasir yako]

قصيده رائعه عاشت ايدج ...

[جواهر بغداد]

عاشت الايادي ورده

[omar_al_tkriety]

مميزة  الكلمات   رائعة   البوح  سلمت يداك  وعاشت بغداد 

[sarroba garabet]

شكرا جزيلا للجميع لكل هذه الأطراءات على كل قصائدي التي أسعدتني وأعطتني الدافع للكتابة والأبداع لأنني مؤمنة بأن الذي يستمتع بالقراءة ويقدرها هو أرق واثقف من الكاتب نفسه

[المهــــاجــر]

شمّة اليوم على عودة شيدكلج
               كريم والساهر شراح يدلعونــج
ثوري ولا تسكتين على ظلاّمج
              أرجعي ودوسي عليهم باقدامــج
فدوة بوسة على خدج وجبينج
              أصحي ولاتخليها تغفى جفونــج
بعيدة آنا بعد شرد أكلّــج
             غير يمّة شلونـج عيني شلونـــج
كلمــــــات جميـــلـــــــة بحـــق وطننـــــا العزيـــــــز
مـــع تمنيـــــــــاتـــي لك بالموفقيـــــــــــــة