وصولي الى امريكا ولاية الينوي . روكفورد

[@wesam@]

السلام عليكم ....
اسف على الانقطاع اللي كان المفروض انطيكم التفاصيل في يوم وصولي الى امريكا بس الضروف كان شوية معرقلة
المهم طبعا كا يوم سفر يوم 4 بالشهر الاول من 2011 وجانت الرحلة كلش طويلة ومتعبة ..اللي صار وينة طبعا احنا عائلة مكونة من زوجة وثلاث اطفال واني اول الطيران كان من مطار بغداد الساعة 2 الظهر وتوجهنا الى عمان كانت الرحلة عبارة عن ساعة ونص واستقبلونا جماعة IOM وقت وصولنا للمطار وجانو طبعا كلش مساعدين ويانا ومنظمين وبعد كما ملينا بعض الاوراق انتظرنا الى الموعد الطيران الثاني من عمان الى المانيا وجان السااعة 3 الصبح بتوقيت عمان يعني بالعراق الساعة 4 الصبح وسلمونة كارتات طعام كل نفر بطاقتين الك حق تاخذ ( بيتزا - ببسي - جاي -ماء ) ةالغلطلة اللي صارت وياية اخذت فلوس عراقي وياي لان مالحكت اصرف دولار وحسبت بان اكو بعمان تصريف الدينار العراقي بس للاسف ماكو اي احد يصرف ولكن الشخص اللي يشتغل باالمنظمة ساعدنا وصرف 1000 دينار بنص دولار .. المهم بعد الانتظار الى ان صارت الساعة 3 الصبح توجهنا للبوابة وانتضرنا وماكو الى ان كالوا انتضروا فد نص ساعة لان الحوال الجوية بعمان مو زينة ..هاي النص ساعة صارت اربع ساعات وطبعا الكل ناموا على الكراسي واطفالي شبعوا بجي الى ان صارت الساعة 7 الصبح توجهنا لالمانيا وصلنا الساعة 9 الصبح بتوقيتهم وجان الانتظار كلش قليل يعني 3 ساعات بس وجانو جماعة IOM كلش لا ابالي ومستعجلين ولا حجوا اي حجاية بس كال امشوا وراي مشينا طبعا المطار كلش جبير بحيث التنقل كلة بالمترو المهم كال اللي رحلتة على شيكاغو على بوابة رقم...... واللي على نيويورك بوابة رقم 6 طبعا اني رحلتي على نيويورك ما اتاخرنا طرنا الساعة 11 ونص الى نيويورك وجانت الرحلة 8 ساعات بين الملل والنوم والحمد لله وصلنا الى المطار واستقبلونا الجماعة بس كانو بقمة الاخلاق والادب بحيث الطفل يبكي يريد مي ولا احد سال ليش يبجي ومن اكلهم الطفل يريد مي يكولولي انتظر مع العلم اكو يمهم بطاله مال مي وبعدين كال ها اذا عندك كلاس جيبة انطيك مي واني ضليت صافن صدك جذب خو ماكو شي وبعدين من شبع بجي يلة انطوه مي ونصيحة اخذوا وياكم مي للاطفال وهنا استلموا الظروف مال DHL وخلصنا منها وختموا الجوازات وسلمونا اوراق الاستمارة I-94 وكانت مملية وكاملة بعدها ودونة للفندق مال المطار  وبتنا بالفندق وقدمو النا العشاء  واجو الساعة 5 الصبح توجهنا للمطار طبعا الرحلة كانت الساة 9 الصبح وهنا كل العراققين والعوائل توزعوا وصفينا بس اني والعائلة وانتظرنا ... ها طبعا بالمانيا جماعة المطار جانو كلش متعاونين بحيث ابو الاطفال يدخلوه اول واحد للطيارة وجان اكو خطا حصل بعمان من انطونا التيكيت جان تسلسل الارقام الكراسي متفرقة بيحث اني انطوني كل رقم شكل يعني زوجتي بكرسي والاطفال كل واحد بمكان مختلف بكرسي بس بعدين صار تبديل الكراسي بين الركاب بالمانيا وكان الخطا من عملن فنصيحة اذا تستلمون التيكيت من عمان اكدوا على تسلسل الارقام مال الكراسي ... وجان التعاون بمطار نيويورك كلش زين وصعدنا للطيارة رقم 4 الى شيكاغو وجانت الرحلة ساعتين الى 10 دقايق المهم وصلنا لكينا واحد شايل بيدة ورقة وبيها اسماءنا والغريب جان موظف بالمطار مو من الجماعة IOM وكال هذا الفاينال دستنيشن ماتكم بشيكاغو كلتلة لا يابة احنا الفاينال مالتنا روكفورد مدينة قريبة على شيكاغو المهم بعد ما انتظرنا وكامو يتصلون بالجماعة والجماعة ماكو وضلينا واحد يصفن بوجه الثاني وبعد اربع ساعات يلة اجتي البنية من الجماعة ولا اعتذرت ولا كالت اسفة على التاخير وبعده كالت راح تصعدون بالباص وكامت البنية بس تفتر شنو السالفة ما اعرف تقريبا ضلت نص ساعة الى ان سالتها كتلها شبيج كالت عربان ماكو مال الجنط طبعا العرباين موجودات ورانا وكلتلها هذا العربانة ورانة كال لا مو هاي بفلوس واني ما عندي فلوس ههههههههههه ضحكت كتلها بيش كالت 5 دولارات انطيتها 5 دولارات وحملنا الجنط ورحنا للباص ستيشن وصعدنا تقريبا الساعة 1 الظهر صعدتنا وسلمت علينا وراحت المهم مشينا بالباص لمدينة روكفورد الى ان وكف الباص ونزل الجنط مالتنا ..ها يابة كال هذا حدكم نزلنا ولالالالالالا طير جان موجود نزلونا بمكان يسموه كلوك تاور وجان الجو كلش بارد دخلنا على المحطة مال البرج عبارة عن بناية انتظرنا ماكو احد الى ان كلت للموظفة ممكن تتصلين بهذا الرقم طبعا راح ينطوكم باج بيه اسم النظمة والعنوان ... كالتلي اتصل بيهم انت كتلها مو العنوان ما اعرفة بالظبط ممكن انت تتصلين وتنطيهم كل التفاصيل والله اتصلت بيهم وما انسى مساعدتها النا ورة 10 دقايق طبكن 3 سيارات سلمووا علينا وودونا للشقة
طبعا المجمع كلة عراقيين والمنطقة كلش هادئة وحلوة
والشقة نوعا ما جاهزة المطبخ جاهز مية مية بس اكو نقوصات يعني بردات ماكو اضوية كهربائية ماكو بس الحمد لله كلها رتبتها
وان شاء الله باجر راح انطيكم التفاصيل البقية واللي صار ويانة ووية الكيس ووركر العراقي

[angie-dawood]

الف مبرووووووووك وصولكم بالسلامة  اخي ربي يوفقكم بالولاية وتشوفون كل الخير

[repentant]

اللهم صلي على محمد وال محمد مبروك الوصول
ممكن مجموعة اساله
1-كم ناخذ ويانا فلوس عراقية هل 75 الف كافية فقط لاجرة تاكس من البيت الى المطار ام ماذا
2- اذا كان الطيران الساعة بال2 ظهرا كم الوقت تنصح الشخص بالذهاب الى مطار بغداد
3- هل هناك تاخير في تدقيق الجوازات في مطار بغداد
4-هل تم محاسبة الاشخاص الحاملين وزن زائد وهل يسمح لنا بحمل جنطة كبيرة حجم 20 كيلو وهاند باك 5 كيلو اضافة الى جنطة الابتوب

[@wesam@]

اللهم صلي على محمد وال محمد مبروك الوصول
ممكن مجموعة اساله
1-كم ناخذ ويانا فلوس عراقية هل 75 الف كافية فقط لاجرة تاكس من البيت الى المطار ام ماذا
2- اذا كان الطيران الساعة بال2 ظهرا كم الوقت تنصح الشخص بالذهاب الى مطار بغداد
3- هل هناك تاخير في تدقيق الجوازات في مطار بغداد
4-هل تم محاسبة الاشخاص الحاملين وزن زائد وهل يسمح لنا بحمل جنطة كبيرة حجم 20 كيلو وهاند باك 5 كيلو اضافة الى جنطة الابتوب

اخي العزيز ان شاء الله توصلون بالسلامة
1-بالنسبة للفلوس اذا تاخذ تكسي من البيت للمطار وهاي فلوس التكسي يمك اما بالنسبة من توصل للمطار فهناك ياخذون التفر 10000 دينار وابو العربانة هم فد 10000 والثاني فد 10000 وهاي هية
2-اني بصراحة طلعت من البيت الساعة 7 الصبح لان الطيران الساعة 2 صح بس هم يردوك الساعة 10 ونص الصبح وبصراحة طلعت 7 الصبح ووصلت متاخر لان الطرق كلها ازدحام
3-بالعكس ماكو اي تاخير
4- صحيح اخي 20 كيلو بس اكو جماعة جابو تقريبا 23 الى 24 وما حاسبوهم اما فوق ال 24 فراح ينشمر يعني انت خليها اقل من هذا الشي فد كيلوين فوك العشرين والهاند باك 7 ونص كيلو واللابتوب ممحسوب وبس الهاند باك تدخل وياك للطيارة
مع تحياتي

[abuhatem]

الف مبروك اخ وسام وبالتوفيق وانشاء الله مستقبل افضل

[ابو الحسن]

ألف مبروك اغاتي وسام
الله يسهل امرك ان شء الله
ابو الحسن

[ابو سالين]

اخي العزيز وسام الف مبروك والحمدلله عله سلامتك وسلامه العائله طبعا ضل بالنه كلنه من يوم4راح واليوم12 الحمدلله طمنتنه..ربي يسهل امرك ويعوض تعبكم خير

[Black Angel]

عمي وسام

الف الحمد لله على السلامة وان شاء الله كل الموفقية
هاي الجزء الاول اريد الاجزاء كلهة حتى استفاد حتى من اجي يمك لان ان شاء الله اير جيرانك - بعد عمر طويل - مااتفاجا واكون مستعد نفسيا هههههههههههههههههههه

[المهاجر الجديد]

1000 الحمد لله على السلامه

 اله يسهل امورك  ويوفقك  وتلاقي كل الخير

اتمنالك حياة سعيده  هانئه  ومستقره

  تقبل تحياتي

                                                                                              ابوحارث

[شموسه123]

الف مبروك والحمدالله عسلامه

[ryan dani]

حمد لله على السلامه وعمر جديد

رايان داني

[شيري روم]

مبروك ويارب موفق انت وعائلتك وبكل خطوه صحة وسلامه واستقرار ...

[Dr.Ameen]

الحمد لله على سلامتكم بس والله انتو اتبهذلتو وخصوصا الاطفال يعني ليش ماكو تنسيق وية المنظمة

[فنكوش]

الحمد لله على سلامتكم اكيد جانت الرحلة متعبة عليكم وعلى الاطفال بس الحمد لله وصلتوا بالسلامة انشاء الله كل الخير والموفقية يارب

[ابن الحلة]

اخ وسام الف مبروك والف الحمد لله على السلامة والله يريحك وينطيك مرادك
تحياتي
ابن الحلة

[ابو غيث]

حمد لله علسلامة وحياة سعيدة ومستقبل زاهر باذن الله

[ملت روحي]

ممبروك اخوية العزيز ةسام والف الحمد لله على السلامة ... يلة حبيبي عدت ان شاء الله وصارت سوالف اخوية ... اتمنالك الموفقية انت والعائلة الكريمة والعيش الرغيد ولاية الخير تكون عليكم يارب

اخوك ملت روحي

[الفانوس السحري]

الف الف مبروك اخوية العزيز بالوصول للسلامة وانشاء الله تشوف بس الخير ولو انتوا اتبهذلتوا ويا المنظمة المفروض تحاجيهم وتحاسبهم وتحجي ويا الكيس ووركر مالتك.

[@wesam@]

السلام عليكم
مثل ما كلت ان شاء الله اليوم اكمل الكم اللي صار الى حد هذا اليوم .. طبعا وصولنا صار يوم 4  العصر الى المدينة روكفورد  يوم 6 بالشهر يعني يومين ونص حسب توقيت بغداد  طبعا وره ما شفنة الشقة وهي عبارة عن غرفتين نوم وصالة ومطبخ وحمام بالنسبة للصالة بيها قنفة عدد 2 وتلفزيون 31 بوصة وتيبل لامب واحد وبس بيها نقص بس اضوية وبردة مال شباك والمطبخ كامل ما بي اي نقص مع ثلاجة كبيرة طبعا الاكل بيها يكفي لاسبوع وكلشي بيها حتى حلويات للاطفال .. ومايكرويف ادوات مطبخ كله جديد ةميز وكراسي للطعام .. غرفة نوم الاطفال بيها جرباية ام النفرين لان عندي بنات 2 والكنتور دفن بالحايط ولوكر ... وكذلك غرفة النوم مالتي نفس الشي بس زايد جرباية ام النفر لابني الزغير والحمام كامل ما بية اي نقص بس الليفة ماكو ههههههههههه ... وبنفس اليوم اجى الكيس ووركر مالتي بالليل طبعا عراقي اسمة امين ابو محمد وكال باجر الساعة 8 الصبح نروح للمنظمة ....
ثاني يوم اجي ورحنا وكتله اريدك تنصحني باي برنامج كال انت عندك عائلة اللي يفيدك برنامج الماجكرانت يتكفل باي شي الى ان يلكالك شغل خلال فترة البرنامج اللي هو اربع اشهر المهم التقيت بالمديرة وسالتني كم سؤال لتشوف الانكليزية مالتي والحمد لله والشكر زين اللغة مالتي وكلتلي على البرنامج واذا لكينالك شغل المفروض تشتغل حتى لو شغلة مو زينة يعني منظف مثلا كتلها واذا رفضت كالت البرنامج ينلغي المهم اني بصراحة مقبلت بداخلي بس كلت اللي كاتبة اللي ربي هو اللي يصير ووقعت العقد ...
بس اريكم تنتبهون لهاي الشغلة
الكيس ووركر العينتين كام ينطيني ارواق اوقعها وكل ورقة ينطيني اياها يكلي اقراها ووقع ولحد الان اوكي الى ان انطاني ورقة وكال وقع هاي على السريع كتلة مو من حقي اقراها كال ها اي اوكي
من قريتها لكيت مصاريف الاثاث اللي بالشقة بحيث مسوين الشقة 5 نجوم ..كلتلة اكولك هاي وين الاغراض اللي تكول عليها جان يكول ها هاي بس مجرد جراءات بعد ممسجلين التحديثات اللي عليها كتلة اني لوقع ميخالف بس باجر اريد ورقة بيها كل الصرفيات مالتي كال اوكي وشفته مثل اانغث شوية ولحد الان هو وجها ثكيل علية المهم
لحد هاي اللحظة اني ممخابر اهلي واكلهم اني وصلت لان اي شخص اسالة بالسكن اللي يمي وكلهم عراقيين يكول لازم عندك سوشيال يلة تشتري خط موبايل وللعلم اللابتوب مالتي انطاكم عمرة وانكسر بهاظروف هاي وردت اشتريت واحد جديد ونفس الحجي كلولي بيه اله عندك سوشيال ورة 3 ايام اجوني على مود الموعد مال الفحص الطبي والتجييك طبعا واللي عنده اطفال خلي يجيب الكرتات مال العراق مال التلقيحات وياه لان راح يمشون على اساسة اخذنا بعض الاختبارات اني والعائلة وحددوا موعد اللقاحات ورة 3 ايام
وبنفس اليوم رحنا سوينا الكرت مال الفود ستامب واحنا عائلة مكونة من خمس نفرات خلو بيه تقريبا 638$ وقابل للزيادة والكاش مني راح يخلون بيه  بداية الشهر الجاي
الى ان طكت روحي رحت اني والولد نشتري لابتوب و خط موبايل وكتلة على مسؤوليتي ما عليك والله اشترينا لحد سال شي ولا هم يحزنون الشغلة طلعت كلش عادية وخابرت والحمد لله وللعلم الاكل اللي جابو مثل الحوم والدجاج بصراحة كلة ذبيناه واكو محل عراقي كلشي بيه من الحلو والبقوليات وغيرها و غيرها ما تتصورون شبيه حتى نومي بصرة بيه ههههههه
بالنسبة للمنطقة كلش حلوة وهادئة وايجارها رخيص 520$ بالشهر والماء مدفوع بس الكهرباء والغاز عليك يعني بحدود 60 $ للغاز والكهرباء والجو كللللللللللللش بارد بس بداخل الشقة دافية يعني اتصوروا ملابس صيفية لابسين بداخل الشقة
واليوم  كملنا اللقاحات مالتنا و قدمو النا على برنامج يسموه الوك خاص للطفال دون سن 5 وللزوجة الحامل والمرضعة وهو عبارة عن صولات بيها تكدر تشتري بيها شغلات معينة لالاطفال مثل الحليب وغيرها والحمد لله على كل شي
وان شاء الله اي جديد راح يوصل اللكم

[الاسد الجامح]

الف الحمد لله على سلامة الوصل
وشايف كل الخير

مشكور حيل حيل على هاي التفاصيل الحلوة

[echo 9]

السلام عليكم
الحمد لله على سلامة الوصول اخ وسام
وبارك الله بحضرتك على التفاصيل
اخي العزيز عندي سؤال اذا سمحت لي
لعاية اي عمر يريدون دفتر اللقاحات ؟ بارك الله بيك

[@wesam@]

السلام عليكم
الحمد لله على سلامة الوصول اخ وسام
وبارك الله بحضرتك على التفاصيل
اخي العزيز عندي سؤال اذا سمحت لي
لعاية اي عمر يريدون دفتر اللقاحات ؟ بارك الله بيك

والله ما اعرف بالظبط بس الطفل اللي عندة لقاحات بالغراق لازم يجيبهن وياه حتى يساعدوك ويكملون لقاحاتهم

[echo 9]

شكرا جزيلا اخ وسام
زين بالنسبة للفلوس المبلغ شكد المسموح بيه وهل يسالون شكد شايلين فلوس وبشوفوهن لو لا
مثلا عائلة مكونة من 9 نفرات شكد مسموح يدخلون فلوس وياهم ؟
بارك الله بيك اخي العزيز

[@wesam@]

شكرا جزيلا اخ وسام
زين بالنسبة للفلوس المبلغ شكد المسموح بيه وهل يسالون شكد شايلين فلوس وبشوفوهن لو لا
مثلا عائلة مكونة من 9 نفرات شكد مسموح يدخلون فلوس وياهم ؟
بارك الله بيك اخي العزيز

اخوية العزيز بالنسبة للفلوس اللي اني شفتة بالنسبة اللي تقريبا اكثر من 30 نفر عراقي عوائل وعزاب محد سالهم شكد جايبين وياكم فلوس واعرف اشخاص جايبين وياهم 40000$ ومتونيين من 3 نفرات ولا احد جاب طاري الفلوس وانت براحتك اني هذا اللي شفتة ةسمعتة واشكرك  على المداخلة

[echo 9]

الف شكر اخ وسام وبارك الله بيك يا طيب
اتمنى لك كل التوفيق باذن الله
عاشت ايدك اخي العزيز

[مهند هادي]

الف الف مبروك وبالتوفيق ان شاء الله

[ابو سالين]

اخ وسام الله يسهل الك ..

[تحطيم القيود]

شكرآ اخي العزيز على التوظيحات الرائعة ...
جعلها الله بلدة الخير والرزق...

وبالتوفيق انشاء الله

[اسمر زيونة]

 للرفع

[amman76]

الحمد لله على السلامه ونحن بانتظار اي شي جديد






المهندس

[nancy86]

الحمد لله على سلامة الوصول اخي وموفقين ان شاء الله بحياتكم الجديدة

اخي بس سؤال بلا زحمة ايجار البيت واثاثه راح يقطعوها من مبلغ الولكم جيك ؟
وهل عندك كفيل في ولاية الينوي او بدون كفيل
لان احنا ان ان شاء الله رح تكون وجهتنا الى ولاية الينوي وعدنا كفيل
بس حايرين بين انه نسكن مع الكفيل لفترة او المنظمة هي تأجر النا

وشكرا الك