وزارة الهجرة تدعو العراقيين إلى العودة إلى بلادهم

[Edy Simon]

وزارة الهجرة تدعو العراقيين إلى العودة إلى بلادهم

بغداد - إياد الملاح
جددت وزارة الهجرة والمهجرين العراقيين دعوتها العراقيين إلى العودة الطوعية إلى البلاد وذلك تزامنا مع الذكرى 11 لإعلان الأمم المتحدة يوم 18 من كانون الأول/ديسمبر يوما عالميا للمهاجرين على خلفية تنامي أعدادهم في دول العالم وسعيها لضمان حقوقهم.

وقال وكيل وزارة الهجرة والمهجرين أصغر الموسوي في تصريح لـ"راديو سوا" إن عدد المهاجرين العراقيين ارتفع كثيرا خلال 30 عاما الماضية، وأكد أن وزارته تعمل على تشجيع عودتهم الطوعية إلى البلاد من جميع أنحاء العالم.
من جانبها، قالت عضو لجنة حقوق الإنسان البرلمانية النائبة أشواق الجاف إن أغلب العراقيين المقيمين في دول العالم المختلفة يواجهون جملة من التحديات وإن مجلس النواب يسعى إلى التغلب عليها.
وانتقدت الجاف مواقف بعض الدول التي تحاول إبعاد المهاجرين العراقيين من أراضيها قسرا، لافتة إلى أن القانون الدولي لحقوق الإنسان يلزم تلك الدول بتقديم الدعم القانوني والمعنوي للمقيمين على أراضيها.
ودعت الأمم المتحدة حكومات الدول إلى اتخاذ التدابير اللازمة لضمان حقوق المهاجرين فضلا عن حث المنظمات الدولية والمحلية على نشر الوعي بالإتفاقيات المتعلقة بحقوق الإنسان والحريات الأساسية للمهاجرين.

[/color]

[jack black]

حسبي الله ونعم الوكيل :'(حسبي الله ونعم الوكيل  حسبي الله ونعم الوكيل

[**Sally**]

على شنو نرجع على الامان لو الاعمار لو نزاهة ال اصغر
 

شكرا edy simon على نقل الخبر

[كوكي 2004]

مساء الخير ..
أبو ديانا عيني مو قبل فترة هم صرح ( أصغر بيك ) وكتلك هذا هيج فارغ ومابي خير لا هو ولا تصريحاته
لأن هو أصغر بس أكولكم لعد لو أسمه أأأأأأكبر جان شسوه 
يعني هو هم مصدك روحه مسؤول وديصرح يافرحة أمه بي 

حسبنااااااااااا الله ونعم الوووووووووووكيل .

تحياتي أبو ديانا والله موضوع يرفع المعنويات
تسلم وبارك الله بيك




              أختك كوكي

[(COBRA)]

صديقي ابو ديانا  الورد .
ارحب بقرار العوده الطوعيه .... ورا 50 سنه من يصير العراق مثل دول المتقدمه  احس بنفسي انسان  ؟

[nooova]

ماكو اي شخص بهذا المنتدى ما يتشرف بعراقيته او حبه لوطنه
بس مع الاسف الوطن محكوم من قبل ناس لا عندهم شرف ولا ذمة ولا ذرة ضمير
و الانسان يعيش مرة وحدة و الحياة قصيرة و الايام تركض
فعلى شنو نعيش باوضاع صعبة و معاناة وافتقار لابسط حقوق الانسان ؟؟؟
هل تعلمون ان العراقي لا يميز بين الطموح و الحقوق ؟؟؟؟
طموح العراقي انه يعيش بامان و يشوف ابنائه يروحون مدارس توفرلهم التعليم الحديث و المتطور (احنة كلنة هذا طموحنة ) بس عند الغرب هاي ابسط الحقوق فيا ترى شنو طموحاتهم ؟؟؟؟؟
اخوان الفجوة كبيرة و واسعة بين الوطن و العالم المتطور
الوطن على عيني و راسي بس مستقبل اولادنة فوق كل شي

و شكرا الك ابو ديانا على نقل الخبر و اعتذر اذا كان كلامي قاسي على بلدنا بس من حرقة القلب لا اكثر ولا اقل

[steven_siv]

خلي يحجون ويجددون لحد مايكولوا كافي مخبل اللي  يرجع

[kunda]

اني رجعت وياريتني مارجعت وهسه بس اريد اهج

[Edy Simon]

اعزائي الكرام
شكراً على مداخلتكم اللي تعبر ان ارائكم الشيقة والواقعية تجاه وطنكم الحبيب.
بالحقيقة انه تصريحات اعضاء الجكومة بين الحينة والاخر لا اكثر ولا اقل الضحك على ذقون الشعب المسكين, حيث يستهلون الفرص عند وجودهم في الدول الديمقراطية بتوجيه النداء لابناء شعبنا المهاجر للعودة, لكن بدونه اسس انسانية وضمانات اجتماعية العودة للبلد, المهم لهم ان يبينو لدول العالم انه العراق بخير ويسود فيه الامان والاستقرا والحياة السعيدة, لكن مع الاسف الشديد رب العالمين يكشف فضائح الزمرة الحاكمة او تبين للدول العالم ان هذي الزمرة فيما بينها تتصارع  وتتنازع وكل واحد يتهم الجانب الاخر في الحكم بتهمة الارهاب والدليل على ذلك انه عراقنا الجريح والحبيب ابتلى بالارهاب من هذي الشلة الحاكمة, والى حد الان الصراع فيه مستمر وهجرة الطيبين حق مشروع لعدم استقرار الاوضاع بعكس ما تدعي السلطة الحاكمة بالوقت الحاضر .
فقد تدهورة الاوضاع وسوف تدهور اكثر بعد انسحاب القوات الامريكية من البلد وهذا ما نشهده قريباًر مع الأسف الشديد.
ما نكدر انكول غير الك الله ياعرقنا الجريح.
تحياتي
ابو ديانا المانيا

[salih alassifi]

اي وداعتك راجعين حتى تقتلونا غير تدلل هسه راح احجز لبغداد

[احمد سلطان]

يااااااااااااااااااااابة عفوا كلشى خلى وزارة المهجرين تدعو الامن والكهرباء الى العودة وتدعو البلد العراق العودة الى اهلة وتدعو الاموال التى سرقت واودعت فى الخارج الى العودة وتدعو الخير وتدعو النفس العراقية الى العودة وبعد ذاللك تدعونا الى العودة الى العراق

[rayanchase]

ان شاء الله الباجر راجع
,,,,
نرجع على شنوو   

والله هذوله  رجلهم  بلشمس  و   عايشين بلخضراء و ميعرفون شنو معاناة العراقي

[ابو معتضد]

ايه نرجع مادام الحكومة حطتلنه دستور يظمن مستقبل الاجيال الجاية  وعدنه كهرباء وكل عائلة انطوههههههه بيت وسيارة ونمشي ابطولنه بالشارع  والمليشيات والارهابين يوزعون ورد بالشارعععع والمصانع مشتغله وصرنه اكبر قوة اقتصادية وعسكرية بالمنطقه وايران مداخله بينه كوووول وبناتنه خطيه متديزوجن لان شبابنه مكظيهه سفرات لاوربا وامريكا  واصلا احنه  عاجبتنه الكعده ابعمان وغثاثتهم وبطاله لان بطرانين فنرجع يابه  سلمولي على هذا اصغر مدري اصفر وكولوله هسه يجيك عالنار 
وشر البلية ما يضحك وشكرا لصاحب الموضوع  عالمعلومة والله كريم 

[علاء علاء]

اخون بكل اطيافكم واديانكم سنه شيعه عرب كرد مسيح ايزيديه شبك اتعرفون صديق كرايب اسمه بالعراق ,,,,,,,,,,,,,,,,اصغر,,,,,,,,,,,,,,شنو هذه امريكي,,,,,,,,,,,اصحاب الخبره رجاءا الاجابه ان امكن  ???وهذه اني شفته العام من اجه وفد مكرمة السيد المالكي الله يحفظه جان حيل حيل ارباطه مرتب

[ABO SARAH]

السلام عليكم


اخاف هذا ديحجي عن ايران ترة اسمة اصغر لو اني متوهم.


تحياتي

[dynamic]

زين هو السيد الوكيل والوزير مالته باي دوله جانوا مهاجرين اسف لاجئين ؟؟؟؟؟وجاي الافندي هسة يريد دروع بشرية لحكومته التعبانة .

تحياتي

[ريتا سعد]

دراسة جديدة تفيد انه من خلال تحليل الـ DNA يقدر الشخص يعرف الامراض اللي ممكن يتعرض الها بالمستقبل كالسكر والسرطان ..الخ
وزارة الهجرة و المهجرين تقدر تعطينا معلومات عن طريقة واسلوب الموت اللي راح نحصل عليه عندما نرجع للعراق ؟؟؟
ليش هو منو طالع بمزاجة من العراق اذا ميكون مهدد لو مخطوف شخص من العائلة لو مقتول.
قبل ميجتمعون ويصرفون مخصصات اجتماع ويطبعون بهل دراسات والوثائق خلي يحلون مشكلة المذابح اللي تصير كل يوم بمختلف محافظات العراق ، اظاهر العراقيين اللي ديموتوهم يومية مديكفون .
حسبي الله ونعم الوكيل هو اللي ياخذ حوبة كل مظلوم من كل ظالم

[SIV NASSA]

حسبي الله ونعم الوكيل ليش هو شبقه بيه العراق شو حتى ناسه تغيروا وواحد يريد ياكل اللاخ

[Edy Simon]

عزيزي الاخ علاء علاء
شكراً على الالتفاتة الطيبة منك على تعد الاديان والمنتسبين اليها, بس احب اوضح لك نقطة واحدة انه في الاونة الاخيرة دا اسمعها باستمرار او ابنظرني هي غير صحيحية وهي:
ذكرت المسلمين والمسيح..........اخون بكل اطيافكم واديانكم سنه شيعه عرب كرد مسيح ايزيديه شبك
المسيح هو سيدنا المسيح عليه السلام, او اهنا التابعين الى المعتنقين الدين المسيحي يدعونا المسيحيين...... وليس المسيح لانه عدنا مسيح واحد والذي بعد كم يوم سوف يصادف ميلاده, العفو اذا كنت غلطان وارجو ان لاتنزعج من توضيحي هذا للكلمة المذكورة.
تحياتي
جوسي البغدادي باحث اجتماعي المانيا

[fresh]

 اذا هو نائب رئيس الدولة يقتل ويصفي وطائفي وهو اعلى مسوؤل بالدولة جا البقية شلون شر البلية ما يضحك اخوان انا بالعراق العظيم بعدي ونصيحة للبعده مثلي اطفروا واللي برا لا ترجعون لبلاد الغاب

[roger]

ارجع للعراق

من يبطلون صفة الالقاب

اصغر الموسوي منو ههههههههه لو جيف سيد خلو بهلمنصب

هاي مثال بسيط

خلوها سنطة عمي

[alkorishe]

هذولة يضحكون على نفسهم

[ابو فرقان]

اخوان لازم يرجعون العراقيين لان الحكومه تريد تصفيهم على راحتهة لو يطلعون من ازلام النظام البائد لو بعثية لو بالقاعدة واذا ما لكو شي ف ميليشيات والنعم من الحكومه

[bhabhan]

والله العظيم مااعرف شنو اللي احجيه عن هاي الوزارة بس اكيد هي السبب بتصعيد مواقف عدم استقبال اي لاجئ عراقي وطرده من دول العالم
حسبي الله ونعم الوكيل فيهم

[Edy Simon]

جوسي اذا انته ترجع اني ارجع 
عزيزي ابومريومة الوردة الحمرة
اذا كلام وعد اني مستعد انزل وياك ولا يهمك, انته بيك خير او ادلل
تحياتي
جوسي البغدادي

[علاء علاء]

اخويه جوسي ,,,,,,,,,,اعتذر بكل ماتحوي هذه الكلمه من معاني ان كان قد سببت اي ازعاج بجهلي بهذا الموضوع,,,,,,اشكر اخويه على توجهي واخ كبير وعله العين والراس,,,,,,,,,,,,واخوتي المسحين احبه لقلبي ولقلب كل المسلمين,,,,,,وعيد مبارك لسيدنا المسيح عليه السلام,,,,,,,,,,,,,,,,,,,,,,,,,,,,,,,,,,,

[الريم 2000]

منو كال ؟ النائب طائفى ؟  ههههه غير همة اللي اسفة قصدي ابو السبح اي زين صدكنة هلكعكعة من هلعجينة المهم شعلينة بس نريد اللة يستر عليكم وعلى اهلنة الطيبين بلعراق و يخلصهم من كل ظالم تعبنة وربي يوفق الجميع-----زينب

[مــودي]

هذا ابو الهجرة يغني ..طبعا ديضربون بلملايين براس الشعب..
اخر خبر ابن المالكي احمد مشتري فندق السفير بسوريا
وصار مدير عام مسؤول على التعييينات بمجلس الوزراء
يعني هم رجعنا عدي وقص

[Edy Simon]

اخويه جوسي ,,,,,,,,,,اعتذر بكل ماتحوي هذه الكلمه من معاني ان كان قد سببت اي ازعاج بجهلي بهذا الموضوع,,,,,,اشكر اخويه على توجهي واخ كبير وعله العين والراس,,,,,,,,,,,,واخوتي المسحين احبه لقلبي ولقلب كل المسلمين,,,,,,وعيد مبارك لسيدنا المسيح عليه السلام,,,,,,,,,,,,,,,,,,,,,,,,,,,,,,,,,,,
اخي العزيز علاء علاء
العفو عزيزي , احنا كلنا عراقيين بالدرجة الاولى او على كولة المقولة الوطن اي العراق للجميع والدين لله.
بس حبيت انبه الفرق بين كلمة المسيح تطلق للسيد المسيح او المسيحيين تطلق لتعبته اي الذين يدينون له.
او ماكو داعي للاعتذار او احنا اخوان او ماكو واحد ما يوقع بالخطئ’ بس برافو للي يعترف بالخطئ لأنه اعتراف بالخطئ فضيلة او كلنا ما معصومين عن الخطئ في حياتنا.
شكراً على تمنياتك الشيقة, واتمنى الك احلى التبريكات بالسنة الجديدة او اتمني ان تحقق طموحاتك او سنة الخ انشاء اللهعلى جبل البلدان الحة تتمتع بصحة وتحقق انجاحاتك.
اخيك
جوسي البغدادي المانيا

[*iskender*]

اي ميخالف هسه يجي 

[مــودي]

منو كال ؟ النائب طائفى ؟  ههههه غير همة اللي اسفة قصدي ابو السبح اي زين صدكنة هلكعكعة من هلعجينة المهم شعلينة بس نريد اللة يستر عليكم وعلى اهلنة الطيبين بلعراق و يخلصهم من كل ظالم تعبنة وربي يوفق الجميع-----زينب

هذا العراق اللي يردو