منقول من الاخ ابو انسالسلام عليكم
اخواني اشكركم على مشراكاتكم والمتألق ابو لانا الله ينطيه الصحه والعافيه ....بس الى حد الان ماشفت احد شارك وشرح عن ولايته ومنظمته شنو الاخوان يخافون من العين والحسد هههههههه لو شنو ؟؟؟؟؟يمعودين وينكم صدك جذب .
اخوان احجيلكم شويه عن منظمتي وهي الاثيوبيه .جزاهم الله الف خير متعاونين ومامقصرين لحد الان .
اخواني اول ماوصلت طبعآ اني كفيلي هي اختي وتسكن هنا في شيكاغو من قبل 7سنوان .ثالث يوم زارني المسئول علينا وجابلي صك ب 1800$وكال هذا ايجار وتآمينات اول شهر ورحنه سوى للبابلكيت وسوينه الفود ستامب وهو 668$ ..وكال ومن الشهر القادم نبدي وياك البرنامج وهو .900$ للايجار ... و480 مصرف جيب .... والفود ستامب مستمر..وبعدها استخرجنا السوشيل وهوية الولايه وهوية العمل وجابولي شوية اغراض للبيت وارسلوا جماعه متطوعين جابوا اغراض جديده بسيطه للبت ...وقبل يومين ارسلو هديه بايسكل لابني الصغير جديد طبعآ وبس هههههههههه ...وابو المنظمه اخبرني انه اذا لكيت شغل بهاي الفتره واشتغلت ماتنقطع مساعدات المنظمه وكال اذا اشتغلت باي مكان وبدون انقطاع لمدة 3شهور ننظيك شهر اضافي مساعدات هديه وتشجيع من المنظمه وهذا حسب كلامه ..وهذا كل الي حصل ويانه لليوم وطبعآ استلمنه المدكل كارت بعد وصولنا ب8ايام واكملنا الفحوصات الطبيه وطبعآ هاي كلش مهمه للكرين كارت واوصيكم ان تكملون كل الفحوصات واذا انطوكم موعد ثاني للفحص بعد شهر ارجو ان تروحون على موعدكم لان اي تخلف مايطلع الكرين كارت اكرر مايطلعلكم الكرين كارت يعني شنو يكولون بالمستوصف لازم تسمعون كلامهم وتكولون نعم وبكل ممنونيه .
هذا واتمنالكم الموفقيه واي سؤال اني برسم الخدمه وتتدللون .
ابو انس
شيكاغو
السلام عليكم
اخواني بالنسبه لشيكاغو والمنطقه السكن بيها Devon اكو حوالي 6محلات حلاقه وكلهم عراقيين واسعار الحلاقه اكوا ب5$ واكوا 7$ وطبعآ هنا النساء والرجال كلهم سوى بالصالون يعني مختلط والحلاقين عراقيين ولد وبنات وانت حسب طلبك تريد بنيه لو ولد يحلقلك وطبعآ لاتنسون البقشيش يعني اني حلقت ب5 ونطيت 2 بقشيش ....وبالنسبه لمكاين الحلاقه موجوده وانواع وتبدي م18$ الى 50$ وكلها فاخره وكهرباء وشحن وبيها كل الملحقات .
ابو انس
شيكاغو
السلام عليكم
اخواني خواتي اليوم اشرح لكم طريقة تركيب النت والهاتف الارضي وقنواةالتلفزيون في بيتكم الجديد .
فبل اسبوع اتصلت بعدة شركات لتركيب النت والهاتف وكل الشركات تقريبآ نفس الشي ..وانا اختاريت شركة comcast وهي من الشركات العريقه في امريكا ..وطلبوا مني رقم السوشيل سكيورتي ورقم هوية الولايه وانتم ستحصلون عليها من تجون وكان الاشتراك نصب النت والهاتف وقنوات امريكيه 120 قناة ب 110$مع الضريبه... وتأمينات 150$ ...واجور تركيب 100$... وانطوني موعد بيوم محدد واجوا الجماعه للنصب ووياهم جهازين واحد للهاتف الارضي والنت وواحد للتلفزيون وكلها مشتركه ببعض والنصب مايطول اكثر من نص ساعه وسرعة النت 12ميغا ..يعني بعد النصب تدفعون كل شهر 110$ والتلفون الارضي يحصل على الموبايل واشكد ماتريدون تخابرون ممكن لان تجيكم الفاتوره مقطوعة وتشمل الكل ب110$... ..اخواني اذا احد يريد يركب راوتر وايرلس من الاحسن ان هو يبرمجه ويركبه لان اذا كلتوا للشركه عندي راوتر راح ياخذون منكم 100$للتركيب ..واني اشتريت راوتر وايرلس وابني انس ركبه واشتغل مثل الورد وسعره 67$ واكوا نوع ثاني ب42$ ... اخواني واذا الواحد يريد يركب بس نت هم ممكن وحسب الرغبه .وجهاز التلفزيون بعد مايركبوه تكدرون انتوا تسحبون منه واير وتقسموه على الغرف ويبث بكل البيت .
ان شاء الله استفاديتوا من هاي المعلومات واي سؤال اني برسم الخدمه .
ابو انس
شيكاغو
السلام عليكم
اخواني خواتي احجيلكم عن شيكاغو .
اخوان طبعآ شيكاغو تعتبر اكبر ثالث ولايه في اميركا ... وانا مثلآ اسكن منطقة devon وهي منطقه جميله وهادئه وبيها كثير من اخواننا العراقيين القدماء وهي تشبه جدآ الكراده داخل وهي مقسمه من ناحية المحلات قسم عراقيين وقسم هنود وباكستان ومن باقي الملل وكل واحد وعمله .يعني تتخيلون نفسكم تتمشون بالكراده داخل ..اسعار الشقق تبدي من 700لشقه غرفه وصاله ..800 غرفتين وصاله ...900 وصاعد ثلاث غرف وصاله وتكون كبيره ...والخدمات مثل التدفئه وهي حسب الاتفاق عليكم او على صاحب العماره ...والبيوت تبدي من 1300وانت صاعد بس البيوت لاتنفعنا لان كل الخدمات براسك حتى تنظيف الشارع يعني مكلفه .. وهناك مناطق كثيره وبها عراقيين في شيكاغو بس منطقتنا تعتبر مفضله لدى الكثيرين لانك تجد بها كل ماتشتهيه نفسك يعني كل شي موجود وماتحير بأي شي حتى محلات الصمون العراقي ومطاعم الكباب ومحلات كثيره عراقيه وسوبر ماركتات عراقيه وكل المعلبات بيها مثل معلبات الشورجه ومكتوب عليها عربي تتخيلون نفسكم بالشورجه ههههههههههههههه ولايوجد بها مشاكل ولا لغاوي وتمشي بالشارع وانت مرتاح وهناك المدارس ايظآ موجوده وانا انصح كل اخواني ان يأتوا الى هده المنطقه لانها متكامله من كل النواحي .....بس المشكله الكبرى ان كل المحلات تغلق ابوابها بعد الساعه 9مساءآ وهذا حال كل الولايات تقريبآ اما وسط البلد يبقى مفتوح الى الساعه 12 تقريبآ . وتتدللون اخواني الكرام .
ابو انس
شيكاغو
السلام عليكم
اخواني اخواتي اني يمكن راح افتتح هذا الموضوع وبأخبار مفرحه لكم ولكن لجماعة شيكاغو فقط لان مااعرف باقي الولايات شنو برامجها .
هناك جمعيه تابعه للكنيسه تسمى (المتوى) وهي تعطي مبلغ 100$لكل لاجئ جديد في الولايه يعني على عدد افراد العائله كل واحد 100 صغير وكبير (مشكورين وجزاهم الله الف خير ) ويتم التسجيل بها اول ماتصلون طبعآ بمساعدة احد يغرف عنوانها وبعد اسبوع يتصلون بكم وتراجعونهم ويعطوكم (صك) بالمبلغ .... وعند بداية الشهر التاسع او العاشر هناك برنامج لدفع فواتير التدفئه والكهرباء ويمكن ان تراجعونهم بس يكون معكم الفواتير وهم يخصصون مبالغ للمساعده وهي كافيه ..اخواني خواتي هذا الي اعرفه ولاادري ان كانت هناك منظمات اخرى ...وارجو من الاخوان اذا عندهم اي معلومات ان يكتبوا حتى الكل يكن على بينه من الامر ولكم جزيل الشكر والامتنان .
ابو انس
شيكاغو
السلام عليكم
اخواني اخواتي اصدقائي في منتدانا الموقر .
اليوم ذهبنا الى الموستوصف لاجراء الفحص الطبي وحبيت ان ابلغكم وانبهكم ان تجلبوا معكم كل بيانات التلقيحات لاطفالكم لانهم طلبوها مننا ونحن لم نجلبها معنا من العراق وعليه اعادوا لنا كل التلقيحات وقاموا بتلقيح الاولاد وكل واحد منهم 6ابر يعني لعبوا بيهم طوبه وتعرفون شنو 6ابر وبنفس الوقت واحده بعد الثانيه وهسه كلهم مخدرين من اثر الابر ويمكن راح ينامون الفراش . بس المعامله الفاخره والوجوه المبتسمه خلتنه ننسى كل الاوجاع لان عدهم البشر مهم جدآ وله قيمه عاليه وصدك الواحد يندم على الايام الي عاشها في الدول العربيه ... وكان هناك عوائل عراقيه وقسم منهم معاهم بيانات التلقيح من العراق وخلصوا من الابر ..وهذا ماعدى الفحوصات الثانيه التي تشمل جميع انحاء الجسم وكل فرد من العائله مع دكتوره .. اخواني خواتي حبيت بس ابلغكم حتى لاتنسون بياناتكم وجيبوها وياكم .
ابو انس
شيكاغو
السلام عليكم
اخواني خواتي احجيلكم على منظمتنا وهي (الاثيوبيه )
طبعآ بعد ماوصلت بيومين اجاني صك من الموضف الي استقبلني بالمطار وهو المسؤل عنا بقيمة 1800$لاربعة نفرات واخبرني ان البرنامج بدايته من الشهر القادم وسيكون دفع الايجار على ان لايزيد عن 900$ ومصرف جيب 480$ ولمدة 3شهور فقط والفود ستامب 668 لكل شهر بس اول شهر كان اكثر شويه ويمكن هذه هديه منهم وانطوني 712$ ومااعرف الشهر القادم يمكن ترجع 668$ وارسل لي اشياء بيت كثيره وادوات مطبخ جديده بالباكيت .. وبعد اسبوع ارسل لي 3اشخاص من غير منظمه وجلبوا لي ادوات مطبخ ومناشف وكثير من الاشياء ومراوح وطاوله وسرير وكلها جديده بالباكيت ..والبارحه اتصل بي شخص وايظآ سوف يجلب لي اشياء كثيره ..كل هذه الاغراض انا حاير بيها اشلون راح اوصلها لبيتي الجديد لانها وصلت بيت اختي ..يعني هسه يرادلي اقل شي 300نقل هههههههه يافرحه الي ماتمت . ووعدني انه سيزودني ببطاقات للباص اول مانروح للمدرسه تصوروا شكلي واني شايل كتب ورايح للمدرسه هههههه لان اجباري ....... ويمكن اني حضي كعد ويه ابو المنظمه ويداريني بس هو انسان رائع ومثقف جدآ . اخوان تره شرحت مفصل ومااريد احد يعتب كل الي ببالي كتبته وتتدللون .وطبعآ اخذني وسوينه الفود ستامب (food stamps) والبطاقه الصحيه (medical card)... والسوشيال سكيورتي الى اليوم بعده ماخلص ويكولون يطول اكثر من شهر .
اخوان تره الكلمه الطيبه صدقه وكل ماتكون معاملتكم طيبه ويه اهل المنظمه ترتاحون اكثر .
ابو انس
السلام عليكم
اخوان اليوم كنت في المدرسه وابلغوني ان الدوام يبدء في شيكاغو 8--9--2009للمرحله الابتدائيه والمتوسطه والثانويه high school .
اخوان نصيحه وانتوا ماخسرانين شي اذا سويتوهه جيبوا شهادات كل السنين الي درسوها اولادكم في الدول العربيه يعني جم صف درس مثلآ الاول والثاني والثالث اطلبوا الاوراق وتكون مصدقه كلها ..اني بالنسبه الي كلها جبتها وكلت اني ماخسران شي .وصدك فادتني وطلبوها مني خصوصآ لابني انس لانه في مصر نجح الى السادس الاعدادي وطلبوا مني اوراق وشهادات الرابع والخامس .
ابو انس
السلام عليكم
اخواني خواتي حبايبي الغاليين في منتدانا الموقر .
اليوم راح احجيلكم سالوفة الف ليله وليله وايحار الشقه ومابعدها ... ايجار الشقق او البيوت عنا نوعين .نوع ان يكون (heat)التدفئه عليكم وباقي المتعلقات من كهرباء وماء حار وغاز , ونوع ثاني من الايجار وتكون التدفئه على صاحب الشقه وباقي المتعلقات عليكم هذا بالنسبه للشقق ...اما البيوت هههههههه يراد واحد يكون عنده فرع من بنك ادنبرا .البيوت ويكون كل شي براسكم من كهرباء وماء حار وبارد وتدفئه وغاز وتنظيف الشارع واجور القمامات وبعض البيوت في الاحياء الراقيه يشمل كهرباء اضوية الشارع ههههه يعني الواحد ينهجم بيته ..هذا بالنسبه لشيكاغو اما باقي الولايات يمكن تختلف الفكره .. ونسيت هناك الغسيل (غسالات الملابس ) طبعآ ممنوع في الشقق تشتري غساله ولازم تغسل بالعماره يعني مشترك صاحب العماره مخلي غساله وكل الشقق تغسل بيها وغالبآ تكون في (basment) يعني السرداب ويكون الغسل بدولار والتنشيف بدولار ومثل ماحجينه سابقآ الكل تلزم سره ومن الافضل تطلع من الصبح وبيدك لفة بيض واستكان جاي وحافي وعيونك مغمضه لانك كاعد من ساعه 5الصبح حتى تلحك السره ههههههه لالادااتشاقه .
تكدر ام البيت اي وقت تغسل بس بفلوس طبعآ ...اني الشقه الي اجرتها مابيها غساله ولازم اغسل عند المحلات الخاصه للغسل وهذا هم جديد اجاني ههههه اخواني خواتي ارجو ان اكون قد وصلت لكم فكرة ايجار الشقق او البيوت !!!!!!!!
اخواني نصيحه اذا اي احد منكم يريد ان يأجر خلي يتفاهم ويه صاحب الدار ومن الافضل تكون التدفئه على صاحب الدار حتى تخلصون من الدفع واني ابلغكم لاني صرت كبش الفداء وكلها صارت براسي .
ابو انس
السلام عليكم
اخواني اخواتي طبعآ في البدايه اعتذر عن هذا الانقطاع للايام الماضيه وذلك لانشغالي بالمنظمه والاجراءات الروتينيه لتكملة الاوراق والفود ستامب والسوشيل سكيورتي .
اليوم احجيلكم على الكراج سيل وهي من عادات الشعب الامريكي وهي انهم يقومون بعرض اثاث البيت وادوات كهربائيه والعاب وكل ماتشتهي النفس في باب بيتهم طبعآ بعد ان يحصلوا على موافقه من مركز الشرطه وبعدها يقومون بعرضها في باب بيتهم وكل حاجه عليها سعرها ... واليوم كنا نتمشى في منطقتنا وشاهدت احد البيوت وهم عارضين اغراض وبكل ترتيب واناقه ولاحضت الاسعار مثلآ مكنسه كهربائيه 20$ لوحات كبيره وجديده 5$ وادوات مطبخ منوعه 1$ ست البيت للمطبخ 15$ سجاده جديده 10$ طحم طاوله واربع كراسي 25$ وكلها اخت الجديد .والناس تحضر وبكل ادب وتشتري ماتشاء فكم هي حلوه هذه العادات وليتها في بلدنا ..وارجع واقول لكم اخواني خواتي ان اثاث بيت هنا وكامل من كل شيئ لايكلف اكثر من 1500 دولار في الزايد فلا تشيلون هم للاثاث ابدآ فكل شيئ متوفر ورخيص ...وان شاء الله غدآ سوف اذهب لسوق الاحد واصور لكم بعض المناضر من هناك حتى تعم الفائده للجميع وعند وصولكم هنا بخير وسلامه تكون عندكم معلومات كافيه ...وانا حاضر لاي سؤال وتتدللون ,
هوب هوب نسيت اكولكم تلفزيون 21بوصه اخذته ب20$فقط وجديد وراح اشتري واحد كبير 52بوصه سينما ب600 وسويت اوردر وانتظر يجيبوه بهل ايام.
ابو انس
السلام عليكم
اخواني اخواتي حبايبي .
اسف لانقطاعي عنكم اليومين السابقه لانشغالي بالمنظمه وانتوا تعرفون الوضع لازم نركض واحنه العراقيين معروفين بالركض طول عمرنه هههههه ....اليوم زارتني المنظمه في بيت اختي والسوبر فايزر انسان جدآ محترم وهو من اثيوبيا ..طبعآ دخل علينا ويه وكت الغده ورحبنه بيه وكعد ويانه وشاف الاكل العراقي والصواني منصوبه على الطاوله والصمون العراقي والخبز وانتوا تدرون العراقيين من ينصبون الميز والمواجيل انواع هههههه هذا ضل فاتح حلكه لان ماعدهم هيجي شي همه اكلهم كله نواشف وعلى الماشي طبعآ هم تخمناه خوش تخمه ووياها لبن اربيل وهذا صار وجه احمر من الاكل وراها صاح كافي يمعودين راح انفجر ههههه طبعآ انطاني صك ب1800 لان احنه اربع نفرات وكال بعد ان يمضي عليكم شهر نبدي ننطيكم 480 لمدة اربعة اشهر يعني ويه 1800 . وكال هاي 1800 تنطون منها التأمين والباقي تشترون احتياجاتكم من اثاث وباقي الاحتياجات وكال اني محضر لكم غرفة نوم لكم وسريرين للاطفال وبعض المواد طبعآ اني اختي محضره اثاث كامل لنا وهوايه من الادوات الكهربائيه وبس اشتري طخم قنفات واسعار القنفات تبدي من 1000 وانت صاعد ..وباقي حاجات البيت متوفره ..وكال ازورك بعد 5 ايام حتى نروح نكمل الاوراق والفود ستامب .. وبعدها طلعت ادور بيت للايجار والحمد لله اي شارع ادخل بيه الكي اقل شي 10 شقق للايجار يعني متوفره والايجارات تتراوح من 800 الغرفتين وصاله والاكبر تبدي من 1100 وانت صاعد وان شاء الله اتوفق والكي شي مناسب لان الواحد من كثرة الشقق يبقى حاير ... واريد اسولفلكم على محلات الحاجه بدولار طبعآ بيها كل شي ومن احسن الانواع ويكدر الواحد يكمل كل اثاث المطبخ من هناك ..اما السوبر ماركتات مثل تاركت وويل مارت وكمارت الواحد يكدر يأثث بيت كامل من هناك واسعار رخيصه وكل واحد اسعاه ارخص من الثاني ..والحلوه بيهم عدهم طريقه لكسب الزبون وهي تروح وتطلب استماره وتملي الاستماره وينطوك كارت صغير خاص بيك لتنزيل الاسعار يعني من تشتري اي شي منهم يسوولك تخفيض على الكارت الموجود عندك ههههه مثل مصر نفس الشي ههههه وهاي موجوده بكل السوبر ماركتات .... وبالنسبه للعمل موجود بكثره بس الاجور قليله يعني تتراوح بين 7 و8 دولار بالساعه واذا الواحد يدور يلكي ب10 ..شفت اخ عراقي هنا صارله سنه وتسع شهور وماخذ الكارت الاخضر كرين كارت والى هسه مامشتغل ويكول مااريد اشتغل الا شي يعجبني والمساعدات مستمره عليه والولفر يصرفله راتب وفود ستامب يعني اخوان ماكوا واحد يموت من الجوع ويشمرون غراضه بالشارع وبالنسبه للكرين كارت تاخذوه بعد سنه واربع شهور واكيد ...تدرون اني الى اليوم ماشفت امريكي هنا بمنطقتنه كلهم هنود وباقي الجنسيات وعتالك اني ببغداد كلهم عراقيين من القدماء والله رازقهم وكلهم عايشين ملوك .اما الهنود واي واي هاي شنو السيارات اخر موديل وكل واحد جم عماره وجم محل واغنى من الامريكي بهوايه ..ومن دا امشي المحلات كاها هنود والشارع اسمه غاندي وتذكرت الافلام الهنديه ههههههههه... اخواني خواتي الي افتهمته انه الانسان هنا يكدر يبني مستقبله بس شويه شويه وهاي بلد الفرص بس يراد بالبدايه شوية صبر ... وحجولي على ولد عراقي وشفته ربح 12 مليون دولار بليانصيب اللوتو وصار مليونير وعايش امبراطور زمانه ...اخواني خواتي لاتتخوفون ولا تفكرون تره الحياة هنا بسيطه والكل يكدر يعيش ويكون نفسه وماكوا اي خوف وماكوا واحد يفشل ..بس شوية صبر وبعدين تشوفون الحياة اشلون تتفتح من جديد وننسى الماضي اخواني توكلوا على الله وتعالوا بدون خوف وتفكير واني واثق من كلامي هذا البلد هو ام الدنيا واعظم بلد مو مصر الوسخه الي يسموها ام الدنيا هاي زبالة الدنيا مصر .. وحرامات على كل يوم ضاع من حياتي بهذا البلد وماانسى اشلون يعاملون العراقي وخصوصآ دوائر الدوله والمدارس .... توكلوا على الله وشدوا حزامكم والمستقبل لكم هنا .. وكل جم يوم ازودكم بمعلومات جديده بس تعالوا .
طبعا ما عندي الرابط الموضوع
http://chicago.craigslist.org/http://www.chicago-il.org/Chicago-Illinois.html?qs=06oENya4ZG1YS6vOLJwpLiFdjG91IC5WixZjXcqPVvKb1M-Hte-S6drebC2LXB-pwDeT_9mSYyKIWwH02tAJU_7iJSZA1RSDVQBzHbPwbPKi26op1G1V_ZLfFthnKz23IVXndHqNuel5QfDVt0Rscp-rDw3_qa3ZxY7S5PM16IaWzujnReAmryWM0yzIH_mOoVcIN_XJPjSYA_agCP5sqWfawUA8nX6hRDki7TjP0ZkhqyHQHqylZcLxeQqTbRNLU4mtBZpimPDS6jxE55aEU.,YT0xO0w9Q2hpY2FnbyBJbGxpbm9pcztSPTE7Uz1NIztrPTE7aD1kZGU5ODZmOGUzZmY0YThkاخوك زعيم الحب (شيكاغو مدينتي القادمه )
