قصيدة الوجدان : للشاعر ولاء الفرطوسي (يعاتب الزمن)
مختارات عقائدية مؤثرة في هذه المخاض من
الشماس ادور عوديشو
اقتباس
أدفع بالعلم … ما أدري بي غَركان
والمراد انكسر والموجة خالَفتا
وإبديرة مناجل … سنبلة إنحَطّيت
حِصدوني … وخضار الطيش ما شِفتا
وصَدَّكت الرمل … ال بي نِكشف الصحراء
وصِبَرت على الجرح … حد ما خَذاني الشيب
وِتحملت السنين وذِكِت ما ذِكتا
إلحَنظَل والعسل ، والزين والموزين
كِلهن جَرَّبِتهِن وانا دوم مو إنتا
إلحنية وياك شِنهي ، و وين بِيهَا تريد
خابِط يا وَكِت مايِصفا بيك الراد
تطَشِّرني ، وكل العمر خَلَّصتا
أنا هلال ب سِماك ، شبيك نَزَّلتا
إليِكفر بالنجم … تنطي ضواك … شلون
اللي يذم الشعر… لا تحلف بوَكتا
ترى سننين الظلم … طَشَّن بروحي الضيم
اعاتبهم واكِللهن … كلشي خَلَّصتا
لا خِفنا صبر … إنعيش بيها الصيف
ولاضحكة امل … انكضّي بيه شتا
مرواح التعب … حطني بحلك الريح
ذراني وطحت … والراس دنَّكتا
وابن نفس الحضن … يضحك بعالي الصوت
ولا جنا خوي … وامي رضعتا
كل ذني … وعشت والنائبات هواي
عِبرن وانتهن … والفات موَّتا
وإيحاجيني المضلوم … بحركة المصلوب
وايكلي … الزمان شلون صاحبتا
على كنطرة غيرك … لا تحط رجليك
وَكتَك مو شَمع ذياب دايرتا
نورس … لا تحط بجرف ما بي ماي
العطش كتال … مثل السيف سالفتا
ولا تزرع شلب … واتغشك النهران
الشلب ينرادلا … وما يصحلك تغشا
رافكت الجرف … وسنين كلها بوك
ما حط بيه كطرة … ولا رَطَّب بيه شفتا
ومن شفت الندى ،،، يصَبِّح على العاكول
وخدود الورد … ما يوم حاضِنتا
لمّيت الشبج … والسِمَج ترس الهور
وكلت الصيف كال … هذا مو وكتا
وعلي راحة خلكهم … حَمَّلوا شكبان
وكال صيدنا ثكيل … وانا حيل لامستا
ومدري تاليها … يا وكت وياك
وانا بيك اعرف … وياما جربتا
وبيا روجا ل اطيح … تمدلي جف سجان
تحطني بقفص … وتكلي ونَّستا
طشينا رمل ، ذرينا رمل … هم امشي ويا الريح
لا تحكمني بايدك … هذا ما عشتا
عشت شاهين وكتي … وآنا تك جناح
وطِرت بلا سما … وحطّيت على اللي رِدنا
وِتمِرني حجايتَك … واقراها صورة وصوت
وادري بالقصد … وادري بالقاصدتا
ولا افر مغزلي واحجي حجي الفاين
ولا أبرثم سوالف تِنحَجي بسَكتا
[/b][/b][/b][/b]