[center شخابيط مُهداة لروح أُمي
اسطيفان هرمز
أُمي عيونها الوَطن
وجْفونها لْحدود
وبجفوفها كَرَمْ النّهرين
لكُل البَشر مَمدود
بحضن أُمي دُفْو وحنيّة
ومن أيديها يدوم الجّود
وبْوَكتْ المِحَنْ
من زُودها كل أحنا نزود
أُمي خيمة
وكَلبها هو العامود
و من تنطي من حنّيَتها
تنطي بلا قيود
ومنها تعلمنا الوفا
وعلمتنا شلون عن
الحِما نذود
أُمي الروح والرية
ومن ريحتها
ترد بيَّ الرّوح
من جنت اخلّي راسي بحضنج
يا يُمه
وأنا جبير جنت أكول .... أيباااااه
شكد اني مَسعود...؟!
يُما ليش استعجلتي الرحيل؟
وخليتينا نعيش
بطرك لدموع
جا وكت الشّدة يا يُمه
المن نعود ؟
وبْرَحيلج يا يُمه
كلت خلاص السعاده
ماتت وبعد ما تعود
ومن بعدج يا يمه
ضاع الوطن
وضاع الحب
وضاع كلشي حلو
وما ظن بعد يعود
ومن فتريت ببلاد الغربه
لكيت حُبج كبلي
بكل مكان موجود
لأن حبج يا يُمّه
حُب ماله حدود[/center]
Estivan Hermez
MICHIGAN FEB\2023
