ܫܘܼܒܳܚܳܐ ܕܒܰܪܢܳܫܐ

[يوسف بيكتاس]

ܫܘܼܒܳܚܳܐ ܕܒܰܪܢܳܫܐ

ܫܘܼܒܳܚܳܐ  ܕܒܰܪܢܳܫܐ ܡܿܢ ܬܠܝܐ ܗ̱ܘ ܒܡܶܫܬܰܟܚܳܢܘܼܬܐ ܕܫܘܼܒܚܳܐ ܓܰܘܳܝܐ. ܘܰܟܕ ܟܪܝܟ ܗ̱ܘ ܒܡܰܪܝܼܪܘܼܬܐ ܘܚܰܠܝܘܼܬܐ܆ ܡܶܣܬܢܳܩܘ ܡܶܣܬܢܶܩ ܠܨܦ̈ܬܐ ܣܓܝ̈ܐܐ: ܕܐܝܟ ܠܒܝܼܒܘܼܬܐ ܘܰܛܢܢܐ ܡܛܰܟܣܐ ܘܐܰܡܝܼܢܐ ܘܚܘܼܡܣܢܐ ܘܥܘܼܙܳܝܐ ܘܫܰܪܝܪܘܼܬܐ ܘܰܬܪܝܼܨܘܬܐ ܘܟܐܢܘܼܬܐ ܘܩܘܼܫܬܐ ܘܚܘܒܐ ܘܐܝܩܪܐ ܘܬܘܼܟܠܢܐ ܝܳܬܢܳܝܐ.... ܘܠܐ ܡܶܫܬܟܰܚ ܐܠܐ ܒܰܪܘܝܼܚܘܼܬ ܬܰܪܥܝܬܐ ܘܝܘܼܠܦܳܢܐ ܚܠܝܼܡܐ. ܒܪܡ ܡܚܝܼܠܘܼܬܐ ܘܰܒܨܝܼܪܘܼܬܐ ܡܬܚܙܝܐ ܒܡܶܨ̈ܥܳܝܘܗܝ ܩܶܨܰܬ ܡܓܰܙܝܘܼܬܐ ܕܣܘܼ̈ܟܳܠܝܳܬܐ ܘܐܝܬܝ̈ܩܳܝܳܬܐ.
 ܒܰܩܛܝܼܪ ܡܼܢ ܫܘܼܘ̈ܫܳܛܐ ܘܛܘܼܘܳܪ̈ܐ ܕܦܳܪܣܝܼܢ ܟܶܢܦ̈ܝܗܘܢ܆ ܠܐ ܢܝܼܚܘܼܬܐ ܫܟܝܼܚܳܐ ܒܛܰܝܘܼܦܘܼܬܐ ܟܪܝܼܟܬܐ. ܘܣܢܝܼܩܘܬܐ ܩܳܪܝܐ ܠܫܘܼܚܠܳܦ ܛܰܝܘܼܦܘܼܬܐ ܕܠܰܚܡܳܐ ܠܥܰܡܝܼܩܘܼܬܐ ܕܡܶܠܬܐ ܗܿܝ ܕܒܗܿ ܒܳܣܡܝܼܢ ܘܥܳܬܪܝܼܢ ܚܝ̈ܐ. ܒܕ ܢܘܼܦܳܫܳܐ ܘܒܘܼܣܳܡܳܐ ܘܢܰܘܚܳܐ ܠܘ ܒܰܠܚܘܼܕ ܡܼܢ ܠܰܚܡܳܐ ܡܶܫܬܰܪܬܰܚ. ܐܠܐ ܐܦ ܡܼܢ ܝܰܡܝܢ̈ܝܳܬܐ ܕܡܶܠܬܐ. ܘܒܰܪܚܘܼܩܝܳܐ ܕܡܼܢ ܓܘܼܪ̈ܳܓܶܐ ܘܚܘܼ̈ܬܚܳܬܐ ܣܡܺܝ̈ܡܶܐ ܕܐܶܢܳܢܳܝܘܼܬܐ ܘܰܨܢܝܼܥܘܼܬܐ ܣܳܚܘܿܦܬܐ. ܕܐܰܡܝܼܪܳܐ: «ܕܠܐ ܗ̱ܘܳܐ ܒܠܰܚܡܳܐ ܒܰܠܚܘܕ ܚܳܝܐ ܒܰܪܢܳܫܳܐ܆ ܐܠܐ ܒܟܠ ܡܶܠܐ ܕܢܳܦܩܳܐ ܡܼܢ ܦܘܼܡܳܐ ܕܐܠܗܐ»  (ܡܬܝ 4: 4).
 ܡܳܕܝܢ ܪ̈ܒܐ ܘܰܙܥܘܪ̈ܐ ܟܠܢ ܫܘܳܬ ܙܕܩ ܕܢܬܚܰܦܰܛ ܒܬܰܪܒܝܼܬܐ ܕܠܰܚܡܳܐ ܘܡܶܠܬܐ. ܐܝܟܢܐ ܕܢܶܫܟܰܚ ܫܽܘܼܒܳܚܳܐ ܘܫܽܘܼܒܚܳܐ ܕܺܝܠܰܢ ܓܰܘܳܝܳܐ. ܘܢܶܫܬܰܘܙܒ ܡܼܢ ܝܘܼܩܪܐ ܘܰܢܗܳܓܐ ܡܥܰܘ̈ܟܢܐ ܕܡܰܪܕܝܼܬܢ. ܟܕ ܠܐ ܛܳܥܶܝܢܢ ܕܚܰܝܠܐ ܚܒܺܝܼܨ ܗ̱ܘ ܘܰܪܒܺܝܼܨ ܒܪܘܼܚܳܐ ܕܬܰܪܥܝܬܐ. ܗܿܝ ܕܟܕ ܡܫܬܰܒܠܐ ܡܼܢ ܚܟܡܬܐ ܕܚܰܘܣܳܢܐ܆ ܡܫܬܰܓܢܝܳܐ ܠܢܘܼܗܪܐ ܕܰܡܫܰܚܠܦ ܡܰܪܝܼܪ̈ܬܐ ܘܥܰܣܩ̈ܬܐ ܠܗܶܢܝܳܢܐ ܩܢܘܼܡܳܝܐ ܘܓܰܘܢܳܝܐ.
 ܚܝ̈ܐ ܡܿܢ ܣܝܼܡܬܐ ܐܢܘܢ ܕܡܫܬܰܟܢܝܢ ܡܼܢ ܐܠܗܐ. ܘܰܫܟܽܘܼܚܝܳܐ ܕܣܝܼܡܬܐ ܗܕܐ ܠܐ ܡܶܫܬܰܡܠܐ ܐܠܐ ܒܡܶܫܬܰܟܚܳܢܘܬܐ ܘܡܶܣܬܰܟܠܳܢܘܼܬܐ ܕܫܘܼܒܳܚܳܐ ܘܫܘܼܒܚܳܐ ܓܰܘܳܝܐ. ܘܗܠܝܢ ܕܡܶܫܟܚܝܼܢ ܘܡܶܣܬܰܟܠܝܼܢ ܣܺܝܼܡܺܝܼܢ ܒܠܶܒܐ ܕܣܺܝܼܡܬܐ ܗܕܐ. ܘܚܰܕܘܼܬܗܘܢ ܠܐ ܡܫܬܰܡܠܝܳܐ ܐܠܐ ܕܰܢܩܘܡܘܢ ܒܡܘܼܙܳܪ̈ܐ ܬܰܪ̈ܥܝܼܬܳܢܳܝܐ ܡܛܠ ܫܰܝܢܳܐ ܘܬܘܼܩܳܢܐ ܘܛܘܼܘܳܪܐ ܕܓܰܘܳܐ. ܘܟܕ ܠܐ ܡܬܬܰܟܠܝܢ ܥܠ ܫܰܒܪܘܼܬ ܝܕܥܬܗܘܢ܆ ܠܐ ܢܳܦܩܝܢ ܡܼܢ ܫܒܝܼܠܐ ܕܚܘܒܐ ܫܪܝܪܐ. ܗܿܘ ܐܝܟܐ ܕܡܶܫܬܟܰܚ ܠܐ ܫܳܒܶܩ ܐܰܬܪܐ ܠܕܶܚܠܬܐ ܘܩܶܢܛܐ. ܘܠܐ ܒܳܥܝܢ ܕܢܶܣܛܘܢ ܡܼܢ ܫܪܪܐ ܕܟܰܝ̈ܠܐ ܓܰܘ̈ܢܳܝܐ. ܘܠܐ ܨܳܒܶܝܢ ܕܢܶܥܠܘܢ ܒܓܝܓܠܐ ܥܕܝܼܠܬܐ ܕܫܰܦܘܼܪܬܢܘܼܬܐ ܘܫܘܼܒܚܐ ܣܪܝܼܩܐ. ܘܰܡܢܰܣܝܢ ܕܢܥܘܕܘܢ ܙܝܙ̈ܢܐ ܡܼܢ ܚܩܠܐ ܕܒܪܢܳܫܐ ܓܰܘܝܐ. ܘܰܒܓ̈ܶܦܐ ܣܰܚܝܼ̈ܚܳܬܐ ܕܡܶܠܬܐ ܛܳܝܣܝܢ ܒܪ̈ܥܝܳܢܝܗܘܢ ܗܳܪܟܐ ܘܬܰܡܢ. ܘܰܡܦܰܬܫܝܼܢ ܐܳܕܫ̈ܐ ܪ̈ܝܫܳܝܐ ܘܫܳܩܠܝܼܢ ܡܢܗܘܢ ܗܿܘ ܕܛܒ ܘܚܳܫܚ ܠܩܘܼܝܳܡܐ ܘܬܘܼܩܳܢܐ. ܘܡܬܦܪܢܣܝܼܢ ܠܦܘܬ ܢܡܘܿܣܐ ܕܡܶܠܬܐ. ܕܚܳܟܡܝܼܢ ܗܿܘ ܕܠܰܚܡܳܐ ܦܰܟܝܗ ܘܰܡܓܺܝܓ ܘܰܡܬܰܚܰܡ. ܘܗܰܝܡܢܘܬܐ ܘܣܰܒܪܐ ܘܚܘܒܐ ܡܫܒ̈ܠܢܐ ܐܶܢܘܢ ܒܗܳܠܝܢ ܕܡܶܠܬܐ ܘܠܰܚܡܐ.
ܬܪܝܢ ܚܝ̈ܠܐ ܢܳܒܥܝܢ ܡܼܢ ܪܘܼܚܐ ܕܒܪܢܫܐ ܗܿܘ ܕܡܦܳܣ ܒܫܘܼܒܳܚܶܗ ܘܫܘܼܒܚܶܗ: ܩܕܡܝܐ ܡܿܢ ܚܘܼܒܐ ܗ̱ܘ ܘܢܘܼܗܪܐ ܕܢܳܣܒ ܡܼܢ ܪܘܼܚܳܐ (ܐܠܗܐ). ܘܦܳܪܣ ܘܡܳܙܓ ܠܗ ܒܠܰܚ̈ܡܳܢܳܝܬܐ ܠܦܘܬ ܣܳܦܩܘܼܬܗ ܒܶܠܥܳܕ ܕܠܘܼܚܝܳܐ. ܘܰܬܪܝܢܐ ܕܝܢ ܗܘܼ ܟܕ ܗ̱ܘ ܚܝܠܐ ܗ̱ܘ ܕܦܳܪܣ ܘܡܳܙܓ ܠܗ ܒܠܰܚ̈ܡܳܢܳܝܳܬܐ ܒܰܕܠܘܼܚܝܳܐ ܣܡܺܝܼܡܳܐ ܕܝܰܨܪ̈ܐ ܒܝܼ̈ܫܶܐ ܕܐܢܳܢܳܝܘܼܬܐ ܗܿܝ ܕܐܺܝܬܝܗܿ ܐܶܡܳܐ ܕܟܠܗܝܢ ܒܝܼܫ̈ܬܐ.
 ܘܓܘܼܪܓܳܐ ܡܰܢ ܘܠܘܼܒܳܒܐ ܕܢܳܒܥ ܡܼܢ ܪ̈ܶܓܫܶܐ ܒܰܣܝܼ̈ܡܐ ܕܐܶܢܰܚܢܳܝܘܼܬܐ  ܐܝܟ ܐܳܩܣܝܓܶܢ ܐܝܬܘܗܝ ܠܒܪܢܫܐ ܕܡܬܚܰܦܛ ܕܢܶܦܪܘܿܣ ܡܘܼܙܳܓܐ ܕܚܘܼܒܐ ܘܢܘܼܗܪܐ ܒܗܝܼܟܕܗܝܼܝܘܼܬܐ ܢܣܝܼܒܬܐ. ܘ«ܠܐ ܪܳܢܐ ܒܗܳܝ ܕܡܘܢ ܡܨܐ ܕܢܶܣܰܒ. ܐܠܐ ܒܗܳܝ ܕܡܘܢ ܡܨܐ ܕܢܶܬܶܠ». ܕܝܳܕܥ ܚ̈ܝܐ ܡܰܬܿܠܐ ܘܡܰܣܒܳܐ ܐܶܢܘܢ. ܘܡܬܬܟܝܼܢܝܼܢ ܡܼܢ ܗܿܘ ܡܐ ܕܡܶܬܝܗܶܒ ܘܡܶܬܢܣܶܒ. ܘܪܳܢܐ ܥܰܡܝܩܳܐܝܬ ܒܗܿܝ ܕܐܳܡܪܐ:  ܡܰܓܳܢ ܢܣܺܝܒ ܠܝ. ܡܶܟܐ ܐܦ ܐܶܢܐ ܫܦܝܥܐܝܬ ܙܳܕܩ ܠܝ ܠܡܶܬܠ. ܘܟܕ ܡܬܚܰܦܛ ܠܡܶܣܬܰܟܳܠܘ ܗܠܝܢ ܕܰܟܣܶܝܢ ܒܥܘܼܒܳܐ ܕܣܘܼܟܳܠܐ ܗܢܐ܆ ܡܶܚܕܐ ܪܳܓܫ ܕܠܡ ܠܐ ܡܰܨܝܳܐ ܕܢܶܩܢܐ ܚܰܝܠܐ ܠܘܼܩܒܰܠ ܩܶܛܪ̈ܐ ܘܒܘܼ̈ܠܒܳܠܐ ܐܢܗܘ ܕܠܐ ܢܰܬܩܶܢ ܢܰܦܫܗ ܘܡܰܕܥܗ ܒܗܠܝܢ ܕܡܠܬܐ. ܘܗܝ ܗܕܐ ܠܐ ܡܫܬܪܪܐ ܥܕܡܐ ܕܗܝܼ ܪܘܼܚܐ ܗܳܘܝܳܐ ܡܣܰܘܣܝܳܢܝܼܬܐ ܕܦܰܓܪܐ ܘܝܰܨܪ̈ܘܗܝ.
ܘܗܕܐ ܐܝܬܝܗܿ ܐܘܪܚܐ ܪܝܼܫܳܝܬܐ ܕܢܳܩܠܐ ܠܘܳܬ ܫܒܝܼ̈ܠܐ ܟܣ̈ܝܐ ܕܫܘܼܒܳܚܳܐ ܘܫܘܼܒܚܳܐ ܪܒܐ. ܘܡܶܟܐ ܝܳܥܝܐ ܘܝܳܪܒܐ ܦܪܘܿܫܘܼܬܐ. ܗܿܝ ܕܫܳܒܩܳܐ ܕܢܶܚܫܘܿܒ ܒܰܪܢܳܫܐ ܗܘܼ ܠܗ ܗܰܕܡܳܐ ܦܪܝܼܫܐ ܒܓܘܼܫܡܳܐ ܕܐܘܼܡܬܐ ܘܐ̱ܢܳܫܘܼܬܐ ܒܰܕܡܘܼܬ ܐܝܠܳܢܐ ܘܦܺܐܪܐ. ܐܠܘܠܐ ܐܝܼܠܳܢܐ ܠܰܝܬ ܦܐܪܐ. ܘܐܠܘܠܐ ܦܐܪܐ ܠܐ ܡܫܬܰܡܠܐ ܐܝܠܳܢܐ. ܐܠܐ ܗܘܼ ܦܐܪܐ܆ ܟܕ ܡܶܬܚܫܶܒ ܐܘ ܚܳܫܒ ܢܦܫܗ ܒܠܚܘܕ ܦܐܪܐ܆ ܘܠܐ ܪܳܓܶܫ ܒܐ̱ܚܝܳܢܘܼܬܗ ܟܣܝܼܬܐ ܕܥܡ ܐܝܠܢܐ܆ ܗܳܝܕܶܝܟ ܡܫܰܪܐ ܕܢܶܥܕܘܿܠ ܢܰܦܫܗ ܟܕ ܐܡܿܪ: « ܙܰܪܥܐ ܐܺܝܼܬܰܝ ܗ̱ܘܝܬ. ܘܰܗܘܝܬ ܦܰܩܚܳܐ ܘܗܰܒܳܒܳܐ. ܘܐܫܬܰܪܢܩܶܬ ܘܐܶܬܡܠܺܝܼܬ ܘܐܶܬܡܗܺܝܬ. ܘܰܠܚܰܪܬܐ ܗܘܺܝܬ ܡܐܟܘܠܬܐ ܠܐ̱ܚܪ̈ܢܐ ܣܪܝܼܩܳܐܝܬ.»
 ܚܘܼܫܳܒܳܐ ܗܢܐ ܓܳܪܦ ܠܰܫܚܘܼܩܝܳܐ ܘܰܡܥܝܼܣ̈ܬܐ. ܒܕ ܒܪܢܫܐ܆ ܒܐܝܢܐ ܕܰܪܓܳܐ ܕܢܶܗܘܐ܆ ܟܕ ܠܐ ܪܳܓܫ ܕܐܝܬܘܗܝ ܗܰܕܳܡܐ ܦܪܝܼܫܳܐ ܘܚܰܝܐ ܒܓܘܼܫܡܐ ܕܒܗ ܡܫܰܡܫ܆ ܠܐ ܡܬܒܰܣܰܡ ܒܣܘܼܟܳܠܐ ܛܥܝܼܡܐ ܕܐܝܼܬܘܬܗ. ܘܠܐ ܡܰܨܝܐ ܕܢܶܡܛܐ ܠܛܰܥܡܐ ܗܰܢܝܐܐ ܐܠܐ ܒܪܥܝܳܢܐ ܕܒܗ ܚܳܙܐ ܢܦܫܗ ܡܢܳܬܐ ܒܟܘܠܐ ܕܐܝܠܢܐ. ܘܗܟܢ ܡܬܒܰܣܡ ܘܪܳܘܙ ܥܕܡܐ ܠܗܿܝ ܕܢܬܠܰܣܛܰܪ ܡܼܢ ܥܶܕܠܳܝܐ ܢܦܫܳܢܝܐ.
 ܐܝܠܢܐ ܘܦܐܪܐ ܟܝܳܢܐܝܬ ܡܫܰܡܫܺܝܢ ܘܰܡܬܰܪܣܶܝܢ ܚܕ̈ܕܐ. ܘܗܳܢܐ ܚܰܝܠܐ ܟܝܳܢܝܐ ܩܒܝܼܥ ܗ̱ܘ ܒܟܠܢܫ. ܐܠܐ ܩܪܝܡ ܗ̱ܘ ܒܰܫܥܝܼܢܐ ܕܝܰܨܪ̈ܐ ܕܐܶܢܢܳܝܘܬܐ. ܘܟܕ ܡܬܢܰܩܕ ܫܥܺܝܼܢܐ܆ ܪܘܼܚܐ ܕܫܘܼܥܠܳܝܐ ܥܳܪܩܐ ܘܫܳܒܩܐ ܕܘܟܬܗܿ ܠܪܘܚܐ ܕܫܘܼܡܠܳܝܐ ܨܒܝܳܢܝܐ. ܘܟܠܡܰܢ ܕܰܡܫܰܡܠܐ ܘܳܠܝܼܬܗ ܒܣܘܼܟܳܠܐ ܗܢܐ ܒܐܘܼܪܚܐ ܛܳܒܬܐ ܩܐܡ. ܘܥܳܬܪ ܘܡܰܥܬܰܪ. ܡܥܰܕܪ ܘܡܶܬܥܰܕܪ. ܡܫܰܡܠܐ ܘܡܶܫܬܰܡܠܐ. ܐܠܐ ܗܿܘ ܕܠܐ ܩܳܢܐ ܪܘܼܚܳܐ ܗܳܕܐ܆ ܒܐܘܪܚܐ ܫܢܺܝܼܙܬܐ ܩܳܐܡ ܡܕܰܠܩܒܳܢܝܼܬܐ ܕܰܟܝܳܢܐ. ܘܦܳܝܫܐ ܐܘܪܚܗ ܙܠܺܝܼܡܬܐ ܒܰܥܩܘܼ̈ܠܝܗܿ ܣܒܺܝ̈ܣܶܝܗܿ ܥܕܰܡܳܐ ܕܢܶܬܬܥܝܼܪ ܒܰܙܩܘ̈ܬܐ ܕܡܶܠܬܐ ܗܿܝ ܕܡܢܼ ܒܪܝܫܝܬ ܫܘܒܳܚܳܐ ܡܢܰܦܨܳܢܐ ܫܰܟܢܰܬ ܠܒܪܢܫܐ.
ܐܝܟ ܕܐܰܡܝܼܪܳܐ: « ܗܺܝܼ ܘܰܪܕܐ ܠܘ ܡܛܠ ܕܡܬܚܰܒܒܳܐ ܝܳܗܒܳܐ ܪܝܼܚܳܐ ܒܰܣܝܼܡܳܐ. ܐܠܐ ܡܛܠ ܪܝܼܚܳܐ ܒܰܣܝܼܡܳܐ ܕܰܡܦܝܼܚܳܐ ܡܬܚܰܒܒܳܐ ܘܡܶܬܢܰܨܪܐ».

ܝܘܣܦ ܒܓܬܫ
ܚܘܼܕܪܐ ܕܡܪܕܘܼܬܐ ܘܣܶܦܪܝܘܼܬܐ ܕܠܫܳܢܐ ܣܘܼܪܝܝܐ: ܡܪܕܝܢ