بعدنه انريده الوطن
ميسون نعيم الرومي
هم بعـدنه انريده الوطن
والوطن بـيديـن غـداره
عـيشـَـتـنه عـيشـة فگـر
والخـيـر للجـاره
دولار نجـَّم للسمه
والشعب مل اخباره
***
باگـو وطـَـنـَّه ابغـفـل
وانطفـَت انـواره
هجـْرو اخيار الشعب
واتسـَـيدت اشـراره
و(الينخطف) ماله اثـَـر
ايموت ابغفل باسراره
***
ما نحچي بس نشتكي
كلمن خـِـتـَـل وابداره
نـلطم تـِعـَـلمنه لطم !
ما النه ابـداً چاره
ذله او مهانه اوهضم
كلمن ابگـلبه ناره
***
-(دجلتنة) هـدَّه الوجع
والموت باكـتارَه
جرفو (بساتين) الورد
حتى (النخل) وأشجاره
-(بالدين) چذب ادعـَـوْ
نترجه منه (شاره)-
نترجه منه شاره
-------------------------------------
تشرين الأول / 2023
ســـــــــــــــــــتوكهولم
