حكومتنا الرشيدة ستستورد / نصف مليون برقع مبرد لنساء البصرة ..!!
جلال چَـرمَگا
نحذر من السفور والتبرج ومن يخالف سوف يتعرض للقصاص. اللهم اشهد انا بلغنا .
[عصابات ومنظمات أرهابية نزلوا من القمر أو المريخ !! ]
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
من يتجول في مدينة / البصرة الصامدة يرى وفي أماكن عديدة العبارة أعلاه .. والكلام أو التحذير موجه الى ألأخوات الفاضلات أهالي البصرة العزيزة .
ياترى لماذا هذا التشدد.. و أين نحن من هكذا كلام ؟؟؟.
• هل نحن من الجهة الثانية من شط العرب أو الخليج العربي حيث جمهورية لا أسلامية يحكمها مجموعة من الجهلة و تفرض كل شىء بالأكراه ؟؟؟.
• أم نحن في زمن الملالي الجهلة / حركة طالبان القذرة الذين كانوا يتصرفون وكأنهم يعيشون في القرون الوسطى ؟؟؟.
• أم ماذا ...؟؟؟.
وألأهم ياترى من أين هذه التعليمات:
• هل من مراجع عليا من مرجعياتنا ؟؟؟.
• هل من مرجعيات البلدان ألأخرى ؟؟؟.
• هل ألأحزاب الحاكمة ـ الشيعية والسنية ـ لهم دور في هذه ألأمور؟؟؟.
• هل لأحدى الحكومات المتواجدة في البصرة أي دور في المسألة ؟؟؟.
• أم ماذا ... بحق السماء؟؟؟.
للرد لابد من أن نجلس مع الخبير ألأستراتيجي ألأخ العزيز ومهجة القلب / السيد حمدان البغدادي لينورنا بالتفصيل الممل عن تلك المسألة التي شغلت البصرة لابل حتى بقية المدن!!.
ــ ياحمدان... ليش البصرة بالذات ؟؟؟.
+ عليك نور.. خوش سؤال.. أخوية البصرة أكبر المدن بعد العاصمة.. البصرة لها أهمية أسترتيجية حيث موقعها على البحر.. البصرة غنية بالثروات الطبيعية في المقدمة / البترول... البصرة خليط وموازييك جميل حيث الشيعة والسنة عاشوا قرون كالأخوان..
ــ هيواشك.. هذه نعرفها.. قصدي على شنو هالمشاكل والويلات والتكتلات؟؟.
+ هساع تجيك.. أخوية 90% وأكثر من المشاكل والقتل وألأرهاب والتهديدات وألأعمال المشينة من جار السؤ / ملالي أيران .. هذولة من كل عقلهم عندهم كم جماعة من المرتزقة والجواسيس والعملاء .. بكل عقلهم يعتبرون البصرة بصرتهم!!... آما مسآلة المراجع فی العراق ، هؤلاء يعبرون بالعلن ومن خلال وكلائهم.. هم بعيدين كل البعد عن هذه التصرفات.. وبالتأكيد ومن غير مناقشة .
ــ صحيح.. محد يشك بمراجعنا .. بس مال البصرة بصرتهم..يخسئوا.. خليهم يشربوا من البحر..
+ هو هم هيچي.. بلاكد شتسوي أمطشرين ملايين الدولارات من أجل السيطرة على المدينة!!!.
ـ وهم فعلا أمسيطرين؟؟.
+ وقتياً وحالياً... نعم.. الله وكيلك يحكمون البصرة.. ليش لاء؟؟ عدهم المئات من العناصر ألأمنية يعملون بتوجيهات من الملالي.. قبل أيام صرح قائد شرطة البصرة وبعظمة لسانه بأنه هنالك آلآف من أفراد الشرطة والضباط لايعملون بأمرته!!.
ــ بس هذا كلام خطير.. لعد بأمرة من ؟؟؟.
+ طبعاً.. والرجل وفي مؤتمر صحفي حضرها العديد من ألأعلاميين .... وألأهم هذه الشغلة الجديدة ... أقرأ :
قال مدير شرطة مدينة البصرة اللواء الركن جليل خلف الشويلي ان نساء المدينة يعشن في خوف بعد مقتل أكثر من 48 امرأة والقاء جثثهن في الشوارع في الاشهر الخمسة الماضية بسبب سلوكيات يعتبرها البعض غير اسلامية.كتب تحذير باللون الاحمر على جدار يحذر النساء من وضع مساحيق التجميل أو الظهور في مكان عام دون غطاء للرأس ويتوعدهن بعقاب شديد!!!.] .
ــ أخوية حقهن يعيشن برعب.. العدد هواية ... أيباخ شلون رقم مخيف ؟؟؟ على شنو؟؟؟ .... حمدان من المعلوم في البصرة أهلنا المسيحيون... هذولة شلون؟؟ يعني هم مشمولين بهذا التحذير..؟؟.
+ طبعاً.. الفرمان يسري على الجميع .... أقرأ :
[قالت ريتا انور (27 عاما) وهي مسيحية انها تفكر في ترك البصرة وربما العراق كله.
وأضافت "لا يمكن ان تصدق.. أنا في بعض الاحيان ارتدي الحجاب. امر مرعب ان ترى على الجدران تلك الكتابة باللون الاحمر وهي تهدد النساء السافرات بالقتل!!!.]
ــ عجيبة... طيب هساع المسلمات وعرفنا.. ولكن غيرهن ليش؟؟؟ .. يعني هذا بياحكم؟؟ أخوية الله وكيلك هذه أوامر / أيرانية تطبق بالبصرة.. من المعلوم أن ( الكلاب ) يعني أقصد جماعة طالبان ولوا من غير رجعة ولكن هذه بيه بصمة ملالي أيران ومن غير مناقشة.. في أيران كل ألأيرانيات مشمولات بفرض الحجاب .. مسلمات وغيرهن !!.
+ أكيد .. هذه ماتقبل مناقشة..
ــ زين والحكومة ؟؟؟.
+ ياحكومة تقصد؟؟ ياهي منهن ؟؟.
ــ حمدان.. الحكومة العراقية..
+ أعرف بس حدد!!!.
ــ ليش كم حكومة بالبصرة؟؟.
+ هواية .. حكومة المركز اللي يمثلها الرجل الشجاع / اللوار الركن جليل خلف الشويلي؟؟ لو حكومة حزب الفضيلة الي يمثلها السيد المحافظ / محمد مصبح الوائلي ؟؟؟.. لو حكومة المجلس ألأعلى اللي يمثلها / أعضاء في مجلس المحافظة؟؟.. لو حكومة السيد / مقتدى الصدر؟؟ لو حكومة / حزب الدعوة ؟؟؟.. لو حكومة عصابات وجواسيس ومرتزقة أيران ؟؟؟ لو ...
ــ حمدااااااااان ... الخاطر الله كافي.. أخوية تحچي جد؟؟؟.
+ لعد أنت وين نايم.. أضيفك علم أقوى حكومة متنفذة في البصرة / حكومة ملالي أيران ومرشدهم خامنئي!!!!.
ــ حمدان.. أروحلك فدوة.. أترك كلشي... أنطيني الحل؟؟؟.
+ الحل ؟؟... الحل ؟؟؟ ... شوف :
• أما يتركون المدينة للجهلة والعصابات وجواسيس أيران... وهذه مستحيلة ودبعدهم!!.
• أما يفرضون القانون ويدعمون / مدير الشرطة ويطردون كل الدخلاء من جواسيس ومرتزقة اللي موجودين داخل ألأجهزة ألأمنية !!.
• وأما يخلون الوضع هيج.. بس يستوردون نصف مليون برقع من النوع الثخين مثل اللي كانت تلبسها ألأفغانيات ( الچادر ) واللي أصبح شائع خلال فترة الملالي الجهلة / طالبان ... ومن المستحسن التعاقد وية شركة أفغانية لو باكستانية ووفق مواصفات.. يعني شوية قماش ثخين وداكن!!!...وبعدين تعاقد ويه / أيران لوضع مروحة صغيرة تحت البرقع ومن ألأفضل أن تكون المروحة مزودة بغازتبريد حتى يبرد أكثر!!.. أنت تعرف أجواء البصرة بالأخص بالصيف ..من هي اللي تگدر تطلع من البيت لمسألة ضرورية كالتبضع أو الذهاب الى الدكتور أو زيارة ألأهل ، ولابسة خمسين كيلو / جادر شتوي؟؟؟ .. وبذلك راح يكون عدنهن / برقع مبرد ومتطور خمس نجوم !!!.
ــ وحق كل ألأنبياء دا تصنف... أعرفك أبو البلاوي.. وضحلي ترة ما أفتهمت... على شنهو أستيراد براقع؟؟.. وشنهو مراوح مبردة وقماش ثخين وداكن؟؟ ... وألأهم في المسألة هذه يرادلهة موافقة البرلمان !!.
+ أولاً حتى يوزعوها مجاناً على نساء البصرة!!!... وبعدين البرلمان مالهم شغلة بالعراق.. هذا البرلمان للأمور والمصالح الشخصية والحزبية وبس!!!... ومسألة العقود والقماش والمراوح حتى يستفاد الجميع.. فلوس العراق هواية.. يعني ليش مايستفاد ألأخرون ؟؟؟ وين العيب؟؟؟.
ــ حمدان.. تحچي جديات؟؟.
+ لعد قابل بيبيات؟؟؟.. طبعا الحالة هيچ مادوم.. لو مدينة عراقية من صدك بحكومة وطنية وشرطة وأجهزة أمنية عراقية... لو خلي يسلموهة الى ملالي طهران ويفرضون أحكامهم مثل / قم وطهران وشيراز!!!.
ــ وجعت گلبي.. الله يوجع گلبك.. ردتك عون.. طلعت فرعون..!!.
+ يافرعون ؟؟ .. أنت مو تريد الصدگ؟؟.
ــ طبعا.. لعد شنو؟؟.
+ أخوية هذه الزبدة.. لعد ماتشوف اللواء الركن البطل / مدير الشرطة عراقي غيور .. لذلك يوميا متعرض الى محاولة أعتيال...!!؟؟.
ــ بس هذولة جهلة.. تدري ليش؟؟.
+ أعرف.. عبالهم بأستشهاد أي قائد عسكري تصفى ألأجواء... ولك بابة بالعراق آلآف من القادة الوطنيين.. يخلص أعماركم وأبطالنا مايخلصون!!.
ــ حمدان.. هذا الحچي... أروحلك فدوة.. ريحتني..
+ حطني على يمناك!!!.
ــ أخر شىء شدكَول ؟؟.
+ أگول .. البصرة بصرتنا... نگطع أرجل اللي يحاول دنسها.. وألأيام بيننا ..
+ أنشاءالله تعالى ...
