܀ ܦܘܼܫܘܼܢ ܕܡܝܼܟܹܐ ܀
ܐܵܢܵܐ ܡܝܼܬܼܵܐ ܝ̄ܘ̄ܢ ܘܥܲܝܢܝܼ ܦܬܝܼܚܹܐ ܓܵܘ ܗܵܢ ܥܲܠܡܵܐ ܕܒܝܼܫܘܼܝܵܬ̈ܐ
ܡܛܠ ܦܫܸܪܹܗ ܚܘܼܒܵܐ ܕܪܘܼܚܵܐ ܡܢ̄ ܠܒܵܐ ܘܪܥܲܫܬܵܐ ܕܒܲܪܐ̄ܢܵܫܘܼܬܼܵܐ
ܟܠܲܝܗ̈ܝ ܢܦܝܼܠܹܐ ܒܵܬ̄ܪ ܫܘܼܒܼܗܵܪܵܐ ܚܕܵܪܵܐ ܠܬܵܓܼܵܐ ܕܗܵܝ ܡܲܠܟܘܼܬܼܵܐ
ܒܵܥܝܼ ܕܝܵܬܒܼܝܼ ܐܲܩܠܵܐ ܠܐܲܩܠܵܐ ܠܟܘܼܪ̈ܣܵܘܵܬܼܵܐ ܕܥܲܡܛܵܢܘܼܬܼܵܐ܀
ܠܲܝܬܸܢ ܦܝܵܫܵܐ ܐ̄ܢܵܫܹܐ ܟܹܐܢܹܐ ܘܠܵܐ ܙܲܕܝܼܩܹܐ ܒܡܲܟܝܼܟܼܘܼܬܼܵܐ
ܟܠܲܝܗ̈ܝ ܦܸܫܠܗ̄ܘܼܢ ܡܵܪܝ̄ ܦܘܼܩܕܵܢܹܐ ܒܝܲܕ ܠܫܵܢܵܐ ܕܕܲܓܵܠܘܼܬܼܵܐ
ܪ̈ܚܝܼܩܹܐ ܡܢ̄ ܚܘܼܒܵܐ ܐܲܠܵܗܵܝܵܐ ܒܥܘܼܡܩܵܝܗ̈ܝ ܩܲܒܼܪܹ̈ܐ ܕܣܵܛܵܢܘܼܬܼܵܐ
ܓܵܘ ܟܠ ܟܢܘܼܫܝܵܐ ܒܓܸܚܟܵܐ ܕܦܵܬܼܵܐ ܘܠܒܵܝܗ̈ܝ ܡܸܠܝܵܐ ܡܢ̄ ܚܲܣܵܡܘܼܬܼܵܐ܀
ܚܫܝܼܒܹ̈ܐ ܠܓܵܐܢܲܝܗ̈ܝ ܓܲܘ ܟܠ ܟܦܲܫܬܵܐ ܐܵܢܝܼ ܝܼܠܲܝܗ̈ܝ ܗܵܢ̈ܝ̄ ܡܕܲܒܪ̈ܵܢܹܐ
ܫܡܵܛܵܐ ܠܚܘܼܒܵܐ ܕܐ̄ܢܵܫܹ̈ܐ ܦܫܝܼܛܹ̈ܐ ܘܒܪ̈ܢܝܵܝܗ̈ܝ ܣܦܝܼܩܵܐ ܡܲܣܚܪ̈ܵܢܹܐ
ܐܲܚܟ̰ܝܼ ܐܵܢܝܼ ܟܹܐ ܗܲܡܙܸܡܝܼ ܘܠܪܸ̈ܢܝܹܐ ܐ̄ܚܹܪ̈̄ܢܹܐ ܠܵܐ ܫܲܡܥܵܢܹ̈ܐ
ܒܝܼ ܕܘܼܪܵܫܵܐ ܢܒܼܝܼܥܵܐ ܡܢ̄ ܒܝܼܫܵܐ ܒܚܲܒܪܹ̈ܐ ܟܘ̇ܦܹ̈ܐ ܡܲܣܠܝܼܵܢܹ̈ܐ܀
ܠܵܐ ܚܲܫܒܼܝܼܬܘܼܢ ܕܝܼܬܘܼܢ ܡܝܵܩܪܹ̈ܐ ܝܵܐ ܒܢܲܝ̈ ܚܸܫܟܵܐ ܒܢܲܝ̈ ܐܵܟܸܕܢܹ̈ܐ
ܐܝܼܩܵܪ̈ܵܘܟܼܘܼܢ ܝܼܠܹܗ ܛܡܝܼܪܵܐ ܬܚܘܼܬ ܐܲܩܠܵܬܼܵܐ ܕܐܵܢ̈ܝ ܡܸܣܟܹܢܹ̈ܐ
ܡܢ̄ ܚܘܼܘܵܘܵܬܼܵܐ ܟܹܐ ܚܵܕܪ̈ܝܼܬܘܼܢ ܩܵܐ ܕܡܲܝܨܝܼܬܘܼܢ ܠܕܸܡܵܐ ܕܡܗܲܝܡܢܹ̈ܐ
ܘܣܲܡܵܐ ܐ̄ܟܘܼܡܵܐ ܟܹܐ ܡܪܵܦܝܼܬܘܼܢ ܒܟܼܠ ܢܲܦ̮ܫܵܬܼܵܐ ܝܵܐ ܩܵܛܠܵܢܹ̈ܐ܀
ܕܟܼܘܼܪ̈ܘܼܢ ܕܝܼܬܘܼܢ ܫܸܒܠܹ̈ܐ ܕܐܵܕܲܡ ܠܲܝܬܘܼܢ ܒܐܲܡܝܼܢ ܗܵܢ̈ܝ̄ ܡܩܵܘܝܵܢܹ̈ܐ
ܒܐܵܬܹܐ ܝܵܘܡܵܐ ܘܒܸܕ ܚܵܙܩܝܼܬܘܼܢ ܡܢ̄ ܕܵܐܗܵܐ ܬܹܒܹܝܠ ܟܪܝܼܬܼܵܐ ܒܙܲܒܼܢܹ̈ܐ
ܒܥܘܼܒܵܐ ܕܥܲܦܪܵܐ ܗܲܪ ܒܕܵܡܟܼܝܼܬܘܼܢ ܓܵܗܹܐ ܐ̄ܚܹܪ̄ܬܵܐ ܝܵܐ ܥܲܦܪ̈ܵܢܹܐ
ܡܐܲܝܟܼ ܗ̇ܘ ܗܲܘܓܵܐ ܕܦܲܪܦܸܣ ܘܛܵܠܸܩ ܡܐܲܝܟܼ ܚܵܦܘܼܬܼܵܐ ܒܲܝܢܵܬܼ ܥܢܵܢܹ̈ܐ܀
ܟܡܵܐ ܕܦܵܪ̈ܣܝܼܬܘܼܢ ܟܬܼܵܒܹ̈ܐ ܕܥܸܠܡܹ̈ܐ ܒܐܲܢܹ̈ܐ ܕܵܪܹ̈ܐ ܕܡܛܲܘܪܵܢܘܼܬܼܵܐ
ܕܠܵܐ ܝܘܼܬܼܪܵܢܵܐ ܣܵܪ̈ܛܝܼ ܘܛܵܠܩܝܼ ܩܲܕ̄ܡ ܝܘܼܠܦܵܢܵܐ ܕܡܫܝܼܚܵܝܘܼܬܼܵܐ
ܟܠܲܝܗ̈ܝ ܣܝܵܡܹ̈ܐ ܕܦܝܼܠܵܣܘ̇ܦܹ̈ܐ ܘܐܲܦ ܡܲܠܦܵܢܹ̈ܐ ܕܗ̇ܝ ܚܲܢܦܘܼܬܼܵܐ
ܝܼܠܲܝܗ̈ܝ ܣܲܟܼܠܹ̈ܐ ܩܲܕ̄ܡ ܝܘܼܠܦܵܢܵܐ ܐܲܠܵܗܵܝܵܐ ܒܗܲܝܡܵܢܘܼܬܼܵܐ܀
ܚܲܟ̰ܵܐ ܨܠܹܐܡܘܼܢ ܡܢ̄ ܚܵܨܵܐ ܕܣܘܼܣܵܐ ܗܲܒܼ̄ܠܗ̄ܘܼܢ ܦܸܪܣܵܬ ܩܵܐ ܡܘܼܪ̈ܕܢܹܐ
ܒܲܣܵܐ ܡܢ̄ ܐܵܢܵܐ ܘܐܵܢܵܝܘܼܬܼܵܐ ܠܲܝܬܘܼܢ ܚܫܝܼܚܹ̈ܐ ܡܐܲܝܟܼ ܪܹ̈ܝܫܵܢܹܐ
ܫܒܼܘܼܩܘܼܢ ܟܘܼܪܣܝܵܐ ܕܡܲܢܝܸܚ ܡܢܟܼܘܼܢ ܓܪ̈ܘܼܫܘܼܢ ܐܝܼܕܼܵܐ ܡܲܚܸܪ̈ܒܼܵܢܹܐ
ܒܸܕ ܢܵܦܠܝܼܬܘܼܢ ܒܥܘܼܡܩܵܐ ܕܗܲܘܬܼܵܐ ܘܡܼܢ ܪܹ̈ܝܫܵܘܟܼܘܼܢ ܒܐܲܟܼܠܝܼ ܟܦܝܼܢܹ̈ܐ܀
ܥܹܕܬܵܐ ܘܓܲܒܹ̈ܐ ܘܡܛܵܟܵܣܝܵܬܼܵܐ ܒܝܼ ܦܘܼܠܵܓܼܵܐ ܒܸܦܣܵܥܵܐ ܝ̄ܢܵܐ
ܣܢܝܼܕܹܐ ܡܢ̄ ܚܲܕ̄ܟܡܵܐ ܕܲܪ̈ܩܘܼܒܼܠܵܝܹ̈ܐ ܩܵܐ ܚܘܼܝܵܕܵܐ ܒܸܬܠܵܚܵܐ ܝ̄ܢܵܐ
ܒܡܲܡܠܹ̈ܐ ܦܪ̈ܝܼܫܹܐ ܡܢ̄ ܟܠܲܝܗ̈ܝ ܬܸܓܼܡܹ̈ܐ ܠܓܘܼܫܡܵܐ ܕܐܘܼܡܬܵܢ ܒܸܢܣܵܪܵܐ ܝ̄ܢܵܐ
ܕܡܵܛܝܼ ܠܢܝܼܫܵܝܗ̈ܝ ܦܲܪ̈ܨܘ̇ܦܵܝܵܐ ܩܲܨܪܹ̈ܐ ܪ̈ܵܡܹܐ ܒܸܒܢܵܝܵܐ ܝ̄ܢܵܐ܀
ܐܵܚ ܡܼܢ ܡܠܲܬ ܕܒܢܲܝ̈ ܐ̄ܣܘܼܪ̈ܝܵܝܹܐ ܒܟܼܠܲܝܗ̈ܝ ܫܡܵܗܹ̈ܐ ܕܝܼܢܵܐ ܫܬܝܼܩܹ̈ܐ
ܡܢ̄ ܐܝܼܕܼܵܐ ܘܐܲܩܠܵܐ ܩܡܝܼܛܹ̈ܐ ܘܝ̄ܣܝܼܪܹ̈ܐ ܡܢ̄ ܨܒܼܘܼܬܵܐ ܕܐܘܼܡܬܵܢ ܒܐܲܡܝܼܢ ܥܪ̈ܝܼܩܹܐ
ܕܠܵܐ ܪܸܥܝܵܢܵܐ ܣܸܡܝܹ̈ܐ ܥܘܝܼܪܹ̈ܐ ܒܝܲܡܵܐ ܕܢܟܼܝܼܠܹ̈ܐ ܒܬܗܘ̇ܡܵܐ ܚܢܝܼܩܹ̈ܐ
ܕܡܝܼܟܹ̈ܐ ܒܥܲܡܛܵܐ ܠܹܐ ܝ̄ܬܘܼܢ ܡܨܵܝܵܐ ܕܒܵܗܪܹ̈ܢܝܼܬܘܼܢ ܡܐܲܝܟܼ ܙܲܠܝܼܩܹ̈ܐ܀
ܦܘܼܫܘܼܢ ܕܡܝܼܟܹ̈ܐ ܬܚܘܼܬ ܗ̇ܘ ܢܝܼܪܵܐ ܒܚܲܩܠܵܐ ܕܟܸܬܘܹ̈ܐ ܕܐܵܢ̈ܝ̄ ܦܲܢܕܵܢܹ̈ܐ
ܒܫܸܢܬܼܵܐ ܛܸܠܝܹ̈ܐ ܬܚܘܼܬ ܫܵܟܝܼܢܹ̈ܐ ܫܸܡܫܵܐ ܙܲܪܩܵܐ ܘܝܵܘܡܵܐ ܓܵܢܹܐ
ܪ̈ܥܲܫܝܵܬܵܘܟܼܘܼܢ ܝܼܠܲܝܗ̈ܝ ܓܕܝܼܠܹ̈ܐ ܬܚܘܼܬ ܐܝܼܣܵܪܵܐ ܕܣܵܟܼ ܠܹܐ ܡܫܵܢܹܐ
ܕܠܵܐ ܫܘܼܘܫܵܛܵܐ ܗܲܪ ܠܲܒܵܬ̄ܪܵܐ ܒܸܕܥܵܪܵܐ ܝ̄ܬܘܼܢ ܡܐܲܝܟܼ ܫܸܟܘܵܢܹܐ܀
ܥܲܒܼـܕܝܼܫܘܼܥ ܣܵܗ̄ܕܵܐ ܝܘܼܚܲܢܲܢ