السلام عليكم شلونكم اخوتي واخواتي يارب كلكم بخير
اخوية اسامة هاي شنو كاعد تغورنا يمكم باردة ويمنا فاتحين مبردة
هههههههههه عافياااااااااااااااااااااااات اخوية
بلا زحمة طلب زغيرون بلكي تكتبلنا عن المدرسة الي انت بيها يعني اريد كلشي وكلاشي بالتفصيل الممل وشلونك بالكوز بالموفقية يارب
وعليكم السلام ..
لا والله مو شغلة اغور بس صدك جانت باردة اليوم الظهر بس بليل اتعدل الجو وصار حلو يعني برد يمكن 2 ساعه وراها صار يخبل صح هم بارد بس حلو. اني طلعت بالبايسكل رحت افتريت . مليت من الفره ورجعت قبل شوية .
اشكرك على الدعاء اخوية ...
حلو موضوع المدرسة هذا خوش فكرة تمام عاشت ايدك ...
راح احجي على المدرسة الي اني بيها والمدرسة الي زوجتي بيها لان احنا كل واحد صرنه بمدرسة .. اما بقية المدارس ما ادري بيها سجوز تطلع غير شكل احتمال ما اعرف يعني راح اخص الحجي على المدرسة الي اني بيها والثانية الي زوجتي بيها وبس وبس وبس ...
سابقا حجيت الكم على مسئولي الي طلع وللاسف الشديد مو خوش انسان او بالاحرى مهمل الى درجة بعدين نطرق الهذا الموضوع ..
بيوم خروجي من فندق الاستقبال (( الكوستي )) جان المفروض من مسئولي يملي كل الاوراق وينطيني عنوان مدرسة وياخذ اليه موعد وياهم او مو وياهم ويه الجهه الي راح تمتحني حتى اتنسبني على مكان معين اتوجه اله يعني .. اختبار يحددون بيه اني يا لفل استحق الاول لو الثاني لو الثالث لو الرابع لو لو لو . المهم هذا المسئول التعبان مال سوه هاي الشغلات ولا فهمني عليهن وكالي تعالي الاسبوع الجاي حتى اكمل شغلاتك ... اني من رحت للبيت الجديد ما كدرت اصبر ثاني يوم طلع ورحت ادور على المكان الي يمتحنون بيه ... ولكيته ... طبيت عليهم كلت الهم اني جاي جديد الكندا واريد اتعلم لغه كالو اهلا وسهلاً بيك انته ماخذ موعد كلت الهم لا كالو اول مره تجي كلت الهم اي .. كالو اوكي راح انسويلك موعد امتحان او اختبار هسه كلت الهم بس عندي زوجتي بالبيت كالو جيبها الباجر اليوم بس انته ... كلت الهم اوكي .... طبيت واختبرت وكملت ... كالولي اتروح على المدرسة الفلانية كلت الهم اوكي ... يسموها هنا المدرسة الهندية لان اكثر مدرسيها وعمالها هنود ...
المهم ثاني يوم اخذت زوجتي ورحت للامتحان وهم نفس الحالة امتحنت وكملنه وطلعنه ها قبل لا اطلع كلت الهم عندي بنتي جانت اتداوم بص الاول وهسه اريد اسجلها بالمدرسة كالو اي اتفضل استريح استراحيت اجتني وحده حبابه ودرة مال الله كالت اي شي تحتاج اني حاضره . سولفنه بموضوع بنتي دلتني منين اروح وشلون اسجلها بالمدرسة ومن هذا الحجي وبعدين انطتني كارت كالت اي شي تحتاجه تجي بهذا الكارت ... طبعا الكارت مثل المفتاح يعني اخليه بجهاز خاص واطب حتى توصل الهم معلوماتي .انه اني طبيت ... اذا احتاج ادز سكنر اروح يمهم اذا احتاج نت افتح اروح يمهم حتى اذا احتاج استنسخ اوراق اروح الهم كل الخدمات هاي ابلاش .. وفوكاها اي شي احتاج من معاملات هم يوكفون ويايه همه .
المهم طلعت واوراقي يمهم كملت ولحد اليوم ما وصلت الهم بعد ههههههههه ...
رحت اراجع على المدرسة الي دزونه عليها اني وزوجتي .
اسمها المدرسة الهندية .
قبلوني المدرسة بس زوجتي ما قبلوها لان لازم بنتي الي عمرها 4 سنوات اتروح وياها كالو ما عدنا فراغ الها لازم تنتظر اقل شي فد شهرين ...
زين اني شنو اتخبلت اخليهم فد شهرين يكعدون بالبيت ... طبعاً لا .... رحت على مدرسة ثانية هم قريبه علينه نفس المسافه تقريباً كلت الهم عندي زوجتي ووياها بنتي عمرها هلكد تقبلوها عدكم فراغ كالو اي بس يصير فراغ انخابرك وبالفعل وره يومين خابروني كالو خلي تجي اداوم .. والحمد لله داومت ........
هسه نجي نحجي على المدرسة مالتي ... والتناقضات بين المدرستين .
بس خلي اروح اشرب جكارة واجيكم
اي اجيت نكمل حجينه ...
وين وصلنه . ها المدرستي الي اني اداوم بيها ..
اول ايام داومت ودوام حلو المدرس مالتنه هندي طبعاً بس مضبوط ودرجة اولى باللهجة . لان هنا عدنه الهنود كارثة باللغه الانكليزية يعني من اتشوفوهم يحجون عبالك كاعد يحجون وياكم هندي مو انكليزي هههههههههههه .
بس مدرسنه لا الحمد لله زين لان ولادته كندا وميعرف يحجي هندي توب يعني يطكطك هندي .. بس مع ذالك اكو عنده لكنه هندية ...
وخوش انسان يعني يحاول يوصل الفكرة بقدر المستطاع وابن اوادم .. واذا جانت عندي شغلة عادي اكله يابه اني راح اروح لان عندي معاملات او عندي شغلة او عندي موعد او او او او يكلي روح يا العزيز ولا يهمك اخذ راحتك ويسألني الباجر تكدر تجي لو لا اكله اي طبعا اجي ... واذا شخص اتاخر على الدوام عادي يكله ها خو ماكو شي يكله لا اخذتني النومة ايكله نوم العوافي ههههههههههههه ..يعني متساهل وخلوق ووردة مال الله واهم شي انه هوه يفهم المقابيله بكل الطرق والوسائل وحتى يعرف كلمات عربية قليلة لكثرة العرب الي مرو عليه اثناء تدريسه وعمله ...هاي اول عشرة ايام تقريباً . بعدها كال اني راح اروح ادرس غير مرحلة لان محتاجيني انتو راح ادرسكم ولمدة شهر بس مدرسة ثانية وجديدة هنا عدنه . تسمحولي كلناله عادي ولا يهمك وطبعاً يوميه الصبح لحد هسه من يجي لازم يمر علينه يسلم علينه يله يروح الدرسة ... المهم ... اتجتي المدرسة الجديدة وبعد ان عرفتنه بنفسها واسمها طبعاً اسمها عربي ميه المية . عرفت اني انه هيه عربيه .. هناك سالتها منين انتي كالت من فلسطين ..وهاي اول مره انشوف مدرسة عربية بالمدرسة مالتنه حسب حجي القداما الي صار الهم سنتين او اكثر . المهم طلع حبابه ووردة مال الله بعد اكثر من ذاك القديم الهندي الحباب وهم اتدرس بشكل مبسط اكثر واكثر يعني اني حسيت نفسي خلال هاي الايام المعدودة استفاديت كوومة منهم الحمد لله والشكر . ومتساهلين وعدهم المواعيد عادي واحد يضربها
زوجتي من داومت بالمدرسة الثانية مدرستهم كنديا ماصله يعني اذا متصير الساعه ضبط يعني اذا همه البريك او الحلة مالتهم الساعه 2.15 دقيقة لو تنكلب الدنيا متخليهم يحلون الساعه 2.14.5 دقيقة اتكول وقت هذا ميصير نخربه . لازم نحترمه حتى هوه يحترمنه .
صح كلامها بس ؟؟؟؟!!!!!!!!! المهم .
التدريس بكل نواحيه وبكل المدارس حلو وزين ومرتب ويفهم وكلشي وكلاشي بس تبقه حسب الشخص الي ايريد يتعلم يجوز هوه دماغه ثكيل هاي تبقى عليه هوه ..
ها بالمناسبة ..
اني من اروح للمدرسة اكدر اتمشه الها ربع ساعه مشي بس اني لا ليش اتمشى اركب سيارة واخذ الهم التكت الي ركبت بيه ينطوني تكت بمكانه وتكت الرجعه ثاني يوم انطيهم اياه هم ينطوني بمكانه يعني يوميه اخذ منهم تكتين مال باص اركب بيه .. الصبح واحد صح اركب بيه . بس من احل من الدوام لا ما اركب باص ارجع مشي وعود العصر اركب باص اروح اخلص شغلاتي واكملهن . يعني فايديني بهذا الشي واكو ناس متركب باص لا الصبح ولا العصر شيسوون يروح يدورون تكتات الصبح او العصر وينطوها الهم حتى ينطوهم بمكانها . تكتات صالحة لحين استخدامها وان شاء الله بعد كم يوم اخذ سكنر وانزل الكم صور التكتات الي نستخدمها هنا وطريقه عملها .
بالمناسبة بنتي نور بعدهي ما مداومة لحد الان لان ورقة اللقاحات مالته ما جايبها ويايه . لان اني ما بقت عندي اي اوراق رسمية او صحية بالعراق القديم وللاسف الشديد لذالك اضطريت اعيد لقاحاتها من جديد هنا حتى يقبلوها بالمدرسة .. فالي جاي على كندا لازم لازم لازم يدبر اوراق اللقاحات مالته تره دوخة بيهن ولو مو كلش صعبة بس تعال اتاخر بتسجيل الاطفال بالمدرسة .
. بشكل عام حلوة المدرسة وحلو التدريس للي يريده اما الي يكول لا شنو ذولي كلاوجية يردون يربحون من عدنه فلوس فهذا اعتبرها ميريد يتعلم ويفيك ..
لان بالمناسبة ذولي المدارس ياخذون علينه فلوس من الحكومة على كل نفر هلكد (( يعني ما ادري شكد )) يعني بالنسبة الهم شغل او عمل اما بالنسبة للدولة فمصلحة ..
المهعم هاي الشغلات مو اختصاصي وما اعرف بيها زين ما اريد اظلم احد . بس على العموم حلوة دراستهم وسهلة ويحاولون يوصلون الفكرة باي صورة .
ها وهاي المدرسة الفلسطينية هسه الي كاعد ادرسنه دره مال الله وتحاول اتساعد بكل الطرق ..
وكاع اتساعدني بموضوع بنتي نور هسه اتريد اتسجلها بالمدرسة قبل لا تخلص التلقيحات يعني تعبت ويايه الله يحفظها .
كافي خلص موضوع المدرسة مالتي ... ههههه
وان شاء الله الموضوع الجاي والثاني على دكتور العائلة وشنو الضرورة بيه ومنو هوه وكلشي وكلاشي عنه وعن الخلفوه هههههههههههههه
وعن المستشفيات وشلعان القلب مالتهن الي راسه يوجعه . لا يروح الهم ويكلهم اريد حباية براسيتول هههه لان راح يوجعون راسه اكثر واكثر ...
وبعدين نحجي عن الهويات وعن البريد الي يجيك وشنو الهويات الي لازم تستلمهن او بالاحرى راح نحجي على الهويات الي راح تستلمهن وبعدين على طبيب العائلة يكون احسن حتى بالتسلسل ..
ابو نور / تورنتو