عراقيين وداخ العالم بيهم .. واكبر واحد يحيرونه
الريس بوش اجاكم ضيف .. ليش تهينونه
والضيف عند العرب الاصيلين .. دائما يكرمونه
نسيتوا من وكع الكم الصنم .. اللي جانوا يعبدونه
وخلصكم من الطاغية الهدام .. اللي جان يعدم الواحد على نظرة عيونه
وخلة الرواتب تكمز من ثلاث تالاف ... لميات الالوف كاموا يستلمونه
والحفاي وقطاع الطرق ترقوا .. وحتى للنفط كاموا ينهبونه
اشو هذا الصحفي المقدام ماشمر فد قندره بوجه احد من مرتزقة الهدام .. من جانوا للشعب يهينونة
ولا احد فتح حلكه بكلمة ... من جانوا ياخذون واحد ويعذبونه
حتى منكدر نكول خطية او مسكين ..لان الكل جان يخاف من الرفاق يلزمونه
واندار الزمن وهسة نشوف نفس الشوادي اللي جانت تكمز للهدام .. بس جلدهم غيروا لونه
عراقيين وداخ العالم بيهم .. واكبر واحد يحيرونه
على طول الزمن وهمه يكمزون وياحاكم يجي يكولون .. احنه فدوه لعيونه
جانوا يشيلون سيارة الملك من الكاع ..وفجاة تلكاهم بالطلقات هو والقران الشايله يزرفونه
والبارحة للباشا نوري سعيد يضربوله تحية .. وبعد كم يوم بالشارع يسحلونه
يهتفون لقاسم احنه نموت عليك .. وفجاة تلكاهم بالاذاعة يكتلونه
ولعبد السلام عارف ماعدنا غيرك يلوكنه .. وبعدها صعد لحم نزل فحم يصيحونه
والهدام غير البطل لو القائد الضرورة .. ماكو تسمية غيرها يسمونه
ولمن وكع صنمه بالساحة .. ب النعلان كاموا يضربونه
شقاق ونفاق .. صدك من بعض الائمه كانوا لاهل هاي الديار يلقبونه
عراقيين وداخ العالم بيهم .. واكبر واحد يحيرونه
اليمته يبقى العراق الجريح مهزلة كدام العالم .... ومايوصل لمستوى يحترمونه
مسكين هذا البلد ابتله بهيج ناس .. حتى الائمة احتاروا شلون يرضونه
يارب ارحم والطف بكل اصيل بهذا البلد .. احترم بلده وصانها وابتعد عن الهمج اللي ياذونه
عراقيين وداخ العالم بيهم .. واكبر واحد يحيرونه
