( ܫܝܕܢܐ ܝܘܢ ܒܚܢܝܢܘܬܐ )
ܗܐ ܪܒܝܬـܝ
ܡܢܐ ܒܥܒܕܢ ܠܡܐ ܕܒܪܐܠܐ ܠܐܝܟܢܘܬܝ
ܝܐ ܚܒܝܒܬـܝ ܝܣܝܪܬܗ̇ ܒܓܒܪܐ
ܨܘܪܬܐ ܕܫܢܘܓܘܬܟܝ
ܠܐ ܝܠܗ̇ ܦܪܫܐ ܡܢ ܪܥܝܢܝ ܘܬܚܡܢܝܬـܝ
ܠܐ ܝܠܗ̇ ܫܒܩܝ ܒܐܝܟܢܘܬܝ
ܒܟܠ ܨܦܪܐ ܘܛܗܪܐ ܘܪܡܫܐ
ܥܡܝ ܗܘܐܠܗ̇ ܒܟܠ ܥܕܢܬـܝ؛؛
ܠܐ ܡܢ̄ ܐܕܝܘܡ ܝܘܡܐ
ܘܠܐ ܡܢ ܪܦܦܐ ܕܚܙܝܬܟܝ
ܐܝܢܐ ܡܢ ܫܠܝܐ ܡܢ ܕܢܚܐ ܕܒܪܝܪܘܬܟܝ
ܒܚܘܒܟܝ ܘܚܢܝܢܘܬܟܝ
ܓܘ ܚܝܘܬܝ ܩܕܡ ܥܝܢܬـܝ؛؛
ܠܐ ܝܠܗ̇ ܦܪܫܐ ܡܢ ܦܐܝܘܬܐ
ܕܪܦܪܦܬܐ ܕܥܝܢܬܟܝ ܘܡܢܫܘܩܬܐ ܕܣܦܘܬܟܝ
ܘܓܫܡܢܬܐ ܠܕܩܐ ܕܨܨܢܟܝ
ܓܘ ܒܝܬܐ ܒܐܘܪܚܐ ܒܟܠ ܐܬܪܐ ܕܗܘܢ؛؛
ܐܦ ܓܘ ܥܪܣܝ ܡܬܝܚܐ ܦܓܪܝ
ܘܪܫܝ ܓܢܝܐ ܥܠ ܣܦܕܝܬـܝ
ܚܙܢ ܨܘܪܬܟܝ ܚܦܝܩܬܐ ܠܫܠܕܝ
ܘܨܒܥܬܟܝ ܡܛܐܘܠ̈ܐ ܒܡܫܛܚܐ ܕܦܬـܝ
ܒܓܘܓܐ ܒܚܕܪܐ ܠܐܟܐ ܘܬܡܐ
ܒܪܫ ܥܪܣܐ ܕܠܠܝܐ ܕܚܕܘܬܟܝ ܘܚܕܘܬܝ؛؛
ܫܘܝܬܐ ܕܥܡܛܢܘܬܐ ܘܫܢܘܓܘܬܐ
ܡܐܝܟ ܕܝܗܘܬ ܩܛܥܐ ܡܢ ܦܓܪܝ
ܘܢܫܡܬܟܝ ܡܙܝܓ̈ܐ ܒܐܐܪ ܕܢܫܡܬـܝ
ܡܪܘܘܝܝ ܘܡܪܘܘܝܐ ܓܢܢ̈ܐ ܕܚܝܘܬܝ؛؛
ܝܐ ܘܪܕܝ ܣܡܘܩܐ
ܐܢܐ ܝܣܝܪܐ ܝܘܢ ܘܐܢܬـܝ ܝܣܝܪܬܐ
ܐܝܢܐ ܫܝܕܢܐ ܝܘܢ ܒܫܢܘܓܘܬܟܝ
ܒܚܘܒܟܝ ܘܚܢܝܢܘܬܟܝ
ܐܢܐ ܝܘܢ ܡܚܘܪܐ ܕܫܝܕܢܘܬܐ
ܟܠ ܡܢܕܝ ܕܚܫܒܬܠܝ ܒܬܚܡܢܬܐ ܘܚܫܒܬܐ؛؛
ܡܢܐ ܐܡܪܢ ܘܡܢܐ ܐܡܪܬܝ
ܠܐ ܝܠܗ̇ ܒܐܝܕܝ ܫܝܕܢܘܬܐ
ܒܪܡܘܝܐ ܝܘܬ ܡܐ ܒܕ ܐܡܪܢ
ܗܐ ܫܡܫܬܐ ܕܠܗܝܩܘܬܝ ܘܚܫܝ
ܒܩܛܠܝ ܗܘܬܝ ܒܫܢܘܓܘܬܟܝ
ܗܐ ܐܬܬܐ ܕܟܠܝܗـܝ ܚܫܝ
ܡܬܠܝ ܘܚܝܐܠܝ ܒܢܦ̮ܫܝ ܩܬܟܝ
ܡܚܘܪܐ ܫܝܕܢܐ ܒܚܢܝܢܘܬܟܝ،،
ܥܒܕܝܫܘܥ ܣܗܕܐ ܝܘܚܢܢ
29 – 4 – 2011
ܥܪܘܒܬܐ