܀ ܒܸܫ ܡܢ̄ ܟܠܲܝܗ̈ܝ ܒܸܪ̈ܝܵܬܼܵـܐ ܀
ܡܼܢ ܪ̈ܘܼܡܝܵܬܼܵـܐ ܕܐܲܬܼܪܝܼ ܩܝܼܢ̈ܐ
ܡܢ ܪ̈ܵܓܼܘ̇ܠܹܐ ܕܫܩܝܼܦ̈ܐ ܘܡܥܲܪܹ̈ܐ
ܒܪܹܫ ܝܵܡܵܬܼܵـܐ ܘܪܹܫ ܛܘܼܪ̈ܵܢܹܐ
ܫܪܹܐܠܵܟܼܝ ܒܚܘܼܒܵܐ ܡܢ̄ ܒܹܝܬܼ ܢܝܼܣܵܢܹ̈ܐ܀
ܒܥܘܼܡܩܝܼ ܙܪܝܼܥܠܵܟܼܝ ܚܲܢܝܼܢܘܼܬܼܵܐ
ܠܚܲܝܝܼ ܩܪܝܼܡܠܵܟܼܝ ܒܢܹܒܼܗܵܝܘܼܬܼܵܐ
ܨܲܕܪܝܼ ܝ̄ܒܼܝܼܫܵܐ ܘܓܵܐܢܝܼ ܨܗܝܼܬܼܵܗ̇
ܠܫܸܩܝܵܐ ܡܢ̄ ܝܲܡܬܼܵܟܼܝ ܒܫܵܢܘ̇ܓܼܘܼܬܼܵܐ܀
ܘܲܪ̈ܕܝܼ ܦܩܸܚܠܗ̄ܘ̇ܢ ܒܗܲܢܝܼܐܘܼܬܼܵܐ
ܐܲܦ ܫܘܼܫܲܢܹ̈ܐ ܘܡܲܪ̈ܓܵܢܝܵܬܼܵـܐ
ܠܒܼܝܼܫܬܵـܐ ܚܲܕ̄ܬܵܐ ܒܗ̇ـܝ ܩܝܼܢܘܼܬܼܵܐ
ܠܒܼܝܼܫܠܵܗ̇ ܪܥܵܫܬـܝܼ ܝܵܪܘܼܩܘܼܬܼܵܐ܀
ܗܲܕܟܼܵܐ ܐܝܼܗ̄ܘܵܐ ܐܵܢ̈ܝ ܝܵܘܡܵܢܹ̈ܐ
ܒܹܝܠܝܼ ܘܒܹܝܠܵܟܼܝ ܡܢ̄ ܕܵܪܹ̈ܐ ܘܙܲܒܼܢܹ̈ܐ
ܣܵܗܕܝܼ ܠܚܘܼܒܵܢ ܡܹܐܣܲـܪ̈ܝܵܬܼܵـܐ
ܒܓܲܘܢܹ̈ܐ ܣܡܘ̇ܩܹ̈ܐ ܡܲܥܛܹܪ̈ܵܢܹܐ
ܡܐܲܝܟܼ ܙܲܗܪܝܼܪܵܐ ܒܕܸܢܚܵܐ ܕܪܵܘܡܵܐ
ܐܵܢ̈ܝ̄ ܬܦܲـܩܝܵܬܲܢ ܐܵܢ̈ܝ̄ ܕܘܼܟܼܪ̈ܵܢܹܐ܀
ܚܘܼܒܵܢ ܐܝܼܗܘܵܐ ܪܸܡܙܵܐ ܕܫܠܵܡܵܐ
ܡܐܲܝܟܼ ܢܵܩܘ̇ܫܵܐ ܘܥܸܛܪܵܐ ܕܒܸܤܡܵܐ
ܓܵܘ ܥܹܕܬܵܬܼܵܐ ܒܟܼܠ ܥܘܼܡܪ̈ܵܢܹܐ
ܘܡܲܫܒܼܵܐ ܚܲܝܵܐ ܡܼܢ ܟܲܪ̈ܡܵܢܹܐ
ܟܹܐ ܚܲܕܪ̈ܵܚ ܗ̄ܘܵܘ ܒܟܼܠ ܕܘܼܟܵܢܹ̈ܐ
ܥܲܡ ܝܲܪܩܘܼܬܼܵܐ ܕܓܵܘ ܒܲـܩـܟ̰ܵـܢ̈ܐ܀
ܘܕܲܝܪܹ̈ܐ ܢܨܝܼܒܹ̈ܐ ܒܪܹܫ ܛܘܼܪ̈ܵܢܹܐ
ܘܨܠܝܼܒܼܵܐ ܚܲܝܵܐ ܥܲܡ ܪ̈ܲܒܵܢܹܐ
ܪ̈ܫܝܼܡܹܐ ܒܫܸܡܵܐ ܕܐܵܢ̈ܝ̄ ܩܲܕܝܼܫܹ̈ܐ
ܒܢܘܼܗܪܵܐ ܕܫܡܲܝܵܐ ܢܨܝܼܒܼܵܐ ܠܩܲܢܬܼܵـܐ
ܒܗ̇ܘ ܙܘܼܝܵܚܵܐ ܒܪܹܫ ܥܘܼܡܪ̈ܵܢܹܐ
ܒܫܵܗܪܵܐ ܨܡܝܼܚܵܐ ܡܼܢ ܢܝܼܣܵܢܹ̈ܐ
ܣܲܚܒܸܪ̈ܵܚ ܗ̄ܘܵܘ ܠܐܵܢ̈ܝ̄ ܪ̈ܘܼܚܵܢܹܐ܀
ܣܵܒܹ̈ܐ ܘܥܠܲܝܡܹ̈ܐ ܥܲܡ ܚܵܡܵܬܼܵـܐ
ܒܟܼܠܲܝܗ̈ܝ ܓܲܘܢܹ̈ܐ ܦܪ̈ܝܼܣܹܐ ܒܓܢܵܢܹ̈ܐ
ܡܢ̄ ܐܘܼܦܩܵܐ ܕܪܘܼܡܬܵـܐ ܒܙܘ̇ܡܵܘܵܬܼܵܐ
ܕܒܼܝܼܩܹ̈ܐ ܚܹܓܵܐ ܥܲܡ ܙܲܘܙܵܢܹ̈ܐ܀
ܘܐܵܢܵܐ ܘܐܲܢ̄ܬـܝܼ ܒܸܫ ܡܢ̄ ܒܸܪ̈ܝܵܬܼܵـܐ
ܐܝܼܬܠܲܢ ܚܲܝܹ̈ܐ ܒܗܲܝܡܵܢܘܼܬܼܵܐ
ܚܘܼܒܵܢ ܢܒܼܝܼܥܵܐ ܡܼܢ ܬܸܕܡܘܼܪܬܵܐ
ܕܝܼܫܘ̇ܥ ܡܫܝܼܚܵܐ ܡܵܪܝ̄ ܬܫܒܘܼܚܬܵـܐ܀
ܥܲܒܼܕܝܼܫܘ̇ܥ ܣܲܗ̄ܕܐ ܐܲܠܒܝܼܠܵܬܝـܼ