ܡܐܙܠܬܐ ܦܘܠܝܛܝܩܝܬܐ ܒܕܥܬܝܕ (10)

[بولص دنخـا]

ܡܐܙܠܬܐ ܦܘܠܝܛܝܩܝܬܐ ܒܕܥܬܝܕ (10)

ܥܡܡ̈ܐ ܡܪܝ ܡܕܝܢܝܘܬܐ ܠܐ ܥܒ݂ܪܘܗܘܢ ܓܘ ܡܬܛܘܪܢܘܬܐ ܘܠܐ ܪܚܫܠܗܘܢ ܠܩܕ݇ܡܐ ܐܢ ܠܐ ܒܬܪ ܕܦܘܪܡܐ ܠܗܘܢ ܫܪܪܐ ܕܪܘܟܒ݂ܐ ܕܟܢܘܫܝܝܗܝ ܘܢܛܪܬܐ ܕܙܕܩ̈ܐ ܕܒܪܢܫܐ، ܡܬܣܟܠܢܘܬܝܗܝ ܕܗܕܡ̈ܐ ܝܢ ܦܪ̈ܨܘܦܐ ܕܐܗܐ ܟܢܘܫܝܐ ܐܝܬ ܠܗܘܢ ܙܕܩ̈ܐ ܫܘܝ̈ܐ ܓܘ ܣܘܥܪܢܐ ܕܦܪܫܬܐ ܕܩܝܘܡܝܗܝ ܐܢ ܕܝܠܝܗܝ ܓܘ ܫܘܬܐܣ̈ܐ ܕܐܬܪܐ ܘܫܘܠܛܢܐ ܝܢ ܓܘ ܛܘܟܣ̈ܐ ܦܘܠܝܛܝܩܝ̈ܐ  ܘܟܢܘܫܝܝ̈ܐ ܕܟܢܘܫܝܝܗܝ.
ܐܢ ܒܥܚ ܠܐ ܬܢܝ ܥܠ ܥܡܢ ܦܘܕ̈ܐ ܘܓܕܫ̈ܐ ܓܘܢܚܝ̈ܐ، ܐܠܨܝܬܐ ܝܠܗ̇ ܕܒܢܚ ܫܘܠܢ ܘܣܘܥܪܢܢ ܦܘܠܝܛܝܩܝܐ ܥܠ ܐܣ̈ܐ ܕܝܡܘܩܪ̈ܛܝܐ ܐܬܪ̈ܝܐ، ܝܗܒ݂ܝ ܐܠܨܝܘܬܐ ܒܕܪܓܼܐ ܩܕܡܝܐ ܗܢܝܢ̈ܐ ܕܥܡܢ ܐܬܘܪܝܐ ܘܚܕܝܘܬܗ ܒܟܠܝܗܝ ܓܒܢ̈ܗ ܘܫܡܗ̈ܗ ܐܢ ܕܝܠܝܗܝ ܥܕܬܢܝ̈ܐ ܝܢ ܬܫܥܝܬܢܝ̈ܐ ܒܙܒ݂ܢܐ ܕܩܐܡ ܡܛܠ ܚܡܝܬܐ ܕܥܡܢ ܥܠ ܐܪܥܗ ܓܘ ܫܝܢܐ ܘܫܠܡܐ. ܐܠܨܝܬܐ ܝܠܗ̇ ܟܡܐ ܕܡܬܡܨܝܢܬܐ ܝܠܗ̇ ܕܚܡܚ ܠܐܣܘܪܐ ܕܫܝܢܐ ܘܫܠܡܐ ܕܟܢܫܢ ܥܡ ܥܡܡ̈ܐ ܕܒܚܝܐ ܝܠܗ ܥܡܗ ܥܠ ܐܣ̈ܐ ܗܢܝܢܝ̈ܐ ܡܫܘܬܦ̈ܐ.
ܐܢ ܒܫܪܪܐ ܒܥܚ ܗܘܝܐ ܡܐܙܠܬܢ ܦܘܠܘܛܝܩܝܬܐ ܬܪܝܨܬܐ ܘܟܐܢܬܐ ܓܘ ܦܠܚܢܐ ܦܘܠܝܛܝܩܝܐ ܘܬܫܡܫܐ ܠܥܡܢ ܘܡܪܡܐ ܡ̣ܢ ܫܘܝܐ ܕܝܕܥܬܗ ܒܙܕܩ̈ܗ ܘܘܠܝܬ̈ܗ، ܥܠܢ ܝܠܗ̇ ܕܛܟܣܚ ܥܡܢ ܥܠ ܐܣ̈ܐ ܘܩܢܘܢ̈ܐ ܕܐܫܛܪ̈ܐ ܕܐܡܘܬ̈ܐ ܡܚܝܕ̈ܐ ܐܝܢܝ ܕܒܝܗܒ݂ܐ ܝܠܝܗܝ ܕܘܪܐ ܪܫܝܐ ܩܐ ܙܕܩܐ ܕܦܪܨܘܦܐ ܘܫܘܦܬܗ ܘܗܢܝܢ̈ܗ ܦܪ̈ܨܘܦܝܐ ܟܝܢܝ̈ܐ ܡܛܠ ܒܢܝܬܐ ܘܛܘܪܐ ܕܟܢܘܫܝܗ ܪܚܩܐ ܡ̣ܢ ܡܥܒܕܢܘܬ̈ܐ ܕܡܦܟ̰ܠܬܗ ܘܡܦܠܡܬܗ ܡ̣ܢ ܬܚܡܢܬܗ ܘܪܢܝܗ ܚܐܪܐ ܒܬܢܘܐ  ܕܠܐ ܗܘܝ ܡܥܒܕܢ̈ܐ ܥܠ ܫܝܢܐ ܘܫܠܡܐ ܕܐܬܪܐ.
ܟܠܝܗܝ ܛܘܟܣ̈ܐ ܦܘܠܝܛܝܩܝ̈ܐ ܘ ܘܫܘܬܐܣ̈ܐ ܐܘܡܬܢܝ̈ܐ ܟܢܘܫܝܝ̈ܐ ܐ݇ܬܐܠܗܘܢ ܡܛܠ ܬܫܡܫܬܐ ܕܟܢܘܫܝܢ ܐܦܢ ܕܦܪ̈ܝܫܐ ܝܠܝܗܝ ܓܘ ܪܢܝܝܗܝ ܐܝܕܝܘܠܘܓ̰ܝܐ ܒܬܫܪܪܬܐ ܕܣܘܟܝ̈ܐ ܕܥܡܐ ܐܬܘܪܝܐ. ܡܬܛܘܪܢܘܬܐ ܘܪܚܫܬܐ ܠܩܕ݇ܡܐ ܕܥܡܢ ܝܢ ܟܢܘܫܝܢ ܓܘ ܫܪܪܬܐ ܠܐܢ̈ܐ ܣܘܟܝ̈ܐ ܝܢ ܢܝܫ̈ܐ ܟܠܝܬܐ ܝܠܗ̇ ܥܠ ܓܫܩܬܗ ܘܦܪܡܝܬܗ ܠܦܠܚܢܐ ܕܐܢ̈ܐ ܛܘܟܣ̈ܐ ܦܘܠܝܛܝܩܝ̈ܐ ܘܫܘܬܐܣ̈ܐ ܐܘܡܬܢܝ̈ܐ ܘܥܡܝ̈ܐ، ܐܢ ܒܫܪܪܐ ܐܢܝ ܒܦܠܚܐ ܝܠܝܗܝ ܠܒܘܬ݂ ܚܘܪ̈ܙܐ ܕܡܘܬܒ݂̈ܐ ܝܠܝܗܝ ܩܐ ܓܢܝܗܝ ܠܦܠܚܐ ܒܝܢܬ݂ ܟܢܫܐ ܕܥܡܢ ܠܡܛܝܬܐ ܠܢܝܫ̈ܐ ܘܣܘܟܝ̈ܐ ܕܟܢܘܫܝܢ.
 ܟܢܫܐ ܝܠܗ ܗ̇ܘ ܥܡܠܐ ܝܢ ܣܘܥܪܢܐ ܩܕܡܝܐ ܘܚܪܝܐ ܕܟܐ ܦܣܩ ܡ̣ܢ ܓܫܩܬܐ ܘܡܐܣܬܐ ܕܝܘܬܪܢܐ ܐܘܡܬܢܝܐ ܟܡܐ ܐܢ̈ܐ ܛܘܟܣ̈ܐ ܒܫܪܪܐ ܒܦܠܚܐ ܝܠܗܝ ܡܛܠ ܫܪܪܬܐ ܒܫܪܝܪܘܬܐ ܠܣܘܟܝ̈ܐ ܘܢܝܫ̈ܐ ܕܥܡܢ ܐܬ݂ܘܪܝܐ ܒܐܪܥܗ ܫܪܫܝܬܐ. ܥܡܐ ܝܠܗ ܗ̇ܘ ܕܘܩܐ ܘܐܘܪܓܢܐ  ܕܡܨܐ ܒܟܠ ܩܪܝܚܘܬܐ ܠܡܓܠܘܝܐ ܘܡܚܙܘܝܐ ܐܢ ܐܢ̈ܐ ܛܘܟܣ̈ܐ ܦܘܠܝܛܝܩܝ̈ܐ ܫܪܝܪܐ ܝܠܝܗܝ ܩܐ ܢܝܫ̈ܐ ܕܥܡܢ ܐܬܘܪܝܐ ܘܢܛܪܬܐ ܕܐܝܬܘܬܗ ܒܐܪܥܗ ܫܪܫܝܬܐ. ܐܢ ܐܢ̈ܐ ܛܘܟܣ̈ܐ ܪܚܩܐ ܝܠܝܗ ܡ̣ܢ ܐܢ̈ܐ ܦܠܛ̈ܐ ܦܘܠܝܛܝܩܝ̈ܐ، ܐܗܐ ܣܘܟܠܗ ܝܠܗ ܕܐܢܝ ܠܐ ܝܠܝܗܝ ܒܦܠܚܐ ܩܐ ܢܝܫܐ ܕܐܬܝܐ ܝܠܗܝ ܡܛܠ ܕܝܗ، ܣܘܟܠܗ ܝܠܗ ܦܩܘܕ̈ܐ ܕܐܢ̈ܐ ܓܒ̈ܐ ܦܝܫ̈ܐ ܝܠܝܗܝ ܙܒ݂ܝܢ̈ܐ ܒܝܕ ܓܒܢ̈ܐ ܕܝܠܝܗܝ ܕܪܩܘܒ݂ܠ ܐܝܬܘܬܐ ܕܐܘܡܬܢ ܝܢ ܝܠܝܗܝ ܒܦܠܚܐ ܩܐ ܝܘܬܪܢܐ ܦܪܨܘܦܝܐ ܘܠܝܬ ܠܗܘܢ ܗܝܡܢܘܬܐ ܒܢܝܫܐ ܘܣܘܟܝ̈ܐ ܕܥܡܐ ܐܬ݂ܘܪܝܐ ܘܠܐ ܒܙܕܩ̈ܗ ܢܡܘܣܝ̈ܐ ܘܒܫܘܠܡܐ ܣܘܟܠܗ ܝܠܗ ܕܐܢܝ ܒܦܠܚܐ ܝܠܝܗܝ ܡܛܠ ܡܫܦܠܬܐ ܘܡܚܝܬܐ ܕܟܠ ܒܥܘܬܐ ܘܣܘܟܝܐ ܥܡܝܐ.
ܩܪܝܢܐ ܡܘܚܒܐ ܐܗܐ ܝܠܗ̇ ܥܠܬܐ ܕܗܠ ܐܕܝܐ ܒܚܙܝܐ ܝܘܚ ܕܥܘܡܪܐ ܕܟܠܝܗܝ ܓܒ̈ܢ ܕܫܘܬܐܣ̈ܐ ܝܠܝܗܝ ܠܐ ܝܠܗ ܗܘܝܐ ܝܪܝܟ݂ܐ ܘܟܢܫܐ ܐܬ݂ܘܪܝܐ ܒܓܪܫܐ ܝܠܗ ܓܢܗ ܡܢܝܗܝ ܡܛܠ ܕܥܡܢ ܒܝܕܥܐ ܝܠܗ ܘܦܪܡܘܝܐ ܕܥܒ݂ܕ̈ܝܗܝ ܠܐ ܝܠܗ ܓܘ ܗܢܝܢܐ ܘܝܘܬܪܢܐ ܕܟܢܫܐ ܐܬ݂ܘܪܝܐ ܡܛܠ ܫܪܪܬܐ ܕܣܘܟܝ̈ܐ ܘܢܝܫ̈ܐ ܕܥܡܢ ܐܝܢܝ ܕܚܘܦܛܐ ܝܠܗ ܘܦܠܝܚܐ ܝܠܗ ܓܘ ܟܠܗ̇ ܬܫܥܝܬܗ ܝܪܝܟ݂ܬܐ ܡܛܠ ܚܕܝܘܬܗ ܘܙܕܩ̈ܗ ܐܘܡܬܢܝ̈ܐ ܘܦܘܠܝܛܝܩܝ̈ܐ ܐܝܢܝ ܕܗܦܟ݂ܐ ܝܠܝܗܝ ܒܙܒ݂ܢܐ ܕܩܐܡ ܓܘ ܢܝܫܐ ܕܫܪܪܬܐ ܕܫܘܠܛܢܐ ܝܬܝܐ ܥܠ ܐܪ̈ܥܬܗ ܬܫܥܝܬܢܝ̈ܐ ܘܡܕܥܪܬܐ ܕܐܪ̈ܥܬܗ ܫܩܝܠ̈ܐ ܒܚܝܠܐ.
ܬܥܒܕܬܐ ܦܘܠܝܛܝܩܝܬܐ ܓܘ ܥܝܪܩ ܐܬܝܬܐ ܝܠܗ̇ ܡܛܠ ܝܗܒ݂ܠܬܐ ܕܦܘܪܣܐ ܩܐ ܓܪܘܣܬܐ ܕܚܝܠ̈ܐ ܦܘܠܝܛܝܩܝ̈ܐ ܘܫܪܪܬܐ ܕܙܕܩ̈ܐ ܐ݇ܢܫܝ̈ܐ ܐܝܟܼ ܕܕܟ݂ܝܪ̈ܐ ܝܠܝܗܝ ܓܘ ܐܫܛܪ̈ܐ ܕܐܡܘܬ̈ܐ ܡܚܝܕ̈ܐ ܘܝܗܒ݂ܠܬܐ ܕܙܕܩ̈ܐ ܕܟܠ ܦܪܨܘܦܐ ܩܐ ܕܗܘܐ ܡܥܒܕܢܐ ܠܦܘܣܩܢ̈ܐ ܕܫܘܠܫܛܢܐ ܦܘܠܝܛܝܩܝܐ ܒܐܘܪܚܐ ܕܓܘܒܝ̈ܐ ܚܐܪ̈ܐ ܘܛܘܟܣܗ ܥܠ ܐܣ̈ܐ ܘܩܢܘܢ̈ܐ ܕܡܝܩܪܝ ܘܢܛܪܝ ܙܕܩܐ ܕܟܠ ܦܪܨܘܦܐ ܝܢ ܟܢܘܫܝܐ ܟܡܐ ܕܝܠܗ ܙܥܘܪܐ ܝܢ ܓܘܪܐ ܒܡܟ̰ܝܢܬܐ ܘܡܪܡܬܐ ܕܡܪܕܘܬܗ ܘܡܕܝܢܝܘܬܗ ܘܫܒ݂ܝܠ̈ܐ ܦܪ̈ܢܣܝ̈ܐ ܓܘ ܦܢܝܬ̈ܗ.
ܬܥܒܕܬܐ  ܦܘܠܝܛܝܩܝܬܐ ܚܕܬܬܐ ܓܘ ܥܝܪܩ ܗ̇ܝ ܝܠܗ̇ ܕܝܘܗܒ݂ܠܗ̇ ܦܘܪܣܐ ܩܐ ܓܒ̈ܢ ܦܘܠܝܛܝܩܝ̈ܐ ܘܛܘܟܣ̈ܐ ܐܘܡܬܢܝ̈ܐ ܐܚܪ̈ܢܐ ܠܛܟܣܬܐ ܕܓܢܝܗܝ ܡܛܠ ܫܪܪܬܐ ܕܣܘܟܝ̈ܐ ܘܢܝܫ̈ܐ ܕܥܡܢ. ܘܡ̣ܢ ܐܟ݂ܐ ܒܚܙܝܐ ܝܘܚ ܙܝܕܬܐ ܕܙܘܥ̈ܐ ܦܘܠܝܛܝܩܝ̈ܐ ܓܘ ܟܢܘܫܝܐ ܐܬ݂ܘܪܝܐ ܕܒܫܩܠܐ ܝܠܝܗܝ ܛܘܪ̈ܐ ܡܫܚܠܦ̈ܐ ܠܐ ܣܘܙܓܪ̈ܐ  ܥܠܝܗܝ ܓܘ ܐܗܐ ܡܫܩܠܐ ܐܢ ܥܠ ܫܘܝܐ ܕܢܝܫ̈ܐ ܝܢ ܕܣܘܟܝ̈ܐ ܥܡܝ̈ܐ.
ܡܬܗܘܝܢܬܐ ܝܠܗ̇ ܕܙܘܥܐ ܦܘܠܝܛܝܩܝܐ ܕܗܘܐ ܚܘܫܚܐ ܡܣܝܡܢܐ ܘܥܒ݂ܘܕܐ ܐܢ ܐܚܢܢ ܫܩܠܚ ܗܪ̈ܓܐ ܘܢܣܝܢܐ ܡ̣ܢ ܕܥܒ݂ܪ ܘܡ̣ܢ ܙܘܥܐ ܦܘܠܝܛܝܩܝܐ ܟܘܪܕܣܬܢܝܐ ܘܥܝܪܩܝܐ.
ܐܢ ܒܫܪܪܐ ܗܘܝ ܓܒ̈ܢ ܦܘܠܝܛܝܩܝ̈ܐ ܫܪܝܪ̈ܐ ܓܘ ܦܠܚܢܐ ܦܘܠܝܛܝܩܝܐ، ܟܠ ܓܒܐ ܟܡܐ ܕܝܠܗ ܙܥܘܪܐ ܝܢ ܓܘܪܐ ܒܕ ܗܘܐ ܠܗ ܕܘܪܐ (ܓܪܐ) ܡܣܝܡܢܐ ܓܘ ܫܪܪܬܐ ܕܣܒ݂ܪ̈ܐ ܕܥܡܢ ܘܙܕܩܗ ܢܡܘܣܝܐ ܕܚܝܐ ܚܐܪܐ ܘܒܫܝܢܐ ܘܫܠܡܐ ܥܠ ܐܪܥܗ. ܘܬܥܒܕܬܐ ܦܘܠܝܛܝܩܝܬܐ ܚܕܬܬܐ ܓܘ ܥܝܪܩ ܒܕ ܝܗܒ݂ܐ ܠܢ ܦܘܪܣܐ ܓܡܝܪܬܐ ܠܒܢܝܬܐ ܕܛܘܟܣ̈ܐ ܘܛܠܒܬܐ ܒܙܕܩܢ ܕܚܝܚ ܥܠ ܐܪܥܢ.
ܡܘܕܝ ܝܠܗ̇ ܗ̇ܝ ܣܬܪܬܝܓ̰ܝܐ ܕܘܵܠܹܐ ܐܙܠܚ ܒܝܗ ܡܛܠ ܟܘܬܫܐ ܦܘܠܝܛܝܩܝܐ ܡܣܝܡܢܐ ܕܡܨܐ ܬܫܡܫ ܣܘܟܝ̈ܐ ܘܢܝܫ̈ܐ ܕܥܡܢ ܘܚܠܨܠܢ ܘܐܣܪܢ ܒܫ ܝܬܝܪ ܠܚܒ݂ܪ̈ܘܬܢ ܡ̣ܢ ܐܡܘܬ̈ܐ ܐܚܪ̈ܢܐ ܕܥܝܪܩ ܦ̮ܝܕܪܠܝܬܐ ܚܕܬܬܐ؟ ܒܫܪܪܐ ܠܝܬ ܣܬܪܬܝܓ̰ܝܐ ܚܕܬܬܐ ܐܝܢܐ ܟܠ ܡܐ ܕܛܠܝܒܐ ܝܠܗ ܡܢܢ ܕܦܪܡܚ ܠܒܢܝܢܐ ܦܘܠܝܛܝܩܝܐ ܚܕܬܐ ܕܥܝܪܩ ܐܝܢܝ ܕܥܒ݂ܪܗ̇ ܓܘ ܡܛܟܣܢܘܬܐ ܕܐܡܘܬ̈ܐ ܡܚܝܕ̈ܐ ܕܛܠܒܬܐ ܝܠܗ̇ ܡܢܗ̇ ܕܐܙܠ݇ܐ ܠܩܕܡܐ ܓܘ ܫܪܪܬܐ ܕܩܢܘܢ̈ܐ ܘܐܫܛܪ̈ܐ ܐ݇ܢܫܝ̈ܐ ܕܐܡܘܬ̈ܐ ܡܚܝܕ̈ܐ ܘܒܢܝܬܐ ܕܟܢܘܫܝܐ ܕܫܘܬܐܣ̈ܐ ܡܕܝܢܝ̈ܐ ܘܒܝܬ݂ܕܝܢܐ ܫܪܝܐ ܡܛܠ ܢܛܪܬܐ ܘܚܡܝܬܐ ܠܙܕܩ̈ܐ ܕܦܪ̈ܨܘܦܐ ܘܪܚܫܬܐ ܓܘ ܬܥܒܕܬܐ ܕܦܪܢܣܘܬܐ ܠܐ ܩܘܢܛܘܢܝܬܐ ܕܗܘܦܪ̈ܟܝܐ ܘܦܢܝܬ݂̈ܐ ܘܩܠܝܡ̈ܐ.
ܡܫܘܬܦܬܐ ܕܥܡܢ ܐܬ݂ܘܪܝܐ ܓܘ ܣܘܥܪܢܐ ܕܡܣܪܗܒ݂ܬܐ  ܕܡܢܬܝܬܐ ܕܬܪܡܝܬܐ ܕܝܡܘܩܪܛܝܬܐ ܓܘ ܥܝܪܩ ܒܕ ܬܫܡܫܐ ܒܫܪܪܬܐ ܕܣܘܟܝ̈ܐ ܕܥܡܢ ܓܘ ܫܪܪܬܐ ܕܫܘܠܛܢܐ ܝܬܝܐ ܘܡܕܥܪܬܐ ܕܟܠܝܗܝ ܙܕܩ̈ܗ ܡܘܦܫܪ̈ܐ ܡ̣ܢ ܡܫܠܛܢ̈ܐ ܕܥܝܪܩ ܒܕܥܒ݂ܪ. ܡܫܬܐܠܢܘܬܐ ܩܕܡܝܬܐ ܘܚܪܝܬܐ ܒܢܦܠܐ ܝܠܗ̇ ܥܠ ܩܕܠܐ ܕܟܠܝܗܝ ܛܘܟܣ̈ܢ ܦܘܠܝܛܝܩܝ̈ܐ ܘܡܘܬܒ݂̈ܐ ܐܘܡܬܢܝ̈ܐ ܕܣܙܓܪܝ ܘܡܪܝܙܝ ܥܡ ܚܕܕܐ ܠܣܕܪܐ ܕܦܠܚܢܐ ܣܘܥܪܢܝܐ ܘܪܫܡܝ ܙܒ݂ܢܐ ܕܫܪܪܬܐ ܕܐܗܐ ܣܕܪܐ ܘܘܠܝܬ̈ܐ ܕܐܢ̈ܐ ܛܘܟܣ̈ܐ ܓܘ ܫܪܪܬܐ ܠܣܕܪܐ ܕܦܠܚܢܐ ܕܐܗܐ ܬܪܡܝܬܐ ܐܠܨܝܬܐ ܗ. ܕ ܬܪܡܝܬܐ ܕܫܪܪܬܐ ܕܕܝܡܘܩܛܝܬܐ ܓܘ ܥܝܪܩ ܚܕܬܬܐ.

[قشو ابراهيم نيروا]

                 ܞ  
ܡܥܵܩܪܵܐ ܟܵܬܵܒܐܚܵܒܥܒܵܐ  ܦܵܘܠܘܣ ܕܢܚܵܐ ܚܵܥܵܐ ܓܵܢܵܘܟܘܢ ܩܐ ܕܐܵܗܵܐ ܡܠܘܐܵܘܟܘܢ ܐܘܡܬܵܢܵܥܵܐ ܚܵܒܪܵܢܘܟܘܢ ܠܓܹܒܵܐ ܕܚܕܵܥܘܬܵܐ ܐܠܗܵܐ ܡܵܩܹܒܹܐܠܵܘܟܘܢ ܘܥܗܒܹܐ ܠܵܘܟܘܢ ܚܘܠܡܵܢܵܐ ܐܡܥܢܵܐܥܬ ܗܵܘܥܬܘܢ ܓܵܘ ܫܘܘܫܵܛܵܐ ܘܡܵܢܬܵܥܬܵܐ ܐܵܡܥܢ ܀       قشو إبراهيم نيروا امريكا؟  

[بولص دنخـا]

ܗܘܬ ܐܦ ܐܢ݇ܬ ܪܒܐ ܒܣܝܡܐ ܩܐ ܡܠܘܐܘܟܼ ܣܓܝܐ̈ܐ ܕܒܦܪܣܐ ܝܘܬ ܘܕܐܝܬ ܠܝܗܝ ܓܒܢ̈ܐ ܡܘܬ݂ܪ̈ܐ ܘܡܪ ܝܘܬܪܢܐ ܒܟܠܝܗܝ ܓܒܢ̈ܐ ܕܚܝܘܬܐ ܕܒܪܢܫܐ ܓܘ ܐܗܐ ܥܠܡܐ ܘܣܒ݂ܪܝ ܝܠܗ ܕܟܠ ܚܕ ܡܗܘܡܢܐ ܘܬܫܡܫܢܐ ܘܛܥܢܢܐ ܕܐܓܪܬܐ ܕܡܪܢ ܐܝܫܘܥ ܡܫܝܚܐ ܕܓܫܩ ܘܫܩܠ ܠܐܘܪܚܐ ܬܪܝܨܬܐ ܕܒܐܙܠܐ ܝܘܬ ܒܝܗ̇ ܡܛܠ ܡܓܡܪܬܐ ܠܐܓܪܬܐ ܕܗܝܡܢܘܬܐ ܕܝܠܗ̇ ܬܫܡܫܬܐ ܕܒܝܬܘܟܼ، ܐܘܡܬܘܟܼ ܘܒܪܢܫܘܬܐ. ܐܝܬ ܠܝ ܣܒ݂ܪܐ ܕܟܠ ܚܕ ܕܫܩܝܠܐ ܝܠܗ ܥܠ ܩܕܠܗ ܐܓܪܬܐ ܕܡܪܢ ܐܝܫܘܥ ܡܫܝܚܐ ܕܢܛܪ ܠܠܫܢܐ ܐܗܐ ܒܝܕ ܝܠܦܬܗ ܘܦܪܣܬܗ ܒܝܢܬ݂ ܒܢ̈ܝ ܐܘܡܬܗ ܘܒܪܢܫܘܬܐ ܡܛܠ ܕܠܫܢܐ ܝܠܗ ܗ̇ܘ ܐܣܛܘܟ݂ܣܐ ܒܫ ܐܠܨܝܐ ܘܚܡܝܢܐ ܘܢܛܪܢܐ ܠܐܝܬܘܬܐ ܕܐܘܡܬܢ ܐܬܘܪܝܬܐ ܘܡܕܥܪܬܐ ܕܙܕܩ̈ܗ̇ ܫܪ̈ܫܝܐ ܒܐܪܥܗ̇ ܢܡܘܣܝܬܐ ܒܝܬܢܗܪ̈ܝܢ ܐܡܝܢ.