܀ ܙܘܼܝܵܚܐ ܐܘܼܡܬܵܢܵܝܐ ܥܲܡ ܙܸܕܩ̈ܐ ܢܵܡܘ̇ܣܵܝ̈ܐ ܀
ܕܠܵܐ ܦܫܝܼܓܼܘܼܬܼܵܐ ܐܲܚܢܲܢ ܐܝܼܬܠܲܢ ܨܒܘܼܬܼܵܐ ܐܘܼܡܬܵܢܲܝܬܵܗ̇ ܟܹܐܢܬܵܗ̇ ܕܠܵܐ ܦܲܝܫܵܐ ܣـܪܝܼܒܼܬܵܗ̇ ܘܐܝܼܬܠܲܢ ܙܸܕܩ̈ܐ،، ܘܬܲܫܥܝܬܼܵـܐ ܕܐܲܬܼܪܲܢ ܢܲܗܪ̈ܝܼܢܵܝܵܐ ܒܸܣܗܵܕܵܐ ܝ̄ܠܵܗ̇ ܐܲܡܝܼܢܵܐܝܼܬܼ ܠܐܵܢ̈ܝ̄ ܗܵܩܘܼܝܵܬܲܢ ܐܵܦܸܢ ܕܦܝܼܫܹܐ ܝ̄ܢܵܐ ܣܪ̈ܝܼܒܹܐ ܒܪܵܒܵܐ ܥܕܵܢܵܬܼܐ، ܐܝܼܢܵܐ ܫܸܡܫܵܐ ܕܙܲܕܝܼܩܘܼܬܼܵܐ ܠܹܐ ܦܲܝܫܵܗ̇ ܕܒܼܝܼܩܬܵܗ̇ ܒܐܸܪܒܵܠܵܐ ܡܛܠ ܐܲܡܝܼܢܵܐܝܼܬܼ ܢܘܼܗܪܵܐ ܕܫܪܵܪܵܐ ܠܹܐ ܓܵܢܹܐ، ܘܥܲܡܲܢ ܟܲܠܕܵܝܵܐ ܣܸܪܝܵܢܵܝܵܐ ܐܬܘܼܪܵܝܵܐ ܒܡܲܫܩܠܹ̈ܐ ܕܕܲܥܒܲܪ ܘܗܲܠ ܩܵܐܹܡ ܢܦܝܼܠܵܐ ܝ̄ܠܹܗ ܬܚܘܼܬܼ ܥܲܣـܩܵܘܵܬܼܵܐ ܘܓܘܼܢܚ̈ܐ ܣܲܓܝܼܐܹܐ ܪܵܒܵܐ ܡܲܪܝܼܪ̈ܐ ܥܒܲܪ ܬܲܫܥܝܼܬܹܗ ܝܵܪܝܼܟܼܬܵـܐ ܡܢ ܝܲܘܡܵܐ ܕܢܦܸܠܠܵܗ̇ ܐܸܡܦܪܵܛܘܼܪܘܼܬܹܗ ܘܫܘܼܠܛܵܢܹܗ ܐܲܬܪܵܝܵܐ ܘܐܘܼܡܬܵܢܵܝܵܐ، ܡܛܠ ܦܘ̇ܠܝܼܛܝܼܩܘܵܬܼܵـܐ ܕܫܘܼܠܛܵܢ̈ܐ ܐ̄ܚܹܪ̈̄ܢܹܐ ܬܒܼܝܼܥܵܐܝܼܬܼ ܐܵܢ̈ܝܼ ܕܐ̄ܬܹܐܠܗ̄ܘ̇ܢ ܒܵܬܼܪܹܗ ܒܥܸܠܬܼܵܐ ܕܡܸܬܼܢܲܩܡܵܢܘܼܬܼܵܐ ܝܲܢ ܒܥܸܠܠܵܬܼܵܐ ܐ̄ܚܹܪ̈̄ܢܹܐ ܠܫܲܠܛܵܢܬܵـܐ ܥܲܠ ܟܠܲܝܗ̈ܝ ܡܨܵܝܵܬܼܵـܐ ܕܐܝܼܬܼܗ̄ܘܵܐܠܹܗ، ܡܘܼܢܫܝܼ̈ܐ ܠܬܲܫܥܝܼܬܲܢ ܙܗܝܼܬܼܵـܐ ܕܒܚܲܕ̄ ܙܲܒܼܢܵܐ ܫܲܠܛܸܢܵܐ ܗ̄ܘܵܐ ܥܲܠ ܟܠܵܗ̇ ܡܬܼܥܲܡܪܵܢܝܼܬܼܵـܐ ܕܬܹܒܹܝܠ، ܘܡܘܼܩܪܘܼܒܼܠܵܗ̇ ܬܸܫܡܫܬܵܐ ܘܩܢܲܝܵܬܼܵـܐ ܘܬܘܼܩܵܢ̈ܐ ܫܲܦܝܼܪܹ̈ܐ ܩܵܐ ܟܠܵܗ̇ ܒܲܪܢܵܫܘܼܬܼܵܐ ܕܡܸܬܼܥܲܡܪܵܢܝܼܬܼܵܐ، ܠܦܘܼܬܼ ܐܵܗܵܐ ܬܲܫܥܝܼܬܼܵܐ ܪܘܝܼܚܬܵـܐ ܘܝܼܕܝܼܥܬܵܐ ܠܪܵܒܵܐ ܥܲܡܡ̈ܐ ܘܐܸܡܘܵܬܼܵܐ، ܩܸܡܠܗ̄ܘ̇ܢ ܒܕܵܪܲܢ ܕܐܸܕܝܘܼܡ ܪܵܒܵܐ ܡܼܢ ܫܘܼܬܼܐܵܣ̈ܐ ܐܘܼܡܬܵܢܵܝ̈ܐ ܦܪ̈ܝܼܫܹܐ ܛܥܝܢܹ̈ܐ ܥܲܠ ܩܕܵܠܲܝܗ̈ܝ ܢܝܼܪܵܐ ܕܐܘܼܡܬܲܝܗ̈ܝ ܠܬܲܡܲܡܬܵـܐ ܠܐܵܢ̈ܝ ܘܵܠܝܼܵܬܼܵـܐ ܕܐܲܒܼܵܗܵܬܲܢ ܟܲܫܝܼܪ̈ܐ ܚܕܵܪ ܐܘܼܡܬܲܢ ܘܐܲܬܼܪܲܢ ܡܵܪܵܐ ܕܲܬܼܪܹܝܢ ܝܲܡܵܬܼܵـܐ ܡܫܲܡܗܹ̈ܐ ܕܩܠܲܬ ܘܦܪܵܬ، ܠܡܲܕܥܲܪܬܵܐ ܐܵܦܸܢ ܠܚܲܕ̄ ܣܲܗܡܵܐ ܙܥܘܼܪܵܐ ܡܼܢ ܡܸܢܕܝܼ ܕܛܠܹܩܠܹܗ ܝܲܢ ܡܵܨܹܝܚ̈ ܐܵܡܪ̈ܲܚ ܠܙܕܩܲܝ̈ܢ ܘܗܵܩܘܼܝܵܬܲܢ ܢܬܝܼܫ̈ܐ(ܣܠܝܼܒ̈ܐ)، ܩܵܐ ܕܗܵܘܹܐܠܲܢ ܚܲܝܘܼܬܼܵܐ ܒܫܲܘܝܘܼܬܼܵܐ ܕܐܸܡܘܵܬܼܵܐ ܐ̄ܚܹܪ̈̄ܢܹܐ ܕܒܚܵܝܵܐ ܝ̄ܢܵܐ ܥܲܡܵܢ ܒܐܸܛܪܵܐ ܕܬܚܘܼܒ̈ܐ ܕܐܲܬܼܪܲܢ ܥܝܼܪܵܐܩ، ܕܗܵܘܲܚ̈ ܫܲܘܬܸܦܵܢ̈ܐ ܥܲܡܲܝܗ̈ܝ ܡܐܲܝܟܼ ܒܢܘܼܢ̈ܐ ܕܚܲܕ̄ ܐܲܬܼܪܵܐ ܓܲܘ ܫܩܲܠܬܵـܐ ܕܦܘܼܣܩܵܢ̈ܐ ܦܪ̈ܝܼܫܹܐ، ܐܸܢ ܦܘܼܠܝܼܛܝܼܩܵܝ̈ܐ ܝܲܢ ܟܢܘܼܫܝܵܝ̈ܐ ܝܲܢ ܡܲܪ̈ܕܘܼܬܵܢܵܝܹܐ ܘܬܸܓܼܡ̈ܐ ܕܚܲܩܠܹ̈ܐ ܡܫܲܚܠܦ̈ܐ ܒܢܝܼܫܵܐ ܕܫܲܘܬܵܦܬܵـܐ ܒܦܘܼܣܩܵܢܵܐ ܕܫܘܼܠܛܵܢܵܐ ܐܲܬܼܪܵܝܵܐ ܘܝܵܬܼܵܝܵܐ ܕܫܲܠܛܘܼܢܹܐ ܝ̄ܠܹܗ ܠܐܲܬܼܪܵܐ، ܘܚܲܕ̄ ܡܢ ܕܐܵܢ̈ܝ̄ ܫܘܼܬܼܐܵܣ̈ܐ ܐܘܼܡܬܵܢܵܝ̈ܐ ܕܕܒܼܚܠܗ̄ܘ̇ܢ ܡܢ ܥܕܵܢܲܝܗ̈ܝ ܘܚܲܝܘܼܬܲܝܗ̈ܝ ܠܦܘܼܬܼ ܙܕܩܲܝ̈ܢ ܣܠܝܼܒ̈ܐ ܥܲܠ ܐܝܼܕܵܬܼܵـܐ ܕܫܘܼܠܛܵܢܵܐ ܕܟـܬܵܬܘܼܪܵܝܵܐ ܩܒܼܝܼܪܵܐ، ܝܼܗ̄ܘܵܐ ܡܘܼܬܒܼܵܐ ܥܲܡܡܵܝܵܐ ܟܲܠܕܵܝܵܐ ܣܸܪܝܵܢܵܝܵܐ ܐܬܘܼܪܵܝܵܐ، ܗ̇ܘ ܡܘܼܬܒܼܵܐ ܡܼܢ ܝܵܘܡܵܐ ܕܡܲܘܠܵܕܹܗ ܒܠܘܼܡܵܕܵܐ ܕܦܝܼܫܠܹܗ ܩܛܝܼܪܵܐ ܒܲܡܕܝܼܢ̄ܬܼܵـܐ ܕܥܲܝܢܟܵܘܵܐ ܒܫܲܪܲܪܬܵܐ ܕܟܠܲܝܗ̈ܝ ܡܢܵܘܵܬܼܵـܐ ܕܥܲܡܲܢ، ܩܸܡܠܹܗ ܒܪܵܒܵܐ ܘܵܠܝܼܵܬܼܵـܐ ܐܵܢܸܢܩܵܝ̈ܐ ܠܦܘܼܬܼ ܣܲܓܝܼܐܹܐ ܡܼܢ ܙܕܩܲܝ̈ܢ ܘܚܲܕ̄ ܡܼܢ ܕܐܵܢ̈ܝܼ ܙܸܕܩ̈ܐ ܝܼܗ̄ܘܵܐ، ܒܥܲܝܬܼܵـܐ ܕܫܘܼܠܛܵܢܵܐ ܝܵܬܼܵܝܵܐ ܓܲܘ ܦܸܢܝܵܬܼܵـܐ ܕܒܸܚܝܵܐ ܝ̄ܠܹܗ ܓܵܘܲܝܗ̈ܝ ܥܲܡܲܢ ܟܠܕܵܝܵܐ ܣܸܪܝܵܢܵܝܵܐ ܐܬܼܘܼܪܵܝܵܐ ܕܝܼܠܵܢܵܐܝܼܬܼ ܓܲܘ ܕܹܫܬܵـܐ ܕܢܝܼܢܘܹܐ، ܘܙܸܕܩ̈ܐ ܐܘܼܡܬܵܢܵܝ̈ܐ ܒܫܲܪܝܼܪܘܼܬܼܵܐ ܠܸܐ ܦܵܝܫܝܼ ܝ̄ܗܝܼܒܼ̈ܐ ܒܝܼ ܦܫܝܼܛܘܼܬܼܵܐ ܝܲܢ ܒܗܵܣܲܢܵܝܘܼܬܼܵܐ ܘܠܹܐ ܐܵܬܼܝܼ ܠܲܩܢܵܝܵܐ، ܐܲܚܟ̰ܝܼ ܒܐܵܓܼܘ̇ܢܵܐ ܦܘܼܠܝܼܛܝܼܩܵܝܵܐ ܡܼܢ ܫܘܼܬܼܐܵܣ̈ܐ ܘܟܢܘܼܫܝ̈ܐ ܘܦܲܪ̈ܨܘܼܦܹܐ ܡܚܲܝܕܹ̈ܐ ܒܚܲܕ̄ ܪܸܢܝܵܐ ܘܪܸܥܝܵܢܵܐ ܐܘܼܡܬܵܢܵܝܵܐ ܪܘܝܼܚܵܐ ܪܸܚܩܵܐ ܡܼܢ ܟܠ ܦܘܼܠܵܓܼܵܐ ܘܣܢܲܝܬܼܵـܐ ܘܒܲܪܒܲܙܬܵܐ ܘܐܵܢܵܝܘܼܬܼܵܐ، ܘܚܕܵܪܬܵܐ ܒܵܬ̄ܪ ܫܘܼܒܼܗܵܪܵܐ ܣܦܝܼܩܵܐ ܕܟܘܼܪ̈ܣܵܘܵܬܼܵܐ ܘܟܸܣܦܵܐ(ܙܘܼܙܵܐ) ܒܝܼ ܢܟܼܝܼܠܘܼܬܼܵܐ، ܠܦܘܼܬܼ ܐܵܗܵܐ ܡܸܢܕܝܼ ܒܥܝܼܬܵـܐ ܝ̄ܠܵܗ̇ ܡܢ ܟܠܲܢ ܕܗܵܘܹܝܚ̈ ܚܘܼܝܸܕܹ̈ܐ ܒܚܲܕ̄ ܦـܘܼܣـܩܵܢܵܐ ܐܘܼܡܬܵܢܵܝܵܐ ܚܹܐܪܵܐ ܕܡܵܨܹܝܚ̈ ܫܲܪܪ̈ܚ ܕܡܵܛܹܝܚ̈ ܠܟܠܲܝܗ̈ܝ ܢܝܼܫ̈ܐ ܐܘܼܡܬܵܢܵܝ̈ܐ ܘܢܵܡܘ̇ܣܵܝ̈ܐ ܢܬܝܼܫ̈ܐ(ܣܠܝܼܒ̈ܐ) ܕܟܠܹܗ ܥܲܡܡܵܢ ܪܸܚܩܵܐ ܡܼܢ ܩܢܲܝܵܬܼܵـܐ ܦܲܪ̈ܨܘܼܦܵܝܹܐ، ܡܛܠ ܐܸܢ ܠܹܐ ܗܵܘܹܐ ܚܘܼܝܵܕܵܐ ܠܹܐ ܗܵܘܹܐܠܲܢ ܙܸܕܩ̈ܐ ܐܘܼܡܬܵܢܵܝ̈ܐ ܚܹܐܪ̈ܐ، ܘܠܵܐ ܣܲܦܪ̈ܵܚ ܡܼܢ ܐ̄ܚܹܪ̈̄ܢܹܐ ܕܝܵܗܒܼܝܼܠܲܢ ܙܸܕܩ̈ܐ، ܘܫܒܼܘܼܩ ܗܵܘܹܐܠܲܢ ܚܝܵܪܬܵـܐ ܪܸܥܝܵܢܲܝܬܼܵـܐ ܥܲܡܝܼܩܬܵـܐ ܘܫܲܪܝܼܪܬܵـܐ ܒܐܲܝܟܲܢܘܵܬܼܵܐ ܕܩܵܐܹܡ ܕܒܸܥܒܼܵܕܵܐ ܝ̄ܢܵܐ ܡܲܥܲܒܕܵܢܘܼܬܼܵܐ ܥܲܠ ܟܝܵܢܵܐ ܕܐܵܓܼܘ̇ܢܲܢ ܘܥܲܠ ܫܒܼܝܼܠܵܐ ܕܒܥܵܝܬܼܵـܐ ܕܙܸܕܩ̈ܐ، ܘܚܲܕ̄ ܡܼܢ ܕܵܐܢܝܼ ܛܘܼܦ̮ܣ̈ܐ ܕܦܸܫܠܹܗ ܓܸܠܝܵܐ ܩܲܕ̄ܡ ܥܲܝܢ̈ܐ ܕܟܠܵܗ̇ ܬܹܒܹܝܠ ܝܼܗ̄ܘܵܐ ܣـܪܵܒܼܬܵـܐ ܠܦـܘܼܣـܩܵܢܵܐ ܕܚܲܡܫܝܼ ܓܲܘ ܡܘܼܬܒܼܵܐ ܕܦܲܪܠܲܡܵܢ ܥܝܼܪܵܐܩܵܝܵܐ ܘܗܪܵܣܬܵـܐ ܠܙ̈ܕܩܵܢ ܫܲܪܝܼܪ̈ܐ، ܠܦܘܼܬܼ ܐܵܗܵܐ ܡܸܢܕܝܼ ܒܥܝܼܬܵـܐ ܝ̄ܠܵܗ̇ ܡܢܲܢ ܒܐܵܗܵܐ ܡܲܫܩܠܵܐ ܬܲܚܲܒܬܵـܐ ܠܫܒܼܝܼܠܵܐ ܦܘܼܠܝܼܛܝܼܩܵܝܵܐ ܫܲܪܝܼܪܵܐ ܕܒܝܹܗ ܐܲܚܟ̰ܝܼ ܡܵܨܹܝܚ̈ ܠܫܲܪܲܪܬܵـܐ ܕܢܝܼܫ̈ܐ ܐܘܼܡܬܵܢܵܝ̈ܐ ܢܵܡܘ̇ܣܵܝ̈ܐ ܠܚܵܡܲܝܬܵـܐ ܕܐܝܼܬܘܼܬܲܢ ܐܵܬܪܲܝܬܼܵـܐ ܘܐܘܼܡܬܵܢܲܝܬܼܵـܐ ܘܝܼܣܲܪܬܵܐ ܒܥܲܦܪ̈ܲܢ ܘܐܲܬܪ̈ܲܢ ܝܸܡܵܝܵܐ ܥܝܼܪܵܐܩ، ܪܸܚܩܵܐ ܡܼܢ ܩܪܵܒܼܵܐ ܦܘܼܠܝܼܛܝܼܩܵܝܵܐ ܕܦܠܸܛܠܹܗ ܒܐܵܗܵܐ ܡܸܬܚܵܐ ܕܝܼܠܹܗ ܦܠܵܛܵܐ ܕܚܲܕ̄ܟܡܵܐ ܣܝܼܣܲܬܪܹ̈ܐ ܦܘܼܠܝܼܛܝܼܩܵܝ̈ܐ ܓܵܘܵܝ̈ܐ ܕܐܘܼܡܬܲܢ ܕܡܘܼܥܒܸܕܠܹܗ ܠܡܵܪܲܡܬܵـܐ ܕܗܹܢܝܵـܢ̈ܐ ܕܚܲܕ̄ܟܡܵܐ ܣܝܼܣܲܬܪ̈ܐ ܦـܘܼܠܝܼܛܝܼܩܵܝ̈ܐ ܒܕܲܪܩܘܼܒܼܠܘܼܬܼܵܐ ܥܲܡ ܗܹܢܝܵـܢ̈ܐ ܕܥܲܡܲܢ ܪܹ̈ܝܫܵܝܹܐ، ܘܐܵܗܵܐ ܩܪܵܒܼܵܐ ܝܼܠܹܗ ܓܪܝܼܫܵܐ ܡܼܢ ܥܲܣـܩܵܘܵܬܼܵܐ ܩܲܕܝܼܡ̈ܐ ܠܦܘܼܬܼ ܗܸܢܝܵـܢ̈ܐ ܦܘܼܠܝܼܛܝܼܩܵܝ̈ܐ ܐܵܢܵܝ̈ܐ ܘܠܵܐ ܐܘܼܡܬܵܢܵܝ̈ܐ، ܡܛܠ ܗܵܢܵܐ ܡܘܼܬܒܼܵܐ ܥܲܡܡܵܝܵܐ ܝܼܗ̄ܘܵܐ ܒܥܲܝܬܼܵـܐ ܕܣܲܗܡܵܐ ܙܲܘܕܵܐ ܡܼܢ ܥܲܡܡܵܐ ܗ̇ܘ ܕܡܘܼܕܟܸܪ̈ܲܢ ܡܼܢ ܫܘܼܪܵܝܵܐ ܕܐܵܗܵܐ ܡܠܘ̇ܐܵܐ، ܕܦܣܹܥܠܹܗ ܡܢ ܝܵܘܡܵܐ ܕܡܲܘܠܵܕܹܗ ܒܐܘܼܪܚܵܐ ܫܲܪܝܼܪܬܵܐ ܕܡܨܹܐܠܹܗ ܕܡܟܲܦܸܫ ܠܟܠܲܝܗ̈ܝ ܓܲܘܢ̈ܐ ܕܥܲܡܲܢ ܟܲܠܕܵܝܵܐ ܣܸܪܝܵܢܵܝܵܐ ܐܬܼܘܼܪܵܝܵܐ ܒܚܲܕ̄ ܪܸܢܝܵܐ ܘܚܲܕ̄ ܬܲܚܡܲܢܬܵـܐ ܘܚܲܕ̄ ܦܘܣܩܵܢܵܐ، ܘܲܦܠܵܛܹ̈ܐ ܝܼܗ̄ܘܵܘ ܡܼܢ ܓܘܼܒܵܝ̈ܐ ܕܡܘܼܬܒܼ̈ܐ ܕܗܘܼܦܲܪ̈ܟܝܹܐ ܕܡܨܹܐܠܹܗ ܕܩܵܢܹܐ ܩܵܐ ܥܲܡܲܢ ܒܐܸܛܪܵܐ ܕܠܝܼܣܬܵـܐ ܕܥܸܫܬܵܪ ܐܘܼܡܬܵܢܲܝܬܵـܐ ܬܪܹ̈ܝܢ ܟܘܼܪ̈ܣܵܘܵܬܼܵܐ ܓܲܘ ܒܲܓܼܕܵܕ ܘܢܝܼܢܘܹܐ، ܘܘܵܠܹܐ ܝ̄ـܠܵܗ̇ ܥܲܠ ܟܠܲܢ ܡܐܲܝܟܼ ܥܲܡܵܐ ܘܫܘܼܬܼܐܵܣ̈ܐ ܘܓܲܒ̈ܐ ܘܦܲܪ̈ܨܘܼܦܹܐ ܕܣܲܢܕܲܚ̈ܠܹܗ ܘܕܲܒܼـܩܵܚ̈ ܒܐܝܼܕܹܗ ܡܛܠ ܒܪܹܐܠܹܗ ܩܵܐ ܫܩܲܠܬܵـܐ ܕܟܠܲܝܗ̈ܝ ܙܕܩܵܢ ܐܘܼܡܬܵܢܵܝ̈ܐ ܢܬܝܼܫ̈ܐ، ܘܐܲܠܵܗܵܐ ܣܵܢܸܕܠܹܗ ܒܟܠܲܝܗ̈ܝ ܫܒܼܝܼܠ̈ܐ ܐܘܼܡܬܵܢܵܝ̈ܐ ܕܐܘܼܡܬܲܢ ܛܠܝܼܡܬܵـܐ ܕܦܲܣܥܵܚ̈ ܒܫܘܼܘܫܵܛܵܐ ܘܡܛܲܘܪܵܢܘܼܬܼܵܐ ܘܡܲܢܬܵܝܬܼܵـܐ، ܘܐܲܡܝܼܢܵܐܝܼܬܼ ܦܵܣܹܥ ܠܲܩܲܕ̄ܡܵܐ،،،
ܥܲـܒܼـܕܝܼܫܘ̇ܥ ܣܵـܗ̄ܕܵܐ ܝܘܼܚܲܢܐ
