ܢܝܼܢܘܹܐ
ܐܸܡܵܐ ܕܲܡ̈ܕܼܝܼܢܵܬ̣ܐܵ
ܐܲܪܝܼܘܿ̄ܬ̣ܵܐ ܕܐܵܫܘܿܪ ܨܠܝܼܦܬܵܐ
ܟܬ̣ܝܼܒ̣ܵܐ ܝܠܹܗ ܫܸܡܹܟ̣ܝ ܓܵܘ ܦܵܣܘܿܩܹ̈ܐ ܕܲܚܕܼܲܬܵܐ ܘܥܲܬ̈ܝܼܩܵܬ̣ܵܐ
ܘܲܚܪܝܼܛܵܐ ܝܠܹܗ ܥܲܠ ܠܘܼܚܹ̈ܐ ܕܟܹܐܦܵܐ ܘܐܵܠܹܦ ܐܲܠܦܝܼ̈ܢ ܠܸ̈ܒܵܘܵܬ̣ܵܐ
ܗܵܐ ܡ̣ܢ ܙܲܒ̣ܢܵܐ ܕܲܙܪܵܩܬܵܐ ܕܬܵܐܪܝܼܚܵܐ ܕܲܡ̈ܕܼܝܼܢܵܬ̣ܐܵ ܘܲܕܡܲܠ̈ܟܿܘܵܬ̣ܵܐ
ܐܲܢ̄ܬ̇ـܝ ܡܲܒܪܘܿܩܹܐ ܝܗ̄ܘܵܬ̇ܝ ܐܲܝܟ̣ ܕܲܗܒ̣ܵܐ ܘܝܵܩܘܿܢ̈ܕܹܐ ܘܡܵܖ̈ܓܵܢܝܵܬ̣ܐܵ
ܝܵܐ ܡܕܼܝܼܢ̄ܬܵܐ ܕܒܘܼܖ̈ܓܹܐ ܖ̈ܵܡܹܐ ܘܗܲܝܟ̈ܠܹܐ ܘܡܲܣ̈ܓܕܼܹܐ ܘܙܸܩܘܿܖ̈ܵܬ̣ܵܐ
ܘܲܕܼܛܲܟ̣ܣܹ̈ܐ ܥܲܬܝܼܩܹ̈ܐ ܕܬܸܫܡܸܫܬܵܐ ܘܐ̄ܖ̈ܵܙܹܐ ܕܟܲܗܢܘܼܬ̣ܵܐ ܕܬܵܘ̈ܕܝܵܬ̣ܐܵ
ܝܵܐ ܡܕܼܝܼܢ̄ܬܵܐ ܕܓܲܢܹ̈ܐ ܬܸܠܝܹ̈ܐ ܘܒܹܝܬ̣ ܐܲܖ̈ܟܹܐ ܡܫܲܡܗܹ̈ܐ ܕܲܟܼ̈ܬ̣ܝܼܒ̣ܵܬ̣ܵܐ
ܒܸܣܗܵܕܼܵܐ ܝܠܲܝܗـܝ ܥܲܠܹܟ̣ܝ ܝܲܕܘܼܥܬ̣ܵܢܹ̈ܐ ܒܝܘܼܠܦܵܢ ܐܵܫܘܿܖ̈ܵܝܵܬ̣ܐܵ
ܟܒ̣ܝܼܫ ܠܹܟ̣ܝ ܠܒܵܬܲـܝ̈ ܥܸܬܩܹ̈ܐ ܡܫܲܡܗܹ̈ܐ ܒܨܲܠܡܹ̈ܐ ܓܠܝܼܦܹ̈ܐ ܒܐܘܼܡܵܢܘܼܬ̣ܵܐ
ܠܲܡܵܣܘܿ ܐܵܫܘܿܪܵܝܵܐ ܘܓܸܠܓܵܡܸܫ ܘܣܲܢܚܹܪܹܝܒ̣ ܡܲܠܵܠܹ̈ܐ ܒܲܫܬܝܼܩܘܼܬ̣ܵܐ
ܘܠܘܼܚܹ̈ܐ ܕܗܘܼܡܵܣܹ̈ܐ ܘܓܲܢ̄ܒܵܪܘܼܬ̣ܵܐ ܘܐ̄ܖ̈ܵܙܹܐ ܕܙܵܟ̣ܘܼܬ̣ܵܐ ܘܲܕܼܡܬ̣ܘܼܡܵܝܘܼܬ̣ܵܐ
ܜܡܝܼܪܹܐ ܝܠܲܝܗـܝ ܒܥܲܦܪܹܟ̣ܝ ܒܹܝܬ̣ ܩܒ̣ܘܼܖܹ̈ܐ ܕܡܲܠܟܹ̈ܐ ܕܐܵܫܘܿܪ ܘܡܲܠ̈ܟܵܬ̣ܵܐ
ܘܕܲܢܒ̣ܝܹ̈ܐ ܘܩܲܕܝܼ̈ܫܹܐ ܘܝܵܘܢܵܢ ܡܫܲܡܗܵܐ ܒܢܘܼܢܵܐ ܘܐܸܓܵܪܬܵܐ ܕܲܬ̣ܝܵܒ̣ܘܼܬ̣ܵܐ
ܘܕܲܝܖܹ̈ܐ ܘܥܘܼܡܖܹ̈ܐ ܘܩܸ̈ܠܵܝܵܬ̣ܐܵ ܕܝܼܚܝܼܕܵܝܹ̈ܐ ܘܕܖ̈ܲܒܵܢܹܐ ܘܖ̈ܲܒܵܢܝܵܬ̣ܐܵ
ܒܓܵܘܹܟ̣ܝ ܣܪܲܛ ܚܕܲܬܵܐ ܒܠܸܫܵܢܵܐ ܕܲܡܫܝܼܚܵܐ ܒܐܸܣܛܖ̈ܵܢܓܹܝܠܵܝܵܬ̣ܐܵ
ܒܓܵܘܹܟ̣ܝ ܦܝܼܫܠܹܗ ܕܪܝܼܫܵܐ ܘܡܦܘܿܫܩܵܐ ܝܘܼܠܦܵܢܵܐ ܕܐܲܠܵܗܘܼܬ̣ܵܐ ܘܲܕܐ̄ܢܵܫܘܼܬ̣ܵܐ
ܐܸܕܝܘܿܡ ܫܬܝܼܩ ܠܹܗ ܩܵܠܵܐ ܕܢܵܩܘܿܫܹ̈ܐ ܕܥܘܼܡܖ̈ܵܢܹܟ̣ܝ ܘܥܘܿܢ̈ܝܵܬ̣ܐܵ ܕܲܨ̈ܠܵܘܵܬ̣ܵܐ
ܬܚܘܿܬ̣ ܙ̈ܥܵܩܵܬ̣ܵܐ ܘܲܨܖ̈ܵܚܝܵܬ̣ܐܵ ܕܒܲܖ̈ܒܪܵܝܹܐ ܕܕܵܥܸܫ ܒܩܵܠܵܐ ܕܲܡܪܲܘܖ̈ܒ̣ܵܢܝܵܬ̣ܐܵ
ܓܙܝܼܡ ܠܗ̄ܘܿܢ ܘܝܸܗ̄ܒ̣ ܠܗ̄ܘܿܢ ܠܲܒܢ̈ܘܼܢܹܟ̣ܝ ܐܲܦܬ̣ܵܐ ܚܲܕܼ̄ܟܡܵܐ ܫ̈ܵܥܵܬ̣ܐܵ
ܥܲܠ ܓܘܼ̈ܕܹܐ ܕܒܵܬܲܝ̈ܗـܝ ܟܬ̣ܝܼܒ̣ ܠܗ̄ܘܼܢ ܣܡܘܿܩܬܵܐ ܢܘܼܢ ܐܵܬ̣ܘܼܬ̣ܵܐ
ܘܝܸܗ̄ܒ̣ ܠܗ̄ܘܿܢ ܓܘܼܒܵܝܹ̈ܐ ܡܲܖ̈ܝܼܪܹܐ ܐܲܝܟ̣ ܕܲܒ̣ܙܲܒ̣ܢܵܐ ܕܚܲܢܦܘܼܬ̣ܵܐ
ܓܙܝܼܬ̣ܵܐ ܝܵܢ ܡܲܫܠܲܡܬܵܐ ܝܵܢ ܣܲܝܦܵܐ ܘܡܵܘܬܵܐ ܝܵܢ ܬܵܘܬܵܒ̣ܘܬ̣ܵܐ
ܟܒ̣ܲܫܘ ܠܐܲܪܥܹܟ̣ܝ ܘܒܲܣܲܪܘ ܘܛܲܢܸܦܘ ܠܲܒ̣ܢܵܬ̣ܹܟ̣̈ܝ ܒܬ̣̈ܘܼܠܵܬ̣ܵܐ
ܩܛܲܠܘ ܠܲܒܢ̈ܘܿܢܹ̈ܟ̣ܝ ܘܫܒ̣ܝܼܩܝܼ ܕܠܵܐ ܩܒ̣ܲܪܬܵܐ ܘܲܕܠܵܐ ܬܸܫܡ̱̈ܫܵܬ̣ܵܐ
ܡܫܘܿܚܠܸܦ ܠܗ̄ܘܿܢ ܙܘܼܝܵܚܹ̈ܟ̣ܝ ܠܲܩܒ̣ܲܪܬܵܐ ܕܥܲܢܝܼ̈ܕܼܹܐ ܘܐܲܒ̣ܝܼܠܘܼܬ̣ܵܐ
ܐܝܼܢܵܐ ܨܖ̈ܵܚܝܵܬ̣ܹܟ̣ܝ ܘܬܸܢܲܚܝܵܬ̣ܹܟ̣̈ܝ ܝܵܐ ܐܲܪܝܼܘܿ̄ܬ̣ܵܐ ܫܥܝܼܫ ܠܗ̄ܘܼܢ ܠܲܒ̣ܪܝܼܬ̣ܵܐ
ܫܥܝܼܫ ܠܗ̄ܘܿܢ ܠܬܹܐܪܬܵܐ ܕܬܹܒ̣ܹܝܠ ܒܡܸܨܥܵܐ ܕܝܘܼܕܼܵܥܵܐ ܘܡܵܘܕܥܵܢܘܼܬ̣ܵܐ
ܡܘܿܪܥܸܫ ܠܗ̄ܘܿܢ ܠܲܕܡܝܼܟ̣ܹ̈ܐ ܐܵܦ ܠܐܵܢ̈ܝܼ ܫܸܢܝܹ̈ܐ ܒܫܸܢܬ̣ܵܐ ܕܪܵܘܵܝܘܼܬ̣ܵܐ
ܕܓܵܘ ܓܲܢܹ̈ܐ ܬܚܘܿܬ̣ ܛܸܠܵܠܹ̈ܐ ܕܐܝܼܠܵܢܹ̈ܐ ܕܒܲܠܘܼܛܵܐ ܘܬܘܼܬ̣ܵܐ
ܐܲܝܟܵܐ ܝܠܲܝܗـܝ ܡܲܠܲܐܟ̣ܹܟ̣̈ܝ ܘܢܵܛܘܿܖܹ̈ܐ ܕܬܲܖ̈ܥܹܐ ܡܫܲܡܗܹ̈ܐ ܒܲܙܪܝܼܙܘܼܬ̣ܵܐ؟
ܟܪܝܼܒܵܐ ܘܲܪܚܝܼܩܵܐ ܝܠܹܗ ܡܸܢܹܟ̣ܝ ܐܵܫܘܿܪ ܐܲܠܵܗܵܐ ܕܓܲܢ̄ܒܵܪܘܼܬ̣ܵܐ؟
ܐܵܦ ܢܲܪܓܵܠ ܘܢܲܒܘܼ ܘܥܸܫܬܵܪ ܐܲܠܵܗܹ̈ܐ ܕܲܩܪܵܒ̣ܵܐ ܘܚܲܟܝܼܡܘܼܬ̣ܵܐ؟
ܠܡܵܢܵܐ ܟܠ ܐܵܗܵܐ ܫܸܬܩܵܐ ܘܲܣܒܵܪܬܵܐ ܘܟܠܲܝܬܵܐ ܘܫܸܠܝܘܼܬ̣ܵܐ؟
ܐܝܼܬ̣ ܠܹܟ̣ܝ ܒܢܘܿܢܹ̈ܐ ܐܝܼܬ̣ ܠܹܟ̣ܝ ܒ̈ܢܵܬ̣ܵܐ ܐܝܼܬ̣ ܠܹܟ̣ܝ ܥܠܲܝܡܘܼܬ̣ܵܐ
ܐܵܠܹܦ ܐܲܠܦ̈ܝܼܢ ܠܗܝܼܩܹ̈ܐ ܕܢܲܫܩܝܼ ܠܥܲܦܪܹܟ̣ܝ ܒܟܠ ܚܲܕܼܘܼܬ̣ܵܐ
ܒܸܕ ܕܲܥܪܝܼ ܡ̣ܢ ܒܵܬ̣ܲܪ ܝܲܡܡܹ̈ܐ ܡ̣ܢ ܢܘܼܟ̣ܪܵܝܘܼܬ̣ܵܐ ܘܡ̣ܢ ܓܵܠܘܼܬ̣ܵܐ
ܐܸܕܝܘܿܡ ܝܵܢ ܩܘܼܕܡܹܐ ܝܵܢ ܒܕܲܥܬ̣ܝܼܕܼ ܩܘܼܪܒܵܐ ܝܵܢ ܒܣܲܝܒܘܼܬ̣ܵܐ
ܠܦܘܼܪܩܵܢܹܟ̣ܝ ܘܲܠܚܘܼܪܵܪܹܟ̣ܝ ܡ̣ܢ ܫܘܼܢܵـܩܵܐ ܕܐܲܣܝܼܪܘܼܬ̣ܵܐ ܘܥܲܒ̣ܕܘܼܬ̣ܵܐ
ܟ̣ܵܡܝܼܣ ܓܝܼܘܲܪܓܝܼܣ
ܐܒ 2014
[/center]
