،،، ܙܲܒܼܢܵܐ ܕܚܛܝܵܬܼܝܼ ،،،
ܓܲܘ ܩܸܢܛܪܘܼܢ ܕܚܛܝܼܬܼܵܐ
ܚܲܛܵܝܵܐ ܝܼܘܸܢ
ܘܒܝܼܫܬܵܐ ܓܲܘ ܪܥܵܫܬܝܼ
ܐܝܼܠܵܗ̇ ܥܒܼܵܕܵܐ ܚܲܝܠܬܼܵܢܵܐ،،
ܠܵܐ ܚܙܹܐܡܘܼܢ ܓܲܘ ܦܵܬܝܼ ܒܪܝܼܪܬܵܗ̇
ܘܒܲܪܣܲܡܬܝܼ ܫܲܦܝܼܪܬܵܐ
ܘܠܒܼܝܼܫܬܝܼ ܒܸܠܗܵܝܵܐ ܒܢܘܼܗܪܵܐ
ܘܒܪܲܩܵܠܵܐ ܕܚܲܒܪܵܢܝܼ ܒܚܲܢܝܼܢܘܼܬܼܵܐ
ܘܡܘܼܫܚܵܬܝܼ ܐܵܢܝܼ ܕܡܲܠܚܡܸܢܢܘܼܢ
ܡܐܲܝܟܼ ܚܫܲܒܼܬܵܐ ܠܝܘܼܬܼܪܵܢܵܐ ܕܒܲܪܢܵܫܘܼܬܼܵܐ
ܕܦܲܬܼܚܝܼ ܩܕܵܡ ܥܲܝܢܐ ܬܲܪ̈ܥܵܢܹܐ ܕܡܲܢܝܵܚܬܵܐ،،،
ܠܵܐ ܠܵܐ ܢܲܦܠܝܼܬܘܼܢ
ܒܩܥ̄ܘܼܠܬܵܐ ܕܚܸܙܘܵܐ ܦܲܢܕܵܢܵܐ،،
ܓܲܘ ܚܛܝܼܬܼܝܼ ܟܹܐ ܣܲܚܒܪܸܢ
ܒܲܬܼܘܵܬܼܵܐ ܕܪ̈ܲܫܝܼܥܹܐ ܘܓܲܢܵܒܼ̈ܐ
ܘܡܓܵܒܸܝܢ ܟܬܼܵܒܼ̈ܐ
ܡܢ̄ ܒܹܝܬܼ ܐܲܪ̈ܟܐ ܕܙܲܢܵܝܘܼܬܼܵܐ
ܕܡܲܣܸܒܼܥܸܢ ܒܵܥܘܼܬܼܝܼ ܘܡܲܪܘܸܢ ܪܸܢܝܝܼ
ܒܫܘܼܥܝܵܬܼܵܐ ܕܥܲܪ̈ܣܹܐ ܓܲܝܵـܪܹ̈ܐ،،،
ܐܵܢܵܐ ܝܼܘܸܢ ܡܲܕܪܲܫܬܵܐ ܕܦܘܼܠܵܓܼܵܐ
ܠܹܐ ܛܵܥܢܸܢ ܫܒܼܘܼܩ ܡܢ̄ ܣܲܝܦܐ ܕܦܲܬܦܲܬܐ،،
ܝܵܐ ܡܲܚܒܵܢܝܼ ܐܲܚܬܘܼܢ ܫܲܡܥܵܢܝܼ
ܠܵܐ ܗܲܝܡܸܢܝܼܬܘܼܢ ܠܟܼܠ ܡܵܐ ܕܐܲܡܪܸܢ
ܪܵܒܵܐ ܝܼܘܸܢ ܥܲܡܛܵܢܵܐ ܒܚܲܒܪܵܢܝܼ
ܓܲܘ ܚܒܲܫܬܵܐ ܕܠܸܠܝܵܐ
ܥܲܒܼܕܸܢ ܢܟܼܝܼܠܘܼܬܼܵܐ ܠܪܸ̈ܥܝܵܢܹܐ
ܠܚܲܕ̄ܟܡܵܐ ܦܲܪ̈ܨܘܼܦܹ̈ܐ
ܕܟܦܝܼܫܹ̈ܐܝ̄ܢܵܐ ܡܢ̄ ܒܵܬ̄ܪ ܓܘܼܕܵܢܹ̈ܐ
ܬܚܘܼܬܼ ܫܟܘܼܪܵܐ ܕܐܵܘܵܢܹ̈ܐ
ܡܐܲܝܟܼ ܓܵܫܘ̇ܫܵܐ ܫܸܠܝܵܐ
ܒܢܝܼܚܘܼܬܼܵܐ ܚܲܕܪܸܢ ܠܡܲܪ̈ܙܵܢܹܐ
ܕܡܲܡܛܸܢ ܐ̄ܪ̈ܵܙܹܐ ܕܒܪܝܼܪܹ̈ܐ ܒܟܸܣܝܘܼܬܼܵܐ
ܠܲܫܡܲܥܬܵܐ ܕܠܵܚܘ̇ܫܹ̈ܐ ܚܲܛܦܵܢܹ̈ܐ
ܒܲܪܩܘܼܠ ܩܸܢܝܵܢܐ ܐ̄ܟܘܼܡܵܐ
ܐܲܓܼܪܵܐ ܕܙܲܒܘܼܢܹ̈ܐ ܡܲܡܛܝܼܵܢܹ̈ܐ،،،
ܓܲܘ ܗܲܡܙܲܡܬܝܼ ܣܲܛܡܸܢ ܠܢܵܫܹ̈ܐ
ܕܡܲܚܙܸܢ ܠܚܸܠܛܹ̈ܐ ܚܲܪܵܫܹ̈ܐ
ܘܥܲܝܢܝܼ ܗܵܘܝܼ ܡܸܠܝܹ̈ܐ ܡܢ̄ ܩܲܪ̈ܝܵܬܼܵܐ
ܕܠܲܝܬܠܗ̄ܘܼܢ ܬܚܘ̇ܡܹ̈ܐ
ܒܝܼ ܚܙܲܝܵܬܼܵܐ ܣܸܡܝܹ̈ܐ ܕܒܝܼܫܹ̈ܐ ،،
ܡܐܲܝܟܼ ܫܲܒܼـܪܵܐ ܙܥܘܼܪܵܐ
ܦܵܣܥܸܢ ܒܐܘܼܪܚܵܐ ܕܒܬܼܘܼܠܵܬܼܵܐ
ܕܦܲܪܫܸܢ ܡܼܢ ܫܘܼܦܪܵܐ ܕܒܢܵܬܼܵܐ
ܘܓܵܐܢܝܼ ܟܹܐ ܚܵܙܸܢܵܗ̇
ܡܐܲܝܟܼ ܫܵܢܘ̇ܓܼܵܐ ܡܲܠܦܵـܢܵܐ
ܠܟܼܠ ܒܲܪܢܵܫܵܐ ܣܢܝܼܩܵܐ ܠܫܵܢܘ̇ܓܼܘܼܬܼܵܐ
ܝܵܗܒܸܢ ܕܲܪܡܵܢܵܐ،،،
ܘܡܲܚܒܸܢ ܚܸܫܟܵܐ ܕܐܘܼܦܩܵܐ ܫܸܠܝܵܐ
ܪܸܚܩܵܐ ܡܢ̄ ܓܲܪܓܲܡܬܵܐ
ܕܦܘܼܡܹ̈ܐ ܘܠܸܫܵܢܹ̈ܐ ܦܲܪ̈ܡܵܢܹܐ
ܘܙܲܩܙܲܩܬܵܐ ܕܣܸܦܘܵܬܼܵܐ ܦܲܬܦܸܬܬܵܢܹ̈ܐ
ܠܹܐ ܒܵܥܸܢ ܩܲܢܝ̈ܐ ܕܫܘܼܒܼܗܵܪ̈ܵܢܹܐ
ܒܟܼܠ ܡܸܫܬܘܼܝܵܬܹ̈ܐ ܠܢܲܦ̮ܫܲܝܗ̈ܝ ܡܲܪ̈ܡܵܢܹܐ
ܓܲܘ ܣܦܲܪ̈ܙܲܒܼܢܹܐ ܘܡܓܲܠܹ̈ܐ ܪܲܫܡܝܼ ܫܘܼܫܲܢܹ̈ܐ
ܘܓܲܘ ܥܒܼܵܕܲܝܗ̈ܝ ܩܵܐ ܫܪܵܪܵܐ ܩܲܛܠܵܢܹ̈ܐ
ܠܹܐ ܩܵܪܸܢ ܦܲܬܘܵܬܹ̈ܐ ܕܣܪ̈ܛܹܐ ܕܘܼܓܠܵܢܹ̈ܐ
ܡܛܠ ܐܝܼܢܵܐ ܣܝܵܡܹ̈ܐ ܬܲܠܚܵܢܹ̈ܐ،،،
ܗܲܝܡܸܢܘܼܢ ܥܲܠܝܼ ܐܵܢܵܐ ܐܝܼܘܸܢ ܚܛܝܼܬܵܐ ܕܙܲܒܼܢܵܐ
ܩܲܪܒܢܸܢ ܡܼܢ ܚܸܫܟܵܐ
ܘܪܲܚܩܸܢ ܡܼܢ ܫܸܡܫܵܐ ܕܨܲܦܪܵܐ
ܝܵܕܥܝܼܬܘܼܢ ܠܡܵܐ،،؟
ܡܛܠ ܗ̄ܘܝܼܵܐ ܝ̄ܘܸܢ ܕܒܼܚܵܐ ܕܥܲܡܵܐ ܫܝܼܕܵܢܵܐ
ܘܪ̈ܘܼܚܵܬܼܵܐ ܕܓܲܘ ܐܲܬܼܪܝܼ ܠܹܐ ܒܵܥܝܼ ܫܪܵܪܵܐ
ܒܕܘܼܓܠܹ̈ܐ ܟܹܐ ܒܵܢܝܼ ܠܕܲܥܬܼܝܼܕܼ ܠܘ̇ܓܢܵܐ
ܓܲܘ ܦܲܬܼܘܵܬܼܵܐ ܒܲܪܣܸܡܝܼ
ܘܓܲܘ ܚܵܨܵܐ ܚܲܪܙܝܼ ܪܘܼܡܚܵܐ ܫܲܕܠܵܢܵܐ
ܡܛܠ ܝܵܬܹ̈ܐ ܕܓܲܘ ܡܕܝܼܢ̄ܬܝܼ
ܕܡܝܼܟܹܐ ܝ̄ܢܵܐ ܒܩܲܒܼܪ̈ܵܘܵܬܼܵܐ
ܘܓܲܘ ܪܹ̈ܫܲܝܗ̈ܝ ܩܒܼܝܼܥܹ̈ܐ ܝ̄ܢܵܐ
ܐܝܼܣܵܪܹ̈ܐ ܚܲܝܠܬܼܵܢܹ̈ܐ ܒܣܲܟܼܠܘܼܬܼܵܐ
ܠܦܘ̇ܬܼ ܐܲܢܹ̈ܐ ܥܸܠܠܵܬܼܵܐ
ܗܘܹܐܠܵܗ̇ ܥܲܣܩܘܼܬܼܝܼ ܗܘܹܐܠܵܗ̇ ܥܸܠܬܼـܝܼ
ܡܛܠ ܒܸܚܵܝܵܐ ܝ̄ܘܸܢ
ܒܐܲܪܥܵܐ ܕܚܛܲܝܵܬܼܵܐ،،،
ܥܲܒܼܕܝܼܫܘ̇ܥ ܣܵܗܕܵܐ ܝܘܼܚܲܢܐ