نسولف بيك ونريدك تمر علناس ...ياتاج العداله ومعدن العفه
نسولف بيك من يلبسنه ثوب الضيج ...ومن تدور بينه المحنه والكلفه
نسولف بيك من نلكَه الامل مذبوح ...ويعالج بروحه ومبتلي بنزفه
نسولف بيك من نشعر فرحنه انباكَ...وصكعتنه المصيبه وكبرت اللهفه
نسولف بيك وبوكت النفاه نتركك وننساك ...ياشمس العداله الابد ماتطفى
ندعي الله بظهورك واحنه مو واعين ...علينه من الذنوب احبال ملتفه
ندعي الله بظهورك مو كَلب ولسان ...لن بكلوبنه المخبوط مايصفى
نتلكاه ونسولف مثل المحبين ....بس نياتنه ياحيف مختلفه
كل واحد يغني علهواء اليهواه ...وعلى راحه مرامه ينقر بدفه
نتباه بمحمد بااللطف والطيب ...وشلنه كشور من لب طيبته وعطفه
نسولف عن علي وزهده وكفاف العيش ...وبوكت الطمع للركبه نتحفه
ونكول الحسن رمز الكرم والجود ...وبعضنه من الخمس مل وسحب جفه
نلطم عالحسين وننكر الف حسين ..بساعات المصالح نكفر بطفه
بصبر زينب نكول ونضرب الامثال ...ماخذنه طبع بس حجي عالشفه
نصلي نصوم ونؤن بصلاه الليل ...مثل ون المحب من ينذبح ولفه
لجن وكت الصبح ننسى الحصل بالليل ...مثل اطرش وماشي بهوسه الزفه
يااعظم طبيب اختاره رب الكون ...وعنده لكل مرض مر علبشر وصفه
نشكيلك امراض العدنه بالاخلاق ....وامراض ابدانه بزرق الابر تشفه
يالغايب الحاضر كلنه نؤمن بيك ...يارمز الاصلاح وشخصك نعرفه
يربان السفينه البحر هاج وماج ...وانت بكل رهواه مسير الدفه
بعض من شيعتك يتمنى تغرك بيك ...كبل ماتوصل علجرف وتكشفه
وبعضهم يدري بشخصك مصدر الاصلاح ...وهو بشخصه فساد الكون ماكفه
وبعضهم كالملاك لسان اله معسول...وبكلبه الف شيطان يتخفى
وبعض من شيعتك محتار بين البين ...لافي لاللشمس ويحير بوصفه
وبعض منهم يريد وياك موته يكون ...عقد نيته بصدق وتوطن لحتفه
هذا البعض جندك ياسليل الذات ...هذا البعض هو الصافي المصفى
هو الصافي المصفى .
تمت ولله الحمد
