تحية الى كل من يدعم
الثورة الشبابية في العراق
حتى ولو بكلمة
بغـداد تـبـقـَه حـره
ميسون نعيم الرومي
-(ايران) سمعي وافهمي – لمـّـي اچوالچ وارحلي
من قال اوبله الحد اليـوم – بيچ (العراق )المبتلي
اخـذي اوياچ الأذنـاب – ذولـَه الولونـَه ولي
خـَربوا وطنه اوهجموا – عمامه اوقاط او(غبي)-
ثار الشعب هـَـبّ اليوم - عن عزمه ما ينثني
شـجعـان كلهم ابـطال – احفاد (الحسين) او(علي)-
كافي بـَعـد گالوا بس – لعـراق حـرّ اوأبي
-(بغداد) لوگالت بغداد – لرْگاب كلهه تنحني
-(البصره) صاحت ياويل – يا دنيه ثوري اوزلزلي
-(ذي قار) ثارت ذي قار – تاريخ عنهه واسألي
اول حضاره بالكون – سومراوجدهه بابلي
كلهه عزم كلهه اصرار – شجعان اهلهه والنبي
-(ديوانيه)(سماوه) و(الكوت) – يا شمس شرقي اونوري
-(النجف)(بابل)(كربله) – شعلة عزم ما تنطفي
-(ديالى)(بعقوبه)او(ميسان) – الكـم تحيـَّه يا هـَـلي
-(غربيه) (موصل) (كركوك) - ننتظر صوتچ تزأري
شـعـب العراق انحييه – يا وطن حـر اوبي
لبيك يا (اعراقي) لبيك – ثار الشعب ما ينثني
كـل الهـَـله بالثـوار– يادنيه ضوّي اونـَـوّري
-(أمريكا) جبتي الأشرار– اخذيهم ابدربچ واثأري
ايران سمعي وافهمي - مالچ مكان ابموطني
صاح الشعب كله اوگال:-
- (ايران بره بره)
-(بـغـداد تـبـقـَه حره)
تـبـقـَه حره
---------------------------------------------------
1 / شباط / 2020
ســـــــــــــــــــتوكهولم
